ᑐᓴᐅᒪᑎᑦᑎᒋᐊᕐᓂᕐᒧᑦ ᐊᑐᐊᒐᑦ: ᑕᓪᓗᕈᑎᐅᑉ ᐃᒪᖓ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᖃᑎᒌᒍᑏᑦ ᑐᕙᐃᔪᐃᑦᑐᕐᒧᑦ ᐊᖏᖃᑎᒌᒍᑏᑦ

ᑐᓴᐅᒪᑎᑦᑎᒋᐊᕐᓂᕐᒧᑦ ᐊᑐᐊᒐᑦ: ᑕᓪᓗᕈᑎᐅᑉ ᐃᒪᖓ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᖃᑎᒌᒍᑏᑦ ᑐᕙᐃᔪᐃᑦᑐᕐᒧᑦ ᐊᖏᖃᑎᒌᒍᑏᑦ

 In blog-inuk

ᕿᑭᖅᑕᓂᒃᑯᑦ ᖁᕕᐊᓱᑉᐳᑦ ᐱᒋᐊᖅᑎᑦᑎᔭᕆᐊᔅᓴᖅ ᑐᑭᓯᐅᒪᑎᑦᑎᒋᐊᕐᓂᕐᒧᑦ ᐊᑐᐊᒐᖅᑖᖅᑲᐅᓂᑦ ᑕᓪᓗᕈᑎᐅᑉ ᐃᒪᖓᓂ ᑲᓇᑕᒥ ᐃᒫᓂ ᓴᐳᔾᔨᕕᒻᒧᑦ ᑐᕙᐃᔪᐃᑦᑐᒧᓪᓗ ᐊᖏᖃᑎᒌᒍᑎᓂᑦ. ᐊᑐᐊᒐᑦ ᐃᓄᓐᓂᑦ ᑕᑯᔪᓐᓇᕐᓯᑎᑦᑎᓯᒪᔪᑦ ᐱᕚᓪᓕᕈᑎᔅᓴᓕᒫᓂᑦ ᐋᔩᕋᕈᑕᐅᓯᒪᔪᓂᑦ ᑖᒃᑯᓇᓂ ᐊᖏᕈᑎᓃᑦᑐᓂᑦ ᐊᑐᖅᑐᑎᒃ ᓈᓴᐅᑎᑎᒍᑦ ᑐᑭᓯᐅᒪᔾᔪᑎᔅᓴᓂᑦ ᐊᒻᒪᓗ ᑐᑭᓯᓇᕐᓯᑎᑕᐅᒋᐊᕐᓯᒪᔪᓂᑦ ᑕᒪᒃᑮᓐᓂᒃ ᐃᓄᒃᑎᑑᖓᔪᓂᑦ ᖃᓪᓗᓈᑎᑑᖓᔪᓂᓪᓗ.

2019ᒥ, ᕿᑭᖅᑕᓃᒃᑯᑦ ᐊᒻᒪᓗ ᒐᕙᒪᑐᖃᒃᑯᑦ ᐋᔩᕋᕈᑎᖃᓚᐅᕐᒪᑕ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᒃᓴᖏᓐᓂᒃ ᐊᖏᕈᑎᒥᒃ ᑕᓪᓗᕈᑎᐅᑉ ᐃᒪᖓᓂ ᓴᐳᔾᔨᕕᖕᒥ ᐊᒻᒪᓗ ᓴᐳᔾᔭᐅᒍᑎᒋᔭᐅᑲᐃᓐᓇᕐᓂᐊᖅᑐᒥᒃ ᑐᕙᐃᔪᐃᑦᑐᕐᒥ ᓴᐳᔾᔨᕕᖕᒥ. ᑖᒃᑯᐊ ᑲᑎᓪᓗᒋᑦ ᑕᓪᓗᕈᑎᐅᑉ ᐃᒪᖓ ᐊᒻᒪᓗ ᑐᕙᐃᔪᐃᑦᑐᖅ ᑭᒡᒐᖅᑐᐃᓂᖃᖅᑐᑦ 7.45 ᐳᓴᓐᑎᒥᒃ ᑲᓇᑕᒥ ᓴᐳᔾᔭᐅᓯᒪᔪᓂᒃ ᐃᒪᓂᒃ ᓯᔾᔭᕆᔭᐅᔪᓂᓗ, ᐊᖏᓂᖅᓴᐅᕌᕐᔪᒃᑐᒥᒃ ᓄᓇᓕᒡᔪᐊᖑᔪᒥᒃ ᐴᓚᓐᒥ.

ᑖᓐᓇ ᐃᒪᖅ ᐱᒻᒪᕆᐋᓗᖕᒪᑦ ᐃᒪᕐᒥᐅᑕᓄᑦ ᐊᒻᒪᓗ ᐱᖃᓯᐅᑎᓯᒪᓪᓗᓂ ᓯᑯᑐᖃᕐᓂ ᐃᑲᔪᖃᑕᐅᑎᓪᓗᒋᑦ ᓯᓚᐅᑉ ᖃᓄᐃᓐᓂᕆᔭᖏᓐᓄᑦ ᐊᒻᒪᓗ ᒪᑭᒪᑎᑦᓯᓂᐊᖅᖢᑎᒃ ᓄᓇᓕᖁᑎᑦᑎᓐᓂ. ᑐᕙᐃᔪᐃᑦᑐᖅ ᓯᑯᑐᖃᖃᖅᑐᖅ ᐅᒪᔪᕋᓛᓄᑦ ᐱᒻᒪᕆᐅᔪᓄᑦ ᓂᕿᒃᓴᕆᔭᐅᕙᒃᑐᓄᑦ ᐃᒪᕐᒥᐅᑕᓂ. ᑕᓪᓗᕈᑎᐅᑉ ᐃᒪᖓᓂ ᐅᒪᔪᖃᐅᑦᓯᐊᖅᑐᖅ ᓇᑦᓯᕐᓂ, ᕿᓚᓗᒐᓂ, ᐊᐃᕕᕐᓂ, ᓇᓄᕐᓂ, ᑎᖕᒥᐊᓂᓪᓗ ᑐᓛᓱᓂ. ᑕᒪᓐᓇ ᐃᒪᖁᑎ ᑕᓪᓕᒪᓂ ᐃᓄᖕᓄᑦ ᓄᓇᓕᖕᓂ ᐊᕙᓗᔭᐅᓯᒪᔪᖅ.

ᑕᓪᓗᕈᑎᐅᑉ ᐃᒪᖓᓄᑦ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᖃᑎᒌᒍᑏᑦ ᐊᒻᒪᓗ ᑐᕙᐃᔪᐃᑦᑐᕐᒧᑦ ᐊᖏᖃᑎᒌᒍᑏᑦ ᑎᑎᕋᕐᓯᒪᒻᒪᑕ ᐊᒥᓱᓂᑦ ᐱᒻᒪᕆᐅᔪᓂᑦ ᐱᕚᓪᓕᕈᑎᔅᓴᓂᑦ ᐱᕈᕐᐸᓪᓕᐊᑎᑕᔅᓴᓂᓪᓗ ᓄᓇᓕᓐᓄᑦ ᐅᑯᓄᖓ ᐃᒃᐱᐊᕐᔪᒃ, ᑲᖏᖅᑐᒑᐱᒃ, ᐊᐅᓱᐃᑦᑐᖅ, ᒥᑦᑎᒪᑕᓕᒃ ᐊᒻᒪᓗ ᖃᐅᓱᐃᑦᑐᖅ. ᑕᒪᒃᑯᐊ ᐱᕚᓪᓕᕈᑎᔅᓴᐃᑦ ᐊᒻᒪᓗ ᐱᕈᕐᐸᓪᓕᐊᑎᑕᔅᓴᐃᑦ ᐱᖓᓱᓂᑦ ᐱᔾᔪᑕᐅᓗᐊᖅᑐᓃᒻᒪᑕ: ᐊᐅᓚᑦᑎᓂᖅ, ᐃᖅᑲᓇᐃᔮᔅᓴᑦ ᐱᓕᕆᐊᓪᓗ, ᐊᒻᒪᓗ ᐊᐅᓚᔾᔪᑎᔅᓴᑦ ᐱᖁᑎᕐᔪᐊᑦ.

ᑖᒃᑯᐊ ᑐᑭᓯᐅᒪᑎᑦᑎᒋᐊᕈᑏᑦ ᐅᔾᔨᕐᓇᕐᓯᑎᑦᑎᒋᐊᕐᓯᒪᔪᑦ ᐱᓇᓱᐊᕈᑕᐅᓕᕋᑖᕐᓯᒪᔪᒥᒃ ᐊᐅᓚᑦᑎᓂᕐᒥᒃ ᐱᕈᕐᐸᓪᓕᐊᑎᑦᑎᓂᕐᒥᓪᓗ ᑲᔪᓯᑎᑦᑎᒍᑕᐅᔪᓐᓇᕐᓯᓯᒪᔪᖅ ᑕᓪᓗᕈᑎᐅᑉ ᐃᒪᖓᓄᑦ ᐊᖏᖃᑎᒌᒍᑎᓂᑦ ᐊᒻᒪᓗ ᑕᕙᐃᔪᐃᑦᑐᕐᒥ ᐊᖏᖃᑎᒌᒍᑎᓂᑦ. ᐊᑐᐊᒐᑦ ᑎᑎᕋᖅᑕᐅᓯᒪᔪᑦ ᕿᑭᖅᑕᓂᒃᑯᓐᓂᑦ ᐱᔾᔪᑕᐅᔪᑦ ᐊᖏᖃᑎᒌᒍᑎᓂᑦ ᑕᑯᔭᐅᔪᓐᓇᓂᕐᓴᐅᖁᓪᓗᒋᑦ ᐃᓄᓐᓄᑦ ᕿᑭᖅᑕᓂ ᓄᓇᓕᓐᓄᑦ.

ᑐᑭᓯᐅᒪᑎᑦᑎᒋᐊᕈᑏᑦ ᐊᑐᐊᒐᑦ ᒪᕐᕈᐃᓕᖅᑲᖓᓪᓗᑎᒃ ᑎᑎᕋᖅᑕᐅᓯᒪᔪᑦ: ᖃᑯᖅᑕᓃᑦᑐᑦ ᒪᑉᐱᒐᕐᓂᑦ ᑐᖑᔪᖅᑐᓃᑦᑐᓪᓗ ᒪᑉᐱᒐᕐᓂᑦ.

ᖃᑯᖅᑕᓃᑦᑐᑦ ᒪᑉᐱᒐᕐᓂᑦ: ᐊᖏᖃᑎᒌᒍᑎᓃᑦᑐᑦ ᑭᓲᒻᒪᖔᑕ

ᖃᑯᖅᑕᓃᑦᑐᑦ ᑐᑭᓯᐅᒪᔾᔪᑎᔅᓴᖅᑕᓖᑦ ᑐᑭᓯᓂᐊᕐᖓᑕ ᐅᖃᓕᒫᖅᑐᑦ ᑐᑭᓯᒃᑲᓂᕐᓗᑎᒃ ᐊᖏᖃᑎᒌᒍᑏᑦ ᒥᔅᓵᓅᖓᔪᓂᑦ ᐊᒻᒪᓗ ᐃᒪᕕᓐᓂᑦ ᐱᔾᔪᑕᐅᓯᒪᔪᓂᑦ. ᑖᒃᑯᐊ ᒪᑉᐱᒐᐃᑦ ᓄᓇᙳᐊᖅᑕᖃᐅᕐᒥᔪᑦ ᐊᒻᒪᓗ ᑎᑎᖅᑲᖅᑕᖃᖅᑐᑎᒃ ᑕᓪᓗᕈᑎᐅᑉ ᐃᒪᖓᑕ ᒥᔅᓵᓅᖓᔪᓂᑦ ᐊᒻᒪᓗ ᑐᕙᐃᔪᐃᑦᑑᑉ ᐃᒪᕕᐅᑉ ᒥᔅᓵᓅᖓᔪᓂᑦ. ᖁᕐᓱᖅᑐᓃᑦᑐᑦ ᑎᑎᖅᑲᖃᐅᕐᒥᔪᑦ ᐱᒻᒪᕆᐅᓂᖏᓐᓂᒃ ᐊᖏᖃᑎᒌᒍᑏᑦ ᓲᕐᓗ ᑐᑭᓯᐅᒪᔾᔪᑎᔅᓴᐃᑦ ᐊᐅᓚᔾᔪᑎᔅᓴᐃᑦ ᐱᖁᑎᕐᔪᐊᑦ ᐱᕈᕐᐸᓪᓕᐊᑎᑕᐅᔪᑦ ᒥᔅᓵᓄᑦ ᐊᒻᒪᓗ ᐃᖅᑲᓇᐃᔮᔅᓴᓂᑦ ᓴᖅᑮᓯᒪᓂᖏᓐᓂ.

ᖃᑯᖅᑕᓃᑦᑐᑦ ᑐᑭᓯᑎᑦᑎᒋᐊᕈᑎᖃᕐᓯᒪᒻᒥᔪᑦ ᐊᑑᑎᖃᓗᐊᕐᓂᖏᓐᓂᒃ ᐊᖏᖃᑎᒌᒍᑎᓃᑦᑐᓂᑦ, ᓈᓴᐅᑎᑎᒍᑦ ᑐᑭᓯᔾᔪᑎᔅᓴᓂᑦ ᑐᑭᓯᓇᕐᓯᑎᑕᐅᒋᐊᕐᓯᒪᓪᓗᑎᒃ ᓇᐃᓪᓕᑎᕐᓯᒪᓪᓗᒋᑦ ᐱᒻᒪᕆᐅᓂᖏᑦ ᐊᖏᖃᑎᒌᒍᑎᓃᑦᑐᑦ. ᑖᒃᑯᐊ ᒪᑉᐱᒐᐃᑦ ᐊᕕᑦᑐᕐᓯᒪᔪᑦ ᐱᖓᓱᐃᓕᖅᑲᖓᓪᓗᑎᒃ: ᐊᐅᓚᑦᑎᓂᖅ, ᐃᖅᑲᓇᐃᔮᑦ ᐱᓕᕆᐊᓪᓗ, ᐊᒻᒪᓗ ᐊᐅᓚᔾᔪᑎᔅᓴᑦ ᐱᖁᑎᕐᔪᐊᑦ.

ᑐᖑᔪᖅᑐᓃᑦᑐᑦ ᒪᑉᐱᒐᕐᓂᑦ:

ᑐᑭᖏᑦ ᐊᒻᒪᓗ ᑐᑭᓯᔾᔪᑎᔅᓴᑲᓐᓃᑦ

ᑐᖑᔪᖅᑐᐃᑦ ᒪᑉᐱᒐᐃᑦ ᓇᓗᓇᐃᔭᐃᓯᒪᔪᑦ ᐊᑑᑎᖃᓗᐊᕐᓂᖏᑦ ᐃᓚᒋᔭᐅᔭᕆᐊᖃᕐᓂᖏᓐᓂᒃ ᑐᑭᓯᔭᐅᓂᐊᕐᖓᑕ ᐊᖏᖃᑎᒌᒍᑏᑦ. ᓇᓗᓇᐃᔭᐃᓯᒪᒻᒥᔪᑦ ᐃᖅᑲᓇᐃᔮᕆᕙᑦᑕᖏᓐᓂᒃ ᑎᒥᙳᖅᑎᑕᐅᓯᒪᔪᑦ ᐊᖏᖃᑎᒌᒍᑎᑎᒍᑦ ᓲᕐᓗ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ.

 

Highlights of the Agreements

ᑕᓪᓗᕈᑎᐅᑉ ᐃᒪᖓᓂ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᖃᑎᒌᒍᑏᑦ (ᐊᖏᖃᑎᒌᒍᑏᑦ) ᓴᖅᑭᑎᑦᑎᓯᒪᔪᑦ 39ᓂᑦ ᓄᑖᓂᑦ ᐊᑑᑎᓕᓐᓂᑦ ᐃᖅᑲᓇᐃᔮᔅᓴᓂᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᑦ. ᐊᑐᓂᑦ ᑕᓪᓕᒪᓂᑦ ᐊᑑᑎᕕᐅᔪᓂᑦ ᓄᓇᓕᓐᓂᑦ ᓄᑖᓂᑦ ᐃᖅᑲᓇᐃᔮᔅᓴᖅᑕᖃᐅᓕᖅᑐᖅ ᒪᑯᓂᖓ ᓇᐅᑦᑎᕐᓱᖅᑎᓄᑦ ᓄᓇᓕᓐᓂᑦ ᑐᑭᒧᐊᒃᑎᑦᑎᔨ, ᓇᐅᑦᑎᕐᓱᖅᑎᓄᑦ ᓯᕗᓕᖅᑎ ᐊᒻᒪᓗ ᓇᐅᑦᑎᕐᓱᖅᑏᑦ. ᑎᓴᒪᐅᔪᖅᑐᑦ ᐊᓯᖏᑦ ᐃᖅᑲᓇᐃᔮᔅᓴᑦ ᓴᖅᑭᕐᓯᒪᔪᑦ ᐊᐅᓚᑦᑎᓂᐊᕐᖓᑕ ᐊᑐᓕᖅᑎᑦᑎᓂᐊᕐᖓᑕᓗ ᐊᖏᖃᑎᒌᒍᑎᓂᑦ. ᑖᒃᑯᐊᖑᓪᓗᑎᒃ ᑐᑭᒧᐊᒃᑎᑦᑎᔨ ᐆᒪᔪᓕᕆᓂᕐᒧᑦ ᐃᒪᕕᓕᕆᓂᕐᒧᓪᓗ, ᐃᓄᓐᓄᑦ ᓇᐅᑦᑎᕐᓱᖅᑎᓄᑦ  ᐊᐅᓚᑦᑎᔨᓪᓗᐊᑕᖅ, ᐃᓄᓐᓄᑦ ᓇᐅᑦᑎᕐᓱᖅᑎᓄᑦ ᐊᐅᓚᑦᑎᔨ, ᐃᒪᖅ ᑐᑭᒧᐊᒃᑎᑦᑎᔨ, ᖃᐅᔨᓴᖅᑐᓕᕆᓂᕐᒧᑦ ᐊᐅᓚᑦᑎᔨ, ᓇᐅᑦᑎᕐᓱᖅᑎᓄᑦ ᐃᖅᑲᓇᐃᔭᖅᑐᓕᕆᔨ, ᐊᑭᓕᕐᓱᖅᑕᐅᔾᔪᑎᓄᑦ ᐃᑲᔫᓯᐊᔅᓴᓄᓪᓗ ᑎᑎᕋᖅᑎ, ᐊᒻᒪᓗ ᐃᓄᓐᓄᑦ ᓇᐅᑦᑎᕐᓱᖅᑎᓄᑦ ᐸᐃᑉᐹᓕᕆᔨ. ᐊᒻᒪᓗᑦᑕᐅᖅ, ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᐃᖅᑲᓇᐃᔭᖅᑎᑖᕋᔭᖅᑐᑦ ᒪᕐᕉᓐᓂᒃ ᐃᓅᓐᓂᒃ ᐃᖅᑲᓇᐃᔮᖑᖃᑦᑕᓂᐊᖅᑐᓄᑦ ᑕᓪᓗᕈᑎᐅᑉ ᐃᒪᖓᓄᑦ ᑐᕌᖓᔪᓂᑦ.

ᐊᖏᖃᑎᒌᒍᑏᑦ ᐱᓇᓱᐊᕈᑎᖃᖁᔨᓯᒪᒻᒪᑕ ᐃᓕᓐᓂᐊᑎᑦᑎᓂᕐᒥᒃ ᐱᓕᒻᒪᔅᓴᐃᓂᕐᒥᓪᓗ ᐃᓄᓐᓂᑦ ᖃᐅᔨᓴᖅᑐᓕᕆᓂᕐᒥᒃ ᐊᒻᒪᓗ ᐊᕙᑎᒥᒃ ᓇᐅᑦᑎᕐᓱᖃᑦᑕᓂᕐᒥᒃ ᐃᖅᑲᓇᐃᔮᔅᓴᓂᑦ. ᐅᔾᔨᕐᓇᕐᓯᑎᑦᑎᒋᐊᕐᓯᒪᒋᓪᓗᓂ ᐃᓚᒋᔭᐅᓪᓚᑦᑖᕐᓂᕐᓴᐅᒋᐊᖃᕐᓂᖏᓐᓂᒃ ᐃᓄᐃᑦ ᓂᕈᐊᖃᑦᑕᓂᕐᒥᒃ, ᑐᑭᒧᐊᑦᑎᑦᑎᖃᑦᑕᓂᕐᒥᒃ ᐊᒻᒪᓗ ᐱᔨᑦᑎᕋᐅᑎᖃᖃᑦᑕᓂᕐᒥᒃ ᖃᐅᔨᓴᖅᑐᓕᕆᓂᕐᒧᑦ ᐱᓕᕆᐊᖑᔪᓂᑦ.

ᐃᓚᒋᔭᐅᓪᓗᑎᒃ ᐃᖅᑲᓇᐃᔮᔅᓴᓂᑦ ᐱᓕᕆᐊᓂᓪᓗ ᐱᕙᓪᓕᐊᑎᑦᑎᓂᕐᒧᑦ, ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᖃᑎᒌᒍᑏᑦ ᐊᑭᓕᕐᓱᐃᔾᔪᑎᖃᕐᓂᐊᖅᑐᑦ ᐱᖁᑎᕐᔪᐊᓄᑦ ᐊᐅᓚᔾᔪᑎᔅᓴᓄᑦ. ᑭᓱᑐᐃᓐᓇᕐᓄᑦ−ᐊᑐᖅᑕᐅᖃᑦᑕᕋᔭᖅᑐᖅ ᐃᖅᑲᓇᐃᔭᕐᕕᔅᓴᖅ ᐊᒻᒪᓗ ᓂᕿᓕᕆᕕᔅᓴᐃᑦ ᓴᓇᔭᐅᓛᕐᖓᑕ ᐊᑐᓂᑦ ᑕᓪᓕᒪᓂᑦ ᐊᑑᑎᕕᐅᔪᓂᑦ ᓄᓇᓕᓐᓂᑦ. ᑖᒃᑯᐊ ᐃᖅᑲᓇᐃᔭᕐᕕᔅᓴᐃᑦ ᐊᑭᓕᖅᑕᐅᓯᒪᓂᐊᖅᑐᑦ ᒥᕐᖑᐃᓯᕐᕕᓕᕆᔨᒃᑯᓐᓂᑦ ᑲᓇᑕᒥ. ᐊᕕᑦᑐᕐᓯᒪᓂᐅᔪᓂᑦ ᐊᐅᓚᑦᑎᕕᒻᒥ ᐃᓕᓐᓂᐊᑎᑦᑎᕕᔅᓴᖅ ᓴᓇᔭᐅᓛᖅᑐᖅ ᒥᑦᑎᒪᑕᓕᒻᒥ ᐊᒻᒪᓗ ᓄᓇᓕᓐᓄᑦ ᑐᓚᑦᑕᕕᔅᓴᖅ ᐊᒻᒪᓗ ᐅᒥᐊᕐᓄᑦ ᑐᓚᑦᑕᕕᔅᓴᐃᑦ ᓯᕗᓪᓕᐸᐅᑦᑎᐅᔾᔭᐅᓂᐊᖅᑐᑦ ᐅᑯᓄᖓ ᐊᐅᓱᐃᑦᑐᖅ, ᖃᐅᓱᐃᑦᑐᖅ, ᐃᒃᐱᐊᕐᔪᒃ ᐊᒻᒪᓗ ᑲᖏᖅᑐᒑᐱᒃ.

ᑲᔪᓯᑎᑕᐅᓯᒪᓂᖏᑦ ᑖᒃᑯᐊ ᐊᖏᖃᑎᒌᒍᑏᑦ ᓇᓗᓇᐃᒃᑯᑕᐅᓂᐊᕐᒥᔪᑦ ᖃᓄᖅ ᑲᔪᓯᑎᑦᑎᒍᓐᓇᕐᒪᖔᑕ ᐃᓄᐃᓪᓗ ᒐᕙᒪᑐᖃᒃᑯᓪᓗ ᐃᖅᑲᓇᐃᔭᖃᑎᒌᑎᓪᓗᖏᑦ. ᑕᒪᒃᑯᐊ ᐊᑐᖅᑕᐅᓚᐅᕐᓯᒪᙱᑦᑐᑦ ᐊᖏᖃᑎᒌᒍᑏᑦ ᖃᐅᔨᒪᒍᑕᐅᓂᐊᕐᒥᔪᑦ ᐃᓄᐃᑦ ᐊᐅᓚᑦᑎᓂᖏᓐᓂᒃ ᓴᐳᔾᔨᕕᓐᓂᑦ, ᐃᖅᑲᓇᐃᔮᔅᓴᖃᕈᑕᐅᓗᑎᒃ ᐃᓄᓐᓄᑦ ᐊᕙᑎᒥᒃ ᓇᐅᑦᑎᕐᓱᖅᑎᐅᓗᑎᒃ ᐊᒻᒪᓗ ᑮᓇᐅᔭᖃᖅᑎᑕᐅᓂᖏᓐᓂᒃ ᑲᒪᔾᔪᑎᔅᓴᓂᑦ ᐊᐅᓚᔾᔪᑎᔅᓴᓂᑦ ᐱᖁᑎᕐᔪᐊᕐᓂᑦ ᐊᑭᓕᔅᓴᓄᑦ ᖁᑦᑎᑦᑐᒥ.

Recommended Posts

ᑐᑭᓯᒋᐊᕐᕕᐅᑕ

ᑐᑭᓯᒋᐊᕆᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᓐᓄᑦ