ᐃᖃᓗᐃᑦ, ᓄᓇᕗᑦ – ᐄᐳᓪ 29, 2021 – ᕿᑭᖅᑕᓃᒃᑯᑦ  ᖃᐅᔨᒐᒥᒃ ᐃᓅᔪᓐᓃᕐᓂᖓᓄᑦ ᒪᓕᒐᓕᕆᔨᐅᓚᐅᖅᑐᖅ ᐊᒻᒪ ᑲᒡᒐᖅᑐᐃᔨᐅᓪᓗᓂᓗ ᑖᒪᔅ ᕘᔪ.  ᕘᔪᑦ NDP−ᑯᓐᓂ ᒪᓕᒐᓕᐅᖅᑎᐅᓯᒪᔪᖅ, ᓯᕗᓕᖅᑎᒋᔭᐅᓪᓗᓂ  ᕗᕆᑎᔅ ᑯᓛᒻᕕᐊᒥ NDP−ᑯᓐᓂ, ᐃᓚᒋᔭᐅᖃᑕᐅᓪᓗᓂ ᑲᓇᑕᒥ ᐳᖅᑐᓂᖅᐹᒥᒃ ᐃᖅᑲᖅᑐᐃᕝᕕᖕᒥ ᕖᓰᒥ ᐊᒻᒪᓗ ᒪᓕᒐᓕᕆᔨᐅᓯᒪᓪᓗᓂ ᐊᒥᓱᓄᑦ ᓄᓇᖃᖅᑐᑐᖃᓄᑦ ᑎᒥᖁᑎᒋᔭᐅᔪᓂᒃ ᐅᑭᐅᖅᑕᖅᑐᕐᒥ, ᐊᖅᑯᓯᐅᖅᓯᒪᓪᓗᓂ ᑐᑭᑖᕈᑎᒋᖃᑦᑕᖅᓯᒪᔭᖏᓐᓂᒃ ᐊᒻᒪᓗ  ᐱᓕᕆᔪᓐᓇᖅᓯᓂᖏᓐᓄᑦ ᓄᓇᖃᖅᑐᑐᖃᐃᑦ ᑐᑭᓯᒋᐊᕐᕕᐅᖃᑦᑕᕐᓂᖏᓐᓂ. ᐊᕐᕌᒍᖃᓚᐅᖅᑐᖅ 88ᓂ.

“ᖁᔭᓕᔪᖓ ᖃᐅᔨᒍᓐᓇᖅᓯᓚᐅᕋᒃᑯᑦ ᐃᖅᑲᖅᑐᐃᔨ ᕘᔪ,” ᐅᖃᖅᑐᖅ ᐸᐅᓗᓯ ᐊᕿᐊᕈᖅ, ᕿᑭᖅᑕᓃᒃᑯᑦ ᐊᖓᔪᖅᑳᖓ “ᐅᐱᓐᓇᓚᐅᖅᑐᖅ ᑎᒃᑯᐊᓚᐅᖅᓯᒪᒐᑦᑎᒍ ᐊᖏᖃᑎᒌᒍᓐᓇᐃᓕᔪᓂᒃ ᓈᓚᖕᓂᖓᓄᑦ 2017ᒥ.  ᐱᖃᓐᓇᕆᔭᐅᓚᐅᖅᑐᖅ ᐃᓄᓕᒫᓄᑦ.  ᐱᒻᒪᕆᐅᔪᑦ ᐱᓕᕆᐊᕆᓯᒪᔭᖏᑦ ᐊᓯᔾᔩᓯᒪᔪᖅ ᐱᐅᓂᖅᓴᓄᑦ.”

ᐃᖅᑲᖅᑐᐃᔨ ᕘᔪᑦ ᐃᖅᑲᐅᒪᔭᐅᔪᒃᓴᐅᔪᖅ ᒪᓕᒐᓕᕆᔨᐅᓚᐅᖅᓯᒪᓂᖓᓂᒃ ᓂᔅᒐᒃᑯᑦ ᐊᓪᓚᐃᑦ ᑎᒥᖁᑎᖓᓂᒃ ᑖᓐᓇ ᐊᑐᖅᑎᓪᓗᒍ ᑳᓪᑐ ᐱᔾᔪᑎᒋᔭᐅᓪᓗᓂ 1960ᓂ 1970ᓂᓗ. ᑖᓐᓇ ᖃᓄᐃᓐᓂᐅᓚᐅᖅᓯᒪᔪᖅ ᓴᖅᑮᓚᐅᕐᒪᑦ ᓄᓇᖃᖅᑐᑐᖃᓄᑦ ᓇᖕᒥᓂᖁᑎᒋᔭᐅᓂᖓᓄᑦ ᑲᓇᑕᐅᑉ ᒪᓕᒐᕐᔪᐊᖏᓐᓂ.  ᒪᓕᒐᓕᕆᔨᐅᑎᓪᓗᒍ, ᐃᖅᑲᖅᑐᐃᔨᐅᑎᓪᓗᒍ, ᐊᒻᒪᓗ ᑲᒥᓴᓇᐅᑎᓪᓗᒍ ᐃᑲᔪᖅᑐᒻᒪᕆᐅᓯᒪᖕᒪᑦ ᐊᒥᓱᓂᒃ ᐃᓄᖃᖅᑐᑐᖃᓂ ᑲᓇᑕᒥ , ᐱᖃᓯᐅᑎᓪᓗᒍ ᕘᔪ ᓈᓚᖕᓂᕆᓚᐅᖅᓯᒪᔭᖓᓂ.

2006ᒥ ᐃᖅᑲᖅᑐᐃᔨ ᕘᔪ ᓴᖅᑭᑎᑦᑎᓚᐅᕐᒪᑦ ᑭᖑᓪᓕᖅᐹᕐᒥ ᐅᓂᒃᑳᓂᒃ ᐊᑐᓕᖅᑎᑕᐅᓂᖓᓄᑦ ᓄᓇᕗᒥ ᐊᖏᖃᑎᒌᒍᑎᖓᓂᒃ ᐱᔾᔪᑎᖃᓗᐊᖅᑐᒥᒃ ᐃᓄᐃᑦ ᐃᖅᑲᓇᐃᔭᕐᓂᖏᑦ ᒐᕙᒪᒃᑯᓐᓂ. ,ᑖᓐᓇ ᐅᓂᒃᑳᓕᐊᖅ ᐊᑐᓕᖁᔨᔾᔪᑎᓂᒃ ᐃᓗᓕᖃᓚᐅᖅᑐᖅ ᓴᖅᑭᑎᑦᑎᒋᐊᖃᖅᖢᑎᒃ ᐃᓕᓐᓂᐊᕐᓂᕐᓂ ᐃᓕᓐᓂᐊᓕᓵᖅᑐᓂᑦ ᑕᐃᑯᖓ ᒍᕇᑦ 12ᒧᑦ ᐱᔾᔪᑎᖃᓗᐊᖅᖢᓂ ᐃᓕᓐᓂᐊᖅᓯᒪᙱᓐᓂᖅ ᐱᓇᐃᓗᑕᕆᔭᐅᓯᒪᓂᖓᓄᑦ ᐃᓄᐃᑦ ᐃᖅᑲᓇᐃᔭᕈᓐᓇᕐᓂᖏᓐᓄᑦ.

ᑐᑭᓯᒃᑲᓐᓂᕈᒪᒍᕕᑦ, ᖃᐅᔨᒋᐊᕐᕕᒃᓴ:

ᕕᐅᓪ ᕼᐋᑉᑭᓐᔅ, ᑐᑭᒧᐊᒃᑎᑦᑎᔨᐅᑲᐃᓐᓇᖅᑐᖅ ᑐᓴᐅᒪᖃᑦᑕᐅᑎᓕᕆᓂᕐᒧᑦ,
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
whopkins@qia.ca
867.975.8413 or
1.800.667.2742