2019-ᒥ ᐊᕐᕌᒍᑕᒫᖅ ᐱᓕᕆᐊᖑᔪᒥᒃ ᕿᒥᕐᕈᓪᓗᑎᒃ ᑲᑎᒪᓂᕐᒥ ᐱᓇᓱᐊᕈᓯᐅᓚᐅᖅᑐᒥ ᑲᖏᖅᑐᒑᐱᒻᒥ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖓ ᐃᓚᐅᓚᐅᖅᑐᖅ 2019-ᒥ ᐊᕐᕌᒍᑕᒫᖅ ᐱᓕᕆᐊᖑᔪᒥᒃ ᕿᒥᕐᕈᓪᓗᑎᒃ ᑲᑎᒪᓂᕐᒥ ᐱᓇᓱᐊᕈᓯᐅᓚᐅᖅᑐᒥ ᑲᖏᖅᑐᒑᐱᒻᒥ.
ᑖᓐᓇ ᑲᑎᒪᓂᐅᓚᐅᖅᑐᖅ ᓄᓘᔮᓕᕆᓂᕐᒥᑦ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᕈᑎᓂᑦ ᐱᔾᔪᑎᖃᖅᑐᑎᒃ ᑖᒃᑯᐊ ᕿᑭᖅᑕᓂᒃᑯᑦ ᐹᕕᓐᓛᓐᑯᓪᓗ.
ᑲᑎᒪᖃᑦᑕᓂᐊᕐᖓᑕ ᓇᓪᓕᑭᑕᕐᓗᒋᑦ ᑕᓪᓕᒪᑦ ᓄᓇᓖᑦ ᐊᑑᑎᕕᐅᔪᑦ ᐅᔭᕋᓐᓂᐊᓂᕐᒧᑦ. ᑕᒫᓂ ᐊᕐᕌᒍᒥ, ᑲᑎᒪᔭᖅᑐᕐᓯᒪᓚᐅᖅᑐᑦ ᑲᖏᖅᑐᒑᐱᒻᒥᐅᑦ ᐱᖅᑯᓯᓕᕆᕝᕕᖓᓐᓂ ᐃᓕᓴᕕᒻᒥ ᒪᐃ 28ᒥ ᒪᐃ 30ᒧᑦ.
ᑲᑎᒪᔭᖅᑐᕐᓯᒪᔪᔪᑦ ᑲᑎᒪᓂᕐᒧᑦ ᐅᑯᐊ, ᕿᑭᖅᑕᓂᒃᑯᑦ ᓯᕗᓕᖅᑎᖏᑦ ᐃᖅᑲᓇᐃᔭᖅᑏᑦ, ᐹᕕᓐᓛᓐᑯᑦ ᑭᒡᒐᑐᖅᑎᖏᑦ ᐊᒻᒪᓗᑦᑕᐅᖅ ᐃᓄᑐᖃᕐᓂᑦ ᐃᓅᓱᑦᑐᓂᓪᓗ ᑭᒡᒐᑐᖅᑏᑦ ᑕᓪᓕᒪᓂᑦ ᓄᓇᓕᓐᓂᑦ ᐊᑑᑎᕕᐅᔪᓃᙶᕐᓯᒪᔪᑦ.
ᑲᑎᒪᓂᕐᒥ ᕿᒥᕐᕈᕕᐅᔪᓐᓇᐸᑦᑐᖅ ᐊᑑᑎᓂᓕᓐᓂᑦ ᐊᒻᒪᓗ ᐱᕚᓪᓕᕈᑕᐅᓯᒪᔪᓂᑦ ᐅᔭᕋᓐᓂᐊᕐᕕᒃ ᐱᔾᔪᑎᒋᓪᓗᒍ. ᐱᕕᖃᕈᑕᐅᕙᒻᒥᔪᖅ ᐃᓄᓕᒫᓄᑦ ᐊᐱᕐᓱᕈᓐᓇᓂᕐᒧᑦ ᐊᒻᒪᓗ ᐊᑐᓕᖁᔨᔾᔪᑎᓕᐅᕐᕕᐅᔪᓐᓇᐸᑦᑐᓂ ᐋᖅᑭᒋᐊᕈᑎᔅᓴᓂᑦ ᓄᓘᔮᓕᕆᓂᕐᒨᖓᔪᓂᑦ.
ᑕᒫᓂ ᐊᕐᕌᒍᒥ ᑲᑎᒪᔭᖅᑐᕐᓯᒪᔪᑦ ᐊᕐᕌᒍᓕᒫᕐᓯᐅᒻᒥᑦ ᐱᓕᕆᐊᕐᒥ ᕿᒥᕐᕈᓂᕐᒥ ᑕᑯᔭᖅᑐᕈᓐᓇᕐᓯᔪᒻᒥᔪᑦ ᓄᓘᔮᓂᑦ ᐅᔭᕋᓐᓂᐊᕐᕕᒻᒥᑦ. ᑲᑎᒪᔭᖅᑐᕐᓯᒪᔪᑦ ᑕᑯᔭᖅᑐᕈᓐᓇᕐᓯᓚᐅᖅᑐᑦ ᐅᔭᕋᓐᓂᐊᕐᕕᒻᒥᑦ ᑕᐃᑲᓂᓗ ᑐᑭᓯᒃᑲᓐᓂᔪᔪᑦ ᐊᐅᓚᓂᕆᕙᑦᑕᖏᑕ ᒥᔅᓵᓅᖓᔪᓂᑦ.
ᑕᑯᔪᓐᓇᕐᓯᔪᔭᕗᑦ ᐃᖅᑲᓇᐃᔭᕐᕕᐅᔪᖅ ᐅᔭᕋᓐᓂᐊᕐᕕᒃ ᐅᖓᓯᒧᑦ. ᐆᑦᑐᕋᔪᒻᒥᔪᒍᑦ ᐊᖁᒋᐅᕐᓴᐅᑎᐅᕙᑦᑐᒥᒃ ᐃᓕᓐᓂᐊᑎᑦᑎᒍᑕᐅᕙᑦᑐᒥᒃ ᓄᓇᒃᑰᕈᑎᕐᔪᐊᓂᑦ ᐊᖁᑎᐅᓂᕐᒥᒃ.
ᐃᓚᒋᔭᐅᓪᓗᓂ ᑕᑯᔭᖅᑐᕐᓯᒪᓂᑦᑎᓐᓄᑦ, ᑲᑎᒪᔭᖅᑐᕐᓯᒪᔪᑦ ᑕᑯᔭᖅᑐᔪᔪᑦ ᓄᑖᕐᒥᒃ ᓇᔪᖅᑕᐅᓂᐊᓕᕐᒥᔪᒥᒃ ᐅᔭᕋᓐᓂᐊᕐᕕᒻᒥ ᑕᐃᔭᐅᓪᓗᓂ ᓴᐃᓕᕕᒃ, ᑖᓐᓇ ᐃᓄᔅᓯᐅᑎᓂᑦ ᓂᕿᓄᑦ ᑰᖃᕐᕕᖃᖅᑐᓂ.
ᐱᐅᓂᕐᐹᖑᓯᒪᔪᖅ ᐅᔭᕋᓐᓂᐊᕐᕕᒻᒧᑦ ᑕᑯᔭᖅᑐᕐᓯᒪᓂᑦᑎᓐᓂ ᐅᐸᔅᓯᓯᒪᑲᐃᓐᓇᕐᓂᕆᓚᐅᖅᑕᕗᑦ ᐊᒥᓲᙱᑦᑑᒐᓗᐊᓂᑦ ᐃᓄᓐᓂᑦ ᐃᖅᑲᓇᐃᔭᖅᑎᓂᑦ ᐅᔭᕋᓐᓂᐊᕐᕕᒻᒥ. ᑕᑯᔪᓐᓇᕐᓯᓚᐅᖅᑕᕗᑦ ᐃᖅᑲᓇᐃᔭᖅᑎᓪᓗᒋᑦ ᐊᒻᒪᓗ ᐅᖃᖃᑎᒋᔪᓐᓇᓯᓪᓗᒋᑦ ᐃᖅᑲᓇᐃᔮᖏᑕ ᒥᔅᓵᓄᑦ.
ᐅᓪᓘᓐᓂᒃ−ᒪᕐᕉᓐᓂᒃ ᑲᑎᒪᓂᕐᒥ ᐅᖃᐅᓯᖃᓚᐅᖅᑐᒍᑦ ᑭᓱᓂᑦ ᑲᔪᓯᑎᑦᑎᓯᒪᒻᒪᖔᑕ 2018ᒥ.
ᕿᑭᖅᑕᓂᒃᑯᑦ ᐹᕕᓐᓛᓐᑯᓪᓗ ᐅᖃᐅᓯᖃᔪᔪᑦ ᐃᖅᑲᓇᐃᔮᖑᓯᒪᔪᓂᑦ ᐱᕚᓪᓕᕈᑎᐅᓂᐊᖅᑐᓂᑦ ᐃᓄᓐᓄᑦ. ᓄᑖᑦ ᐃᑲᔫᓯᐊᔅᓴᑦ ᐋᔩᕋᕈᑎᖃᒃᑲᓂᕐᓂᐅᓚᐅᖅᑐᒥ ᐊᖏᕈᑎᓂᑦ ᓲᕐᓗ $2.25 ᒥᓕᐊᓐᓄᑦ ᐊᑭᑦᑐᕆᐊᖅᑕᐅᓚᐅᖅᑐᑦ ᐃᓄᓐᓂᑦ ᐃᓕᓐᓂᐊᑎᑦᑎᖃᑦᑕᓂᕐᒧᑦ ᑮᓇᐅᔭᖅᑑᑎᔅᓴᑦ 2018ᒥ 2021ᒧᑦ ᐅᖃᐅᓯᐅᔪᒻᒥᔪᑦ.
ᓄᓇᓖᑦ ᐅᖃᐅᓯᖃᖃᑦᑕᔪᔪᑦ ᖃᓄᐃᔅᓴᖏᓐᓂᖏᓐᓂᒃ ᐃᓕᓐᓂᐊᑎᑦᑎᒍᑕᐅᒃᑲᓐᓂᖃᑦᑕᓂᐊᖅᑐᓂᑦ ᐃᓄᓐᓄᑦ ᕿᑭᖅᑕᓂ−ᑲᑐᔾᔨᖃᑎᒌᒍᑕᐅᔪᑎᒍᑦ.
ᑲᑎᒪᓂᖓᑦ ᐱᕕᖃᕈᑕᐅᓚᐅᕐᖓᑦ ᓄᓇᓕᓐᓄᑦ ᐃᑲᔪᕐᓯᕆᐊᕈᑕᐅᔪᓐᓇᖅᑐᓂ ᐊᑐᓕᖁᒐᔭᙳᐊᖅᑕᖏᓐᓂᒃ ᐋᖅᑭᒋᐊᕈᑎᔅᓴᓂᑦ ᑕᒪᒃᑮᓐᓄᒃ ᕿᑭᖅᑕᓂᒃᑯᓐᓄᑦ ᐹᕕᓐᓛᓐᑯᓄᓪᓗ.
ᐃᓚᖏᑦ ᐱᒻᒪᕆᐅᓗᐊᖅᑐᑦ ᐊᑐᓕᖁᔨᔾᔪᑕᐅᓯᒪᔪᓂᑦ ᐅᖃᐅᓯᐅᓯᒪᔪᓂᑦ ᑲᑎᒪᓂᕐᒥ ᐅᑯᐊᖑᕗᑦ:
- ᐋᖅᑭᒋᐊᕈᑎᔅᓴᐅᔪᓐᓇᖅᑐᓂᑦ ᑐᑭᓯᐅᒪᖃᑦᑕᐅᑎᒍᑎᖃᖃᑦᑕᓂᕐᒥᒃ ᓄᓘᔮᓕᕆᓂᐅᑉ ᒥᔅᓵᓅᖓᔪᓂᑦ ᐊᒻᒪᓗ ᐊᖏᖃᑎᒌᒍᑎᓂᑦ ᐃᑲᔫᓯᐊᔅᓴᓂᑦ
- ᐱᔾᔪᑎᖃᕐᓂᓴᐅᓗᑎᒃ ᐃᓄᓐᓂᑦ ᐃᖅᑲᓇᐃᔭᖅᑎᑏᓐᓇᓂᕐᒥᒃ ᐊᒻᒪᓗ ᐃᑲᔪᕐᓂᕐᒥᒃ ᐃᓄᓐᓂᑦ ᐊᑲᐅᙱᓕᐅᕈᑎᖃᖅᑎᓪᓗᒋᑦ ᐊᓐᓇᐃᑐᐃᓐᓇᖃᑦᑕᖏᓪᓗᑎᒃ ᐃᖅᑲᓇᐃᔭᖅᑎᖏᓐᓂᒃ
- ᐱᔭᕆᐊᑭᓐᓂᕐᓴᐅᑎᑕᐅᓗᓂ ᐱᓕᕆᔾᔪᓯᐅᔭᕆᐊᓕᒃ ᐊᑐᕈᒪᓗᓂ ᐆᒪᔪᓕᕆᓂᕐᒧᑦ ᐊᑭᓕᐅᓯᐊᔅᓴᓂᑦ ᑮᓇᐅᔭᓂᑦ
- ᑐᑭᓯᐅᒪᔾᔪᑎᔅᓴᖃᕆᐊᒃᑲᓂᕐᓗᓂ ᑳᓐᑐᓛᑦ ᒥᔅᓵᓄᑦ − ᑭᒃᑯᑦ ᑳᓐᑐᓛᒃᑕᐅᖃᑦᑕᕐᒪᖔᑕ ᓱᒻᒪᐅᒻᒪᖔᕐᓗ
ᐃᓘᓐᓇᑎᒃ ᐊᑐᓕᖁᔨᔾᔪᑕᐅᓯᒪᔪᑦ ᓄᐊᑕᐅᓯᒪᔪᑦ ᐊᒻᒪᓗ ᐅᓂᒃᑳᓃᓛᖅᑐᑎᒃ. ᐅᓂᒃᑲᑦ ᑕᑯᔭᔅᓴᕈᓛᖅᑐᑦ ᑕᒪᒃᑮᓐᓂᒃ ᐅᖃᐅᓰᓐᓂᒃ ᑎᑎᕋᕐᓯᒪᓗᑎᒃ ᕿᑭᖅᑕᓂᒃᑯᑦ ᐹᕕᓐᓛᓐᑯᓪᓗ ᖃᕋᓴᐅᔭᒃᑯᑦ ᐃᑭᐊᖅᑭᕕᖓᓐᓂ ᐊᒻᒪᓗ ᓄᓇᓕᓐᓂᑦ ᑐᓴᐅᒪᑎᑦᑎᔩᑦ ᐊᒻᒪᓗ ᐹᕕᓐᓛᓐᑯᑦ ᑐᓴᐅᒪᑎᑦᑎᔨᖏᑕ ᐊᓪᓚᕝᕕᖏᓐᓂ.
ᕿᑭᖅᑕᓂᒃᑯᑦ ᐹᕕᓐᓛᓐᑯᓪᓗ ᑲᔪᓯᓂᐊᖅᑐᑦ ᑐᑭᓯᑎᑦᑎᒋᐊᖃᑦᑕᓂᕐᒥᒃ ᑕᒫᓂ ᐊᕐᕌᒍᒥ ᑐᓴᖅᑎᑦᑎᓗᑎᓪᓗ ᖃᓄᑐᐃᓐᓇᖅ ᐱᕙᓪᓕᐊᓂᐅᔪᓂᑦ 2019ᒥ ᐊᕐᕌᒍᓕᒫᖅ ᐱᓕᕆᐊᕐᒥ ᕿᒥᕐᕈᓕᖅᑲᑕ ᒥᑦᑎᒪᑕᓕᒻᒥ.
ᑕᐃᒫᖑᐃᓐᓇᐸᒻᒪᑦ, ᐊᑏ ᖃᐅᔨᒋᐊᖃᑦᑕᓂᐊᖅᑯᓯ ᖃᕋᓴᐅᔭᒃᑯᑦ ᐃᑭᐊᖅᑭᕕᑦᑎᓐᓂ qia.ca ᑐᑭᓯᒋᐊᒃᑲᓐᓂᕈᒪᒍᔅᓯ ᐃᖅᑲᓇᐃᔮᑦᑕ ᒥᔅᓵᓄᑦ ᐱᕙᓪᓕᐊᓂᐅᓯᒪᔪᓂᑦ.
ᒫᓐᓇᓕᓴᐅᔫᒥᔪᓂᑦ ᑐᓴᕋᔅᓴᓂᑦ ᑕᑯᖃᑦᑕᕈᓐᓇᕐᒥᔪᓯ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐱᓕᕆᐊᖏᑕ ᒥᔅᓵᓄᑦ ᖃᕋᓴᐅᔭᒃᑯᑦ ᐃᑭᐊᖅᑭᕕᑦᑎᓐᓂ ᕙᐃᔅᐳᒃᑯᑦ ᑐᐃᑐᒃᑯᓪᓗ.