ᓄᕕᐱᕆ 16ᒥ – 18ᒧᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒋᑦ ᑐᙵᓱᑦᑎᑦᑎᔪᔪᑦ ᖃᓂᒋᔭᖓᓃᑦᑐᓂᑦ 50 ᕿᒧᒃᓯᖅᑎᓂᑦ ᓇᑭᑐᐃᓐᓈᕐᓯᒪᔪᓂᑦ ᕿᑭᖅᑕᓂ ᓄᓇᓕᐅᔪᓂᑦ ᑕᒪᐅᖓ ᐃᖃᓗᓐᓄᑦ ᐅᖃᐅᓯᖃᕆᐊᖅᑐᑎᓪᓗᒋᑦ ᖁᕕᐊᒋᔭᖏᓐᓂᒃ ᖃᐅᔨᒪᔭᖏᓐᓂᓪᓗ ᕿᒧᒃᓯᖃᑦᑕᕐᓂᐅᑉ ᒥᔅᓵᓄᑦ.

ᑲᑎᒪᓂᖓᑦ ᐱᒋᐊᕈᑎᖃᔪᔪᖅ ᓇᒡᒐᔾᔭᐅᒥ ᐅᓐᓄᒃᑯᑦ ᑲᑎᖃᑎᒌᑦᑐᑎᒃ ᑐᙵᓱᑦᑎᑕᐅᓪᓗᑎᓪᓗ ᑲᑎᒪᔭᖅᑐᖅᑐᓕᒫᑦ. ᑲᑎᒪᔾᔪᑎᔅᓴᖏᓐᓂᒃ ᐊᑐᖅᑕᐅᔪᔅᓴᐃᓪᓕ ᐱᒋᐊᔪᔪᑦ ᐊᐃᑉᐱᕐᒥ ᑕᕝᕙᓂ ᑲᑎᒪᔭᖅᑐᕐᓯᒪᔪᑦ ᐅᓪᓛᒃᑯᑦ ᑐᑭᓯᕙᓪᓕᐊᔪᔪᑦ ᐱᕙᓪᓕᐊᓯᒪᓂᖏᑕ ᒥᒡᓴᓄᑦ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᐊᒻᒪᓗ ᕿᑭᖅᑕᓂᒃᑯᑦ ᓴᐃᒻᒪᖃᑎᒌᓐᓂᕐᒧᑦ ᐱᓕᕆᐊᖅᑖᖅᑲᐅᕆᓯᒪᔭᖏᓐᓂᒃ. ᐅᓐᓄᓴᒃᑯᑦ, ᑲᑎᒪᔭᖅᑐᕐᓯᒪᔪᑦ ᐃᓚᒋᔭᐅᔪᔪᑦ “ᑐᑭᓯᕙᓪᓕᐊᓂᕐᒥᒃ ᑕᐃᔅᓱᒪᓂᓴᕐᓂᑦ” ᑲᑎᒪᒍᑎᖃᖅᑐᑎᒃ, ᑕᒪᓐᓇ ᐃᑲᔫᑎᖃᔪᔪᖅ ᑕᐃᒫᒃ ᐃᓘᓐᓇᖏᓐᓅᖓᔪᓂᑦ ᐅᖃᐅᓯᐅᔪᓂᓪᓗ ᑐᑭᓯᐅᒪᑦᑎᐊᓂᕐᓴᐅᓂᐊᕐᖓᑕ ᐊᑐᖅᑕᐅᓯᒪᔪᑦ ᒥᔅᓵᓄᑦ ᕿᒧᔅᓯᖃᑦᑕᓂᕐᒨᖓᔪᓂᑦ ᑕᒫᓂ ᕿᑭᖅᑕᓂ.

ᐱᖓᑦᑎᕐᒥ, ᑲᑎᒪᔭᖅᑐᕐᓯᒪᔪᑦ ᑐᑭᓯᒃᑲᓐᓂᔪᔪᑦ ᕿᑭᖅᑕᓂᒃᑯᑦ ᕿᒻᒥᓂᑦ ᐊᑐᖅᑕᐅᑎᑦᑎᒋᐊᒃᑲᓂᕐᓂᕐᒧᑦ ᐱᓕᕆᐊᕐᒥᑦ ᐊᒻᒪᓗ ᖃᓄᖅ ᑲᑐᔾᔨᖃᑎᒌᒃᑯᑦ ᐃᑲᔪᕐᒪᖔᑕ ᕿᒧᒃᓯᖁᑎᓕᓐᓂᒃ ᑕᒫᓂ ᕿᑭᖅᑕᓂ. ᑲᑎᒪᔭᖅᑐᕐᓯᒪᔪᑦ ᑐᑭᓯᑎᑕᐅᔪᒻᒥᔪᑦ ᑲᔪᓯᑎᑕᐅᖏᓐᓇᕐᓂᖓᓂᒃ ᓄᓇᕗᒥ ᐸᖓᒡᒍᔾᔨᓂᐅᕙᑦᑐᖅ ᐊᒻᒪᓗ ᐃᓚᒋᔭᐅᒍᒪᕙᓗᓪᓚᕆᔪᔪᑦ ᑕᐃᒫᒃ ᓱᑲᓐᓂᑭᓴᐅᑎᔪᓂᑦ ᕿᑭᖅᑖᓘᑉ ᓂᒋᐊᓂᒥᐅᓂᑦ.

ᐃᓅᓱᑦᑐᑦ ᕿᒧᒃᓯᖅᑏᒃ ᑎᐊᕙᓐ ᒪᓂᖅ ᐊᒻᒪᓗ ᑎᓃᔅ ᒪᓕᑭ ᑐᓴᕐᓂᐊᖅᑐᐊᓗᓐᓂᑦ ᐅᓂᒃᑳᖃᔪᔫᒃ ᑲᑎᒪᔪᓄᑦ ᐊᑐᕐᓯᒪᔭᖏᑕ ᒥᔅᓵᓄᑦ ᖃᓄᖅ ᕿᒧᒃᓯᖁᑎᑖᕐᓂᑰᒻᒪᖔᑎᒃ. ᑎᐊᕙᓐ, 20ᓂᒃ ᐅᑭᐅᓕᒃ, ᖃᐅᑕᒫᑦ−ᐃᓅᓯᕆᓪᓗᒍ ᐊᖑᓇᓱᑦᑎ ᖃᐅᓱᐃᑦᑐᕐᒥ ᐊᑐᖃᑦᑕᓲᖅ ᕿᒧᒃᓯᖏᓐᓂᒃ ᐊᖑᓇᓱᑉᐸᑦᑐᓂ ᓂᕿᒋᔭᐅᓂᐊᖅᑐᓂᑦ ᐃᓚᖏᓐᓄᒃ ᓄᓇᖅᑲᑎᖏᓐᓄᓪᓗ. ᑎᓃᔅ, ᖃᐅᑕᒫᑦ ᕿᒧᒃᓯᖏᓐᓂᒃ ᐊᑐᐃᓐᓇᖃᑦᑕᕈᓐᓃᕋᓗᐊᖅᑐᓂ, ᓯᕗᓪᓕᕐᐹᖑᓪᓗᓂ ᐊᕐᓇᐅᓪᓗᓂ ᓵᓚᒃᓴᓚᐅᕐᓯᒪᔪᖅ ᓄᓇᕗᒥ ᐸᖓᒡᒍᔾᔨᓂᕐᒥᒃ. ᐅᓂᒃᑳᖃᔪᔪᖅ ᐊᑐᕐᓯᒪᔭᖏᓐᓂᒃ ᐃᓕᓐᓂᐊᐸᑦᑐᓂ ᐊᑖᑕᒥᓂᒃ, ᐹᓪ ᒪᓕᑭᒥᒃ, ᖃᓄᖅ ᕿᒧᒃᓯᖁᑎᖏᓐᓂᒃ ᐱᕈᐃᔭᕆᐊᖃᕐᒪᖔᖅ ᐋᖅᑭᐅᒪᑎᑦᑎᔭᕆᐊᖃᕐᒪᖔᕐᓗ. ᐅᖃᐅᓯᖃᔪᒻᒥᔪᖅ ᐃᑲᔪᖅᑕᐅᓯᒪᓂᖓᓂᒃ ᖃᓄᑐᐃᓐᓇᑦᑎᐊᖅ ᕿᒧᒃᓯᐅᕐᔪᐊᖃᑕᐅᑎᓪᓗᒍ ᓄᓇᕗᒥ ᐸᖓᒡᒍᔾᔨᓂᕐᒥ.

ᐅᓪᓗᖓᓐᓂ ᐱᖓᔪᐊᓂ, ᑲᑎᒪᔭᖅᑐᕐᓯᒪᔪᑦ ᐱᓕᕆᖃᑎᒌᔪᔪᑦ ᓇᓗᓇᐃᔭᐃᓪᓗᑎᒃ ᓇᓪᓕᐊᓐᓂᒃ ᐃᑲᔪᖅᑕᐅᔾᔪᑎᖃᕆᐊᖃᕐᒪᖔᑕ ᐃᖅᑲᓇᐃᔭᖅᑏᑦ ᑐᑭᓯᓇᓱᑦᑎᓪᓗᒋᑦ ᑖᒃᑯᓇᙵᑦ ᖃᓄᒃᑲᓐᓂᖅ ᑕᒪᓐᓇ ᑲᒪᒋᔭᐅᓂᐊᕐᒪᖔᑕ ᐱᓕᕆᐊᔅᓴᐃᑦ. ᑐᑭᓯᓇᕐᓯᔪᔪᖅ ᐊᒥᓱᑦ ᑲᑎᒪᔭᖅᑐᕐᓯᒪᔪᖅ ᐱᓕᕆᖃᑎᒌᒃᑲᓐᓂᖃᑦᑕᕈᒪᓛᕐᓂᖏᓐᓂᒃ ᐊᒻᒪᓗ ᐃᓕᒃᑲᓐᓂᕈᒪᓂᖏᓐᓂᒃ ᐃᓄᑐᖃᕐᓂᑦ ᐊᒻᒪᓗ ᕿᒧᒃᓯᖅᑎᐅᖃᑎᖏᓐᓂᒃ.

ᑲᑎᒪᓂᖏᓐᓂ ᑲᑎᒪᔭᖅᑐᕐᓯᒪᔪᑦ ᐃᓅᓱᑦᑐᑦ ᐃᓐᓇᐃᓪᓗ ᐱᕕᖃᖅᑎᑕᐅᖃᑦᑕᓚᐅᖅᑐᑦ ᐅᖃᐅᓯᖃᕈᓐᓇᓂᕐᒥᒃ ᐊᒻᒪᓗ ᐅᓂᒃᑳᖃᕐᓂᕐᒥᒃ ᐊᑐᕐᓯᒪᔭᖏᑕ ᒥᔅᓵᓄᑦ. ᑕᒪᓐᓇ ᑐᓴᕈᒥᓇᑦᑎᐊᖅᑐᓂᑦ ᓂᓪᓕᐊᒍᑕᐅᖃᑦᑕᓚᐅᖅᑐᖅ ᑭᓱᑐᐃᓐᓇᓕᒫᑦ ᒥᔅᓵᓄᑦ ᓲᕐᓗ ᒪᑯᓂᖓ ᖃᓄᑎᒋ ᑕᑭᔫᑎᒋᒋᐊᖃᕐᒪᖔᖅ ᐊᑦᑐᓈᖓ ᐊᔾᔨᒌᙱᑐᒡᒍᑎᐅᓲᖑᒻᒪᑕ ᓄᓇᑦᑕ ᐋᖅᑭᓯᒪᓂᖏᑦ, ᒪᑯᓄᖓ ᐊᑦᑏᖃᑦᑕᓂᕐᒧᑦ ᐊᒻᒪᓗ ᐋᖅᑭᓱᕐᓯᒪᔭᕆᐊᖃᕐᓂᖏᑦ ᐊᓄᐃᑦ ᐊᓄᓕᐅᕐᓗᓂ.

ᐃᓘᓐᓇᖏᓐᓂ, ᓯᕗᓪᓕᕐᐹᑦᑎᐊᕐᒥ ᕿᒧᒃᓯᖅᑎᓂᑦ ᕿᑭᖅᑕᓂ ᑲᑎᒪᑎᑦᑎᓂᖅ ᑲᔪᓯᓂᖃᑦᑎᐊᔪᔪᖅ. ᑲᑎᒪᑎᑦᑎᑎᐊᒃᑳᓘᒃ ᒥᐊᓕ ᐅᐃᓪᒪᓐ ᐊᒻᒪᓗ ᔪᐃᓕ ᓴᖑᔭ ᑲᑎᒪᖃᑕᐅᔪᓂᑦ ᐃᓚᒋᔭᐅᑎᑦᑎᑦᑎᐊᖃᑦᑕᔪᔫᒃ ᐊᒻᒪᓗ ᐃᖏᕐᕋᑎᑦᑎᑎᐊᖅᑐᑎᒃ ᐱᓇᓱᐊᕈᓯᐅᑉ ᐃᓗᐊᓂ. ᐊᒥᓱᑦ ᐱᖃᑎᑖᖅᑐᓚᐅᖅᑐᑦ ᖃᐅᔨᔭᕆᐅᖅᑕᖏᓐᓂᒃ ᑭᒃᑯᑐᐃᓐᓇᑦᑎᐊᑦ ᐅᓂᒃᑳᖃᑦᑕᓚᐅᕐᖓᑕ ᕿᒧᒃᓯᖃᑦᑕᕐᓂᐅᑉ ᒥᔅᓵᓄᑦ ᐊᒻᒪᓗ ᐃᖅᑲᓇᐃᔮᖏᑕ ᒥᒡᓴᓄᑦ ᐊᑐᖅᑕᐅᑲᓐᓂᖃᑦᑕᖁᓪᓗᒋᑦ ᑖᒃᑯᐊ ᐃᓕᖅᑯᓯᑦᑎᓐᓂ ᐱᐅᓯᓪᓚᕆᐅᓯᒪᔪᑦ.

ᑲᑎᒪᓂᖅ ᕿᑭᖅᑕᓂᒃᑯᓐᓄᑦ ᐱᕕᖃᕈᑕᐅᓚᐅᖅᑐᖅ ᑐᓴᐅᒪᕕᖃᕐᓂᕐᒥᒃ ᕿᑭᖅᑕᓂ ᕿᒧᒃᓯᖅᑎᓂᑦ ᐊᒻᒪᓗ ᑐᓴᐅᒪᒍᑎᒋᓂᐊᖅᑕᖏᓐᓂᒃ ᖃᓄᐃᑦᑐᓂᑦ ᐃᑲᔪᖅᑕᐅᔾᔪᑎᖃᕆᐊᖃᕐᒪᖔᑕ ᐊᒻᒪᓗ ᑭᓱᑦ ᐃᑲᔫᑎᖃᕐᓂᐊᕐᒪᖔᑕ ᓯᕗᓂᔅᓴᑎᓐᓂ ᐱᓕᕆᓂᐅᖃᑦᑕᓂᐊᖅᑐᓂᑦ ᑖᓐᓇ ᐊᖅᑯᑎᒋᓗᒍ ᕿᒻᒥᓂᑦ ᐊᑐᖅᑕᐅᑎᑦᑎᒋᐊᒃᑲᓂᕐᓂᕐᒧᑦ ᐱᓕᕆᐊᖅ.

ᑲᑎᒪᑎᑦᑎᒍᓐᓇᓚᐅᖅᑐᑦ ᐃᖅᑲᓇᐃᔮᖑᓯᒪᔪᑦ ᐊᔅᓱᕈᐊᖑᓪᓗᑎᒃ ᐱᔾᔪᑎᒋᓪᓗᒋᑦ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᓂᑦ. ᐋᒡᒌᓯ 19, 2019ᖑᑎᓪᓗᒍ, ᑲᓇᑕᐅᑉ ᒐᕙᒪᒃᑯᖏᑦ ᐃᓕᓴᕐᓯᓂᖏᓐᓂᒃ ᒪᒥᐊᓐᓂᖏᓐᓂᓪᓗ ᓇᓗᓇᐃᕐᓯᓪᓚᕆᑕᐃᓐᓇᓚᐅᕐᓯᒪᒻᒪᑕ ᕿᑭᖅᑕᓂ ᓄᓇᓕᓐᓄᑦ ᐃᓄᓐᓄᑦ ᑕᐃᔅᓱᒪᓂ ᐃᓕᖅᑯᓯᖃᑎᒋᙱᑕᖏᓐᓂᒃ ᐊᐅᓚᑦᑎᒍᑕᐅᓯᒪᔪᓄᑦ ᐊᑐᐊᒐᕐᓄᑦ ᐊᒻᒪᓗ ᐱᐅᓯᕆᔭᐅᓯᒪᔪᓄᑦ ᐊᕐᕌᒍᓂᑦ 1950ᒥ 1975ᒧᑦ. $2.9 ᒥᓕᐊᓐ ᑮᓇᐅᔭᑦ ᑐᓂᔭᐅᓯᒪᒻᒪᑕ ᕿᒻᒥᓂᑦ ᐊᑐᖅᑕᐅᑎᑦᑎᒋᐊᒃᑲᓂᕐᓂᕐᒧᑦ ᐱᓕᕆᐊᖑᓂᐊᖅᑐᒧᑦ ᑎᓴᒪᐅᔪᙱᒐᖅᑐᓂᑦ (7) ᐊᕐᕌᒎᓂᐊᖅᑐᓂᑦ ᑕᒫᓂ ᕿᑭᖅᑕᓂ ᓄᓇᓕᐅᔪᓂᑦ.