ᕿᑭᖅᑕᓃᒃᑯᑦ ᐃᑲᔪᐃᓐᓇᖅᑐᑦ ᐃᓕᓐᓂᐊᖅᑎᓂᒃ ᓯᕗᓂᒃᓴᕆᔭᖏᓐᓂᒃ ᓯᕗᒧᐊᖅᑎᑦᑎᓂᕐᒥᒃ ᐃᓕᓐᓂᐊᕐᓂᒃᑯᑦ.

ᐱᖓᓲᔪᖅᑑᔪᑦ ᐃᓕᓐᓂᐊᖅᑏᑦ ᓄᓇᕗᒥ ᐃᓚᒋᔭᐅᕗᑦ 12−ᓄᑦ ᐱᓇᓱᐊᖁᓯᓄᑦ ᓴᓇᔪᓕᕆᔨᐅᒋᐅᖅᓴᓂᕐᒥᒃ ᐃᖃᓗᓐᓂ ᓄᓇᕗᑦ ᓯᓚᑦᑐᖅᓴᕐᕕᖓᓂ.

ᑖᓐᓇ ᐃᓕᓐᓂᐊᕐᓂᖅ ᐃᓚᒋᔭᐅᔪᖅ ᕿᑭᖅᑕᓃᒃᑯᑦ  ᕿᑭᖅᑕᓃᒃᑯᑦ ᑲᑐᔾᔨᒍᑎᒋᔭᖓᓂᒃ ᐃᓕᓐᓂᐊᖅᑎᑦᑎᓂᕐᒥᒃ ᐱᓕᒻᒪᒃᓴᐃᓂᕐᒥᓪᓗ , ᐊᒻᒪᓗ ᕿᑭᖅᑕᓂ ᐃᓄᖕᓂᑦ ᐱᕕᖃᖅᑎᑦᑎᔪᑦ ᓴᓇᔪᓕᕆᓂᕐᒥᒃ ᐃᖅᑲᓇᐃᔮᖃᕈᓐᓇᓛᖁᓪᓗᒋᑦ.

ᕿᑭᖅᑕᓃᒃᑯᑦ ᓴᓇᔪᓕᕆᔨᐅᒋᐅᖅᓴᓂᕐᒥᒃ ᐃᓕᓐᓂᐊᕐᓂᖓ ᐃᓕᓐᓂᐊᖅᑎᑕᐅᖕᒥᔪᖅ ᒥᑦᑎᒪᑕᓕᖕᒥ ᐃᒃᐱᐊᕐᔪᖕᒥᓗ.  ᒫᓐᓇ 18ᖑᔪᑦ ᐃᓕᓐᓂᐊᖅᑐᑦ ᓴᓇᔪᓕᕆᔨᐅᒋᐅᖅᓴᓂᕐᒥᒃ.

ᐃᓕᓐᓂᐊᖅᑐᑦ ᐃᓕᓐᓂᐊᕐᓂᐊᖅᑐᑦ ᖃᓪᓗᓈᑎᑐᑦ ᐃᓕᓐᓂᐊᕐᓂᖅ, ᐅᖃᓕᒫᕐᓂᖅ, ᐊᒻᒪ ᓈᓴᐅᓯᕆᓂᕐᒥᒃ, ᐊᒻᒪᓗ ᐊᐅᓚᐅᑎᓕᕆᓂᕐᒥᒃ ᐊᒻᒪᓗ ᖃᐅᔨᓴᕈᑎᓂᒃ ᖃᐅᔨᓴᖅᑕᐅᑎᑦᑎᕙᒡᓗᑎᒃ ᓴᓇᔪᓕᕆᔨᐅᓂᕐᒧᑦ ᖃᐅᔨᓴᐅᑎᖓᓂᒃ ᑕᑕᑎᖅᓯᐊᓂᑦᑎᐊᕈᓐᓇᖁᓪᓗᒋᑦ ᐃᓕᓐᓂᐊᕆᐊᒃᑲᓐᓂᕈᓐᓇᕐᓂᕐᒧᑦ.

ᐅᑯᐊ ᓯᑕᒪᐅᔪᑦ ᐃᓕᓐᓂᐊᖃᑕᐅᔪᑦ ᓴᓇᔪᓕᕆᔨᐅᒋᐅᖅᓴᓂᕐᒥᒃ.

ᒪᐃᔭ ᓇᑐᒃ 19ᓂ ᐊᕐᕌᒍᓕᒃ ᓴᓂᕋᔭᖕᒥᑦ.  ᑖᓐᓇ ᐃᓕᓐᓂᐊᕐᓂᖅ ᐃᑲᔪᕐᓂᐊᖅᑐᖅ ᐅᐊᔭᓕᕆᔨᐅᒋᐅᖅᓴᓂᕐᒥᒃ.

ᓄᓇᓕᖕᒥᓄᑦ ᐅᑎᕈᒪᓛᖅᑐᑦ ᐃᓕᓐᓂᐊᕌᓂᒃᐸᑦ ᐃᖅᑲᓇᐃᔭᕐᓗᓂ ᐊᒻᒪᓗ ᓂᕆᐅᒋᔭᖃᖅᖢᓂ ᖃᓄᐃᓕᐅᕐᓂᖓ ᑲᔪᖏᖅᓴᐃᓂᐊᖅᐳᖅ ᐊᓯᖏᓐᓂᒃ ᓴᓇᔪᓕᕆᔨᐅᒋᐅᖅᓴᕈᒪᔪᓄᑦ.

“ᐊᖑᑎᓄᑐᐃᓐᓇᖅ ᑐᕌᖓᙱᑦᑐᖅ,” ᐅᖃᖅᑐᖅ.

ᐱᔫᒥᓵᕈᑎᒥᒃ ᓴᖅᑭᑦᑐᖃᓚᐅᕐᒪᑦ ᕙᐃᔅᕗᒃᖓᒍᑦ.  ᓇᑐᒃ ᑕᑯᓪᓗᓂᐅᒃ, ᐃᓱᒪᓪᓗᓂ ᐃᖅᑲᓇᐃᔮᒃᓴᐅᑦᑎᐊᕆᒍᒪᓇᕆᓪᓗᓂᐅᒃ ᐱᓇᓱᖃᑕᐅᓚᐅᖅᑐᖅ.

ᐊᔪᕐᓇᕋᓗᐊᖅᑎᓪᓗᒍ ᓯᕗᓪᓕᖅᐹᑦᑎᐊᒃᑯᑦ ᐃᓄᑑᔭᕆᐅᕐᓂᖓᓂᒃ, ᓇᑐᒃ ᐃᓕᓐᓂᐊᖅᑕᒥᓂᒃ ᖁᕕᐊᒋᔭᖃᖅᑐᖅ.

ᕚᓕ ᐊᕐᓇᒃᑲᖅ 27ᓂ ᐊᕐᕌᒍᓕᒃ ᑲᖏᖅᑐᒑᐱᖕᒥᑦ.  ᓴᓇᔪᓕᕆᔨᐅᒋᐅᖅᓴᓂᕐᒥᒃ ᐃᓕᓐᓂᐊᖃᑕᐅᔪᖅ ᑐᕌᒐᖃᖅᖢᓂ ᕿᔪᓕᕆᔨᐅᒍᒪᓛᕐᓗᓂ.

“ᐊᕐᕌᓂ ᓯᕐᓗᐊᓕᐅᓚᐅᖅᑐᖓ ᐃᓪᓗᒃᑲ ᐃᑲᔪᖅᑎᒋᓪᓗᒋᑦ ᐊᒻᒪᓗ ᑕᐃᔅᓱᒪᓂ ᐆᑦᑐᕋᑦᑎᐊᕈᓐᓇᓚᐅᙱᑦᑐᖓ,” ᐊᕐᓇᒃᑲᖅ ᐅᖃᖅᑐᖅ. “ᑖᓐᓇ ᐱᔾᔪᑎᒋᓪᓗᒍ ᑲᔪᖏᓕᓚᐅᖅᐳᖓ.”

ᐊᕐᓇᒃᑲᖅ ᓂᕆᐅᒋᔭᖃᖅᑐᖅ ᐃᓕᓐᓂᐊᕌᓂᒃᑯᓂ ᕿᔪᓕᕆᔨᐅᓂᕐᒥᒃ ᐃᓱᒪᔪᖅ ᐃᒡᓗᓕᐅᕈᒪᓪᓗᓂᐅᒃ ᐊᐃᑉᐸᓂ ᑲᖏᖅᑐᒑᐱᖕᒥ.

ᓱᓕ ᓇᓗᔪᖅ ᓇᓂ ᐃᖅᑲᓇᐃᔭᕈᒪᓂᐊᕐᒪᖔᑦ ᕿᔪᓕᕆᔨᐅᓕᖅᐸᑦ, ᑭᓯᐊᓂ ᓄᓇᕗᒥ ᐃᒡᓗᓕᕆᔨᕐᔪᐊᒃᑯᓐᓂ ᐃᓱᒪᒐᓗᐊᖅᑐᖅ ᐃᖅᑲᓇᐃᔭᕈᒪᓪᓗᓂ.

ᔪᕋᐃᔭ ᐊᓕᔭᖅ 20ᓂ ᐊᕐᕌᒍᓕᒃ ᑲᖏᖅᖠᓂᕐᒥᑦ ᐃᖃᓗᖕᒥᐅᑕᐅᓕᖅᖢᓂ 7ᕙᐅᔪᓂᒃ ᐊᕐᕌᒎᓕᖅᑐᓄᑦ. ᐸᕐᓇᒃᓯᒪᔪᖅ ᐱᔭᕇᕈᓂᐅᒃ ᐃᓕᓐᓂᐊᕐᓂᖓ ᐊᑖᑕᒋᓚᐅᖅᑕᖓᑕ ᐃᖅᑲᓇᐃᔮᕆᓚᐅᖅᑕᖓᓂᒃ ᐊᑐᕈᒪᔪᖅ ᐅᐊᔭᓕᕆᔨᐅᓂᕐᒥᒃ.

ᓵᓕ ᐸᓂᒃᐸᒃ 22ᓂ ᐊᕐᕌᒍᓕᒃ ᐸᖕᓂᖅᑑᕐᒥᐅᑦᓴᔭᐅᓪᓗᓂ ᐃᖃᓗᖕᒥᐅᑕᓕᖅᑐᖅ.  ᓴᓇᔪᓕᕆᔨᐅᒋᐅᖅᓴᓂᕐᒥᒃ ᐃᓕᓐᓂᐊᖃᑕᐅᔪᖅ ᐊᒻᒪᓗ ᑐᕌᒐᖃᖅᖢᓂ ᓂᐱᑎᕆᔨᐅᒍᒪᓛᖅᑐᖅ ᐃᓕᓐᓂᐊᕌᓂᒃᑯᓂ.

ᓂᐱᑎᕆᓂᕐᒥᒃ ᐃᓕᓐᓂᐊᖅᓯᒪᔪᖅ ᐳᖅᑐᓂᖅᓴᒥᒃ ᐃᓕᓐᓂᐊᕐᕕᖕᒥ ᐊᒻᒪᓗ ᓴᓇᓚᐅᖅᖢᓂ ᓯᒡᒐᓖᕕᓂᕐᓄᑦ ᐊᑦᑕᐅᑎᒥᒃ, ᐃᓯᖅᑎᕆᔾᔪᑎᒥᒃ ᐊᒻᒪᓗ ᐊᓯᖏᓐᓂᒃ ᒥᑭᔪᓂᒃ ᐱᖁᑎᓂᒃ.  ᐸᓂᒃᐸᒃ ᓇᖕᒥᓂᖅᑖᕈᒪᓛᖅᑐᖅ ᓂᐱᑎᕆᔨᐅᓗᓂ ᐃᖃᓗᓐᓂ.

ᑖᓐᓇ ᐃᓕᓐᓂᐊᕐᓂᖅ ᑮᓇᐅᔭᖃᖅᑎᑕᐅᓯᒪᔪᖅ ᐃᓚᖓᒍᑦ ᒐᕙᒪᑐᖃᒃᑯᑦ ᐃᓕᓐᓂᐊᖅᑎᑦᑎᓂᕐᒧᑦ ᑮᓇᐅᔭᖃᖅᑎᑦᑎᔨᐅᔪᓂᑦ ᐊᒻᒪᓗ ᑲᑭᕙᒃ ᑲᑐᔾᔨᖃᑎᒌᓂᑦ.