ᓄᑖᑦ ᑲᑎᒪᔨᐅᔪᑦ ᐊᒻᒪᓗ ᐱᓕᕆᐊᒃᓴᓂᑦᑎᑕᐅᓂᖏᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦᑕ ᑲᑎᒪᔨᖏᖕᓂ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦᑕ ᑲᑎᒪᔨᖏᑦ ᑎᒃᑯᐊᖅᓯᓚᐅᖅᐳᑦ ᒪᕐᕉᖕᓂᒃ ᓄᑖᕐᓂᒃ ᑲᑎᒪᔨᐅᔫᓐᓂᒃ ᑕᐃᑯᖓ ᐊᐅᓚᑦᑎᔩᑦ ᑲᑎᒪᔨᖏᖕᓄᑦ, ᐊᒻᒪᓗ ᐱᓕᕆᐊᒃᓴᓂᑦᑎᑕᐅᓪᓗᑎᑦ ᓄᑖᒃ ᐊᐅᓚᑦᑎᔨᐅᔪᓄᑦ ᑲᑎᒪᔨᓄᑦ ᐃᓚᒋᔭᐅᓕᖅᖢᑎᒃ ᔮᓐᓄᐊᕆ 13 ᑲᑎᒪᔩᑦ ᑲᑎᒪᑎᓪᓗᒋᑦ ᐃᖃᓗᖕᓂ ᑎᒃᑯᐊᖅᑕᐅᓚᐅᖅᐴᒃ.
ᑲᑎᒪᔩᒃ ᑎᒃᑯᐊᖅᑐᐅᔫᒃ ᓚᐃᔭ ᓂᖏᐅᖅ ᐊᒻᒪᓗ ᔨᐅᕆᒥ ᑑᕐᖔᓗᒃ ᐃᓚᒋᔭᐅᓪᓗᑎᒃ ᑭᒡᒐᖅᑐᐃᔪᑦ ᐃᓄᖕᓂᑦ. ᓚᐃᔭ ᓄᓇᓕᖕᒥ ᑲᑎᒪᔨᐅᕗᖅ ᐊᐅᓱᐃᑦᑐᕐᒧᑦ, ᑲᑎᒪᔨᐅᒃᑲᓐᓂᓕᕐᒥᔪᖅ ᑭᖑᓪᓕᕐᒥᒃ ᐃᓚᒋᔭᐅᓪᓗᓂ ᑭᒡᒐᖅᑐᐃᔪᖅ ᐃᓄᖕᓂᒃ ᑕᐃᑯᖓ ᑎᒃᑯᐊᖅᑕᐅᔪᖅ ᐊᐅᓚᑦᑎᔩᑦ ᑲᑎᒪᔨᖏᖕᓄᑦ. ᔨᐅᕆᒥ ᓂᕈᐊᖅᑕᐅᕋᑖᕐᓂᑰᕗᖅ ᓄᓇᓕᖕᓂ ᑲᑎᒪᔨᐅᓪᓗᓂ ᐃᒃᐱᐊᕐᔪᖕᒥ.
ᓚᐃᔭ ᐊᒻᒪᓗ ᔨᐅᕆᒥ ᑲᑎᒪᔨᕈᕐᒥᔫᒃ ᑕᐃᒪᐃᑦᑐᓂᓗ ᑖᒥ ᐋᑲᕙᒃ, ᐃᓄᖕᓂᒃ ᑭᒡᒐᖅᑐᐃᔪᖅ ᑭᒻᒥᕈᕐᒥ, ᐸ.ᔪ. ᐊᕿᐊᕈᖅ, ᐊᖓᔪᖅᑳᖅ, ᐅᓛᔪᖅ ᐊᑭᓱᒃ, ᐊᖓᔪᖅᑳᑉ ᑐᖓᓕᐊ, ᐊᒻᒪᓗ ᓕᕙᐃ ᐹᓇᐹᓯ, ᐊᓪᓚᑦᑎ−ᑮᓇᐅᔭᓕᕆᔨ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐊᐅᓚᑦᑎᔩᑦ ᑲᑎᒪᔨᖏᑦ.
ᐅᕝᕙ ᐅᑯᐊ ᑎᑎᖅᑐᖅᓯᒪᓂᖏᑦ ᐱᓕᕆᐊᒃᓴᕆᔭᖏᑦᑕ ᑎᒃᑯᐊᖅᑕᐅᓯᒪᓂᕆᔭᖏᖕᓄᑦ:
- ᕿᑭᖅᑖᓗᒃ ᑯᐊᐳᕇᓴᙵᓄᑦ ᐃᒃᓯᕙᐅᑕᖅ: ᐅᓛᔪᖅ ᐊᑭᓱᒃ
- ᑲᑭᕙᒃ ᑲᑐᔾᔨᖃᑎᒌᖏᖕᓄᑦ ᐃᒃᓯᕙᐅᑕᖅ: ᔨᐅᕆᒥ ᑑᕐᖔᓗᒃ
- ᐊᐅᓚᑦᑎᔩᑦ ᑲᑎᒪᔨᐅᖃᑎᒌᑦᑐᑦ ᓄᓘᔭᑦ ᐅᔭᕋᓐᓂᐊᕐᕕᖓᓄᑦ ᐃᒃᓯᕙᐅᑕᐅᖃᑎᒌᖦᖢᑎᒃ: ᓕᕙᐃ ᐹᓇᐹᓯ
- ᓄᓘᔮᑦ ᐊᕙᑎᖓᑕ ᖃᐅᔨᓴᖅᑕᐅᓂᖓᓄᑦ ᓯᕗᓕᖅᑎ: ᓕᕙᐃ ᐹᓇᐹᓯ
- ᐃᓅᓯᖃᑦᑎᐊᓂᕐᒧᑦ ᐊᑐᐊᒐᖅ ᑲᑎᒪᔨᕋᓛᑦ ᐃᒃᓯᕙᐅᑕᖓ: ᓚᐃᔭ ᓂᖏᐅᖅ
- ᕿᑭᖅᑕᓂ ᓱᓕᔪᕐᓂᐊᓂᕐᒧᑦ ᑭᒡᓕᓯᓂᐊᖅᑏᑦ ᐃᒃᓯᕙᐅᑕᖓ: ᓚᐃᔭ ᓂᖏᐅᖅ
- ᐃᑲᔫᓯᐊᒃᓴᑦ ᑮᓇᐅᔭᖃᕐᕕᖓᓄᑦ ᑲᑎᒪᔨᕋᓛᑦ: ᑖᒥ ᐋᑲᕙᒃ
- ᐃᓄᐃᑦ ᖃᐅᔨᒪᔭᑐᖃᖏᑦ ᐊᒻᒪᓗ ᐃᓚᐅᖃᑕᐅᓂᖏᑦ ᓯᕗᓕᖅᑎ: ᐅᓛᔪᖅ ᐊᑭᓱᒃ
- ᐃᒪᕐᒥᐅᑕᓕᕆᓂᕐᒧᑦ ᐊᒻᒪᓗ ᓂᕐᔪᑎᓕᕆᓂᕐᒧᑦ ᐃᒃᓯᕙᐅᑕᖅ: ᓕᕙᐃ ᐹᓇᐹᓯ
- (ᓄᓇᕗᑦ ᑐᙵᕕᒃ ᑎᒥᖓ) ᐃᓄᐃᑦ ᐃᓅᓯᖃᑦᑎᐊᕐᓂᖓᓄᑦ ᐱᕙᓪᓕᐊᑎᑕᐅᓂᖏᑦᑕ ᐅᖃᐅᔾᔨᒋᐊᖅᑏᑦ ᑲᑎᒪᔨᕋᓛᖏᑦ: ᓚᐃᔭ ᓂᖏᐅᖅ
- (ᓄᓇᕗᑦ ᑐᙵᕕᒃ ᑎᒥᖓ) ᓄᓇᕗᒻᒥ ᐃᓄᐃᑦ ᐆᒪᔪᓕᕆᓂᕐᒧᑦ ᑲᑎᒪᔨᕋᓛᖏᑦ: ᑖᒥ ᐋᑲᕙᒃ
- (ᓄᓇᕗᑦ ᑐᙵᕕᒃ ᑎᒥᖓ) ᐱᖁᑎᕐᔪᐊᓕᕆᓂᕐᒧᑦ ᐊᒻᒪᓗ ᐃᒡᓗᓕᕆᓂᕐᒧᑦ ᐅᖃᐅᔾᔨᒋᐊᖅᑏᑦ ᑲᑎᒪᔨᕋᓛᖏᑦ: ᐅᓛᔪᖅ ᐊᑭᓱᒃ
- ᐃᓚᒌᒃᑐᓄᑦ ᐃᒃᓯᕙᐅᑕᖅ: ᑖᒥ ᐋᑲᕙᒃ