ᐅᓗᖅ ᑐᓴᖅᑎᑦᑎᔾᔪᑕᐅᓂᖓ: ᔪᓚᐃ 15, 2020

ᖃᓄᐃᓕᐅᕈᑕᐅᔪᖅ: ᒪᑐᕕᔅᓴᖓ ᐅᖓᕙᕆᐊᖅᑕᖅ; ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐅᖓᕙᕆᐊᕐᓯᔪᑦ ᓯᕕᑦᑐᕆᐊᕐᓯᓪᓗᑎᓪᓗ ᖃᕋᓴᐅᔭᕋᓛᕐᓂᑦ−ᑐᕌᖓᔪᓂᑦ−ᐃᓕᓐᓂᐊᖅᑎᓄᑦ ᐱᓕᕆᐊᖑᔪᒥᒃ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ 40ᑲᓂᕐᓂᑦ ᖃᕋᓴᐅᔭᕋᓛᕐᓂᑦ ᑐᓂᓯᓂᐊᖅᑐᑦ ᐃᑲᔫᑎᒋᓗᒋᑦ ᐱᓇᓱᐊᖃᑕᐅᔪᓐᓇᖅᑐᓄᑦ ᐃᓕᓐᓂᐊᖅᑎᓄᑦ ᐃᓕᓐᓂᐊᕈᑎᖏᑦ ᐅᓚᕕᑕᐅᓯᒪᑎᓪᓗᒋᑦ ᐳᕝᕕᕆᓇᖅᑐᒧᑦ (COVID-19). ᑖᓐᓇ ᓯᕕᑦᑐᕆᐊᕐᓯᒍᑕᐅᔪᖅ ᖁᔭᓐᓇᒦᕈᑎᒋᕙᕗᑦ ᐃᑲᔪᕐᓂᖏᓐᓄᑦ ᐋᒃᑐᐊᒃᑯᑦ, ᑲᓇᑕᒥ ᐊᖏᓂᕐᐹᖑᓪᓗᑎᒃ ᑲᑐᔾᔨᖃᑎᒌᑦ ᖃᐅᔨᓴᖅᑐᓕᕆᓂᕐᒧᑦ, ᐃᓱᕐᕆᐅᑎᓕᕆᓂᕐᒧᑦ, ᓴᓇᔪᓕᕆᓂᕐᒧᑦ ᓈᓴᐅᓯᕆᓂᕐᒧᓪᓗ (STEM) ᑐᕌᖓᔪᓂᑦ ᐃᑲᔫᑎᖃᕋᓱᑉᐸᑦᑐᑦ.

ᐅᓇ ᐱᔾᔪᑎᒋᓗᐊᖅᑐᒍ, ᕿᑭᖅᑕᓂᒃᑯᑦ ᑐᓂᓯᔭᐅᓯᒪᒻᒪᑕ 40ᑲᓂᕐᓂᑦ ᖃᕋᓴᐅᔭᕋᓛᕐᓂᑦ ᐃᒪᐃᑦᑐᓂᑦ Google Pixelbook Go 13.3 inch ᐊᖏᓂᓕᓐᓂᑦ ᖃᕋᓴᐅᔭᕋᓛᕐᓂᑦ ᐋᒃᑐᐊᑯᓐᓂᑦ. ᐋᒃᑐᐊ ᑖᒃᑯᐊ ᑲᓇᑕᒥ ᐃᑲᔪᖅᑏᑦ ᐃᑲᔪᓲᑦ ᐃᓕᓐᓂᐊᖅᑎᓂᑦ ᑐᙵᕕᐅᓂᐊᖅᑐᓂᑦ ᐃᓕᓐᓂᐊᑎᑦᑎᖃᑦᑕᓂᕐᒥᒃ ᖃᐅᔨᓴᖅᑐᓕᕆᓂᕐᒥ, ᐃᓱᕐᕆᐅᑕᐅᕙᑦᑐᓂᑦ, ᓴᓇᔪᓕᕆᓂᕐᒥᒃ ᐊᒻᒪᓗ ᓈᓴᐅᓯᕆᓂᕐᒥᒃ ᐃᓕᓐᓂᐊᑎᑦᑎᖃᑦᑕᓂᒃᑯᑦ ᐊᒻᒪᓗ ᐊᐅᔭᒃᑯᑦ ᐃᓕᓐᓂᐊᑎᑦᑎᖃᑦᑕᓂᒃᑯᑦ ᑲᑎᒻᒪᕙᑦᑐᓂᑦ. ᐋᒃᑐᐊᒃᑯᑦ ᐱᓕᕆᖃᑦᑕᕐᓯᒪᒻᒪᑕ ᓄᓇᕗᒥ ᓇᒥᓕᒫᖅ ᐱᔨᑦᑎᕋᐅᑎᖃᕐᐸᑦᑐᑎᒃ ᑲᑐᔾᔨᖃᑎᒌᕝᕕᖓᓐᓂ (STEM) ᑲᑎᒻᒪᑎᑦᑎᓪᓗᑎᒃ ᐊᒻᒪᓗ ᑲᑎᒪᓂᒃᑯᑦ ᐃᓕᓐᓂᐊᑎᑦᑎᒍᑕᐅᕙᑦᑐᓂᑦ ᐊᕙᑎᑦ ᐊᕐᕌᒍᑦ ᐅᖓᑖᓂ. ᑕᒫᓂ ᐊᕐᕌᒍᒥ, ᐱᔾᔪᑎᒋᓪᓗᒍ ᐳᕝᕕᕆᓇᖅᑐᖅ, ᓇᔫᑎᓗᑎᒃ ᐱᔨᑦᑎᕋᐅᑎᖃᕈᓐᓇᓚᐅᙱᒻᒪᑕ ᑕᐃᒫᒃ ᐃᑲᔫᑎᖃᖅᑯᑦ ᐊᓯᐊᓂᒃ ᐊᖅᑯᑎᖃᖅᑐᑎᒃ − ᓲᕐᓗ ᖃᕋᓴᐅᔭᕋᓛᖅᑖᑎᑦᑎᓪᓗᑎᒃ ᐃᓄᓐᓂᑦ ᐃᓕᓐᓂᐊᖅᑎᓂᑦ.

ᑐᔅᓯᕋᐅᓯᐅᕐᓂᖅ ᖃᕋᓴᐅᔭᕋᓛᕐᓂᑦ ᐃᓕᓐᓂᐊᖅᑎᓄᑦ ᑐᕌᖓᔪᓂᑦ ᐱᔭᕆᐊᑭᑦᑐᖅ. ᑐᔅᓯᕋᐅᑏᑦ ᖃᕋᓴᐅᔭᒃᑯᑦ ᐊᑐᐃᓐᓇᐃᑦ ᐅᕙᓂ https://www.qia.ca/computers-for-students-program/ ᐊᒻᒪᓗ ᕿᓚᒥᕈᓗᒃ 10ᓂᑦ−15 ᒥᓂᔅᓯᓄᑦ ᕿᓚᒥᐅᑎᒋᔪᒥᒃ ᐱᔭᕇᕋᔅᓴᐅᓪᓗᑎᒃ. ᓂᕈᐊᖅᑕᐅᒍᕕᑦ, ᖃᕋᓴᐅᔭᖅ ᑐᔫᑕᐅᒐᔭᖅᑐᖅ ᐃᓕᔅᓯᓐᓄᑦ ᐱᑖᕆᓛᕋᕕᐅᒃ ᐱᒋᓂᐊᓕᕐᓗᒍ.

ᑭᓇᑐᐃᓐᓇᖅ ᐃᓄᒃ ᐃᓕᓐᓂᐊᖅᑎ ᐅᑭᐅᓕᒃ 8ᓂᑦ 18ᓄᑦ ᓄᓇᖃᕐᓯᒪᔪᖅ ᐊᑕᐅᓯᕐᒥᒃ ᐊᕐᕌᒍᒥᐅᒐᓗᐊᖅ ᓇᓕᑐᐃᓐᓇᖏᓐᓂ 13ᓂᑦ ᕿᑭᖅᑕᓂ ᓄᓇᓕᐅᔪᓂᑦ ᐱᓇᓱᐊᕈᓐᓇᖅᑐᖅ.

ᓯᕗᓪᓕᕐᒥ ᑮᓇᐅᔭᐃᑦ ᑖᒃᑯᓄᖓ ᐃᑲᔫᑎᓄᑦ ᐅᑯᓇᙶᕐᓯᒪᔪᔪᑦ ᒫᔅᑕᑳᑦ ᑐᙵᕕᐊᓂ Mastercard Foundation ᐊᒻᒪᓗ ᒐᕙᒪᑐᖃᒃᑯᓐᓂ.

ᒪᑐᕕᔅᓴᖓ ᑐᔅᓯᕋᐅᓯᐅᕐᓂᕐᒧᑦ ᔪᓚᐃ 24, 2020 5:00ᒨᖅᑲᑦ ᐅᓐᓄᓴᒃᑯᑦ ᑲᓇᓐᓇᐅᑉ ᓯᕿᙳᔭᖓ ᒪᓕᓪᓗᒍ.

ᑐᑭᓯᒋᐊᒃᑲᓐᓂᕈᒪᒍᔅᓯ, ᑐᑭᓯᒋᐊᕐᕕᐅᖃᑦᑕᕐᓕ:

ᓰᒪ ᓴHᐊ ᔨᐅᕋHᐃ,

ᑐᑭᒧᐊᑦᑎᑦᑎᔨ ᑐᓴᐅᒪᖃᑦᑕᐅᑎᓂᕐᒧᑦ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ

szerehi@qia.ca

867.975.8413

1.800.667.2742