ᑐᓴᒐᒃᓴᑦ: ᕿᑭᖅᑕᓂᒃᑯᑦ ᓇᓪᓕᒍᓱᑉᐳᑦ ᐃᓅᔪᓐᓃᑎᓪᓗᒍ ᐃᒡᓗᓕᖕᒥᐅᑕᖅ ᑲᑎᒪᔨᑦᑎᓐᓂ ᑲᑎᒪᔨᐅᖃᑕᐅᔪᖅ, ᔮᓂ ᒪᓚᐃᔭ ᑯᑉᓗ

ᑐᓴᒐᒃᓴᑦ: ᕿᑭᖅᑕᓂᒃᑯᑦ ᓇᓪᓕᒍᓱᑉᐳᑦ ᐃᓅᔪᓐᓃᑎᓪᓗᒍ ᐃᒡᓗᓕᖕᒥᐅᑕᖅ ᑲᑎᒪᔨᑦᑎᓐᓂ ᑲᑎᒪᔨᐅᖃᑕᐅᔪᖅ, ᔮᓂ ᒪᓚᐃᔭ ᑯᑉᓗ

 In media-releases-inuk

ᐃᖃᓗᐃᑦ, ᓄᓇᕗᑦ − ᒪᐃ 4, 2020 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓂᒃᑯᑦ) ᕿᔅᓵᑉᐳᑦ ᓇᓗᓇᐃᕐᓯᔭᕆᐊᔅᓴᖅ ᐃᓅᔪᓐᓃᕐᓂᖓᓂᒃ ᐃᒡᓗᓕᖕᒥᐅᑕᖅ ᑲᑎᒪᔨᑦᑎᓐᓂ ᑲᑎᒪᔨᐅᖃᑕᖅ, ᔮᓂ ᒪᓚᐃᔭ ᑯᑉᓗ. ᕿᑭᖅᑕᓂᒃᑯᑦ ᓇᓪᓕᒍᓱᑉᐳᑦ ᐃᓚᖏᓐᓂᒃ, ᐱᖃᑎᖏᓐᓂᒃ ᓄᓇᖅᑲᑎᖏᓐᓂᓪᓗ.

“ᔮᓂ ᒪᓚᐃᔭ ᑯᑉᓗ ᑐᙵᓇᓚᐅᕐᖓᑦ, ᒥᑭᓪᓕᑎᕐᓯᒪᕙᑦᑐᓂᓗ ᐃᑉᐱᒋᔭᐅᑦᑎᐊᖅᑐᓂᓗ ᓄᓇᖓᓐᓂ ᓯᕗᓕᖅᑎᐅᓚᐅᖅᑐᓂ,” ᐅᖃᖅᑐᖅ ᕿᑭᖅᑕᓂᒃᑯᑦ ᐊᖓᔪᖅᑳᖓᑦ, ᐸᐅᓗᓯ ᐊᕿᐊᕈᖅ, “ᐃᑉᐱᒍᓱᓪᓚᕆᖃᑦᑕᓚᐅᕐᖓᑦ ᐃᓕᖅᑯᓯᑦᑎᓐᓂᒃ ᐊᒻᒪᓗ ᐊᔅᓱᕈᖅᑐᓂ ᐃᖅᑲᓇᐃᔭᖃᑦᑕᓚᐅᕐᖓᑦ ᑎᑎᕋᖅᑕᐅᓯᒪᖁᓪᓗᒋᑦ ᓴᖅᑭᔮᖏᓐᓇᖁᓪᓗᒋᓪᓗ ᖃᐅᔨᒪᓂᖏᑦ ᐃᓄᐃᑦ ᐃᓄᑐᖃᐃᑦ. ᑭᖑᓂᖃᓈᖅᑕᐅᓪᓚᕆᓐᓂᐊᖅᑐᖅ.”

ᔮᓂ ᒪᓚᐃᔭ ᑯᑉᓗ ᐃᓅᓚᐅᕐᓯᒪᔪᖅ ᓄᓇᓯᐊᕐᒥ, ᖃᓂᒋᔭᖓᓂ ᒥᑦᑎᒪᑕᓕᐅᑉ ᐱᕈᕐᓴᓪᓗᓂᓗ ᐃᒡᓗᓕᖕᒥ. ᑐᖏᓕᐊᓂ ᓂᕈᐊᖅᑕᐅᓯᒪᓪᓗᓂ ᕿᑭᖅᑕᓂᒃᑯᓐᓄᑦ ᓄᓇᓕᓐᓂᑦ ᑲᑎᒪᔨᐅᓚᐅᖅᑐᖅ ᐃᒡᓗᓕᖕᒥᐅᓂᑦ. ᓯᕗᓪᓕᕐᐹᒥ ᓂᕈᐊᖅᑕᐅᓚᐅᕐᓯᒪᔪᖅ 2014ᖑᑎᓪᓗᒍ. ᑲᑎᒪᔨᓂᑦ ᑲᑎᒪᔨᐅᖃᑕᐅᓂᖓᓂ, ᐃᓚᒋᔭᐅᓚᐅᖅᑐᖅ ᕿᑭᖅᑕᓂᒃᑯᑦ ᑮᓇᐅᔭᓕᕆᓂᕐᒧᑦ ᑲᑎᒪᔨᕋᓛᖏᓐᓄᑦ. ᑯᑉᓗ ᒐᕙᒪᒃᑯᓐᓄᑦ ᑐᓴᐅᒪᑎᑦᑎᔨᐅᓚᐅᕐᓯᒪᒻᒥᔪᖅ ᓄᓇᕗᑦ ᒐᕙᒪᒃᑯᖏᓐᓂ.

ᑯᑉᓗ ᖁᕕᐊᒋᔭᖃᓗᐊᙳᐊᖃᑦᑕᓚᐅᖅᑐᖅ ᑲᒪᒋᕙᑦᑕᖏᓐᓂ ᑎᑎᕋᖃᑦᑕᓂᕐᒥᒃ ᐃᓄᑐᖃᐃᑦ ᖃᐅᔨᒪᔭᖏᓐᓂᒃ, ᑎᑎᕋᖅᑕᐅᓯᒪᔪᑦ ᒫᓐᓇ ᐃᑲᔫᑎᖃᕐᓗᑎᒃ ᐱᓇᓱᐊᕈᑎᐅᓕᖅᑐᑦ ᐱᖅᑯᓯᓕᕆᕕᒻᒥ ᐃᓕᓴᕕᒻᒥ ᑲᖏᖅᑐᒑᐱᒻᒥ.

ᔮᓂ ᒪᓚᐃᔭ ᑯᑉᓗ ᕿᒪᑦᑕᖏᑦ ᓄᓕᐊᖓ, ᕗᕌᓂᑲ ᐊᕿᐊᕈᖅ ᑯᑉᓗ, ᑎᓴᒪᐅᔪᖅᑐᑦ ᕿᑐᕐᖓᖏᑦ ᐊᒻᒪᓗ ᐃᕐᖑᑕᒐᓴᖏᑦ.

 

ᑐᑭᓯᒋᐊᒃᑲᓐᓂᕈᒪᒍᔅᓯ, ᑐᑭᓯᒋᐊᕐᕕᐅᖃᑦᑕᕐᓕ:

ᓰᒪ ᓴHᐊ ᔨᐅᕋHᐃ

ᑐᑭᒧᐊᒃᑎᑦᑎᔨ ᑐᓴᐅᒪᖃᑦᑕᐅᑎᓂᕐᒧᑦ

szerehi@qia.ca

867.975.8413

1.800.667.2742

 

Recommended Posts

ᑐᑭᓯᒋᐊᕐᕕᐅᑕ

ᑐᑭᓯᒋᐊᕆᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᓐᓄᑦ