ᓇᐃᓈᖅᑐᑦ: ᐊᖑᓇᓱᖃᑎᖃᕐᓂᖅ ᒥᑦᑎᒪᑕᓕᒻᒥᐅᓂᑦ ᓇᐅᑦᑎᕐᓱᖅᑎᓂᑦ

ᓇᐃᓈᖅᑐᑦ: ᐊᖑᓇᓱᖃᑎᖃᕐᓂᖅ ᒥᑦᑎᒪᑕᓕᒻᒥᐅᓂᑦ ᓇᐅᑦᑎᕐᓱᖅᑎᓂᑦ

 In blog-inuk

ᐋᒡᒌᓯᐅᑎᓪᓗᒍ ᐊᐅᓪᓚᖃᑎᒋᔪᔭᕗᑦ ᒥᑦᑎᒪᑕᓕᒻᒥᐅᑦ ᓇᐅᑦᑎᕐᓱᖅᑏᑦ ᐊᖑᓇᓱᒋᐊᖅᑐᑕ ᑕᓯᐅᔭᕐᒧᑦ. ᒥᑦᑎᒪᑕᓕᒻᒥᐅᑦ ᐃᖅᑲᓇᐃᔭᖃᑎᒌᑦ ᐃᓚᒋᔭᐅᒻᒪᑕ ᓇᐅᑦᑎᕐᓱᖅᑎᖁᑎᑦᑎᓐᓄᑦ ᑕᓪᓕᒪᓂᑦ ᑕᓪᓗᕈᑎᐅᑉ ᐃᒪᖓᓂ ᓄᓇᓕᐅᔪᓂᑦ, ᑖᒃᑯᐊ ᓄᑖᑦ ᐃᖅᑲᓇᐃᔮᑦ ᐋᔩᕋᕈᑕᐅᓚᐅᕐᓯᒪᔪᑦ ᐊᖅᑯᑎᒋᓪᓗᒋᑦ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᖃᑎᒌᒍᑏᑦ  ᐊᖏᕈᑕᐅᓪᓗᑎᒃ ᐋᒡᒌᓯ 2019ᒥ.

ᑕᕝᕙᐅᑯᐊ ᑕᑯᑎᑦᑎᒋᐊᕈᑏᑦ ᐃᖅᑲᓇᐃᔮᕆᓯᒪᔭᖏᓐᓂᒃ ᕿᑭᖅᑕᓂᒃᑯᑦ ᐃᖅᑲᓇᐃᔭᖅᑎᖏᑕ ᑕᒫᓂ ᑕᓪᓗᕈᑎᐅᑉ ᐃᒪᖓᓂ ᑲᓇᑕᒥ ᐃᒫᓂ ᓴᐳᔾᔨᕕᒻᒥ..

 

ᓇᐅᑦᑎᕐᓱᖅᑏᑦ, ᐅᕝᕙᓗᑭᐊᖅ ᐃᓄᐃᑦ ᓇᐅᑦᑎᕐᓱᖅᑏᑦ, ᐃᔨᒋᔭᐅᒻᒪᑕ ᓯᐅᑎᒋᔭᐅᓪᓗᑎᓪᓗ ᓴᐳᔾᔨᕕᒻᒧᑦ. ᓇᐅᑦᑎᕐᓱᓲᖑᒻᒪᑕ ᐊᕙᑎᖓᓃᑦᑐᓂᑦ ᖃᓂᒋᔭᖓᓐᓂ ᓄᓇᓕᐅᔪᑦ ᐊᒻᒪᓗ ᓂᕿᑖᖅᑎᑦᑎᕙᑦᑐᑎᒃ ᐊᖑᓂᑦᑕᒥᓂᖏᓐᓂᒃ ᓄᓇᖅᑲᑎᖏᓐᓄᑦ. ᒥᑦᑎᒪᑕᓕᒻᒥ, ᒫᓐᓇ ᐱᖓᓱᓂᑦ ᓇᐅᑦᑎᕐᓱᖅᑎᖃᖅᑐᒍᑦ.

ᓇᐅᑦᑎᕐᓱᖅᑎᕈᓚᐅᕋᑎᒃ ᓱᓕ, ᔭᐃᒥᓯ ᑯᓄᒃ, ᓕᐅ ᒪᒃᑖᖅ, ᐊᒻᒪ ᕋᐃᔭᓐ ᐊᕐᓇᑲᓪᓚᒃ ᐃᓚᒋᔭᐅᓚᐅᕐᓯᒪᔪᑦ ᕿᑭᖅᑕᓂᒃᑯᑦ  ᓄᓇᓕᓐᓂᑦ ᓇᐅᑦᑎᕐᓱᕐᓂᕐᒥ ᐱᓕᕆᐊᕐᒥ. ᑖᓐᓇ ᐱᓕᕆᐊᖅ ᐱᒋᐊᓚᐅᕐᓯᒪᔪᖅ 2017ᖑᑎᓪᓗᒍ ᐊᒻᒪᓗ ᐊᐅᓚᓂᖃᓚᐅᕐᓯᒪᓪᓗᓂ ᐆᑦᑐᕋᐅᑕᐅᓪᓗᓂ ᐱᓕᕆᐊᖑᓪᓗᓂ ᓇᐅᑦᑎᕐᓱᖃᑦᑕᓂᕐᒥᒃ, ᐃᓕᓐᓂᐊᓂᕐᒥᒃ, ᐱᓕᒻᒪᓴᕐᓂᒥᓪᓗ ᐊᒻᒪᓗ ᐱᓕᕆᔪᓐᓇᕐᓯᑎᑦᑎᕙᓪᓕᐊᓂᕐᒥᒃ ᓄᓇᓕᓐᓂᑦ. ᑕᕝᕙᓂ ᒥᑦᑎᒪᑕᓕᒻᒥᐅᑦ ᓇᐅᑦᑎᕐᓱᖅᑏᑦ ᐱᒋᐊᓚᐅᕐᓯᒪᔪᑦ ᕿᑭᖅᑕᓂᒃᑯᓐᓂ.

“ᖁᔭᓕᔪᖓ ᐃᖅᑲᓇᐃᔮᖅᑖᖅᑎᑕᐅᓯᒪᒐᒪ ᓇᐅᑦᑎᕐᓱᖅᑎᐅᓂᕐᒥᒃ,” ᐅᖃᖅᑐᖅ ᓕᐅ ᒪᒃᑖᖅ, “ᐃᓕᒃᑲᓐᓂᕈᒪᔪᖓ ᓄᓇᐅᑉ ᒥᔅᓵᓄᑦ ᐊᒻᒪᓗ ᐃᓕᓐᓂᐊᖅᑎᓪᓗᒋᑦ ᕿᑐᕐᖓᒃᑲ ᑕᐃᒫᒃ ᐱᐅᓯᕗᑦ ᑲᔪᓯᑎᑕᐅᓂᐊᕐᖓᑕ.”

ᓂᐅᕐᕈᓯᒪᓂᑦᑎᓐᓂ ᒪᒃᑖᑉ ᐃᓪᓗᕋᓛᖓᓄᑦ ᑕᓯᐅᔭᕐᒥ, ᓇᐅᑦᑎᕐᓱᖅᑏᑦ ᕿᒥᕐᕈᔪᔪᑦ ᐱᕈᖅᑐᖏᓐᓂᒃ ᑕᒫᓂ, ᓯᓚᐅᑉ ᖃᓄᐃᓐᓂᖓᓂ ᐊᒻᒪᓗ ᐱᐅᓯᕆᕙᑦᑕᖏᓐᓂᒃ ᐃᒫᓂᒥᐅᑕᐃᑦ ᐆᒪᔪᑦ ᑎᖕᒥᐊᓪᓗ. ᐊᖑᓂᔪᒻᒥᔪᑦ ᓇᑦᑎᕐᓂᑦ ᑖᒃᑯᐊ ᐃᓄᓐᓄᑦ ᑐᓂᐅᖅᑲᖅᑕᐅᔪᔪᑦ ᓂᕿᖏᑦ ᒥᑦᑎᒪᑕᓕᒻᒥ.

ᒥᑦᑎᒪᑕᓕᒻᒥ ᓇᐅᑦᑎᕐᓱᖅᑏᑦ ᐱᒻᒪᕆᐊᓗᒻᒥᒃ ᐃᖅᑲᓇᐃᔮᓖᑦ ᑕᓪᓗᕈᑎᐅᑉ ᐃᒪᖓᓂ ᑲᓇᑕᒥ ᐃᒫᓂ ᓴᐳᔾᔨᕕᒻᒥ. ᓂᕆᐅᑉᐳᒍᑦ ᑕᑯᖅᑯᔾᔨᑲᓐᓂᓛᕆᐊᔅᓴᖅ ᐊᔾᔨᙳᐊᓂᑦ ᐊᒻᒪᓗ ᑕᕐᕆᔮᔅᓴᓂᓪᓗ ᐊᓯᑦᑎᓐᓂᒃ ᐃᖅᑲᓇᐃᔭᖃᑎᑦᑎᓐᓂᒃ ᐱᓯᒪᔪᓂᑦ ᐃᒃᐱᐊᕐᔪᒻᒥᐅᓂᑦ, ᑲᖏᖅᑐᒑᐱᒻᒥᐅᓂᑦ, ᖃᐅᓱᐃᑦᑐᕐᒥᐅᓂᑦ ᐊᐅᓱᐃᑦᑐᕐᒥᐅᓂᓪᓗ ᑕᖅᑭᐅᓂᐊᖅᑐᓂᑦ ᓯᕗᓂᔅᓴᑎᓐᓂ.

Recommended Posts

ᑐᑭᓯᒋᐊᕐᕕᐅᑕ

ᑐᑭᓯᒋᐊᕆᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᓐᓄᑦ