ᑐᓴᒐᒃᓴᑦ: ᕿᑭᖅᑕᓂᒃᑯᑦ ᐱᕙᓪᓕᐊᒻᒪᑕ ᐃᓄᐃᑦ ᐊᐅᓚᑦᑎᓂᖏᓐᓂᒃ ᑕᓪᓗᕈᑎᐅᑉ ᐃᒪᖓᓂ ᑲᓇᑕᒥ ᐃᒫᓂ ᓴᐳᔾᔨᕕᒻᒥᑦ
ᑕᒫᓂ ᐱᓇᓱᐊᕈᓯᕐᒥ ᐃᖃᓗᓐᓂ ᐃᒪᒃᑯᑦ, ᐅᕝᕙᓘᓐᓃᑦ ᐃᓄᐃᑦ ᐅᖃᐅᔾᔨᒋᐊᖅᑏᑦ ᑲᑎᒪᔨᕋᒫᑦ ᑕᓪᓗᕈᑎᐅᑉ ᐃᒪᖓᑕ ᒥᔅᓵᓄᑦ, ᑲᑎᒪᖃᑎᒌᓚᐅᖅᑐᑦ ᓯᕗᓪᓕᕐᐹᒥ.
ᒪᐃᒃ ᔭᐃᐴᑎ, ᐃᔅᓯᕙᐅᑕᖓᑦ ᐃᒪᒃᑯᑦ ᐊᒻᒪᓗ ᕿᑭᖅᑕᓂᒃᑯᓐᓄᑦ ᑲᑎᒪᔨ ᑲᖏᖅᑐᒑᐱᒻᒥᐅᓂᑦ, ᖁᕕᐊᓱᓪᓚᕆᑦᑐᖅ ᑲᑎᒪᖃᑎᒌᒍᓐᓇᕐᓯᑕᐃᓐᓇᕐᖓᑕ.
ᑕᓪᓕᒪᐃᑦ ᐅᑭᐅᖅᑕᖅᑐᒥ ᓄᓇᓕᐅᔪᑦ ᕿᑭᖅᑖᓗᒻᒥ ᖃᓂᒋᔭᓖᑦ ᐅᕝᕙᓘᓐᓃᑦ ᑕᒫᓂᒥᐅᑕᐃᑦ ᑕᓪᓗᕈᑎᐅᑉ ᐃᒪᖓᓂ ᓴᐳᔾᔨᕕᒻᒥ ᐅᑯᐊᖑᒻᒪᑕ ᐊᐅᓱᐃᑦᑐᕐᒥᐅᑦ, ᖃᐅᓱᐃᑦᑐᕐᒥᐅᑦ, ᐃᒃᐱᐊᕐᔪᒻᒥᐅᑦ, ᒥᑦᑎᒪᑕᓕᒻᒥᐅᑦ ᑲᖏᖅᑐᒑᐱᒻᒥᐅᓪᓗ
ᐃᒪᒃᑯᑦ ᒫᓐᓇ ᑲᑎᒪᔨᖏᑦ ᑖᒃᑯᐊᖑᒻᒪᑕ ᕿᑭᖅᑕᓂᒃᑯᑦ ᑲᑎᒪᔨᖏᑦ ᑖᒃᑯᓇᓂ ᑕᓪᓕᒪᓂᑦ ᓄᓇᓕᐅᔪᓃᙶᕐᓯᒪᔪᑦ, ᐊᒻᒪᓗ ᕿᑭᖅᑕᓂᒃᑯᑦ ᐃᖅᑲᓇᐃᔭᖅᑎᖏᑦ ᓯᕗᓕᖅᑎᖏᓪᓗ.
ᓄᓇᓕᓐᓂᑦ ᑲᑎᒪᔩᑦ ᐅᑎᖅᑲᑕ ᐊᖏᕐᕋᖏᓐᓄᑦ ᑲᑎᒪᔭᖅᑐᕐᓯᒪᓚᐅᖅᑎᓪᓗᒋᑦ ᑐᔅᓯᕋᓛᕐᖓᑕ ᐃᒪᒃᑯᓐᓄᑦ ᑲᑎᒪᔨᔅᓴᓂᑦ.
ᑲᑎᒪᔨᕋᓛᑦ ᑲᑎᒪᔨᖃᐅᓕᓛᖅᑑᒐᓗᐊᑦ ᕿᑭᖅᑕᓂᒃᑯᓃᙶᕐᓯᒪᔪᓂᑦ ᐊᒻᒪᓗᑦᑕᐅᖅ ᐃᓄᓐᓂᑦ ᐆᒪᔪᕐᓂᐊᑎᒃᑯᓃᙶᕐᓯᒪᔪᓂᑦ, Hᐊᒪᓚᒃᑯᑦ ᑲᒪᑎᔨᖏᓐᓃᙶᕐᓯᒪᔪᓂᑦ, ᐃᓄᑐᖃᕐᓂᑦ ᐊᒻᒪᓗ ᖃᐅᔨᒪᔨᒋᔭᐅᔪᓂᑦ ᐊᒻᒪᓗ ᓄᓇᓕᓐᓂᑦ ᓄᓇᓕᕆᓂᕐᒧᑦ ᑲᑎᒪᔨᕋᓛᖑᖃᑕᐅᔪᓂᑦ ᐊᑐᓂᑦ ᑕᓪᓕᒪᓂᑦ ᓄᓇᓕᐅᔪᓂᑦ.
ᐃᖅᑲᓇᐃᔮᖃᕐᖓᑕ ᐅᖃᐅᔾᔨᒋᐊᖅᑎᐅᓂᕐᒥᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᐱᔾᔪᑎᒋᓪᓗᒋᑦ ᐱᔾᔪᑕᐅᕙᑦᑐᑦ ᑕᓪᓗᕈᑎᐅᑉ ᐃᒪᖓᓂ ᑲᓇᑕᒥ ᐃᒫᓂ ᓴᐳᔾᔨᕕᐅᑉ ᒥᔅᓵᓅᖓᔪᓂᑦ. ᐃᓚᒋᔭᐅᒻᒪᑦ ᑕᒪᓐᓇ ᑲᑐᔾᔨᖃᑎᒌᑦᑐᑎᒃ ᐊᐅᓚᑦᑎᓂᕐᒧᑦ ᑕᓪᓗᕈᑎᐅᑉ ᐃᒪᖓᓂ ᑕᒪᓐᓇ ᐋᔩᕈᑕᐅᓯᒪᒻᒪᑦ ᑖᒃᑯᐊ ᐱᓪᓗᒋᑦ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᕈᑏᑦ.
ᕿᑭᖅᑕᓂᒃᑯᑦ ᐋᔩᖃᑎᒌᒍᑎᖃᕐᓯᒪᔪᑦ ᑕᓪᓗᕈᑎᐅᑉ ᐃᒪᖓᓂ ᑲᓇᑕᒥ ᐃᒫᓂ ᓴᐳᔾᔨᕕᒻᒥᑦ ᐃᓄᓐᓄᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᖃᑎᒌᒍᑎᓂᑦ ᑖᒃᑯᓄᖓ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐊᑎᓕᐅᖅᑕᐅᓚᐅᕐᓯᒪᔪᑦ ᐊᖏᕈᑏᑦ 2019ᖑᑎᓪᓗᒍ.
ᑲᑐᔾᔨᓪᓗᑎᒃ ᐊᐅᓚᑦᑎᖃᑎᒌᓐᓂᕐᒥᒃ ᑕᒪᔅᓱᒥᖓ ᐃᓄᐃᑦ ᐊᒻᒪᓗ ᑲᓇᑕᒥᐅᑦ ᒐᕙᒪᒃᑯᖏᑦ ᑐᙵᕕᐅᒻᒪᑕ ᐊᖏᕈᑎᓄᑦ.