ᓴᖅᑭᑎᑦᑎᕋᑖᓚᐅᖅᑐᒍᑦ 2018-19ᒥ ᐃᑲᔫᓯᐊᔅᓴᓂᑦ ᐊᒻᒪᓗ ᑐᖅᑯᖅᑕᐅᕙᓪᓕᐊᔪᓂᑦ ᑮᓇᐅᔭᓂᑦ ᐊᕐᕌᒍᓕᒫᕐᓯᐅᑎᓂᑦ ᐅᓂᒃᑳᓂᑦ ᐊᒻᒪᓗ ᕿᓚᓈᖅᑐᑕ ᐃᓕᔅᓯᓐᓄᑦ ᑕᑯᖅᑯᑎᒍᒪᔮᖅᑐᒋᑦ. ᐅᓂᒃᑳᑦ ᑕᑯᖅᑯᔾᔨᔪᑦ ᖃᓄᖅ ᑖᒃᑯᐊ ᑮᓇᐅᔭᐃᑦ ᐊᑐᖅᑕᐅᖃᑦᑕᕐᒪᖔᑕ ᐱᓕᕆᑎᑦᑎᒍᑕᐅᕙᑦᑐᓄᑦ ᐅᓪᓗᒥ ᐋᖅᑭᔅᓱᐃᕙᓪᓕᐊᓯᓐᓈᑦ ᐱᓇᓱᐊᕈᑎᔅᓴᓂᑦ ᓴᓂᕐᕙᖅᑕᐅᓯᒪᓂᐊᖅᑐᓂᑦ ᐃᓄᓐᓄᑦ ᓯᕗᓂᔅᓴᑎᓐᓂ ᐊᑐᖅᑕᐅᒐᔭᖅᑐᓂᑦ. ᐅᓂᒃᑳᑦ ᐊᔾᔨᙳᐊᖃᐅᕐᒥᔪᑦ ᐊᒻᒪᓗ ᑎᑎᕋᕐᓯᒪᔪᖅᑕᖃᐅᖅᑐᑎᒃ ᐱᐅᔫᑎᐊᓗᓐᓂᑦ ᐱᓕᕆᐊᖅᑕᖃᖃᑦᑕᓚᐅᕐᖓᑦ ᐃᑲᔫᓯᐊᔅᓴᓂᑦ ᑮᓇᐅᑎᒍᑦ. ᑖᒃᑯᐊ ᐱᓕᕆᐊᑦ ᐅᑯᐊᖑᓪᓗᑎᒃ ᕿᑭᖅᑕᓂ ᐃᓕᖅᑯᓯᓕᕆᓂᕐᒧᑦ ᐃᑲᔫᑏᑦ, ᕿᑭᖅᑕᓂ ᐸᐃᕆᕕᓐᓄᑦ ᐃᑲᔫᑏᑦ ᐊᒻᒪᓗ ᐸᐃᕆᕕᓕᕆᓂᕐᒧᑦ ᐊᒻᒪᓗ ᓱᕈᓯᓛᕐᓂᑦ ᐃᓕᓐᓂᐊᕆᐅᕐᓴᐅᑎᓂᑦ ᐱᕙᓪᓕᐊᑎᑦᑎᓂᕐᒧᑦ ᐊᒻᒪᓗ ᐱᓇᓱᐊᕋᔅᓴᓄᑦ ᑮᓇᐅᔭᑦ ᐱᕈᕐᐸᓪᓕᐊᑎᑦᑎᔾᔪᑕᐅᔪᑦ.

2018-19ᒥ ᑮᓇᐅᔭᖅᑑᑎᔅᓴᑦ ᐊᒻᒪᓗ ᐊᑭᓕᕐᓱᐃᔾᔪᑕᐅᓯᒪᔪᑦ ᑖᒃᑯᓂᖓ ᐱᓕᕆᐊᓂᑦ ᐅᖓᑖᓃᔪᔪᑦ $1.4 ᒥᓕᐊᓐ ᑮᓈᐅᔭᑦ ᐃᓚᒋᔭᐅᓪᓗᑎᒃ:

• $600,000 ᕿᑭᖅᑕᓂ ᐃᓕᖅᑯᓯᓕᕆᓂᕐᒧᑦ ᐃᑲᔫᑏᑦ (QCAP)
• $500,000 ᐸᐃᕆᕕᓐᓄᑦ ᐃᑲᔫᑏᑦ (ᕿᑐᕐᖓᓕᓐᓄᑦ)
• $226,000 ᐸᐃᕆᕕᓐᓄᑦ ᐱᓇᓱᐊᕈᑎᔅᓴᓄᑦ
• $100,000 ᐱᓇᓱᐊᕋᔅᓴᓄᑦ ᑮᓇᐅᔭᑦ

ᑮᓇᐅᔭᓄᑦ ᐃᓯᕐᐸᑦᑐᓄᑦ ᐊᑐᐊᒐᑦ ᐋᖅᑭᓱᖅᑕᐅᓯᒪᒻᒪᑕ ᐊᑐᕋᔅᓴᐅᖁᓪᓗᒋᑦ − ᐃᓄᐃᑦ ᑕᑯᓴᕋᐃᖃᑦᑕᓂᐊᕐᖓᑕ ᖃᓄᖅ ᑮᓇᐅᔭᐃᑦ ᐊᑐᖅᑕᐅᖃᑦᑕᕐᒪᖔᑕ ᕿᑭᖅᑕᓂᒃᑯᓐᓂᑦ. ᑕᐃᒪᐃᒻᒪᑦ ᐊᕐᕌᒍᓕᒫᕐᓯᐅᑎᓂᑦ ᐅᓂᒃᑳᓕᐅᕐᓯᒪᕗᒍᑦ ᑕᑯᖅᑯᔨᑐᐃᓐᓇᖏᑦᑐᓂᑦ ᐱᓕᕆᐊᕆᕙᑦᑕᑎᓐᓂᒃ ᑭᓯᐊᓂᓕ ᐋᖅᑭᔅᓱᐃᓯᒪᓪᓗᑎᒃ ᑮᓇᐅᔭᐃᑦ ᖃᓄᐃᓕᖓᓕᕐᓂᖏᓐᓂᒃ ᐃᑲᔫᓯᐊᔅᓴᓂᑦ ᐊᒻᒪᓗ ᑐᖅᑯᖅᑕᐅᕙᓪᓕᐊᔪᓂᑦ ᑮᓇᐅᔭᓂᑦ.

ᑕᐃᒫᒃ ᐅᓂᒃᑳᓕᐅᖃᑦᑕᕐᓂᖅ ᑲᔪᓯᑎᑦᑎᒍᑕᐅᕗᖅ ᕿᑭᖅᑕᓂᒃᑯᑦ ᑐᓂᓯᒪᓂᖏᓐᓄᑦ ᑮᓇᐅᔭᓕᕆᔾᔪᑎᓂᑦ ᑭᐅᔨᒋᔭᐅᖃᑦᑕᕆᐊᖃᕐᓂᖏᓐᓂᒃ ᐊᒻᒪᓗ ᑐᑭᓯᑎᑦᑎᓯᒪᖃᑦᑕᕆᐊᖃᕐᓂᖏᓐᓂᒃ. ᕿᑭᖅᑕᓂᒃᑯᑦ ᐊᖏᕐᓯᒪᒻᒪᑕ ᑮᓇᐅᔭᓄᑦ ᐊᐅᓚᕕᖓᓐᓂ ᑲᒪᒋᔭᔅᓴᖏᓐᓄᑦ ᐊᒻᒪᓗ ᑮᓇᐅᔭᓕᕆᔾᔪᑎᓂᑦ ᐸᕐᓇᐃᖃᑦᑕᓂᕐᒧᑦ ᑮᓇᐅᔭᓂᑦ ᐱᕚᓪᓕᕈᑕᐅᔪᒫᕐᓂᐊᖅᑐᓂᑦ ᕿᑭᖅᑕᓂ ᐃᓄᖏᓐᓄᑦ, ᑕᐃᒫᒃ ᖃᐅᔨᒪᑦᑎᐊᖃᑦᑕᕐᓂᐊᕋᑦᑕ ᑮᓇᐅᔭᖃᑐᐃᓐᓇᖏᓐᓂᑎᓐᓂᒃ ᐱᓕᕆᐊᔅᓴᓄᑦ ᐅᓪᓗᒥ ᑭᓯᐊᓂᓕ ᐱᓇᓱᐊᕈᑎᔅᓴᖃᖁᔨᓪᓗᑕ ᐃᑲᔪᑎᔅᓴᓂᑦ ᐃᓄᓐᓄᑦ ᓯᕗᓂᔅᓴᑎᓐᓂ.

•