ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐃᑲᔪᖅᑐᐃᓂᐊᖅᑐᑦ ᐃᒡᓗᓕᖕᒥᐅᓂᑦ ᓄᕙᒡᔪᐊᕐᓇᖅ-19−ᒥᒃ ᐊᐃᑦᑐᐃᔪᖃᖃᑦᑕᑎᓪᓗᒍ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐱᓇᓱᐊᒐᖃᐃᓐᓇᕐᓂᐊᖅᐳᑦ ᓱᓕ ᐃᑲᔪᖅᑐᐃᓗᑎᑦ ᓂᕿᖃᑦᑎᐊᕐᓂᐊᕐᓂᖏᖕᓂᑦ ᐃᓄᐃᑦ ᐊᒻᒪᓗ ᐊᓯᒥᓂᒃ ᑕᑯᖃᑦᑕᕆᐊᖃᙲᓐᓇᖅᑎᓪᓗᒋᑦ ᓄᕙᒡᔪᐊᕐᓇᖅ-19 ᐱᓪᓗᒍ ᐊᑦᑐᖅᑕᐅᓂᖃᖅᑐᓄᑦ ᓄᓇᓕᖕᓄᑦ ᓂᕿᓂᒃ ᑲᑎᖅᓱᖅᓯᒪᔪᓂᑦ ᑐᓂᐅᖅᑲᐃᓗᑎᑦ ᐃᑲᔪᕐᓂᐊᓕᖅᑐᑦ ᐊᒻᒪᓗ ᓂᕿᑖᕈᑎᒃᓴᓂᒃᑎᑦᑎᓗᑎᑦ ᐃᒡᓗᓕᖕᒥ. ᕿᑭᖅᑖᓗᖕᒥᐅᑦ ᐃᓄᐃᑦ ᐃᒡᓗᓕᖕᒥᐅᑕᐃᑦ ᐱᔪᓐᓇᖅᑐᑦ ᒪᕐᕈᐊᖅᑎᕐᓗᑎᒃ ᑕᒪᒃᑯᓂᖓ ᓂᕿᓂᑦ ᑲᑎᖅᓱᖅᑕᐅᓯᒪᔪᓂᑦ ᐊᑭᖃᖅᑎᒋᔪᑦ ᐃᒪᓐᓇᓂᑦ $250 ᐊᑐᓂ.
ᑖᓐᓇ ᐱᓕᕆᐊᖅ ᐋᖅᑭᓱᖅᑕᐅᓯᒪᕗᖅ ᓂᕿᖃᑦᑎᐊᖁᓪᓗᒋᑦ ᐃᓄᐃᑦ ᐃᒡᓗᒥᐅᑕᐅᖃᑎᒌᑦᑐᑦ ᓄᓇᓕᑦᑎᓐᓂ ᓄᕙᒡᔪᐊᕐᓇᖅ-19−ᖃᐅᖅᑐᖅᑕᓕᖕᓂᑦ.
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓂᕿᑖᕈᓐᓇᐅᑎᓂᑦ ᐋᑎᕆᔪᑦ ᐃᒡᓗᓕᖕᒥ ᐱᓕᕆᖃᑎᖃᖅᖢᑎᑦ ᑯᐊᐸᒃᑯᓐᓂ. ᑮᓇᐅᔭᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᓄᕙᒡᔪᐊᕐᓇᖅ-19 ᐊᐃᑦᑑᑕᐅᓕᖅᑎᓪᓗᒍ ᖃᓄᐃᓕᐅᕈᑎᖃᕆᐊᕈᑎᕗᑦ ᑕᐃᑲᙶᖅᑐᑦ ᑲᓇᑕᑉ ᒐᕙᒪᖓᑕ ᓄᓇᖃᖅᑳᖅᓯᒪᔪᑦ ᓄᓇᓖᑦ ᐃᑲᔪᖅᑐᖅᑕᐅᓂᖏᖕᓄᑦ ᑮᓇᐅᔭᖁᑎᒋᔭᐅᔪᓂᑦ.
ᐅᕝᕙ ᐅᑯᐊ ᖃᓄᐃᓕᐅᕈᑕᐅᓂᐊᖅᑐᑦ ᓂᕿᑖᖅᑎᑦᑎᖃᑦᑕᕐᓗᑕ:
- ᐱᒋᐊᕐᓗᒍ ᔮᓐᓄᐊᕆ 3, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪᓗ ᑯᐊᐸᒃᑯᑦ ᓂᕿᑖᕈᓐᓇᐅᑎᑖᖅᑎᑦᑎᓂᐊᖅᑐᑦ, ᐊᑭᖃᖅᑎᒋᔪᓂᑦ $250−ᓂᑦ
- ᐱᒋᐊᕐᓗᒍ ᔮᓐᓄᐊᕆ ᑕᖅᑭᖓᑕ ᕿᑎᐊᓂ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪᓗ ᑯᐊᐸᒃᑯᑦ ᑭᖑᓪᓕᕐᒥᒃ ᓂᕿᑖᕈᓐᓇᐅᑎᓂᑦ ᐋᑎᕆᖃᑦᑕᓛᖅᑐᑦ, ᐊᑭᖃᖅᑎᒋᔪᓂᑦ $250−ᓂᑦ
- ᓂᕿᑖᕈᓐᓇᐅᑏᑦ ᐋᑎᖅᑕᐅᒐᔭᖅᑐᑦ ᐃᓄᖕᓂᑦ ᑕᑯᙱᓪᓗᑎᑦ ᐊᑐᓂ ᐃᓄᐃᑦ ᐃᒡᓗᖏᖕᓅᖅᑕᐅᓗᑎᑦ ᐃᒡᓗᓕᖕᒥ
ᐃᓄᐃᑦ ᐊᒥᓱᑦ ᐃᓚᒌᑦᑐᑦ ᐃᒡᓗᒥᐅᑕᐅᖃᑎᒌᑦᑐᑎᑦ ᐊᐱᕆᔭᐅᕗᑦ ᖃᐅᔨᒃᑲᕐᓗᑎᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᓄᓇᓕᒻᒥᐅᓂᑦ ᐱᓕᕆᖃᑎᖃᖅᑎᖏᖕᓂᑦ ᑐᑭᓯᒋᐊᒃᑲᓐᓂᖁᓪᓗᑎᑦ ᖃᓄᒃᑲᓐᓂᖅ ᐃᑲᔪᖅᑐᖅᑕᐅᒃᑲᓐᓂᕈᓐᓇᕋᔭᕐᒪᖔᕐᒥᒃ.
ᑐᑭᓯᒋᐊᒃᑲᓐᓂᖁᓪᓗᑎᑦ ᑕᒪᔅᓱᒪᑉ ᐱᓕᕆᐊᑉ ᒥᒃᓵᓄᑦ, ᖃᕋᓴᐅᔭᒃᑯᑦ ᑎᑎᕋᕈᓐᓇᖅᑐᑎᑦ ᐅᕗᖓ: COVID-19@qia.ca ᐅᕝᕙᓘᓐᓃᑦ ᐅᖄᓚᓗᑎᑦ ᐅᕗᖓ: 1-867-975-8383.
ᑕᑯᓂᐊᕐᓗᒍ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐃᑭᐊᖅᑭᕕᖓ ᐅᕙᓂ qia.ca ᑐᑭᓯᒋᐊᒃᑲᓐᓂᖁᓪᓗᑎᑦ ᐊᒻᒪᓗ ᖃᐅᑕᒫᑦ ᑐᓴᕋᒃᓴᓂᑦ ᓄᑖᕐᓂᑦ ᐅᖃᓕᒫᖁᓪᓗᑎᑦ.
ᑐᑭᓯᒋᐊᒃᑲᓐᓂᕈᒪᒍᕕᑦ, ᖃᐅᔨᒃᑲᕐᓗᒍ:
ᕕᐅᓪ ᕼᐊᑉᑭᓐᔅ, ᑐᑭᒧᐊᑦᑎᑦᑎᔨᐅᑲᐃᓐᓇᖅᑐᖅ ᑐᓴᐅᒪᖃᑦᑕᐅᑎᔪᓕᕆᔨᒃᑯᓐᓂ,
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
whopkins@qia.ca
867.975.8413 ᐅᕝᕙᓘᓐᓃᑦ
1.800.667.2742