ᕿᑭᖅᑕᓂ ᐃᓄᐃᒃ ᑲᑐᔾᔨᖃᑎᒌᖏᑦ ᐱᓕᕆᐊᒃᓴᒥᒃ ᓴᖅᑭᑦᑏᕗᑦ ᐃᑲᔪᖅᑕᐅᖁᓪᓗᒋᑦ ᕿᒧᒃᓯᖅᑏᑦ
ᐃᖃᓗᐃᑦ, ᓄᓇᕗᑦ, ᐅᑐᐱᕆ 8, 2020- ᕿᑭᖅᑕᓂ ᐃᓄᐃᒃ ᑲᑐᔾᔨᖃᑎᒌᖏᑦ ᐊᓕᐊᓇᐃᒍᓱᒃᐳᑦ ᕿᑭᖅᑕᓂ ᕿᒧᒃᓯᖃᖅᑐᓕᕆᓂᕐᒥᒃ ᓴᖅᑭᑦᑏᖕᒪᑕ ᐃᑲᔪᖅᑕᐅᖁᓪᓗᒋᑦ ᐃᓄᐃᑦ ᕿᒧᒃᓯᖃᖅᑎᐅᕙᒃᑐᑦ.
ᑕᒪᓐᓇ ᐊᕌᒍᓄᑦ ᐱᖓᓱᓄᒃ ᐊᐅᓚᑕᐅᓂᐊᖅᖢᓂ ᐃᓄᐃᑦ ᕿᑭᑖᓗᖕᒥ ᕿᒻᒥᖃᖅᑎᐅᖏᓐᓇᖁᓪᓗᒋᑦ ᕿᒧᒃᓯᕈᓐᓇᐅᑎᓂᒃ. ᑐᒃᓯᕋᐅᑎ ᐊᑕᐅᓯᖅ ᐱᔭᐅᔪᓐᓇᖅᑐᖅ $3,000 ᐊᑕᐅᓯᐊᕐᓗᓂ ᐃᑲᔫᓯᖅᑖᕈᑕᐅᖃᑦᑕᕐᓂᐊᖅᑐᖅ. ᑕᒪᓐᓇ ᕿᑭᖅᑕᓂ ᓱᓕᔪᒥᒃ ᑭᒡᒐᖅᑐᐃᓂᕆᔭᖓᓂᖔᖅᑐᖅ.
ᕿᑭᖅᑕᓂ ᕿᒧᒃᓯᖅᑲᖅᑕᖅᑐᓕᕆᓂᕐᒧᑦ ᐱᓕᕆᐊᒃᓴᖅ ᐱᒻᒪᕆᕐᔪᖓᐊᖑᖕᒪᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐱᓕᕆᐊᕇᓐᓇᖅᑕᖓ ᕿᑭᖅᑕᓂ ᓱᓕᔪᒥᒃ ᑭᒡᒐᖅᑐᐃᔨᖏᓐᓂᖔᖅᑐᖅ,” ᐸᐅᓗᓯ ᐊᕿᐊᕈᒃ, ᕿᑭᖅᑕᓃᒃᑯᑦ ᐊᖓᔪᖅᑳᖓᑦ ᐅᖃᖅᑐᖅ, “ ᐊᓕᐊᓇᐃᒍᓱᑦᑎᐊᖅᐳᖓ ᓯᕗᓂᒃᓴᖃᑦᑎᐊᕐᓂᐊᖅᑰᕐᒪᑦ ᕿᑭᖅᑕᓂ ᕿᒧᒃᓯᖃᑦᑕᖅᑐᓕᕆᓂᖅ ᐃᓕᖅᑯᓯᕆᔭᐅᓯᒪᔪᑦ ᐊᑐᖅᑕᐅᒃᑲᓐᓂᖃᑦᑕᓕᕐᓗᑎᒃ ᐃᓄᐃᑦ ᕿᑭᖅᑕᓂᕐᒥᐅᓄᑦ”
ᐃᓄᐃᑦ ᕿᑭᖅᑕᓂᕐᒥᐅᑦ ᑕᓪᓕᒪᓂᒃ ᐅᖓᑖᓄᓪᓗ ᕿᒻᒥᖃᓱᕈᑎᒃ ᐃᑲᔫᓯᐊᖅᑖᕋᓱᖃᑕᐅᔪᓐᓇᖅᑐᑦ. ᑐᒃᓯᕋᐅᑏᑦ. ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓂᒃ ᐃᑭᐊᖅᑭᕕᖓᓂ ᐱᔭᐅᔪᓐᓇᖅᑐᑦ, ᐃᑲᔪᖅᑕᐅᔪᒪᓗᑎᓪᓘᓐᓃᒃ ᐃᖅᑲᓇᐃᔭᖅᑎᖏᓐᓄᑦ ᐅᕗᖓ ᐅᖄᓚᓗᑎᑦ 867-975-8384. qia.ca/qikiqtani-qimuksiqtiit-project/
ᑐᒃᓯᕋᐅᑎᐅᑉ ᐃᓕᕝᕕᒃᓴᖓᑕ ᐅᓪᓗᖓ ᑎᓯᐱᕆ 31, 2020. ᐃᑲᔫᓯᐊᖅᑖᕈᓐᓇᕐᓂᕋᑕᐅᔪᒃ ᑮᓇᐅᔭᒥᒃ ᓇᒃᓯᐅᔾᔨᕕᐅᒐᔭᖅᑐᑦ ᔮᓄᐊᕆ 31, 2021 ᑐᖔᓂ. ᕿᒧᒃᓯᖃᖅᑐᓕᕆᓂᕐᒧᑦ ᐃᑲᔫᓯᐊᖅᑖᕈᑎ ᐃᓱᓕᓐᓂᐊᕆᓪᓗᓂ ᒫᔾᔨ 2023ᒥᑦ.
ᑐᓴᕆᐊᒃᑲᓐᓂᕈᒪᒍᕕᑦ, ᑐᓴᕆᐊᕐᕕᒋᒍᒃ:
ᓰᒪ ᓴᕼᐋ ᔨᕆᕼᐃ,
ᑐᑭᒧᐊᒃᑎᑦᑎᔨ ᑐᓴᖅᑕᐅᔪᒃᓴᓂᒃ,
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
szerehi@qia.ca
867.975.8413
1.800.667.2742