QIA ELECTIONS - Our homeland, our future, our vote. Remember to cast your ballot. Learn More

ᕿᑭᖅᑕᓃᒃᑯᑦ ᓂᕈᐊᕐᓂᖓ - ᐊᖏᕐᕋᕗᑦ, ᓯᕗᓂᒃᓴᕗᑦ ᐊᒻᒪᓗ ᓂᕈᐊᕐᓂᕗᑦ. ᓂᕈᐊᕆᐊᖅᑐᕐᓂᐊᖅᐳᑎᑦ. ᑐᑭᓯᒃᑲᓐᓂᕆᑦ

QIA Internship-Digital Skills for Inuit Youth

QIA Internship-Digital Skills for Inuit Youth

 In blog-inuk

ᑲᑐᔾᔨᖃᑎᖃᖅᑐᑎᒃ ᐱᙳᐊᖅ ᑲᑐᔾᔨᖃᑎᒌᒃᑯᓐᓂᑦ* ᐊᒻᒪᓗ ᑮᓇᐅᔭᖅᑖᕐᓯᒪᓪᓗᑎᒃ ᑲᓇᑕᐅᑉ ᒐᕙᒪᒃᑯᖏᓐᓂᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓂᒃᑯᑦ) ᐃᓄᓐᓂᑦ ᐃᓅᓱᑦᑐᓂᑦ ᐃᓕᓐᓂᐊᕈᓐᓇᑎᑦᑎᓯᒪᔪᑦ ᖃᕋᓴᐅᔭᓕᕆᓂᕐᒥᒃ ᐃᖅᑲᓇᐃᔭᕐᓯᓐᓈᑦ ᕿᑭᖅᑕᓂᒃᑯᓐᓂᑦ ᐃᓕᒃᑲᓂᕐᓂᐊᕐᖓᑕ ᑲᑐᔾᔨᖃᑎᒌᑦ ᒥᔅᓵᓄᑦ.

ᐱᔾᔪᑎᖃᖅᑐᑎᒃ ᐃᖅᑲᓇᐃᔭᕐᓯᓐᓈᑦ ᐃᓕᓐᓂᐊᕐᓂᖅ ᐃᓄᓐᓂᑦ ᐃᓅᓱᑦᑐᓂᑦ ᕿᑭᖅᑕᓂ ᓄᓇᓕᓐᓂᑦ ᐃᓚᒋᔭᐅᔪᓐᓇᑎᑦᑎᒍᒪᓯᒪᒻᒪᑕ ᐊᑭᓕᕐᓱᖅᑕᐅᓗᑎᒃ ᐃᖅᑲᓇᐃᔭᕐᓯᓐᓈᑦ ᐃᓕᓐᓂᐊᕐᓗᑎᒃ, ᑐᑭᓯᑎᑕᐅᓗᑎᒃ ᓇᓗᓇᐃᖅᑕᐅᓯᒪᔪᓂᑦ ᐃᓄᓐᓄᑦ ᑎᒥᐅᔪᒥᒃ ᐊᒻᒪᓗ ᐃᓕᑦᑎᖁᓪᓗᒋᑦ ᐊᑑᑎᓕᓐᓂᑦ ᖃᕋᓴᐅᔭᓕᕆᓂᕐᒥᒃ ᐊᒻᒪᓗ ᐊᑲᕐᕆᔾᔪᑕᐅᕙᑦᑐᓕᖅᑐᓂᑦ ᐱᓕᕆᔾᔪᑎᓂᑦ ᐃᓚᒋᔭᐅᓗᑎᒃ ᐃᓕᓐᓂᐊᖅᑕᖏᓐᓂᒃ, ᐃᓕᓐᓂᐊᓂᕐᒥᒃ ᑲᑎᒪᓂᒃᑯᑦ ᐊᒻᒪᓗ ᐱᔭᕇᕐᓯᖃᑦᑕᕐᓗᑎᒃ ᑲᒪᒋᔭᔅᓴᖅᑖᕆᓯᒪᔭᖏᓐᓂᒃ. ᐃᖅᑲᓇᐃᔭᕐᓯᓐᓈᑦ ᐃᓕᓐᓂᐊᖅᑐᑦ ᐱᓕᕆᖃᑎᖃᓪᓚᑦᑖᖃᑦᑕᓚᐅᖅᑐᑦ, ᑕᑯᓐᓈᐸᑦᑐᑎᒃ ᓄᓇᓕᓐᓂᑦ ᑐᓴᐅᒪᑎᑦᑎᔨᒥᒃ (ᑐᓴᐅᒪᑎᑦᑎᔨ) ᕿᑭᖅᑕᓂᒃᑯᓐᓂᑦ ᐊᕕᑦᑐᕐᓯᒪᓂᐅᔪᓂᑦ ᐊᓪᓚᕕᓐᓂᑦ ᐊᐅᓚᓂᕆᕙᑦᑕᖏᓐᓂᒃ ᑐᑭᓯᒃᑲᓐᓂᖁᓪᓗᒋᑦ ᐊᒻᒪᓗ ᐃᓕᑦᑐᖁᓪᓗᒋᑦ ᖃᓄᐃᑦᑐᑐᐃᓐᓇᑦᑎᐊᕐᓂᑦ ᕿᑭᖅᑕᓂᒃᑯᓐᓂᑦ ᐱᓕᐊᖑᕙᑦᑐᓂᑦ, ᑐᑭᓯᕙᓪᓕᐊᓯᓐᓈᑦ ᐊᒻᒪᓗ ᐊᔪᕈᓐᓃᐸᓪᓕᐊᓯᓐᓈᑦ ᖃᕋᓴᐅᔭᓕᕆᓂᕐᒥᒃ.

ᐃᓕᓐᓂᐊᖃᑦᑕᓚᐅᖅᑕᖏᑦ ᒪᑯᐊ: ᖃᕋᓴᐅᔭᒃᑯᑦ ᐅᖃᓕᒫᖃᑦᑕᕐᓂᖅ ᐊᒻᒪᓗ ᖃᕋᓴᐅᔭᒃᑯᑦ ᐊᑦᑕᓇᖅᑐᒦᑦᑕᐃᓕᓂᖅ, ᑐᑭᓯᑎᑕᐅᓂᖅ ᖃᕋᓴᐅᔭᒃᑯᑦ ᑎᑎᖅᑭᕆᔾᔪᑕᐅᕙᑦᑐᒥᒃ, ᐅᓂᒃᑳᓕᐅᕈᑕᐅᕙᑦᑐᒥᒃ, ᓈᓴᐅᓯᕆᔾᔪᑎᒥᒃ ᑎᑎᖅᑭᕆᔾᔪᑎᒥᓪᓗ, ᐊᑐᖃᑦᑕᓂᕐᒥᒃ ᒎᒍᓪᒥᒃ ᐊᒻᒪᓗ ᓈᓴᐅᓯᕆᔾᔪᑎᓂᑦ ᐊᑐᖅᑕᐅᕙᑦᑐᓂᑦ, ᑐᑭᓯᑎᑕᐅᓂᖅ ᒎᒍᓪᑯᑦ ᑎᑎᖅᑭᕆᔾᔪᑎᓂᑦ, ᐋᖅᑭᔅᓱᐃᖃᑦᑕᓂᕐᒥᒃ ᐊᑑᑎᖃᕈᓐᓇᑎᐊᖅᑐᓂᑦ ᖃᕋᓴᐅᔭᒃᑯᑦ ᐅᓂᒃᑳᓕᐅᕈᑎᓂᑦ, ᐋᖅᑭᔅᓱᐃᖃᑦᑕᕐᓂᖅ ᐃᓕᓐᓂᐊᑎᑦᑎᔾᔪᑎᓂᑦ ᑕᑯᓐᓇᕋᔅᓴᓂᑦ, ᑐᑭᓯᑎᑕᐅᓂᖅ ᖃᕋᓴᐅᔭᒃᑯᑦ ᓈᓚᖃᑦᑕᕋᔅᓴᓂᑦ, ᑐᑭᓯᑎᑕᐅᓂᖅ ᖃᕋᓴᐅᔭᒃᑯᑦ ᑕᑯᔭᔅᓴᓕᐅᖃᑦᑕᓂᕐᒥᒃ, ᖃᕋᓴᐅᔭᒃᑯᑦ ᐊᔾᔨᙳᐊᓕᕆᖃᑦᑕᓂᕐᒥᒃ ᐊᓯᒃᑲᓐᓂᐊᓗᖏᓐᓂᓪᓗ.

“ᐃᓕᑦᑎᔪᖓ ᐊᒥᓱᐊᓗᓐᓂᑦ ᐱᐅᔫᑎᐊᓗᓐᓂᑦ ᐊᑑᑎᖃᑦᑎᐊᓂᐊᖅᑐᓂᓪᓗ ᐃᖅᑲᓇᐃᔭᕐᓯᓐᓈᑦ ᐃᓕᓐᓂᐊᑎᓪᓗᖓ. ᐱᓕᕆᖃᑎᒋᖃᑦᑕᓚᐅᖅᑕᒃᑲ ᓄᓇᓕᓐᓂᑦ ᑐᓴᐅᒪᑎᑦᑎᔨ, ᕿᑭᖅᑕᓂᒃᑯᓐᓂᑦ ᑐᑭᓕᐅᕆᔩᑦ, ᐱᓕᕆᐊᔅᓴᓕᕆᔩᑦ ᐊᒻᒪᓗ ᐃᖅᑲᓇᐃᔭᖅᑐᓕᕆᔩᑦ ᑕᑯᓪᓗᒋᑦ ᐊᒥᓱᑦ ᐃᖅᑲᓇᐃᔮᖃᕐᐸᑦᑐᑦ ᕿᑭᖅᑕᓂᒃᑯᓐᓂᑦ. ᑖᓐᓇ ᐃᖅᑲᓇᐃᔭᕐᓯᓐᓈᑦ ᐃᓕᓐᓂᐊᕈᑎᒋᓚᐅᖅᑕᕋ ᓇᓗᓇᐃᖅᑕᕋ 10ᒥᒃ 10ᒨᖓᑎᓪᓗᒋᑦ ᐱᐅᓂᕆᔪᓐᓇᖅᑕᖏᑦ” ᐅᖃᖅᑐᖅ ᑕᐃᕕᑎ ᓄᑲᖅᑎᖅ ᐅᐊᑦᓯᑰ, ᐊᐅᓱᐃᑦᑐᕐᒥᐅᑕᖅ, ᐃᓚᒋᔭᐅᓚᐅᕐᖓᑦ ᐃᓕᓐᓂᐊᓂᕐᒥ ᑕᐃᒪᙵᑦ ᐱᒋᐊᔪᒻᒪᑦ ᐊᒃᑑᕝᕙ 2021ᒥ. ᐃᓕᓐᓂᐊᖅᑐᑦ ᐱᔭᕇᕐᕕᔅᓴᓖᑦ ᒫᑦᓯ 31, 2022ᒥ. ᐃᓕᓐᓂᐊᖅᑐᑦ ᑕᕝᕙᓂ ᐅᑯᐊᖑᕗᑦ:

ᑕᐃᕕᑎ ᓄᑲᖅᑎᖅ ᐅᐊᑦᓯᑰ, ᐊᐅᓱᐃᑦᑐᖅ

ᔪᐊᑕᓐ ᒪᒃᒧᓐ, ᐃᖃᓗᐃᑦ
ᑲᐃᑦᓕᓐ ᓇᑦᓯᖅ, ᐃᖃᓗᐃᑦ
ᕗᓃᔅ ᐃᕙᓗ, ᐃᒡᓗᓕᒃ
ᑳᑎ ᐋᐸᒃ, ᓴᓂᕋᔭᒃ
ᓵᑭ ᓄᓇ, ᑭᙵᐃᑦ
ᓴᐸ ᑯᑭ, ᓴᓂᑭᓗᐊᖅ
ᒪᕇᓇ ᓄᕿᙵᖅ, ᕿᑭᖅᑕᕐᔪᐊᖅ
ᑐᕈᐃ ᖃᒪᓂᖅ, ᐃᒃᐱᐊᕐᔪᒃ
Hᐊᐃᓕ ᐃᓱᓪᓗᑕᖅ, ᐸᓐᓂᖅᑑᖅ

*ᐱᙳᐊᖅ ᖃᕋᓴᐅᔭᓕᕆᓂᕐᒥᒃ ᐃᓕᓐᓂᐊᑎᑦᑎᕙᑦᑐᑦ ᐃᓅᓱᑦᑐᓄᑦ ᑐᕌᖓᔪᒥᒃ ᐱᓕᕆᐊᕐᒥᑦ ᑲᑐᔾᔨᖃᑎᖃᖅᑐᑎᒃ ᐊᓪᓚᕝᕕᖓᓐᓂᑦ ᓄᑖᓂᑦ ᐱᓕᕆᔾᔪᓯᕐᓂᑦ, ᖃᐅᔨᓴᖅᑐᓕᕆᓂᕐᒥᒃ ᐊᒻᒪᓗ ᒪᑭᒪᓇᓱᐊᕈᑎᓂᑦ ᐱᕙᓪᓕᐊᔪᓕᕆᓂᕐᒥᒃ ᑲᓇᑕᒥ

Recent Posts

ᑐᑭᓯᒋᐊᕐᕕᐅᑕ

ᑐᑭᓯᒋᐊᕆᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᓐᓄᑦ