ᐃᖃᓗᐃᑦ, ᓄᓇᕗᑦ – ᐋᒡᒌᓯ10, 2021 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓃᒃᑯᑦ) ᑐᒃᓯᕋᐅᑎᓕᐅᕈᒪᔪᓄᑦ ᐱᔪᒪᓕᕐᒥᔪᑦ ᑕᒪᐃᓐᓄᑦ 2021-2022 ᐃᓕᓐᓂᐊᕆᐊᕐᓂᐊᖅᑐᑦ ᐃᓕᓐᓂᐊᕐᕕᒡᔪᐊᒧᑦ ᐃᑲᔫᓯᐊᖅᑖᕈᑎᒃᓴᖏᓐᓂᒃ. ᐃᓕᓐᓂᐊᕆᐊᕐᓂᐊᖅᑐᑦ ᑐᒃᓯᕋᕈᓐᓇᖅᓯᔪᑦ ᐃᑭᐊᖅᑭᕕᒃᑰᕐᓗᑎᒃ ᑎᑎᕋᕆᐊᓕᖕᓂᒃ ᐱᔪᓐᓇᖅᓯᔪᑦ.

ᑕᒪᓐᓇ ᑕᓪᓕᒪᒋᓂᐊᓕᖅᑕᖓ ᐊᕐᕌᒍ ᕿᑭᖅᑕᓃᒃᑯᑦ ᐃᓕᓐᓂᐊᕐᕕᒡᔪᐊᒧᑦ ᐃᓕᓐᓂᐊᕆᐊᕐᓂᐊᖅᑐᓄᑦ $200,000ᓂᒃ ᐃᑲᔫᓯᐊᖅᑖᖅᑎᑦᑎᔾᔪᑎᒋᓪᓗᓂᔾᔪᒃ. 80ᓂᒃ ᐱᔭᐅᔪᓐᓇᖅᑐᖃᕐᓂᐊᖅᑐᖅ ᐃᑲᔫᓯᐊᖅᑖᕈᑎ ᐊᑐᓂ $2500 ᐊᕐᕌᒍᑕᒫᑦ ᑐᒃᓯᕋᐅᑎᐅᔪᓐᓇᖅᑐᑦ, ᓯᕗᓪᓕᖅᐹᖑᔪᓄᑦ ᓈᓇᓱᖕᓂᖏᓐᓂᒃ ᑭᓯᐊᓂ ᑐᓂᔭᐅᓂᐊᖅᖢᑎᒃ.

ᑖᓐᓇᑦᑕᐅᖅ $5,000 ᔮᓐ ᐊᒪᕈᐊᓕᒃ ᐃᑲᔫᓯᐊᖅᑖᕈᑎ ᐅᐱᒍᓲᑕᐃᓪᓗᓂ ᔮᓐ ᐊᒪᕈᐊᓕᒃ ᐊᒃᓱᕉᑎᖃᓚᐅᕐᒪᑦ ᐃᓄᐃᑦ ᓄᓇᕗᒻᒥ ᐱᕚᓪᓕᖅᑎᓐᓇᓱᒃᖢᓂᒋᑦ. ᕿᑭᖅᑕᓃᒃᑯᑦ ᑐᓂᔭᐅᖅᑳᕆᐊᓕᖕᓂᒃ ᕿᒥᕐᕈᓂᐊᖅᑐᖅ ᐃᓕᓐᓂᐊᕆᐊᒃᑲᓐᓂᕋᓱᒃᑐᑦ ᐃᓄᐃᑦ ᐅᖃᐅᓯᖏᓐᓂᒃ ᐱᖅᑯᓯᖏᓐᓂᓪᓗ ᐃᓕᓐᓂᐊᕐᓂᐊᖅᑎᓪᓗᒋᑦ ᑐᕌᖓᔪᖅ.

“ᕿᑭᖅᑕᓂ ᐃᓕᓐᓂᐊᕆᐊᕐᓂᐊᖅᑐᓄᑦ ᐃᑲᔫᓯᐊᖅᑖᕈᑏᑦ ᐃᑲᔪᖅᓯᒪᓕᖅᑐᑦ ᕿᑭᖅᑕᓂ ᐃᓕᓐᓂᐊᖅᑏᑦ ᐃᓕᓐᓂᐊᕐᕕᒡᔪᐊᒧᙵᐅᓂᐊᖅᑎᓪᓗᒋᑦ;” ᕿᑭᖅᑕᓃᒃᑯᓐᓄᑦ ᐊᖓᔪᖅᑳᖑᓚᐅᑲᒃᑐᖅ ᐅᓛᔪᒃ ᐊᑭᓱᒃ ᐅᖃᖅᑐᖅ. “ᑖᒃᑯᐊ ᐃᑲᔫᓯᐊᖅᑖᕈᑏᑦ ᕿᑭᖅᑕᓂ ᐃᓄᐃᑦ ᐃᓕᓐᓂᐊᖅᑎᖏᑦ ᐊᒃᓱᕉᑎᖃᖏᓐᓂᖅᓴᐅᖁᓪᓗᒋᑦ ᐃᓕᓐᓂᐊᖅᑎᓪᓗᒋᑦ ᐊᑭᓕᕆᐊᓕᖕᓄᑦ.”

ᐃᑲᔫᓯᐊᖅᑖᕈᒪᔪᓄᑦ ᑐᒃᓯᕈᐅᑎᒥᒃ ᐱᓇᓱᒍᑏᑦ ᒪᑐᓂᐊᖅᑐᑦ ᐊᐃᑉᐹᑦ, ᐋᒡᒌᓱ 31, 2021ᒥ.

ᕿᑭᖅᑕᓃᒃᑯᑦ ᐊᔭᐅᖅᑐᐃᒐᓗᐊᖅᐳᑦ ᐃᓕᓐᓂᐊᕆᐊᕐᓂᐊᖅᑐᑦ ᐃᑭᐊᖅᑭᕕᒃᑯᑦ ᐃᑲᔫᓯᐊᖅᑖᕈᑎᓂᒃ ᑐᒃᓯᕋᖁᔭᐅᓪᓗᑎᒃ ᐊᑕᐅᓯᕐᒧᑦ ᑕᒪᐃᓐᓄᓪᓘᓐᓃᑦ ᐊᑐᐃᓐᓇᐅᑎᑕᐅᔪᓂᒃ. ᐃᖅᑲᐅᒪᓂᐊᖅᐳᓯ, ᑐᒃᓯᕋᐅᑎᓕᐅᕐᓂᐊᕈᕕᑦ ᑕᒪᐃᓐᓂ ᐃᓕᓐᓂᐊᕆᐊᕐᓂᐊᕐᓂᕐᓄᑦ ᑎᑎᖅᑲᓕᒫᑦ ᐱᔪᒪᔭᐅᓂᐊᕐᒪᑕ ᑐᓂᔭᕆᐊᖃᕋᔭᖅᑐᑦ.

ᐃᑲᔫᓯᐊᖅᑖᕈᑎᑖᕈᒪᓂᕐᒧᑦ ᑕᒪᐃᓐᓂᒃ ᐅᑯᐊ ᒪᓕᒋᐊᓖᑦ:

• ᑐᒃᓯᕋᖅᑐᖅ ᓄᓇᕗᑦ ᑐᙵᕕᒃᑯᓐᓂᖔᖅᑐᒥᒃ ᐊᐅᒃᑕᔫᖃᕆᐊᖃᖅᑐᑦ ᓈᓴᐅᑎᓕᖕᒥᒃ ᐃᓅᓂᖏᓐᓂᒡᓗ ᓇᓗᓇᐃᖅᑕᐅᓯᒪᖃᑕᐅᓗᑎᒃ ᓄᓇᕗᒻᒥ ᓄᓇᖃᕐᓂᕐᒧᑦ ᐊᖏᖃᑎᒌᒍᑎᓂᒃ ᕿᑭᖅᑕᓂ ᐊᕕᒃᓯᒪᓂᖓᒍᑦ.
• ᐃᓕᓐᓂᐊᖅᑏᑦ ᓄᓇᕗᒻᒥᐅᑕᐅᔭᕆᐊᖃᖅᑐᑦ 13 ᓄᓇᓖᑦ ᕿᑭᖅᑕᓃᑦᑐᑦ ᓇᓗᓇᐃᖅᑕᐅᓯᒪᓂᖏᓐᓂᒃ- ᐊᓯᐊᓂ ᓄᓇᓖᑦ ᐃᓱᒪᒃᓴᖅᓯᐅᕈᑕᐅᓂᐊᕐᒥᔪᑦ ᐃᓕᓐᓂᐊᕐᕕᒡᔪᐊᒧᑦ ᐃᓕᓐᓂᐊᕐᓂᖏᓐᓄᑦ.
• ᓱᓕᕗᖔᕈᑎᒥᒃ ᐃᓕᓐᓂᐊᕐᓂᖏᓐᓄᑦ ᑎᑎᖅᑲᒥᒃ ᐃᓕᓐᓂᐊᕐᕕᒡᔪᐊᕐᓃᖔᖅᑐᒥᒃ ᑐᓂᓯᓯᒪᔭᕆᐊᖃᖅᑐᑦ.
• ᐃᖅᑲᓇᐃᔭᕈᓐᓇᐅᑎᐅᑉ ᓈᓴᐅᑎᖓᓂᒃ ᐱᔭᕆᐊᓕᒃ

ᔮᓐ ᐊᒪᕈᐊᓕᒃ ᐃᑲᔫᓯᐊᖅᑖᕈᑎᒧᑦ ᑐᒃᓯᕋᖅᑐᑦ ᐅᑯᓂᖓ ᒪᓕᒋᐊᓖᑦ:

• ᐃᓕᓐᓂᐊᖅᑐᑦ ᐃᓕᓐᓂᐊᕐᕕᒡᔪᐊᒧᑦ ᐃᓕᓐᓂᐊᕐᓂᖏᓐᓂᒃ ᑎᑎᕋᖅᑕᐅᓯᒪᔭᕆᐊᓖᑦ, ᓇᓗᓇᐃᔭᖅᓯᒪᓗᑎᒡᓗ ᐃᓄᐃᑦ ᐅᖃᐅᓯᖏᓐᓂᒃ ᐱᖅᑯᓯᖏᓐᓂᓪᓗ ᐃᓕᓐᓂᐊᕐᓂᖏᓐᓂᒃ ᓯᑎᐱᕆᒥ ᔮᓄᐊᕆᒧᑦ ᐃᓕᓐᓂᐊᕐᓂᐅᕙᒃᑐᒥᒃ.
• 500ᓂ ᑕᐃᒎᓯᖃᕐᓗᓂ ᑎᑎᕋᖅᓯᒪᔭᕆᐊᓕᒃ ᖃᓄᖅ ᔮᓐ ᐊᒪᕈᐊᓕᐅᑉ ᐃᔾᔪᑎᐊᑦᑎᐊᒐᒃᓴᐅᖕᒪᐋᒃ ᑎᑎᕋᐅᓯᕆᓗᒍᓗ ᓄᓇᕗᒻᒥ ᓄᓇᖃᕐᓂᕐᒧᑦ ᐊᖏᖃᑎᒌᒍᑎ.
• ᓄᑖᖅ ᐃᖅᑲᓇᐃᔭᖅᓯᒪᓂᕐᒧᑦ ᐅᓂᒃᑳᖅ
• ᐃᓕᓐᓂᐊᕆᐊᕈᑏᑦ ᓇᓗᓇᐃᔭᖅᓯᒪᓂᖏᑕ ᑎᑎᖅᑲᖏᓐᓂᒃ ᓄᑖᓂᑦ
• ᒪᕐᕉᖕᓂ ᐃᑲᔪᖅᑐᐃᔫᖕᓂᒃ ᑎᑎᕋᖃᕆᐊᓕᒃ ᐃᓕᓴᐃᔨᒥᖔᖅᑐᒥᒃ, ᐃᓕᓐᓂᐊᕐᕕᒡᔪᐊᒧᑦ ᐃᓕᓴᐃᔨᒥᖔᖅᑐᒥᒃ ᐃᖅᑲᓇᐃᔭᕐᕕᖕᒥᖔᖅᑐᒥᓪᓗ ᐱᓕᕆᖃᑎᒌᓐᓇᖅᓯᒪᓗᒍ.
• ᐃᓕᓐᓂᐊᖅᑐᑦ ᐃᓕᓐᓂᐊᕆᐊᑦᑎᐊᖏᓐᓇᕆᐊᖃᖅᑐᑦ ᐅᓪᓗᓕᒫᖅ ᑎᐃᓕᓐᓂᐊᖅᑎᐅᓗᑎᒃ ᖁᕝᕙᓯᖕᓃᓪᓗ ᐃᓕᓐᓂᐊᖅᑕᒥᒃ ᓇᓗᓇᐃᖅᓯᒪᔭᕆᐊᖃᖅᖢᑎᒃ ᐃᑲᔫᓯᐊᖅᑖᖃᑕᐅᔪᒪᔪᓄᑦ.

ᐃᑭᐊᖅᑭᕕᒃᑯᑦ ᑐᒃᓯᕋᐅᑎᑖᕈᓐᓇᖅᐳᓯ ᐅᕙᓂ: https://www.qia.ca/scholarship-application/

ᐃᓕᓐᓂᐊᖅᑐᑦ ᐃᑲᔪᖅᑕᐅᔭᕆᐊᖃᕐᓂᕈᑎᒃ ᑖᒃᑯᐊ ᑎᑎᕋᖅᑕᐅᓇᓱᖕᓂᖏᓐᓄᑦ ᕿᑭᖅᑕᓂ  ᐃᑲᔫᓯᐊᖅᑖᕈᒪᓂᕐᒧᑦ ᑎᑎᕋᕆᐊᓕᖕᒥ, ᑐᓴᕆᐊᕈᓐᓇᖅᑐᑦ ᓄᓇᓕᖕᓂ ᕿᑭᑕᓂ ᑭᒡᒐᖅᑐᐃᔨᐅᔪᒧᑦ.

ᑐᓴᕆᐊᒃᑲᓐᓂᕈᒪᒍᕕᑦ, ᑐᓴᕆᐊᕐᕕᒋᒍᒃ:

ᕕᐅᓪ ᕼᐋᑉᑭᓐᔅ,
ᑐᓴᐅᒪᔪᓕᕆᓂᕐᒧᑦ ᑐᑭᒧᐊᒃᑎᑦᑎᔨᐅᓚᐅᑲᒃᑐᖅ,
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
whopkins@qia.ca
867.975.8413 or
1.800.667.2742