ᕿᑭᖅᑕᓃᒃᑯᑦ ᑲᔪᖏᖅᓴᐃᕗᑦ ᐃᓄᖕᓂᑦ ᕿᑭᖅᑕᓂᒥᐅᓂᒃ ᐱᓇᓱᖃᑕᐅᖁᓪᓗᒋᑦ ᓄᓇᕗᒥ ᐊᖑᓇᓱᒃᑎᓄᑦ ᐃᑲᔫᑎᓂᑦ
ᐃᖃᓗᐃᑦ, ᓄᓇᕗᑦ ᕖᕝᕗᐊᓕ 23, 2022 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓃᒃᑯᑦ) ᑲᔪᓯᓯᒪᔪᒥᒃ ᐃᑲᔪᖅᑐᐃᖏᓐᓇᖅᐳᑦ ᐃᓄᖕᓂᑦ ᕿᑭᖅᑕᓂᒥᐅᓂᑦ ᐊᑭᓕᕆᐊᖃᖅᑕᒥᓂᒃ ᐱᔾᔪᑎᒋᓪᓗᒋᑦ ᐊᖑᓇᓲᑎᓄᑦ ᐱᖁᑎᓂᒃ ᑐᒃᓯᕋᕈᓐᓇᖅᖢᑎᒃ ᑮᓇᐅᔭᓂᒃ ᓄᓇᕗᒥ ᐊᖑᓇᓱᒃᑎᓄᑦ ᐃᑲᔫᑎᓂᑦ. (NHSP). ᐃᓄᐃᑦ ᕿᑭᖅᑕᓂᒥᐅᑦ ᑮᓇᐅᔭᓂᒃ ᑐᒃᓯᕋᕈᓐᓇᖅᑐᑦ ᓇᓪᓕᐊᑐᐃᓐᓇᕐᒥᒃ ᒥᑯᔪᓄᑦ ᐱᖁᑎᓄᑦ, ᐊᑦᑕᕐᓇᐃᔭᐃᒃᑯᑎᓂᒃ ᐱᖁᑎᓄᑦ, ᐊᒻᒪᓗ ᐱᕐᓗᐊᕿᔪᕕᓂᕐᒨᖓᔪᓂᒃ ᐃᑲᔫᑎᓂᑦ.
ᑮᓇᐅᔭᖅᑕᖃᖅᑐᖅ ᐊᑐᐃᓐᓇᐅᔪᓄᑦ ᑕᕝᕙᓂ ᐊᕐᕌᒍᒥ ᒪᓂᒪᔪᓂᒃ, ᐃᓄᐃᑦ ᕿᑭᖅᑕᓂᒥᐅᑦ ᑲᔪᖏᖅᓴᖅᑕᐅᕗᑦ ᐱᓇᓱᖁᓪᓗᒋᑦ ᑐᒃᓯᕋᕐᓗᑎ ᒫᑦᓯ 31, 2022ᖑᓚᐅᙱᓐᓂᖓᓄᑦ. ᑮᓇᐅᔭᓂᒃ ᐃᓕᓯᕕᐅᒃᑲᓐᓂᕐᓂᐊᖅᑐᑦ ᓄᓇᕗᒥ ᐊᖑᓇᓱᒃᑎᓄᑦ ᐃᑲᔫᑎᖏᑦ ᐄᐳᓪ 1, 2022ᖑᓕᖅᐸᑦ.
“ᕿᑭᖅᑕᓃᒃᑯᑦ ᖃᓄᖅᑑᖏᓐᓇᖃᑦᑕᕐᒪᑕ ᖃᓄᖅ ᐃᑲᔪᒃᑲᓐᓂᕈᓐᓇᕐᒪᖔᑖᒃ ᐃᓄᖕᓂᑦ ᖃᑕᒫᖅᓯᐅᑎᓂᒃ ᐃᓅᓯᖏᓐᓂᑦ. ᐊᔾᔨᒌᙱᑦᑐᑦ ᓄᓇᕗᒥ ᐊᖑᓇᓱᒃᑎᓄᑦ ᐃᑲᔫᑎᑦ ᐋᖅᑭᒃᓱᖅᑕᐅᓯᒪᔪᑦ ᐃᓄᖕᓂᑦ, ᐃᓄᐃᑦ ᐊᑐᐃᓐᓇᖃᕐᓂᐊᕐᒪᑕ, ᐃᓚᐅᓗᑎᒃ, ᐊᒻᒪᓗ ᐃᓕᓐᓂᐊᖅᑎᑦᑎᔪᓐᓇᕐᓗᑎᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ” ᐅᖃᖅᑐᖅ ᕿᑭᖅᑕᓃᒃᑯᑦ ᐊᖓᔪᖅᑳᖓ ᐅᓛᔪᒃ ᐊᑭᓱᒃᓗ
ᐱᓇᓱᖃᑕᐅᔪᓐᓇᖅᑐᑎᑦ ᓄᓇᕗᒥ ᐊᖑᓇᓱᒃᑎᓄᑦ ᐃᑲᔫᑎᓂᑦ ᒥᑭᔪᓄᑦ ᐱᖁᑎᓄᑦ, ᐱᕐᓗᐊᕿᔪᕕᓂᕐᓄᑦ ᐃᑲᔫᑎᓂᒃ ᐅᕝᕙᓘᓐᓃᑦ ᓇᓪᓕᐅᒃᑯᒫᖃᖅᑎᑦᑎᓂᕐᒧᑦ ᐱᓕᕆᐊᒃᓴᓄᑦ 16ᓂᑦ ᐊᕐᕌᒍᖃᕈᕕᑦ ᐅᖓᑖᓂᓘᓐᓃᑦ, ᓂᕿᒃᓴᖅᓯᐅᖅᑎᐅᒍᕕᑦ, ᐊᒻᒪᓗ ᐊᑐᐊᓂᒃᓯᒪᙱᒃᑯᕕᒋᑦ ᑭᒡᓕᒋᔭᐅᔪᑦ ᑮᓇᐅᔭᐃᑦ ᑐᒃᓯᕋᖅᑕᐅᔪᓐᓇᖅᑐᑦ ᐊᕐᕌᒍᒧᑦ.
ᑐᑭᓯᒃᑲᓐᓂᕆᐊᖃᕈᕕᑦ, ᐅᕝᕙᓘᓐᓃᑦ ᑕᑕᑎᖅᓯᒍᒪᒍᕕᑦ ᖃᕆᓴᐅᔭᒃᑯᑦ, ᑕᑯᒋᐊᕈᒃ ᐃᑭᐊᖅᑭᕕᕗᑦ. ᐃᑲᔪᖅᑕᐅᒋᐊᖃᕈᕕᑦ ᑕᑕᖅᑎᖅᓯᓗᑎᒃ, ᐅᕝᕙᓘᓐᓃᑦ ᖃᕆᓴᐅᔭᖃᙱᒃᑯᕕᑦ ᑕᑕᑎᖅᓯᔪᓐᓇᕐᓗᑎ, ᓄᓇᓕᖕᓂ ᑐᓴᐅᒪᑎᑦᑎᔨᓯ ᖃᐅᔨᒋᐊᕐᕕᒋᓗᒍ ᐃᑲᔪᕈᓐᓇᕐᓂᐊᕐᒪ.
ᑐᑭᓯᒃᑲᓐᓂᕈᒪᒍᕕᑦ, ᖃᐅᔨᒋᐊᕐᕕᒃᓴᖅ:
ᑭᐊᕋᓐ ᕙᓚᕼᐊᑎ
ᑐᑭᒧᐊᒍᑎᒃᓴᓄᑦ ᑐᓴᐅᒪᖃᑦᑕᐅᑎᓕᕆᓂᕐᒧᑦ ᑐᑭᒧᐊᕐᒃᑎᑦᑎᔨ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
(ᐅᖄᓚᐅᑖ) 867.975.8398 ᐊᑭᖃᙱᑦᑐᒧᓪᓘᓐᓃᑦ1.800.667.2742