ᐃᑉᐱᐊᕐᔪᖕᒥᐅᖕ ᓵᓐ ᓴᐸ ᐊᒻᒪ ᑕᐃᔪᓪ ᐊᐅᓚ ᒥᑦᑎᒪᑕᓕᓂᐊᕐᓂᓚᐅᕐᑑᖕ ᐃᑉᐱᐊᕐᔪᖕᒥᒃ ᖃᒧᑕᐅᔭᕐᑐᑎᖕ ᐱᖓᑦᑎᐅᑎᓪᓗᒍ, ᔮᓐᓄᐊᕆ 6, ᐃᑲᕐᕋᓂᑦ ᖁᓕᓂᑦ ᒪᕐᕉᓂᓪᓗ (12) ᐊᑐᖅᑕᐅᒐᔪᑦᑑᒐᓗᐊᖅ ᐃᖏᕐᕋᔪᓄᑦ, ᖃᓄᐃᓕᑳᓪᓚᓂᓚᐅᕐᖓᑎᖕ.

ᐊᐅᓪᓚᕐᓂᐊᖅᑑᖕ ᖃᕆᓴᐅᔭᒃᑯᑦ ᒫᓃᑦᑐᖔᕈᑎᒥᑦ ᐊᑐᖅᑐᒥᓃᖕ ᐊᑎᓕᐅᕐᑐᑎᖕ ᐃᑉᐱᐊᕐᔫᑉ ᕼᐋᒪᓚᖓᓂᑦ ᐅᓪᓛᖓᒍᑦ ᐊᐅᓪᓚᕐᓂᖅᑐᑎᓪᓗ ᒥᑦᑎᒪᑕᓕᓕᐊᕐᑑᖕ ᐅᓪᓗᖓᒍᑦ.

ᓂᓪᓚᓱᑦᑐᕈᓘᓐᓂᓚᐅᕐᖓᑦ, ᓂᓪᓕᓇᕐᓂᖓ -35ᒦᑲᑕᑦᑐᓂ ᐊᒻᒪ ᐊᓄᕆᔪᕈᓘᓪᓗᓂ ᓱᒃᑲᓂᖓ 84 ᑭᓚᒦᑕᒥᖃᑦᑕᕐᑐᓂ ᑎᑭᓪᓚᑦᓯᒐᐃᒻᒪᓐ.  ᖃᐅᖓᒍᑦ ᓯᓚᕈᔫᓂᕐᓴᐅᓂᕐᑐᓂ, ᐊᓄᕆᖓ ᑎᑭᓪᓚᑦᓯᖃᑦᑕᕐᑐᓂ 90 ᑭᓚᒦᑕᓄᑦ.

ᐅᓪᓘᑉ ᐊᐃᑉᐸᖓᓂ ᖃᐅᒻᒪᑦ, ᑐᓴᖅᑐᖃᓚᐅᕐᓂᖏᑦᑐᖅ ᓱᓕ ᖃᒧᑕᐅᔭᕐᓯᒪᔫᓐᓂᖕ.  ᕿᓂᖅᑏᑦ ᐊᐅᓪᓚᕐᑐᒥᓃᑦ ᔮᓐᓄᐊᕆ 8ᖑᑎᓪᓗᒍ ᔭᒐᐅᖅᑲᔫᖕ ᕿᓂᕆᐊᕐᑕᐅᓪᓗᑎᖕ.  ᒪᕐᕉᓕᖓᔫᓐᓂᖕ ᐊᐅᓪᓚᕐᑐᖃᓚᐅᕐᑐᖅ, ᐊᐃᑉᐸᖓ ᒥᑦᑎᒪᑕᓕᖕᒥᖕ ᐊᐃᑉᐸᖓᓗ ᐃᑉᐱᐊᕐᔪᖕᒥᖕ ᕿᓂᖅᑏᑦ ᐃᓪᓕᓂᒃᑯᑦ ᐃᓪᓗᒌᒥᖕ ᕿᓂᕆᐊᓕᕐᑐᑎᖕ.

ᕿᓃᓐᓇᖅᑐᑎᖕ, ᖃᐅᑐᐊᕐᒪᑦ ᔭᒐᐅᖅᑲᓪᓗᑎᒃ ᓱᓕ ᐊᒻᒪ ᕿᓂᖅᑐᑦᓴᑲᓐᓂᕐᓂᑦ ᐃᑲᔪᕐᑎᑖᕆᐊᖃᓕᓚᐅᕐᑐᑦ.

ᑕᐃᒪᓕ ᕿᓂᖅᑎᒃᑯᑦ ᐊᐱᕆᓐᓂᓚᐅᕐᑐᑦ ᐃᑉᐱᐊᕐᔫᑉ ᓇᐅᑦᑎᖅᓱᖅᑎᖏᓐᓂᑦ ᐃᑲᔪᕈᓐᓇᕐᒪᖔᑕ.  ᓯᕗᓪᓕᕐᒥ ᓇᐅᑦᑎᖅᓱᖅᑏᑦ ᐅᑕᖅᑭᑲᐃᓐᓇᖁᔭᐅᓪᓗᑎᖕ ᐅᖄᓚᕕᐅᔪᒫᕐᓂᐊᕐᓗᑎᖕ ᑭᓯᐊᓂᓕ ᔮᓐᓄᐊᕆ 10ᖑᕐᒪᑦ ᐃᑲᔪᖁᔭᐅᓕᓚᐅᕐᑐᑦ ᕿᓂᖅᑐᓄᑦ.

ᓂᐅᕆ ᐃᖃᓗᔾᔪᐊᖅ, ᓄᓇᖓᓂ ᐊᖏᔪᖅᑳᕆᔭᐅᔪᖅ ᐃᑉᐱᐊᕐᔫᑉ ᓇᐅᑦᑎᖅᓱᖅᑎᖏᓐᓄᑦ, ᐊᕐᕌᒍᓂᖕ ᖁᓕᓂᑦ ᑕᓪᓕᒪᓂᓪᓗ (15) ᕿᓂᖅᑎᐅᓯᒪᓕᕋᒥ ᐱᓕᒻᒪᑦᓯᒪᓕᕐᑐᓂ ᑐᑭᒧᐊᕐᑎᑦᓯᓂᖕᒧᑦ ᕿᓂᖅᑐᓂᑦ, ᐊᐅᓚᑦᑎᓕᕐᑐᓂ ᑐᑭᒧᐊᕐᑎᑕᐅᒋᐊᓕᓐᓂᑦ.  ᒫᑎᐅ ᐊᑭᑯᓗᒃ ᐊᒻᒪ ᔫᓇ ᒪᒃᐸ ᐊᐱᕆᔭᐅᓚᐅᕐᑑᖕ ᐊᐅᓪᓚᖃᑕᐅᔪᓐᓇᕐᒪᖔᑕ.

ᓇᐅᑦᑎᖅᓱᖅᑏᑦ, ᒫᑎᐅ ᔫᓇᓗ, ᐅᓯᓕᕐᓱᐃᓪᓗᑎᖕ ᖃᒧᑎᒥᓐᓂᖕ, ᑕᖁᐊᑦᓴᒋᕐᑐᑎᖕ, ᐊᐅᓪᓚᕐᑐᑎᓪᓗ ᓈᑦᓯᐅᖑᔭᒥ ᔮᓐᓄᐊᕆ 10ᖑᑎᓪᓗᒍ 3:30 ᐅᓪᓗᒃᑯᑦ ᕿᓂᖅᑎᓄᑦ ᕿᓂᕆᐊᖃᑕᐅᓕᕐᑐᑎᖕ.

ᓯᓚᕈᔫᓂᖓᓄᑦ ᐱᔭᕆᐊᑐᓐᓂᓚᐅᕐᑐᖅ ᕿᓂᕐᑐᓄᑦ.  ᐊᓄᕆᒧᑦ ᐃᓪᓕᓃᑦ ᐊᐱᓯᒪᓪᓗᑎᖕ, ᖃᒧᑕᐅᔭᒧᑦ ᑐᒥᓯᕕᑦᓴᐅᑦᓯᐊᕋᓂ.

ᐊᔪᕈᓐᓃᕈᓘᔭᕋᒥ, ᓵᓐ ᑕᐃᔪᒃᑯᒃ, ᐊᐅᓪᓚᕐᑎᑦᓯᔪᓐᓇᕐᓯᑕᐃᓐᓇᓂᕐᑐᑎᖕ ᖃᖓᑦᑕᖅᑎᑕᐅᓯᒪᔪᒃᑯᑦ ᒫᓃᑉᐳᖔᕈᒻᒥᑦ ᓱᑯᑦᓯᐊᓃᒻᒪᖔᕐᒥ ᓈᑦᓯᐅᖑᔭᐅᑎᓪᓗᒍ.  ᖁᒧᑕᐅᔭᕐᓯᒪᔫᖕ ᓇᓗᓇᐃᕐᓯᔪᒥᓃᖕ ᐊᐅᓪᓚᕐᑎᑕᖓ 1:30ᒨᕐᑎᓪᓗᒍ ᐅᓪᓗᒃᑯᑦ, ᑭᓯᐊᓂ ᑎᐊᐱ ᔮᓐᓴᓐ, ᐃᑉᐱᐊᕐᔫᑉ ᕼᐋᒪᓚᖓᓐᓄᑦ ᐊᐅᓚᑦᑎᔨᒻᒪᕆᒃ, ᑎᑭᕝᕕᐅᑕᐃᓐᓇᓂᕐᑐᓂ 5:30 ᐅᓐᓄᓴᒃᑯᑦ.

ᖃᖓᑦᑕᖅᑎᑕᐅᓯᒪᔪᒃᑯᑦ ᒫᓃᑉᐳᖔᕈᑎᒃᑯᑦ ᕿᓂᖅᑐᑦ ᓇᓂᓯᓕᓚᐅᕐᑐᑦ ᓵᓐᒥᖕ ᑕᐃᔪᒥᓪᓗ ᓱᑯᑦᓯᐊᓃᒻᒪᖔᑎᖕ ᓄᓇᓐᖑᐊᒃᑯᑦ ᓇᓂᔭᐅᓪᓗᑎ.   ᑐᑭᓯᒐᒥ ᓱᑯᑦᓯᐊᓃᒻᒪᖔᑎᖕ, ᕿᓂᖅᑏᑦ ᓇᓂᓯᔪᓐᓇᕐᓯᓚᐅᕐᑐᑦ ᑕᒪᒃᑮᓐᓂᖕ 4:30ᑎᓪᓗᒍ ᐅᓪᓛᒃᑯᑦ ᖃᐅᑐᐊᕐᒪᑦ.

ᓵᓐ ᑕᐃᔪᒃᑯᖕ ᑐᐱᖅᑐᒥᓃᖕ, ᓇᓪᓕᑭᑦᑐᑎᖕ ᓯᓂᖃᑦᑕᕐᑐᒥᓃᖕ.  ᖃᓄᐃᓚᐅᖏᑦᑑᖕ ᓇᓂᔭᐅᒐᒥ.

ᖃᒧᑕᐅᔭᕐᓯᒪᔫᖕ ᓇᓂᔭᐅᓂᖏᓐᓄᑦ ᑎᑭᑦᑐᒍ, ᐃᑲᕐᕋᓂᑦ ᖁᓕᑦ ᐱᖓᓲᔪᕐᑐᓂᓪᓗ (16) ᑐᕋᐃᓐᓇᕐᑐᑎᖕ ᕿᓃᓐᓇᓚᐅᕐᑐᑦ, ᐅᖄᓚᖃᑦᑕᐅᑏᓐᓇᕐᑐᑎᖕ ᒥᑦᑎᒪᑕᓕᖕᒧᑦ ᐃᑉᐱᐊᕐᔪᖕᒧᓪᓗ ᕿᓂᖅᑎᐅᖃᑕᐅᔪᓄᓪᓗ.

ᐃᓛᖕ “ᑕᖃᓇᕈᔪᓚᐅᕐᑑᖕ,” ᐅᖃᖅᑐᓂ.

ᓵᓐ ᖃᒧᑕᐅᔭᖏᖕ ᓱᕋᐅᑎᓐᓂᓚᐅᕐᖓᑎᖕ, ᑕᐃᒪᐃᒻᒪᓐ ᑕᐃᔪᒃᑯᖕ ᕿᓂᖅᑕᐅᒋᐊᖃᓕᓚᐅᕐᑑᖕ. ᓯᐊᕐᕆᔭᐅᑎᖓᑕ ᐊᐃᑉᐸᖓ ᓄᖑᓐᓂᑦᓯᐊᖑᓕᕐᓂᕐᖓᑦ.

ᕿᓂᖅᑏᑦ ᐅᑎᕈᔾᔨᓪᓗᑎᖕ ᑕᐃᔪᒥᖕ ᓵᓐᒥᓪᓗ ᓇᒡᒐᔾᔭᐅᒥ ᔮᓐᓄᐊᕆ 11ᖑᑎᓪᓗᒍ.  ᓂᐅᕝᕕᐅᕆᐊᕐᓯᒪᔪᓄᑦ ᑐᓐᖓᓱᐊᑎᑕᐅᑦᓯᐊᓚᐅᕐᑐᑦ.

ᓇᐅᑦᑎᖅᓱᖅᑏᑦ ᓯᕗᓪᓕᕐᐹᕆᓐᖏᑕᖓ ᕿᓂᖅᑐᓄᑦ ᐃᑲᔪᖃᑕᐅᓂᖓᑦ.  ᐃᑲᔪᕐᓯᒪᒻᒥᔪᑦ ᒪᕐᕈᐃᓱᕐᑐᑎᖕ ᕿᓂᖅᑐᖃᕐᑎᓪᓗᒍ ᐃᑉᐱᐊᕐᔪᖕᒥ, ᐊᓯᖏᓐᓂᓪᓗ ᓄᓇᓕᓐᓂᑦ ᕿᓂᖅᑐᓄᑦᑕᐅᖅ ᐃᑲᔪᖃᑦᑕᕐᓯᒪᓪᓗᑎᖕ.

ᐸᖅᑭᔨᐅᓪᓗᑎᖕ ᑕᓪᓗᕈᑎᐅᑉ ᐃᒪᖓᓄᑦ, ᓇᐅᑦᑎᖅᓱᖅᑏᑦ ᖃᐅᔨᓴᐃᓐᓇᕐᖓᑕ ᓯᑰᑉ ᖃᓄᐃᓕᕙᓪᓕᐊᓂᖓᓂᑦ ᐃᖏᕐᕋᕕᑦᓴᐅᒐᓗᐊᕐᒪᖔᑦ ᐊᒻᒪ ᐃᑲᔪᕐᑎᐅᓪᓗᑎᖕ ᕿᓂᖅᑐᖃᕆᐊᖃᓕᕋᐃᒻᒪᑦ ᓄᓇᒥᓐᓂ, ᑐᑭᓯᐅᒪᓂᕐᒥᒍᑦ ᖃᐅᔨᖃᑦᑕᕐᓯᒪᔭᖏᓐᓂᑦ ᓄᓇᖅᑲᑎᒌᑦ ᐊᒻᒪ ᓄᓇᒥᓂᖕ ᖃᐅᔨᒪᑦᓯᐊᕐᓂᖏᓐᓄᑦ ᐃᑲᔪᕈᓐᓇᕐᓯᓯᒪᕗᑦ ᐃᓅᖃᑎᒥᓂᖕ ᕿᓂᖅᑕᐅᔪᖃᕆᐊᖃᓕᕋᐃᒻᒪᑦ.

ᔪᓚᐃ  2018ᖑᑎᓪᓗᒍ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐱᒋᐊᕐᑎᑦᓯᓚᐅᕐᓯᒪᒻᒪᑕ ᑕᓪᓗᕈᑎᐅᑉ ᐃᒪᖓᓄᑦ ᓇᐅᑦᑎᖅᓱᖅᑎᓂᑦ ᐆᑦᑐᕋᕐᓯᓐᓈᑦ ᐃᑉᐱᐊᕐᔪᖕᒥ ᐱᑎᑕᐅᒐᒥ ᐃᑲᔫᑕᐅᔪᒫᕐᓂᐊᕐᑐᓂᑦ ᑲᓇᑕᒥ ᑕᕆᐅᕐᒥ ᓴᐳᔾᔨᕕᖏᓐᓄᑦ ᑐᕌᖓᔪᓂᑦ.  ᑕᐃᒪᓐᖓᑦ ᐃᑲᔫᑕᐅᓯᒪᔪᑦ ᐃᓚᓯᓯᒪᓕᕐᑐᑦ ᓄᓇᓕᓐᓂ ᑕᓪᓕᒪᓂᑦ ᑕᓪᓗᕈᑎᐅᑉ ᐃᒪᖓᑕ ᐊᕙᑎᐊᓃᑦᑐᑦ ᐱᒋᐊᕐᑎᑕᐅᕙᓪᓕᐊᓪᓗᑎᖕ.