ᕿᑭᖅᑕᓃᒃᑯᑦ ᑐᓴᖅᑎᑦᑎᕗᑦ ᐃᐱᑎᑮ ᒥᒃᓵᓄᑦ: : ᐱᐅᓯᒋᐊᖅᑎᑦᑎᓂᖅ ᓱᕈᓯᓛᑦ ᐃᓕᓐᓂᐊᖅᑎᑕᐅᓂᖏᓐᓄᑦ ᕿᑭᖅᑖᓗᖕᒥ
ᐃᖃᓗᐃᑦ, ᓄᓇᕗᑦ – ᐊᒃᑑᕝᕙ 4, 2017 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓴᖅᑭᑎᑦᑎᓂᐊᖅᑐᑦ ᐃ ᐱ ᑎ ᑮᒥᑦ, ᓄᑖᖑᔪᒥᒃ ᐱᓕᕆᐊᒃᓴᒥ ᐱᔾᔪᑎᖃᕐᓂᐊᖅᑐᒥᒃ ᐱᔪᓐᓇᕐᓂᕆᔭᐅᔪᓂᒃ ᐱᕙᓪᓕᐊᑎᑦᑎᓂᕐᒧᑦ ᐊᒻᒪᓗ ᐃᓕᖅᑯᓯᕐᒨᖓᔪᓂᒃ ᑐᕌᖓᓗᑎᒃ ᓱᕈᓯᓛᓄᑦ ᐃᓕᓐᓂᐊᖅᑎᑦᑎᓂᕐᒧᑦ ᐃᑲᔪᕈᑎᒃᓴᓂ, 2018-19ᒥ.
ᒪᓪᓗᒍ ᐃ ᐱ ᑎ ᑭ, ᕿᑭᖅᑕᓃᒃᑯᑦ ᓯᑕᒪᓂᒃ ᐱᓕᕆᐊᒃᓴᓂ ᓴᖅᑭᑎᑦᑎᓂᐊᖅᑐᑦ ᕿᑭᖅᑖᓗᖕᒥ: ᐃᓚᒌᓄᑦ ᐅᖃᓕᒫᕆᐅᖅᓴᓂᕐᒧᑦ ᑎᑎᕋᕆᐅᖅᓴᓂᕐᒧᓪᓗ ᑐᕌᖓᔪᓂᒃ, ᐃᓐᓇᕐᓂᒃ ᐸᐃᕆᕕᖕᒦᑦᑐᖃᕈᓐᓇᖅᓯᓗᓂ, ᐸᐃᕆᕕᓕᕆᓂᕐᒧᑦ ᑲᑎᒪᓂᒃᓴᖏᓐᓄᑦ, ᐊᒻᒪᓗ ᐸᐃᕆᕕᓕᕆᓂᕐᒧᑦ ᑲᑎᒪᔩᑦ ᐃᓕᓐᓂᐊᖅᑎᑕᐅᓂᖏᓐᓄᑦ.
“ᐱᒻᒪᕆᐅᓂᐊᕐᒪᑦ ᑖᒃᑯᐊ ᑮᓇᐅᔭᐃᑦ ᐊᑐᖅᑕᐅᓗᑎᒃ ᐱᐅᓯᒋᐊᖅᑕᐅᓂᖏᓐᓂᒃ ᓱᕈᓯᓛᑦ ᐃᓕᓐᓂᐊᖅᑎᑕᐅᓂᖏᓐᓂᒃ ᐊᒻᒪᓗ ᐸᐃᕆᕕᓕᕆᓂᕐᒧᑦ ᕿᑭᖅᑖᓗᖕᒥ,” ᐅᖃᖅᑐᖅ ᕿᑭᖅᑕᓃᒃᑯᑦ ᐊᖓᔪᖅᑳᖓ ᐸᐅᓗᓯᐊ ᐊᕿᐊᕈᖅ. “ᑮᓇᐅᔭᖃᖅᑎᑦᑎᓂᕐᒥᒃ ᐸᐃᕆᕕᖕᓂ ᑐᑭᖃᖅᑐᖅ ᐱᕙᓪᓕᐊᑎᑦᑎᓂᑦᑎᓐᓂᒃ ᕿᑐᕐᖓᑦᑎᓐᓂ ᐊᒻᒪᓗ ᑐᓐᖓᕕᓕᐅᖅᐸᓪᓕᐊᓗᒋᑦ ᓯᕗᓂᒃᓴᕆᓂᐊᖅᑕᖏᑦ.”
ᐃ ᐱ ᑎ ᑭ ᓴᖅᑭᑎᑕᐅᒍᓐᓇᖅᓯᓚᐅᖅᑐᖅ ᑮᓇᐅᔭᖃᖅᑎᑕᐅᓪᓗᑎᒃ $500,000ᓂᑦ ᒪᕐᕉᓄᑦ ᐊᕐᕌᒎᓂᐊᖅᑐᓄᑦ ᑐᓂᔭᐅᔪᑦ ᒪᑭᒋᐊᖅᑕᒃᑯᓐᓂᑦ, ᓴᖅᑭᓯᒪᔪᑦ ᒪᑭᒋᐊᖅᑕᒃᑯᑦ ᐃᓕᓐᓂᐊᖅᑎᑦᑎᓂᕐᒧᑦ ᑯᐊᐳᕇᓴᖓᓐᓂᑦ ᑮᓇᐅᔭᖅᑖᕈᑕᐅᓚᐅᖅᑐᓂᑦ ᐊᖏᖃᑎᒌᒍᑕᐅᓯᒪᔪᓄᑦ ᓄᓇᕗᑦ ᑐᓐᖓᕕᒃᑯᓐᓄᑦ ᐊᒻᒪᓗ ᒐᕙᒪᑐᖃᒃᑯᓐᓄᑦ.
“ᑖᓐᓇ ᐱᓕᕆᐊᒃᓴᖅ ᐃᑲᔪᑦᑎᐊᕈᓐᓇᕐᓂᐊᖅᑐᑦ ᐸᐃᕆᕕᖕᓂᑦ ᑮᓇᐅᔭᖃᑦᑎᐊᕈᓐᓇᖅᓯᓗᑎᒃ ᐊᒻᒪᓗ ᐃᑲᔫᑎᖃᓕᕐᓗᑎᒃ ᐱᐅᓂᖅᐹᒥᒃ ᐃᓕᓐᓂᐊᖅᑎᑦᑎᔪᓐᓇᕐᓗᑎᒃ ᐃᓄᖕᓂᑦ ᕿᑐᕐᖓᕆᔭᐅᔪᓄᑦ”, ᐅᖃᖅᑐᖅ ᓄᕐᓗ ᐲᑕ, ᐃᓕᓴᐃᔨ ᐸᐃᕆᕕᓕᕆᓂᕐᒧᓪᓗ ᐊᐅᓚᑦᑎᔨ ᑐᒥᑯᓗᐃᑦ ᓴᐃᐹᕿᕕᒻᒥ.
ᐱᓕᕆᐊᒃᓴᐃᑦ ᖃᓄᐃᓕᖓᓂᐊᕐᓂᖏᑦ ᐃ ᐱ ᑎ ᑭ ᐱᔭᒃᓴᖓ ᒪᓕᓪᓗᒍ:
ᐱᓕᕆᐊᒃᓴᖅ 1 – ᐃᓚᒌᓄᑦ ᐅᖃᓕᒫᕆᐅᖅᓴᕐᓂᖏᑦ/ᑎᑎᕋᕆᐅᖅᓴᕐᓂᖏᓪᓗ ᑐᕌᖓᔪᓂᒃ
- ᕿᑭᖅᑕᓃᒃᑯᑦ ᓴᖅᑭᑎᑦᑎᓗᑎᒃ ᐃᓚᒌᓄᑦ ᐊᑐᖅᑐᒃᓴᓂᒃ ᐃᑲᔪᕈᑎᒃᓴᓂ
- ᑖᒃᑯᐊ ᐃᑲᔪᕈᑎᒃᓴᑦ ᑐᓂᔭᐅᓗᑎᒃ ᓱᕈᓯᓗᒃᑖᓄᑦ ᕿᑭᖅᑖᓗᖕᒥ ᐃᓕᓐᓂᐊᕆᐊᕐᓂᓕᓵᖅᑐᓄᑦ ᐱᒋᐊᕐᓗᑎᒃ ᓯᑎᐱᕆ 2018ᒥ
- ᑖᒃᑯᐊ ᐃᑲᔪᕈᑎᒃᓴᑦ ᐱᖃᓯᐅᑎᓂᐊᖅᑐᑦ ᐅᖃᓕᒫᒐᓂ, ᐱᓐᖑᐊᕈᓯᓂ, ᖃᓄᐃᓕᐅᕈᑎᒃᓴᓂᑦ ᐊᒻᒪᓗ ᐊᓯᖏᓐᓂᓗ ᐃᑲᔪᕈᑎᒋᔭᐅᓂᐊᖅᑐᓄᑦ ᐃᓚᒌᓄᑦ ᐅᖃᓕᒫᕆᐅᖅᓴᓂᖏᓐᓄᑦ/ᑎᑎᕋᕆᐅᖅᓴᓂᖏᓐᓄᓪᓗ
ᐱᓕᕆᐊᒃᓴᖅ 2 – ᐃᓐᓇᖃᕐᓂᖅ ᐸᐃᕆᕕᖕᓂ
- ᑖᓐᓇ ᐱᒋᐊᕈᑎᒋᔭᐅᓯᒪᔪᖅ ᐃᑲᔪᕐᓂᐊᖅᑐᒥᒃ ᐃᓐᓇᕐᓂᒃ ᐃᓚᐅᓂᖏᓐᓄᑦ ᐸᐃᕆᕕᖕᓂ ᕿᑭᖅᑖᓗᖕᒥ
- ᓯᕗᓪᓕᖅᐹᖓ ᐱᒋᐊᕐᓂᖓᓂ ᐱᓕᕆᐊᒃᓴᖅ ᑲᑎᑦᑎᓂᐊᖅᑐᑦ ᐃᓐᓇᕐᓂ ᐊᒻᒪᓗ ᐸᐃᕆᕕᖕᓂ ᐊᐅᓚᑦᑎᔨᓂ ᓇᓗᓇᐃᔭᐃᔪᓐᓇᕐᓗᑎᒃ ᖃᓄᖅ ᐱᐅᓂᖅᐹᒃᑯᑦ ᐃᑲᔪᕈᓐᓇᕋᔭᕐᓂᖏᑦ ᐃᓐᓇᐃᑦ ᐃᓚᐅᓂᖏᓐᓄᑦ ᐸᐃᕆᕕᖕᓂ ᕿᑭᖅᑖᓗᖕᒥ
- ᐊᐃᑉᐹᓂ ᐱᓕᕆᐊᒃᓴᒥ ᐊᑐᕐᓂᐊᖅᑐᖅ ᑭᐅᔾᔪᑎᒋᔭᐅᓚᐅᖅᑐᓂᒃ ᓄᐊᑕᐅᓚᐅᖅᑐᓄᑦ ᐆᒃᑐᕋᖅᑕᐅᓗᑎᒃ ᐃᓐᓇᖅᑕᖃᕐᓗᓂ ᐸᐃᕆᕕᖕᓂ
ᐱᓕᕆᐊᒃᓴᖅ 3 – ᐸᐃᕆᕖᑦ ᑲᑎᒪᓂᖏᑦ
- ᑖᓐᓇ ᑲᑎᒪᓂᖅ ᑲᑎᑦᑎᒍᑕᐅᓂᐊᖅᑐᑦ ᐸᐃᕆᕕᖕᓂ ᐊᐅᓚᑦᑎᔨᓂ ᐃᖅᑲᓇᐃᔭᖅᑐᓄᑦ ᕿᑭᖅᑖᓗᖕᒥ
- ᑖᓐᓇ ᑲᑎᒪᓂᖅ ᐱᕕᒃᓴᖃᖅᑎᑦᑎᓂᐊᖅᑐᖅ 3-5ᓄᑦ ᐅᓪᓗᓄᑦ ᐃᓕᓐᓂᐊᖅᑎᑕᐅᓂᕐᒥᒃ ᐊᒻᒪᓗ ᐱᔪᓐᓇᕐᓂᕆᔭᖏᑦ ᐱᕙᓪᓕᐊᑎᑕᐅᒃᑲᓐᓂᕐᓗᑎᒃ ᐸᐃᕆᕕᖕᓂ ᐊᐅᓚᑦᑎᔨᐅᔪᓄᑦ ᕿᑭᖅᑖᓗᖕᒥ
ᐱᓕᕆᐊᒃᓴᖅ 4 – ᐸᐃᕆᕕᖕᓂ ᑲᑎᒪᔩᑦ ᐃᓕᓐᓂᐊᖅᑎᑕᐅᓂᖏᑦ
- ᕿᑭᖅᑕᓃᒃᑯᑦ ᐃᖅᑲᓇᐃᔭᖃᑎᖃᕐᓗᑎᒃ ᐊᒃᑐᖅᑕᐅᓯᒪᓂᐊᖅᑐᓂᒃ ᓄᐊᓴᐃᓗᑎᒃ ᑐᑭᓯᒋᐊᕈᑎᒃᓴᓂ ᑖᒃᑯᐊ ᐸᐃᕆᕕᖕᓂ ᐃᖅᑲᓇᐃᔭᖅᑐᑦ ᑭᓱᓂᒃ ᐃᓕᓐᓂᐊᕆᐊᖃᖅᑕᖏᓐᓂᒃ
- ᐊᑐᕐᓗᒋᑦ ᑭᐅᔾᔪᑎᒋᔭᐅᔪᑦ ᓄᐊᑕᐅᔪᓄᑦ ᕿᑭᖅᑕᓃᒃᑯᓐᓄᑦ ᐱᕙᓪᓕᐊᑎᑦᑎᓂᐊᖅᑐᑦ ᐊᑐᖅᑕᐅᖃᑦᑕᐃᓐᓇᕐᓂᐊᖅᑐᒥᒃ ᐸᐃᕆᕕᖕᓂᑦ ᑲᑎᒪᔨᐅᔪᑦ ᐃᓕᓐᓂᐊᖅᑎᑕᐅᓂᖏᓐᓄᑦ ᕿᑭᖅᑖᓗᖕᒥ
ᑐᑭᓯᒋᐊᒃᑲᓐᓂᕈᒪᒍᕕᑦ, ᖃᐅᔨᒋᐊᕐᕕᒃᓴᖅ:
ᓰᒪ ᓴᕼᐋᕐ ᓯᐊᕋHᐃ,
ᑐᑭᒧᐊᖅᑎᑦᑎᔨ ᑐᓴᐅᒪᖃᑦᑕᐅᑎᓄᑦ,
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
szerehi@qia.ca
(867) 975.8413
1.800.667.2742
