ᐃᖃᓗᐃᑦ, ᓄᓇᕗᑦ − ᒫᑦᓯ 6, 2018 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ (ᕿᑭᖅᑕᓂ) ᐱᓕᕆᖃᑎᖃᖅᑐᑎᒃ ᐹᕕᓐᓛᓐ ᓴᕕᒃᓴᓂᒃ ᐅᔭᕋᓐᓂᐊᕕᖕᒥᒃ (ᐹᕕᓐᓛᓐ) ᓴᖅᑮᓚᐅᖅᑐᑦ ᕿᑭᖅᑕᓂ ᐊᔪᕈᓐᓃᕐᓴᐅᑎᒃᓴᓂᒃ ᐃᓕᓐᓂᐊᑎᑦᓯᓂᕐᒥᓪᓗ ᐃᖅᑲᓇᐃᔮᑎᒍᑦ ᑲᑐᔾᔨᖃᑎᒌᑦᑐᑎᒃ (Q-STEP) ᐃᓕᓐᓂᐊᕈᑎᒃᓴᒥᒃ ᓅᕙᐃᒻᕙ 2017−ᒥ. ᐃᓚᖓ ᐃᓕᓐᓂᐊᖅᑕᐅᔪᑦ, ᕿᑭᖅᑕᓂᒃᑯᑦ, ᐱᓇᓱᐊᖃᑎᖃᖅᑐᑎᒃ ᐹᕕᓐᓛᑯᓐᓂᒃ ᖁᕕᐊᓱᑦᑐᑦ ᑐᓴᖅᑎᑦᓯᒋᐊᒃᓴᖅ 14 ᐃᓄᐃᑦ Q-STEP-ᑯᑦ ᐃᓕᓐᓂᐊᓚᐅᖅᑐᑦ ᐃᖅᑲᓇᐃᔭᖃᑕᐅᓕᕐᒪᑕ ᐹᕕᓐᓛᑯᓐᓂ ᐃᓕᓐᓂᐊᖃᑕᐅᓚᐅᖅᑐᓂᒃ ᓄᑖᒥ ᓴᓇᔨᐅᓂᕐᒥᒃ ᐃᓕᓐᓂᐊᖅᑐᓂᒃ.

ᓇᒥᑐᐃᓐᓈᖅᑐᑦ ᑲᒻᐸᓂ ᐊᐅᓚᑕᖏᓐᓂᒃ ᐱᓕᕆᒡᕕᖕᓂᒃ, ᓴᓇᔨᐅᒋᐅᕐᓴᖅᑐᑦ ᐃᑲᔪᖅᑏᑦ ᑎᒍᓯᓂᐊᖅᑐᑦ ᐊᑑᑎᓕᖕᓂᒃ ᐱᖕᒪᕆᐅᔪᒥᒃ ᑲᒪᒋᓪᓚᑖᕐᓗᒍ ᐆᑦᑐᕋᕐᓂᕐᒥᒍᑦ ᐃᖅᑲᓇᐃᔭᖅᑎᓂᒃ ᐃᔾᔪᐊᕐᓯᖃᑦᑕᕐᓗᑎᒃ ᐊᔪᕈᓐᓃᕐᓯᒪᔪᓂᒃ ᐱᓕᕆᔨᓂᒃ ᐊᒻᒪᓗ ᐃᓕᒃᑲᓂᕐᓗᑎᒃ ᐱᓕᕆᐊᖑᖃᑦᑕᓲᓂᒃ ᐅᔭᕋᓐᓂᐊᕐᕖᑦ ᐊᐅᓚᓂᖏᓐᓂ.

“ᑖᒃᑯᐊ ᐃᓄᐃᑦ ᓴᓇᔨᐅᒋᐅᕐᓴᕐᓗᑎᒃ ᐃᑲᔪᖅᑎᐅᓂᐊᖅᑐᑦ ᐃᑲᔫᑎᓕᖕᒥᒃ ᑎᒍᓯᕙᓪᓕᐊᒍᓐᓇᓂᐊᖅᑐᑦ ᐃᓕᓐᓂᐊᕐᓗᑎᒃ ᐃᖅᑲᓇᐃᔭᕐᕕᓚᑦᑖᒥ,” ᐅᖃᖅᑐᖅ ᕿᑭᖅᑕᓂᒃᑯᑦ ᐊᖓᔪᖅᑳᖓ ᐲᔭᐃ ᐊᕿᐊᕈᖅ, “ᑖᓐᓇ ᐱᒋᐊᖅᑎᑕᐅᓯᒪᓂᖓ ᐱᖕᒪᕆᐅᓂᐊᖅᑐᖅ ᐊᓪᓗᕆᐊᕈᑕᐅᓗᓂ ᑐᕌᖓᔪᒧᑦ ᓇᓗᓇᐃᕈᑕᐅᓗᓂ ᐊᒥᓲᓂᕐᓴᐅᓕᕐᓂᖏᓐᓂᒃ ᐃᓄᐃᑦ ᐃᖅᑲᓇᐃᔭᖅᑐᑦ ᐅᔭᕋᓐᓂᐊᕕᖕᒥ ᓄᓇᑦᑎᓐᓂ.”

ᓴᓇᔨᐅᒋᐅᕐᓴᖅᑐᓄᑦ ᐃᑲᔪᖅᑎᓄᑦ ᐱᓕᕆᐊᒃᓴᖅ ᓯᕗᓪᓕᕐᐹᖅ ᐊᓪᓗᕆᐊᕈᑎ ᓴᓇᔨᐅᓂᕐᒥᒃ ᓇᓗᓇᐃᒃᑯᖅᑖᓂᕐᒧᑦ ᐃᓕᓐᓂᐊᕐᓯᒪᓗᓂ, ᑖᓐᓇ ᐹᕕᓐᓚᓐ ᑲᔪᓯᑎᑕᖓ ᓯᕗᓪᓕᐹᑦᓯᐊᒥ ᖃᖓᓕᒫᖅ ᐊᑐᓚᐅᕐᓯᒪᓐᖏᑕᖓ.

“ᑖᓐᓇ ᓄᑖᖅ ᓴᓇᔨᐅᒋᐅᕐᓴᓂᕐᒧᑦ ᐃᓕᓐᓂᐊᕐᓂᖅ ᐃᓚᒋᔭᐅᔪᖅ ᐱᓇᓱᐊᒐᑦᓴᓪᓗᐊᑕᖏᓐᓄᑦ ᐹᕕᓐᓛᒃᑯᑦ ᓴᖅᑮᓂᖅ ᐱᓇᓱᐊᖃᑎᖃᖅᑐᓂ ᐃᓕᓐᓂᐊᑎᑦᓯᓂᕐᒥᒃ ᐊᒻᒪᓗ ᐃᖅᑲᓇᐃᔮᒃᓴᖃᖅᑎᑦᓯᓂᕐᒥᒃ ᓄᓇᖃᖅᑐᓂᒃ ᕿᑭᖅᑕᓂ ᓄᓇᓕᖏᓐᓂ,” ᐅᖃᓚᐅᖅᑐᖅ ᕗᕋᐃᔭᓐ ᐱᐊᓂ, ᐊᖓᔪᖅᑳᖅ ᐊᐅᓚᑦᓯᔨᒻᒪᕆᐅᓪᓗᓂᓗ ᐹᕕᓐᓛᑯᓐᓂ.

ᑖᓐᓇ ᓄᑖᖅ ᐃᓕᓐᓂᐊᕐᓂᖅ ᐃᓄᖕᓄᑦ ᐹᕕᓐᓛᓐᒥ ᐃᖅᑲᓇᐃᔭᖅᑎᕈᕈᑕᐅᔪᓐᓇᖅᑐᖅ ᐱᐊᓂᒃᐸᓪᓕᐊᓯᓐᓈᕐᓗᓂ ᐃᓕᓐᓂᐊᕐᓯᒪᔭᕆᐊᓕᖕᓂᒃ ᐱᓕᕆᐊᖃᕐᓯᒪᒋᐊᖃᕐᓂᓂᓪᓗ ᓇᓗᓇᐃᒃᑯᑕᖅᑖᕈᑎᒃᓴᒥᒃ ᐊᔪᕈᓐᓃᕐᓯᒪᓂᕐᒧᑦ ᓴᓇᓂᕐᒥᒃ.

“ᒪᒃᑯᑦᑐᑦ ᓄᓇᖃᖅᑳᕐᓯᒪᔪᑦ ᐱᕈᕐᐸᓪᓕᐊᓂᖏᑦ ᓱᑲᓐᓂᕐᐸᐅᒻᒪᑕ ᑲᓇᑕ ᐃᓄᖏᓐᓂ, ᐊᒻᒪᓗ ᐅᕙᑦᑎᓐᓄᓕᒫᖅ ᐃᑲᔫᑎᓕᒃ ᐊᔪᕈᓐᓃᕐᓯᒪᒍᑎᒃᓴᖏᓐᓄᑦ ᐱᓕᖕᒪᓴᕐᓯᒪᓗᑎᓪᓗ ᐃᖅᑲᓇᐃᔮᒃᓴᑦᓯᐊᕙᖕᓂᒃ ᓇᑉᕚᕈᓐᓇᖁᓪᓗᒋᑦ. ᐅᕐᕈᑎᓪᓗᒋᑦ ᐊᐳᖅᑕᕐᕕᐅᕙᑦᑐᑦ ᐃᖅᑲᓇᐃᔮᒃᓴᓄᑦ ᐃᑲᔫᑎᓂᐊᖅᑐᖅ ᐱᕈᕐᐸᓪᓕᐊᓂᖓᓂᒃ ᒪᑭᒪᔾᔪᑎᑦᑎᓐᓄᑦ ᐊᖅᑯᑎᖃᕐᓗᑎᒃ ᑕᒪᐃᓐᓄᑦ ᐱᓪᓚᑖᖅᑐᒥᒃ ᐊᔾᔨᒌᑎᑦᓯᓂᕐᒧᓪᓗ ᑲᔪᓯᐊᑦᓯᐊᕈᑎᒃᓴᖏᓐᓂᒃ,” ᐅᖃᓚᐅᖅᑐᖅ ᐊᖓᔪᖅᑳᖅ ᐹᑎ ᕼᐊᔾᑐ, ᒥᓂᔅᑕ ᐃᖅᑲᓇᐃᔭᖅᑐᓕᕆᓂᕐᒧᑦ, ᐃᖅᑲᓇᐃᔭᕐᕖᑦ ᐱᕙᓪᓕᐊᑎᑕᐅᓂᖏᓐᓄᑦ ᐃᖅᑲᓇᐃᔮᓄᓪᓗ.

ᑕᖅᑭᐅᓂᐊᖅᑐᓂ ᐊᕐᕕᓂᓕᓐᓂ, ᓴᓇᔨᐅᒋᐅᕐᓴᔪᑦ ᐃᑲᔪᖅᑏᑦ ᐃᖅᑲᓇᐃᔭᖅᑎᓂᒃ ᐃᔾᔪᐊᕐᓯᖃᑦᑕᕈᒫᕐᓂᐊᖅᑐᑦ ᐹᕕᓐᓛᓐ ᕿᔪᓕᕆᔨᖏᓐᓂᒃ, ᐅᐊᔭᓕᕆᔨᓂᒃ, ᓱᓪᓗᓕᓕᕆᔨᓂᒃ, ᐊᐅᖅᑭᑦᓯᔨᓂᒃ, ᐊᓯᖏᓐᓂᓪᓗ, ᓴᓇᔨᐅᒋᐅᕐᓴᕐᕕᒋᔭᒥᓂᒃ ᐃᓕᓐᓂᐊᕐᓗᑎᒃ. ᑲᔪᓯᑦᓯᐊᖅᑐᑦ ᐱᐊᓂᒡᓗᑎᒃ ᑕᖅᑭᓂᒃ ᐊᕐᕕᓂᓕᓐᓂᒃ ᐃᓱᓕᑉᕕᒃᓴᓕᖕᒥᒃ, ᐱᓇᓱᐊᒐᖅᑖᕋᓱᐊᖅᑐᑦ ᑎᑎᕋᕐᓯᒪᓂᐊᖅᑐᑦ ᓴᓇᔨᐅᒋᐅᕐᓴᕐᕕᒋᔭᒥᓄᑦ ᐃᓯᕈᑎᒥᒃ ᖃᐅᔨᕈᑎᕐᔪᐊᓂᒃ. ᑲᔪᓯᑦᓯᐊᖅᑐᑦ ᐊᑎᖃᖃᑕᐅᕕᒋᔭᒥᓂ ᓴᓇᔨᐅᒋᐅᕐᓴᕐᕕᒋᔭᒥᒍᑦ ᐃᓕᓐᓂᐊᖅᑕᒥᓂᒃ ᐃᖅᑲᓇᐃᔭᖅᑎᒻᒪᕆᕈᕐᓂᐊᖅᑐᑦ ᖃᐅᑕᒪᖅᑕᖅᑎᐅᓗᑎᒃ, ᐱᓯᒪᐃᓐᓇᕐᓗᑎᒃ ᓴᓇᔨᐅᓕᕐᓗᑎᒃ ᓇᓗᓇᐃᒃᑯᑕᖃᕐᓗᑎᒃ ᐹᕕᓐᓛᓐᒥ.

ᑖᓐᓇ ᐃᓕᓐᓂᐊᕈᑕᐅᔪᖅ ᐃᓚᒋᔭᐅᔪᖅ ᐱᓇᓱᐊᒐᑦᓴᓕᐊᖑᓯᒪᔪᓂ ᓴᖅᑭᖅᑕᐅᓯᒪᔪᑦ Q-STEP−ᑯᑎᒍᑦ ᐃᑲᔪᖅᑕᐅᔪᖅ ᑲᑭᕙᒃᑯᓐᓂᒃ. ᐃᖅᑲᓇᐃᔭᖅᑎᓴᕐᓯᐅᒃᑲᓐᓂᕈᑎᖏᑦ Q-STEP−ᑯᓐᓂ ᐃᓕᓐᓂᐊᕈᑕᐅᔪᓂᒃ ᑲᒪᖃᑕᐅᔪᒫᕐᓂᐊᖅᑐᑦ ᑐᑦᑕᕐᕕᒃ, ᐃᓄᓐᓂᒃ ᐃᖅᑲᓇᐃᔭᖅᑎᑦᓴᓂᒃ ᓄᐊᑦᓯᕕᒃ.

ᑐᑭᓯᒋᐊᒃᑲᓐᓂᕈᒪᒍᕕᑦ ᖃᓄᖅ ᐱᓇᓱᐊᕈᓐᓇᕐᒪᖔᕐᐱᑦ ᑐᑦᑕᕕᖕᒧᑦ, ᖃᐅᔨᒋᐊᕐᕕᒃᓴᑦ ᕿᑭᖅᑕᓂᒃᑯᑦ ᐅᕘᓇ Tuttarvik@QIA.CA

ᕿᑭᖅᑕᓂ ᐊᔪᕈᓐᓂᕐᓴᐅᑎᓕᕆᔩᑦ ᐃᓕᓐᓂᐊᑎᑦᓯᒍᑎᓂᓪᓗ ᐃᖅᑲᓇᐃᔮᓄᑦ ᐱᓇᓱᐊᖃᑎᒌᑦᑐᓄᑦ (Q-STEP) ᑮᓇᐅᔭᓕᑕᐅᓯᒪᔪᑦ ᐃᓚᖓᓂᒃ ᑲᓇᑕ ᒐᕙᒪᒃᑯᖏᓐᓂ ᐊᔪᕈᓐᓃᕐᓴᐅᑎᓕᕆᔨᒃᑯᓐᓂᒃ ᐱᓇᓱᐊᖃᑎᒌᓐᓂᒥᓪᓗ ᑮᓇᐅᔭᓕᑕᐅᕕᖓᓂᒃ.

 

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᒥᑦᓵᓄᑦ

 

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ (ᕿᑭᖅᑕᓂ) ᑮᓇᐅᔭᓕᐅᕋᓱᐊᖅᑎᐅᖏᑦᑐᑦ ᓴᓴᐃᔭᑎ ᑭᒡᒐᖅᑐᐃᔪᑦ 14,000-ᓃᑦᑐᓂᒃ ᐃᓄᓐᓂᒃ ᕿᑭᖅᑕᓂ ᓄᓇᖓᓂ (ᐹᕕᓐ) ᓄᓇᕗᒻᒥ, 13-ᖑᓪᓗᑎᒃ ᓄᓇᓖᑦ ᐱᓯᒪᔪᓂᒃ ᐊᐅᓱᐃᑦᑐᒥᒃ ᖁᑦᑎᑦᑐᒥ ᓴᓂᑭᓗᐊᒧᑦ (ᕕᐅᑦᓱ ᕿᑭᖅᑕᖏᑦ) ᓂᒋᐊᓂ ᑲᓇᓐᓇᕐᐸᓯᐊᓂ ᑕᓯᐅᔭᕐᔪᐊᑉ. ᕿᑭᖅᑕᓂᒃᑯᑦ ᐱᓂᐊᕐᓂᕋᐅᑎᖓ ᐊᑦᑕᓇᐃᕐᓯᒪᔪᒥᒃ, ᐊᐅᓚᑦᓯᓗᑎᒃ ᓯᕗᒧᐊᒃᑎᑦᓯᓗᑎᓪᓗ ᐱᔪᓐᓇᐅᑎᖏᓐᓂᒃ ᐃᑲᔫᑎᒃᓴᓂᓪᓗ ᕿᑭᖅᑕᓂ ᐃᓄᖏᓐᓄᑦ; ᐊᒻᒪᓗ ᐱᕚᓪᓕᕈᑎᒃᓴᖓᓂᒃ ᐃᓄᒃᑎᑐᑦ ᐊᒻᒪᓗ ᐃᓄᐃᑦ ᐱᖅᑯᓯᖏᓐᓂᒃ, ᐊᕙᑎᒨᖓᔪᓂᒃ ᐊᑑᑎᖃᕐᓂᖏᓐᓂᒃ, ᓇᖕᒥᓂᖅ−ᒪᑭᒪᓂᕐᒥᒃ, ᐊᒻᒪᓗ ᒪᑭᒪᔾᔪᑎᓄᑦ, ᐃᓅᓯᕐᒧᑦ ᐃᓕᖅᑯᓯᕐᒧᓪᓗ ᖃᓄᐃᓐᖏᑦᓯᐊᕈᑎᒃᓴᓂᒃ ᒪᑐᐃᖓᑦᓯᐊᑐᒃᑯᑦ ᐊᒻᒪᓗ ᓇᖕᒥᓂᖅ ᐊᐅᓚᑦᓯᔪᓐᓇᕐᓗᑎᒃ ᐊᑐᕐᓂᐊᖅᑕᒥᓂᒃ. ᐃᓛᒃᑯᑦ 38 ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᓂ, ᕿᑭᖅᑕᓂᒃᑯᑦ ᓇᓗᓇᐃᖅᑕᐅᓯᒪᔪᑦ ᐃᓄᐃᑦ ᑲᑐᔾᔨᖃᑎᒌᑦ (DIO) ᐱᓕᕆᐊᒃᓴᓖᑦ ᐊᐅᓚᑦᓯᓂᕐᒥᒃ ᐃᓄᐃᑦ ᓄᓇᖁᑎᖏᓐᓂᒃ ᕿᑭᖅᑕᓂ ᓄᓇᖓᓂ.

ᕿᑭᖅᑕᓂ ᐱᕙᓪᓕᐊᔪᖁᑎᖏᓐᓂᒃ ᑐᑭᓯᒋᐊᕐᕕᒃᓴᖅ:

ᓴᐃᒪ ᓴᐊᕼᐊ ᔨᕆᕼᐃ,

ᑐᑭᒧᐊᒃᑎᑦᑎᔨ ᑐᓴᐅᒪᔾᔪᑎᓕᕆᔨᒃᑯᓐᓂ,

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ

ᐃᕐᖐᓐᓈᕈᑖ: szerehi@qia.ca

ᐅᖄᓚᐅᑖ: (867) 975.8413

ᐊᑭᖃᓐᖏᑦᑐᖅ: 1.800.667.2742

 

ᐹᕕᓐᓛᓐ ᓴᕕᒃᓴᓂᒃ ᐅᔭᕋᓐᓂᐊᖅᑏᑦ ᑯᐊᐳᕇᓴᒃᑯᑦ ᒥᑦᓵᓄᑦ

ᑲᑐᔾᔨᓂᒃᑯᑦ ᓇᖕᒥᓂᖁᑕᐅᔪᑦ ᑖᒃᑯᓇᓐᖓᑦ ᓄᓇᕗᒻᒥ ᓴᕕᒃᓴᓕᕆᔩᑦ ᐊᒻᒪᓗ ᐋᓯᓗᐊᒥᑎᐅᓪ, ᐸᕕᓐᓛᓐ ᓴᕕᒃᓴᓂᒃ ᐅᔭᕋᓐᓂᐊᖅᑏᑦ ᑯᐊᐳᕇᓴᒃᑯᑦ ᐊᐅᓚᑦᓯᔪᑦ ᖁᑦᓯᓂᕐᐹᒦᑦᑐᒥᒃ−ᐱᐅᓂᕐᐹᒥᒃ ᓴᕕᒃᓴᓂᒃ ᐅᔭᕋᓐᓂᐊᕕᖕᒥ ᕿᑭᖅᑖᓗᖕᒥ, ᓄᓇᕗᑦ. ᐅᔭᕋᓐᓂᐊᕐᕕᖁᑎᕗᑦ ᐅᔭᕋᓐᓂᐊᖃᑦᑕᖅᑐᖅ ᖁᑦᓯᓂᕐᐹᒦᑦᑐᒥᒃ−ᐱᐅᓂᕐᐹᒥᒃ ᑐᕋᐃᓐᓇᖅᑐᒥᒃ ᐊᐅᓪᓚᑎᑦᓯᖃᑦᑕᖅᑐᖅ ᓴᕕᒃᓴᒥᒃ, iron ore, ᓯᓚᕐᔪᐊᒥ. ᐹᕕᓐᓛᓐ ᑐᒃᓯᕋᕐᓯᒪᔪᑦ ᐱᔪᓐᓇᐅᑎᑖᕈᒪᔾᔪᑎᑎᒍᑦ ᐅᓄᕐᓯᒋᐊᕆᔪᒪᓪᓗᑎᒃ ᐊᕐᕌᒍᑕᒫᑦ ᐊᐅᓪᓚᖅᑎᖃᑦᑕᖅᑕᒥᓂᒃ 12 ᒥᓕᔭᓐ ᑕᓐᓄᑦ. ᐹᕕᓐᓛᓐ ᐊᖏᕐᓯᒪᓂᓕᒃ ᐊᐅᓚᑦᓯᓂᐊᕐᓂᕐᒥᒃ ᓄᓘᔮᓐᓂ ᐅᔭᕋᓐᓂᐊᕕᖕᒥᒃ ᐊᕙᑎᒧᑦ ᐃᓅᓯᕐᒧᓪᓗ ᓱᕋᒍᑕᐅᔾᔮᖏᑦᑐᒃᑯᑦ ᑲᒪᒋᔭᖃᑦᓯᐊᕐᓗᑎᒃ ᐃᑲᔫᑎᖃᕈᓐᓇᓂᐊᖅᑐᒥᒃ ᑕᒪᐃᓐᓄᑦ ᐱᓇᓱᐊᖃᑕᐅᔪᓕᒫᓄᑦ.

 

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᔭᐃᓴᓐ ᓚᐃᑦ

ᑐᓴᐅᒪᔾᔪᑎᓕᕆᔨ

ᐅᖄᓚᐅᑖ: (416) 364-8820 ext. 5032

ᐃᑉᐱᐊᔪᒻᒥᒐᖅ: (416) 529-2624