ᐃᖃᓗᐃᑦ, ᓄᓇᕗᑦ, ᐄᐳᓪ 4, 2022 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ, (ᕿᑭᖅᑕᓃᒃᑯᑦ) ᐅᓪᓗᒥ ᑐᓴᖅᑎᑦᑎᕗᑦ ᐱᓕᕆᐊᖃᖅᐸᓪᓕᐊᓂᐊᕐᒪᑕ ᑮᓇᐅᔭᐃᑦ ᐃᓯᖅᑐᓄᑦ ᐊᑐᐊᒐᐅᑉ ᐋᖅᑭᒋᐊᕈᑎᒃᓴᖏᓐᓂ ᓄᓇᓕᖕᓂ ᐃᓚᐅᑎᑦᑎᓗᑎᒃ.

ᑖᓐᓇ ᑮᓇᐅᔭᓄᑦ ᐃᓯᖅᑐᓄᑦ ᐊᑐᐊᒐᖅ ᓴᖅᑭᑎᑦᑎᓚᐅᖅᑐᖅ ᑐᖅᑯᖅᓯᒪᔪᓂᒃ ᑮᓇᐅᔭᓂᒃ ᐊᒻᒪ ᐃᑲᔫᓯᐊᒃᓴᓄᓪᓗ ᑮᓇᐅᔭᓂᒃ ᐊᒻᒪᓗ ᑎᑎᕋᖅᓯᒪᔪᖃᖅᖢᓂ ᖃᓄᖅ ᕿᑭᖅᑕᓃᒃᑯᑦ ᑐᖅᑯᖅᓯᕙᓪᓕᐊᓂᐊᕐᒪᖔᑖᒃ ᐊᒻᒪ ᖃᓄᖅ ᑮᓇᐅᔭᐃᑦ ᑭᓱᓄᑦ ᐊᑐᖅᑕᐅᓂᐊᕐᓂᖏᓐᓄᑦ.

ᓄᓇᓕᖕᓂ ᐃᓚᐅᑎᑦᑎᓂᕐᒧᑦ ᐸᕐᓇᐅᑎᖓᓂᑦ ᐊᖏᖅᑕᐅᓚᐅᖅᑐᒥᒃ ᑲᑎᒪᔨᓄᑦ ᒫᑦᓯ 4ᒥ, ᕿᑭᖅᑕᓃᒃᑯᑦ ᑲᑎᒪᔨᖏᑦ ᓇᓗᓇᐃᖅᓯᓚᐅᖅᑐᑦ ᐋᖅᑭᒋᐊᖅᓯᖁᔨᓪᓗᑎᒃ ᒫᓐᓇ ᐊᑐᖅᑕᐅᔪᒥᒃ ᐊᑐᐊᒐᕐᒥ ᒪᕐᕉᓕᕐᓗᑎᒃ: ᑮᓇᐅᔭᐃᑦ ᐃᓯᖅᑐᑦ ᑭᓱᓄᑦ ᐊᑐᖅᑕᐅᔪᒃᓴᒫᑦ ᐊᑐᐊᒐᖃᕐᓗᓂ ᐊᒻᒪᓗ ᑐᖅᑯᖅᓯᕙᓪᓕᐊᓂᕐᒧᑦ ᑮᓇᐅᔭᓂᒃ ᐊᑐᐊᒐᕐᒥ. ᕿᑭᖅᑕᓃᒃᑯᑦ ᑲᑎᒪᔨᖏᑦ ᓇᓗᓇᐃᖅᓯᑦᑎᐊᓚᐅᕐᒪᑕ ᐋᖅᑭᒋᐊᖅᓯᖁᔨᓪᓗᑎᒃ ᒫᓐᓇ ᐊᑐᖅᑕᐅᔪᒥᒃ ᐊᑐᐊᒐᕐᒥᒃ ᑮᓇᐅᔭᓂᒃ ᐊᑐᒃᑲᓐᓂᕈᓐᓇᕐᓂᐊᕐᒪᑕ ᐊᒻᒪ ᑮᓇᐅᔭᐃᑦ ᐊᔾᔨᒌᙱᑦᑐᓄᑦ ᐊᑐᖅᑕᐅᔪᓐᓇᕐᓂᖏᓪᓗ.

ᑖᒃᑯᐊ ᓄᑖᖑᓂᐊᖅᑐᑦ ᐊᑐᐊᒐᐃᑦ ᕿᑭᖅᑕᓃᒃᑯᑦ ᑐᒃᓯᕋᐅᑎᒋᔭᖏᓐᓂᑦ ᐱᕕᖃᖅᑎᑦᑎᓂᖅᓴᐅᓂᐊᖅᑐᑦ ᓱᑲᑎᖅᓯᒪᙱᓪᓗᑎᒃ ᕿᑭᖅᑕᓃᒃᑯᓪᓗ ᐋᖅᑭᒋᐊᖅᓯᖃᑦᑕᕈᓐᓇᕐᓗᑎᒃ ᖃᖓᑐᐃᓐᓇᖅ ᖃᔅᓯᐅᔪᓂᑦ ᑮᓇᐅᔭᐃᑦ ᐊᑐᖅᑕᐅᔪᓐᓇᖅᑐᓂᒃ ᐊᑕᐅᑦᓯᒃᑯᓪᓗ ᑐᖅᑯᖅᓯᕙᓪᓕᐊᓗᑎᒃ ᓯᕗᓂᒃᓴᑦᑎᓐᓄᑦ ᑭᖑᕚᕇᖑᔪᓄᑦ ᐊᑐᖅᑕᐅᔪᓐᓇᓛᕐᒪᑕ. ᕿᑭᖅᑕᓃᒃᑯᑦ ᒪᕐᕉᓂᒃ ᓄᑖᓂᒃ ᐋᖅᑭᒋᐊᖅᓯᒍᒪᔪᑦ ᑮᓇᐅᔭᐃᑦ ᑭᓱᓄᑦ ᐊᑐᖅᑕᐅᔪᓐᓇᕐᓂᖏᓐᓂᒃ, ᓄᓇᓕᖕᓄᑦ ᐃᑲᔫᑎᑦ ᐊᒻᒪ ᐱᕕᒃᓴᐃᓪᓗ, ᐊᒻᒪᓗ ᐊᔾᔨᒌᙱᑦᑐᓂᑦ ᐱᕙᓪᓕᐊᔪᓕᕆᓂᕐᒨᖓᔪᓂ.

“ᕿᑭᖅᑕᓃᒃᑯᑦ ᓄᓇᓕᓕᒫᓅᓛᖅᑐᑦ ᑐᓴᕈᒪᖕᒪᑕ ᖃᓄᕐᓕ ᐃᓱᒪᒋᔭᖃᕐᒪᖔᑖᒃ ᑐᒃᓯᕋᕈᑎᒋᔭᐅᔪᓂᒃ ᐋᖅᑭᒋᐊᕈᑎᒋᔭᐅᔪᒪᔪᓄᑦ. ᖁᕕᐊᓱᒃᑐᖓ ᐃᖅᑲᓇᐃᔭᖃᑎᒋᓂᐊᕋᒃᑭᑦ ᑲᑎᒪᔨᐅᖃᑎᒃᑲ ᐃᓄᐃᓪᓗ ᓴᖅᑭᑎᑦᑎᔪᓐᓇᕐᓛᕋᑦᑕ ᓄᑖᓂᒃ ᑮᓇᐅᔭᐃᑦ ᐊᑐᕈᓐᓇᕐᓂᐊᖅᑐᓄᑦ ᐱᕕᖃᖅᑎᑦᑎᓂᖅᓴᐅᓂᐊᖅᑐᒥᒃ ᓄᓇᓕᖕᓂᑦ ᖃᓄᖅ ᕿᑭᖅᑕᓃᒃᑯᑦ ᑮᓇᐅᔭᓂᒃ ᑭᓱᓄᑦ ᐊᑐᕋᔭᕐᒪᖔᑖᒃ ᐊᑐᓂ ᓄᓇᓕᖕᓂ, “ᐅᖃᖅᑐᖅ ᕿᑭᖅᑕᓃᒃᑯᑦ ᐊᖓᔪᖅᑳᖓ ᐅᓛᔪᒃ ᐊᑭᓱᒃ”.

ᓄᓇᓕᖕᓅᖃᑦᑕᖅᐸᓪᓕᐊᓂᐊᖅᑐᑦ ᐱᒋᐊᕐᓗᑎᒃ ᐄᐳᓪᒥᑦ ᑕᐃᑯᖓ ᑎᑭᓪᓗᒍ ᕿᑭᖅᑕᓃᒃᑯᑦ ᐊᕐᕌᒍᑕᒫᖅᓯᐅᑎᖓᓂᒃ ᑲᑎᒪᓂᕆᓛᖅᑕᖓᓄᑦ ᐅᑑᕙ 4, 2022ᒧᑦ ᐃᖃᓗᓐᓂ, ᓄᓇᕗᒥ ᐊᖅᓴᕐᓃᑦ ᑲᑎᒪᕝᕕᐊᓂ.

ᑐᑭᓯᒃᑲᓐᓂᕈᒪᒍᕕᑦ ᑮᓇᐅᔭᐃᑦ ᐃᓯᖅᑐᓄᑦ ᐊᑐᐊᒐᐅᑉ ᐋᖅᑭᒋᐊᕈᑎᖏᑦᑕ ᒥᒃᓵᓄᑦ ᐅᕝᕙᓘᓐᓃᑦ ᐃᓚᒋᔭᐅᓛᕐᓂᖏᑦ ᓄᓇᓕᓯ, ᑕᑯᒋᐊᕐᓗᒍ ᐃᑭᐊᖅᑭᕕᕗᑦ ᐅᕗᖓ: www.qia.ca/resourcerevenue

ᑐᑭᓯᒃᑲᓐᓂᕈᒪᒍᕕᑦ, ᖃᐅᔨᒋᐊᕐᕕᒃᓴᖅ:
ᑭᐊᕋᓐ ᕙᓚᕋᑎ
ᑐᑭᒧᐊᒍᑎᒃᓴᓄᑦ ᑐᓴᐅᒪᖃᑦᑕᐅᑎᓕᕆᓂᕐᒧᑦ ᑐᑭᒧᐊᒃᑎᑦᑎᔨ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
(ᐅᖄᓚᐅᑖ) 867.975.8398 ᐅᕝᕙᓘᓐᓂᑦ ᐊᑭᖃᙱᑦᑐᒧᑦ 1.800.667.2742
kflaherty@qia.ca