ᐅᑭᐅᖅᑕᖅᑐᑉ ᓯᓚᑦᑐᓴᕐᕕᖓᓂ ᐃᓕᓐᓂᐊᖅᑎᖁᑎᖓᑦ ᐃᐊᓕ ᑐᖏᓕᒃ ᓵᓚᒃᓴᓚᐅᖅᐳᖅ ᒪᓐᑐᕆᐊᓪ ᑮᓇᐅᔭᖃᕐᕕᖓ ᓯᕗᓪᓕᖅ ᓴᓇᙳᐊᒐᑦ! $7,500−ᓂᑦ ᑮᓇᐅᔭᓂᑦ ᐱᔾᔪᓯᐊᖅᑖᖅᑐᒥᓂᐅᓪᓗᓂ ᐅᔭᒥᓕᐊᕆᔭᒥᓂᖓᓄᑦ ᑕᐃᔭᐅᔪᖅ, “ᓂᕆᐅᓐᓂᕐᒥᒃ ᓇᓂᓯᓂᖅ”.

“ᓂᕆᐅᓐᓂᖅ ᐊᑐᖅᑕᐅᓲᖑᕗᖅ ᐱᐅᓂᖅᓴᒥᒃ ᐅᓪᓗᖃᓕᖁᓪᓗᑕ, ᓇᓂᓯᓗᑕ ᖁᕕᐊᓱᓐᓂᕐᒥᒃ ᐊᒻᒪᓗ ᓇᒡᓕᖕᓂᕐᒥᒃ,” ᐅᖃᖅᑐᓂ ᑐᖏᓕᒃ, ᐃᓕᓴᕆᔭᐅᓚᐅᖅᑐᖅ ᑕᒫᓂ ᐱᓇᓱᐊᕈᓯᕐᒥ ᐊᕕᑦᑐᖅᓯᒪᔪᓂ ᓵᓚᒃᓴᖅᑐᒥᓂᐅᓂᖓᓄᑦ ᓄᓇᕗᒻᒥ.

ᑐᖏᓕᒃ ᓵᓚᒃᓴᖅᑐᒥᓂᖅ ᐅᔭᒥᓕᐊᖓ ᓇᓗᓇᐃᒃᑯᑕᐅᕗᖅ ᐊᑐᖅᑕᐅᕙᑦᑐᒥ, ᐊᓯᐅᔨᔪᒥᓂᐅᓂᑦᑎᓐᓄᑦ ᖁᕕᐊᓱᙱᑦᑐᑕ ᐋᓐᓂᐊᓚᐅᖅᑐᑕ ᐊᒻᒪᓗ ᓂᕆᐅᓐᓂᖅᑖᓕᕆᓪᓗᑕ ᓇᓂᓯᖁᓪᓗᑕ ᓄᑖᕐᒥᒃ ᓇᒡᓕᖕᓂᕐᒥᒃ. ᓯᕗᓪᓕᖅᐹᑦᑎᐊᒥ ᐊᑐᕆᐅᕋᓗᐊᖅᑎᓪᓗᒍ ᓴᕕᕋᔭᕐᒥᒃ ᐊᒻᒪᓗ ᒎᓗᓂᒃ ᓱᓗᙳᐊᖏᖕᓄᑦ ᑕᑯᒥᓇᓗᖅᑯᑎᓕᐊᕆᕙᑦᑕᖏᖕᓂᑦ, ᐅᖃᓚᐅᖅᐳᖅ ᐊᒃᓱᕈᕈᑎᒋᓛᕆᓚᐅᖅᐹ ᐃᓕᓪᓗᒍ ᕿᑎᐊᓄᑦ ᐊᐃᕕᑉ ᑑᒑᖓ ᓴᓇᙳᐊᖅᓯᒪᔪᖅ.

ᒪᓐᑐᕆᐊᓪ ᑮᓇᐅᔭᖃᕐᕕᖓ ᓯᕗᓪᓕᖅᐹᖅ ᓴᓇᙳᐊᖔᖅ! ᐊᕐᕌᒍᑕᒫᑦ ᐊᑭᑦᑐᕋᐅᑎᑎᑦᑎᒍᑕᐅᕗᖅ ᐊᖓᔪᖅᑳᓂ ᓯᓚᑦᑐᓴᕐᕕᓂ ᐊᒻᒪᓗ ᐃᓕᓴᐃᔨᓂ ᓯᓚᑦᑐᓴᕐᕕᓂ 110-ᖑᔪᓂᑦ ᐊᑦᑎᓂᖅᓴᒥ ᐃᓕᓐᓂᐊᖅᑐᑦ ᓴᓇᙳᐊᖅᑐᓕᕆᓂᕐᒧᑦ ᑲᓇᑕᒥ ᓂᕈᐊᒐᒃᓴᓕᐅᖁᔭᐅᓲᖑᓪᓗᑎᑦ ᐃᓕᓐᓂᐊᖅᑎᓂᑦ ᑐᓂᓯᓗᑎᑦ ᓴᓇᔭᒥᓂᐅᔪᓂᑦ. ᕿᒥᕐᕈᔩᑦ ᓴᓇᙳᐊᖅᑐᓕᕆᔨᒻᒪᕆᐅᔪᑦ ᓂᕈᐊᖅᑕᐅᓯᒪᕗᑦ ᓂᕈᐊᖁᔭᐅᓪᓗᑎᑦ ᑕᒫᓂ ᐊᕐᕌᒍᒥ ᓵᓚᒃᓴᕋᔭᖅᑐᒥ 295-ᖑᔪᒥᓂᐅᓪᓗᑎᑦ ᑐᓂᔭᒥᓃᑦ.

ᓵᓚᒃᓴᖃᑕᐅᓪᓗᓂ, ᑐᖏᓕᑉ ᓴᓇᙳᐊᒐᖓ ᑕᑯᒃᓴᐅᑎᑕᐅᒐᔭᖅᐳᖅ ᓯᕗᓪᓕᖅᐹᑦᑎᐊᒥ ᖃᕋᓴᐅᔭᒃᑯᑦ ᒪᓐᑐᕆᐊᓪ ᑮᓇᐅᔭᖃᕐᕕᖓᑕ ᓯᕗᓪᓕᖅ ᓴᓇᙳᐊᒐᖅ! ᑕᑯᒃᓴᐅᑎᑦᑎᓂᖏᖕᓂᑦ ᓯᑏᕝᕙ 15-ᒥ ᑎᑭᑦᑐᒍ ᐊᒃᑑᕝᕙ 16-ᒧᑦ ᐅᕙᓂ artmuseum.utoronto.ca.

2018-ᒥᓂᑦ, ᑐᖏᓕᒃ ᐃᓕᓐᓂᐊᖃᑦᑕᕐᓂᑰᕗᖅ ᑕᑯᒥᓇᓗᖅᑯᑕᓂᑦ ᐃᓕᓐᓂᐊᕐᕕᖓᓂ ᐃᖃᓗᓐᓂ ᐅᑭᐅᖅᑕᖅᑐᑉ ᓯᓚᑦᑐᓴᕐᕕᖓᓂ. ᓴᓇᒋᐊᓯᓕᓚᐅᖅᓯᒪᔪᖅ ᑖᔅᓱᒥᖓ ᒪᐃ 2020-ᐅᑎᓪᓗᒍ ᐊᒻᒪᓗ ᐱᔭᕇᖅᓴᕋᐃᒋᐊᖃᓕᓚᐅᖅᑖ ᓵᓚᒃᓴᖃᑕᐅᒐᓱᐊᕐᓂᐊᕋᒥ. ᒫᓐᓇᓕ ᑐᖏᓕᒃ ᐃᖅᑲᓇᐃᔮᖃᓕᕆᕗᖅ ᐱᔭᕇᕐᓗᓂ ᐃᓕᓐᓂᐊᖅᑕᒥᓂᒃ, ᐸᕐᓇᒃᐳᖅ ᐊᑐᕐᓂᐊᖅᑐᓂᒋᑦ ᑮᓇᐅᔭᑦ ᓵᓚᖃᐅᓯᐊᖏᑦ ᓴᓇᙳᐊᒃᑲᓐᓂᕈᑎᒋᓗᓂᒋ ᑕᑯᒥᓇᓗᖅᑯᑎᓕᐅᕈᑎᒋᓗᒋᓪᓗ.