ᐃᖃᓗᐃᑦ, ᓄᓇᕗᑦ – ᔫᓂ 24, 2020 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐱᔾᔪᓯᐊᖅᑖᑎᑦᑎᒋᐅᓚᐅᖅᐳᑦ ᐃᓄᒃᑐᑦ ᐅᖃᐅᓯᓕᕆᓂᕐᒧᑦ ᐱᔾᔪᓯᐊᕐᒥᒃ ᖁᑦᑎᓂᖅᐹᕐᒥᒃ ᐃᓕᓐᓂᐊᕇᖅᑐᒧᑦ ᑲᐃᑎ ᑲᓪᓗᒃ, ᐃᓕᓐᓂᐊᕇᕐᓂᖏᖕᓄᑦ ᓇᓪᓕᐅᓂᖅᓯᐅᕐᓂᖃᖅᑎᓪᓗᒋᑦ ᐃᓄᒃᓱᒃ ᐃᓕᓐᓂᐊᕐᕕᐊᓗᒻᒥ ᐃᖃᓗᓐᓂ ᔫᓂ 23-ᖑᑎᓪᓗᒍ.

$1,000−ᖑᓪᓗᓂ ᐱᔾᔪᓯᐊᖅ, ᐋᖅᑭᒃᑕᐅᓯᒪᔪᖅ ᓇᓪᓕᐅᓂᖅᓯᐅᕈᑎᒋᔭᐅᖁᓪᓗᒋᑦ ᐃᓕᓐᓂᐊᖅᑏᑦ ᑕᑯᒃᓴᐅᑎᑦᑎᓲᑦ ᐸᐸᑦᑏᓐᓇᕋᓱᐊᓲᓄᑦ ᐅᖃᐅᓯᕐᒥᒃ ᐊᒻᒪᓗ ᐃᓄᒃᑐᑦ ᐅᖃᓪᓚᒐᓱᐊᖃᑦᑕᓲᓄᑦ ᖁᑦᑎᓂᖅᐹᕐᒥᒃ ᐃᓕᓐᓂᐊᖅᑎᓪᓗᒋᑦ, ᐱᓕᕆᖃᑎᒌᒍᑕᐅᕗᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᖕᓄᑦ ᐊᒻᒪᓗ ᐃᓄᒃᓱᒃ ᐃᓕᓐᓂᐊᕐᕕᐊᓗᒻᒧᑦ. ᑖᓐᓇ ᓯᕗᓪᓕᖅᐹᖑᕗᖅ ᐱᔾᔪᓯᐊᖅ ᑐᓂᔭᐅᔪᓪᓗᓂ.

“ᐃᓄᒃᑐᑦ ᐊᖅᑯᑕᐅᕗᖅ ᐸᐸᑕᐅᔾᔪᑎᒋᔭᐅᓪᓗᓂ ᐱᖅᑯᓯᑦᑎᓐᓂᒃ ᐊᒻᒪᓗ ᑭᓇᐅᓂᑦᑎᓐᓂᒃ ᐃᓅᓪᓗᑕ,” ᐅᖃᖅᑐᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐊᖓᔪᖅᑳᖓᑦ ᐸᐅᓗᓯ ᔫᓯᐱ ᐊᕿᐊᕈᖅ, “ᖁᕕᐊᓱᒻᒪᕆᓲᖑᕗᖓ ᐊᒻᒪᓗ ᐅᐱᒍᓱᑦᑐᖓ ᐃᓕᓴᕆᓪᓗᒋᑦ ᐃᓕᓐᓂᐊᖅᑏᑦ ᐅᖃᐅᓯᑦᑎᓐᓂᒃ ᐱᖅᑯᓯᑦᑎᓐᓂᓪᓗ ᐊᑐᖃᑦᑕᓲᑦ.”

“ᐃᓄᒃᑐᑦ ᐅᖃᓪᓚᒋᐊᓯᒌᓚᐅᖅᓯᒪᒐᒪ, ᒥᑭᔫᑕᐅᓂᖅᓴᓂᒃ ᐃᓕᓐᓂᐊᕐᕕᒻᒥ ᐃᓕᓐᓂᐊᓕᓵᖅᑎᓪᓗᖓ,” ᐅᖃᖅᑐᓂ ᐱᔾᔪᓯᐊᖅᑖᖅᑐᖅ ᑲᓪᓗᒃ, “ᐃᓄᒃᑐᑦ ᐅᖃᐅᓯᕋ ᓴᙵᑦᑎᒃᑲᓐᓂᕋᓱᐊᓛᕆᕙᕋ ᓯᕗᓂᒃᓴᑦᑎᓐᓂ.”

ᑲᓪᓗᒃ, ᖃᐅᓱᐃᑦᑐᒥᐅᑕᒃᓴᔭ, ᓄᓇᕗᑦ ᓯᕗᓂᒃᓴᕗᑦ ᐃᓕᓐᓂᐊᕐᕕᖓᓄᑦ ᐅᑭᐊᒃᓵᖅ 2021-ᒥ ᐃᓕᓐᓂᐊᕆᐊᓛᖅᑐᖅ ᑲᔪᓯᓗᓂᐅᒃ ᐃᓕᓐᓂᐊᕐᓂᖓ.

ᑐᑭᓯᒋᐊᒃᑲᓐᓂᖁᓪᓗᑎᑦ, ᖃᐅᔨᒃᑲᕐᓗᒍ:

ᓰᒪ ᓴᕼᐊᕐ ᔪᕆᕼᐃ,

ᑐᑭᒧᐊᑦᑎᑦᑎᔨ ᑐᓴᐅᒪᖃᑎᒌᖕᓂᕐᒧᑦ,

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ

szerehi@qia.ca

867.975.8413 or

1.800.667.2742