ᕿᑭᖅᑕᓂ ᐃᓕᖅᑯᓯᓕᕆᕐᒧᑦ ᐱᓕᕆᐊᖑᔪᑦ ᐃᓘᓐᓇᖏᓐᓂᒃ 13ᓂᑦ ᓄᓇᓕᓐᓂᑦ

ᐃᖃᓗᐃᑦ, ᓄᓇᕗᑦ − ᔫᓂ 18, 2018 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒋᖏᑦ (ᑲᑐᔾᔨᖃᑎᒌᖏᑦ) ᖁᕕᐊᓱᑉᐳᑦ ᓇᓗᓇᐃᕐᓯᔭᕆᐊᔅᓴᖅ ᐊᖏᖅᑕᐅᓯᒪᔪᓂᑦ ᕿᑭᖅᑕᓂ ᐃᓕᖅᑯᓯᓕᕆᓂᕐᒧᑦ ᐃᑲᔫᑎᓂᑦ − ᕿᑭᖅᑕᓂ ᐃᓕᖅᑯᓯᓕᕆᓂᕐᒧᑦ ᐃᑲᔫᑎᑎᒍᑦ ᐱᓕᕆᐊᑦ. 31 ᐊᖏᖅᑕᐅᓯᒪᔪᑦ ᑐᔅᓯᕋᕐᓯᒪᔪᑦ ᐅᑯᐊᖑᕗᑦ ᐱᓕᕆᐊᑦ ᑭᒃᑯᑐᐃᓐᓇᕐᓄᑦ ᐊᒻᒪᓗ ᓄᓇᓕᓐᓂᑦ ᑲᑐᔾᔨᖃᑎᒌᓄᑦ ᐃᓘᓐᓇᖏᓐᓂ 13ᓂᑦ ᕿᑭᖅᑕᓂ ᓄᓇᓕᓐᓂᑦ.

ᐱᓕᕆᐊᑦ ᒪᑯᐊᖑᕗᑦ ᐃᖃᓗᓕᐅᑎᑎᑦᑎᓃᑦ, ᐊᖑᓇᓱᓐᓃᑦ ᓅᓯᒪᑎᑦᑎᓃᑦ, ᑲᑕᔾᔭᓂᕐᒥᒃ ᑎᑎᖅᑐᒐᖃᑦᑕᓂᕐᒥᒃ ᐃᓕᓐᓂᐊᑎᑦᑎᓂᖅ, ᕿᓯᓕᕆᓂᖅ, ᖁᓕᑦᑕᐅᔭᓕᐅᖅᑎᑦᑎᓂᖅ.

ᑖᒃᑯᐊ ᑐᑭᓯᒋᐊᕈᑕᐅᒃᑲᓐᓂᓚᐅᕐᓯᒪᔪᑦ ᐃᓘᓐᓇᖏᓐᓂᒃ 13ᓂᑦ ᕿᑭᖅᑕᓂ ᓄᓇᓕᓐᓂᑦ 2017ᒥ, ᑲᑐᔾᔨᖃᑎᒌᒃᑯᑦ ᑐᓴᖅᑕᖏᓐᓂᒃ ᑐᑭᓯᓚᐅᕐᓯᒪᒻᒪᑕ ᕿᑭᖅᑕᓂ ᓄᓇᓖᑦ ᐃᓄᐃᑦ ᐃᓕᖅᑯᓯᓕᕆᓂᕐᒧᑦ ᑐᕌᖓᔪᓂᑦ ᐱᓕᕆᐊᖅᑕᖃᖁᔨᓚᐅᕐᓯᒪᒻᒪᑕ ᐊᑐᖅᑎᑦᑎᔪᓂᑦ ᐱᖅᑯᓯᑦᑎᓐᓂᒃ ᐃᓕᓐᓂᐊᖅᑕᐅᔪᓐᓇᖅᑐᓂᑦ ᐊᒻᒪᓗ ᓲᖑᓯᑎᑦᑎᒋᐊᕈᑕᐅᔪᓐᓇᖅᑐᓂᑦ ᐃᓄᐃᑦ ᐃᓕᓴᕐᓇᕈᑎᖏᓐᓂᒃ, ᐱᓗᐊᖅᑐᒥᑦ ᓅᓯᒪᑎᑦᑎᖃᑦᑕᓂᕐᒥᒃ ᒥᕐᓱᑎᑦᑎᖃᑦᑕᓂᕐᒥᓪᓗ.

ᕿᑭᖅᑕᓂ ᐃᓕᖅᑯᓯᓕᕆᓂᕐᒧᑦ ᐃᑲᔫᑎᓂᑦ, ᐊᑐᓂᑦ ᓄᓇᓖᑦ ᒫᓐᓇ ᐊᑐᖃᑦᑕᕈᓐᓇᓯᒻᒪᑕ $53,000ᓄᑦ ᑎᑭᓯᒪᔪᓂᑦ ᐱᓕᕆᐊᓅᖓᔪᓂᑦ ᑕᒫᓂ ᐊᕐᕌᒍᒥ. ᓯᕗᓪᓕᕐᒥ ᑮᓇᐅᔭᖅᑑᑎᔅᓴᑦ ᐃᒪᓐᓇᓄᑦ ᐊᒥᓲᓂᓕᓐᓅᖓᔪᒻᒪᑕ $33,000 ᐊᑐᓂᑦ ᓄᓇᓕᓐᓄᑦ ᑭᓯᐊᓂ ᐱᔾᔪᑎᒋᓪᓗᒋᑦ ᑮᓇᐅᔭᖅᑖᕆᒃᑲᓂᕐᓯᒪᔭᖏᑦ ᐃᑲᔫᓯᐊᔅᓴᓄᑦ ᑮᓇᐅᔭᓂᑦ, ᑲᑐᔾᔨᖃᑎᒌᒃᑯᑦ ᑲᑎᒪᔨᖏᑦ ᑐᑭᑖᕈᑎᖃᔪᒻᒪᑕ ᐊᑭᑦᑐᕆᐊᖅᑕᐅᖁᓪᓗᒋᑦ ᑮᓇᐅᔭᖅᑑᑎᔅᓴᖏᑦ ᑕᒫᓂ ᐊᕐᕌᒍᒥ ᐃᑲᔫᑎᓅᖓᔪᑦ ᒪᐃᖑᑎᓪᓗᒍ ᑲᑎᒪᔩᑦ ᑲᑎᒪᓂᖓᓐᓂ ᕿᑭᖅᑕᕐᔪᐊᕐᒥ.

ᓅᓯᒪᑎᑦᑎᖃᑦᑕᕐᓂᖅ ᐊᒻᒪᓗ ᒥᕐᓱᑎᑦᑎᖃᑦᑕᕐᓂᖅ ᓯᕗᓪᓕᐸᐅᑦᑎᐅᔾᔭᐅᓯᒪᒐᓗᐊᖅᑎᓪᓗᒋᒃ, ᑲᑐᔾᔨᖃᑎᒌᒃᑯᑦ ᐃᓱᒪᒋᔭᖃᕆᐊᖃᑦᑕᓂᐊᕐᒥᒻᒪᑕ ᐊᓯᖏᓐᓂᒃ ᐃᓄᐃᑦ ᐃᓕᖅᑯᓯᖏᓐᓅᖓᔪᓂᑦ ᐱᓕᕆᐊᔅᓴᓂᑦ. ᐃᑲᔫᑎᑖᖅᑲᐅᒃ ᐋᖅᑭᑦᑕᐅᓯᒪᒻᒪᑦ ᐊᑐᖅᑕᐅᔪᓐᓇᓂᕐᓴᐅᖁᓪᓗᒍ, ᐱᔭᕆᐊᑭᓪᓕᑎᔅᓯᒪᓪᓗᑎᒃ ᑐᔅᓯᕋᐅᑏᑦ ᐊᒻᒪᓗ ᐅᓂᒃᑳᓕᐅᖃᑦᑕᕆᐊᖃᕐᓂᖏᑦ.

“ᖁᕕᐊᓇᓪᓚᕆᑦᑐᖅ ᑕᑯᔭᕆᐊᔅᓴᖅ ᐊᒥᓱᓂᑦ ᑐᔅᓯᕋᐅᑎᓂᑦ ᓄᑖᓄᑦ ᐱᓕᕆᐊᖑᖃᑦᑕᓂᐊᖅᑐᓄᑦ ᐃᓘᓐᓇᖏᓐᓂᒃ 13ᓂᑦ ᕿᑭᖅᑕᓂ ᓄᓇᓕᓐᓂᑦ,” ᐅᖃᖅᑐᖅ ᑲᑐᔾᔨᖃᑎᒌᒃᑯᑦ ᐊᖏᔪᖅᑳᖓᑦ ᐸᐅᓗᓯ ᐊᕿᐊᕈᖅ, “ ᐱᓕᕆᐊᑦ ᐃᓕᖅᑯᓯᑦᑎᓐᓅᖓᔪᑦ ᐱᖅᑯᓯᑦᑎᓐᓅᖓᔪᓪᓗ ᐊᑑᑎᖃᕐᖓᑕ ᐃᓄᓐᓂᑦ ᐅᐱᒍᓱᑦᑎᑦᑎᓂᕐᒥᒃ ᐊᒻᒪᓗ ᐱᔪᓐᓇᕐᓯᑎᑦᑎᕙᓪᓕᐊᓂᕐᒥᒃ ᐃᓅᓱᑦᑐᖁᑎᑦᑎᓐᓂᒃ.”

ᕿᑭᖅᑕᓂ ᐃᓕᖅᑯᓯᓕᕆᓂᕐᒧᑦ ᐃᑲᔫᑏᑦ ᐃᑲᔫᑎᐅᕙᑦᑐᓂᑦ ᓂᕈᐊᖅᑕᐅᖃᑕᐅᓯᒪᒻᒪᑦ ᑲᑐᔾᔨᖃᑎᒌᒃᑯᑦ ᑲᑎᒪᔨᖏᓐᓂᑦ ᐅᑐᐱᕆ 2017ᖑᑎᓪᓗᒍ ᐃᓚᒋᔭᐅᖁᓪᓗᒍ ᓄᑖᓄᑦ ᐃᑲᔫᓯᐊᔅᓴᓄᑦ ᑮᓇᐅᔭᓄᑦ ᐊᑭᓕᕐᓱᐃᔾᔪᑕᐅᖃᑦᑕᓂᐊᖅᑐᓄᑦ. ᑮᓇᐅᔭᑦ ᐃᑲᔫᓯᐊᔅᓴᓄᑦ ᑮᓇᐅᔭᓂᑦ ᐅᕙᙶᖃᑦᑕᖅᑐᑦ ᑐᖅᑯᖅᑕᐅᕙᓪᓕᐊᔪᓂᑦ ᑮᓇᐅᔭᓂᑦ, ᑐᖅᑯᖅᑕᐅᕙᓪᓕᐊᔪᑦ ᑮᓇᐅᔭᑦ ᓄᐊᑕᐅᕙᓪᓕᐊᕙᑦᑐᑦ ᑮᓇᐅᔭᓂᑦ ᐃᓯᕐᐸᑦᑐᓂᑦ ᑐᕌᕐᐸᓪᓕᐊᕙᑦᑐᑎᒃ ᐃᑲᔫᐊᓯᔅᓴᓄᑦ ᑮᓇᐅᔭᓄᑦ ᐊᒥᓱᕈᒃᑲᓐᓂᖁᓪᓗᒋᑦ ᐃᑲᔫᑎᐅᕙᑦᑐᓄᑦ ᐃᓄᓐᓄᑦ ᑐᕌᖓᔪᑦ.

ᐃᓘᓐᓇᑎᒃ ᕿᑭᖅᑕᓂ ᐃᓕᖅᑯᓯᓕᕆᓂᕐᒧᑦ ᐃᑲᔫᑎᓂᑦ ᐊᖏᖅᑕᐅᓯᒪᔪᑦ ᐃᑲᔫᑎᑎᒍᑦ ᐱᓕᕆᐊᑦ ᐱᖃᓯᐅᑎᓯᒪᔪᑦ ᑖᔅᓱᒧᖓ. ᑐᖏᓕᐊᓂ ᐃᓕᖅᑯᓯᓕᕆᓂᕐᒧᑦ ᐃᑲᔫᑎᓂᑦ ᑐᔅᓯᕋᐅᓯᐅᖁᔨᓂᖅ ᓴᖅᑭᖅᑕᐅᓛᖅᑐᖅ ᔪᓚᐃ−ᕿᑎᖏᓐᓂ 2018.

ᑐᑭᓯᒋᐊᑲᓐᓂᕈᒪᒍᔅᓯ, ᑐᑭᓯᒋᐊᕐᕕᐅᖃᑦᑕᕐᓕ:

ᓰᒪ ᓴHᐊ ᔨᐅᕋHᐃ, ᑐᑭᒧᐊᑦᑎᑦᑎᔨ ᑐᓴᐅᒪᖃᑦᑕᐅᑎᓂᕐᒧᑦ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ

szerehi@qia.ca 867.975.8413 1.800.667.2742