ᐃᖃᓗᐃᑦ, ᓄᓇᕗᑦ, ᐆᑦᑑᑉᐱᕆ 4, 2022 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ (ᕿᑭᖅᑕᓂ) ᓯᕗᓪᓕᐹᖅᓯᐅᑎᓂᒃ ᕿᒥᕐᕈᓯᒪᓕᖅᑐᑦ ᑲᒪᒋᔭᖃᖅᑐᖅ ᒥᓂᔅᑕ ᐃᓱᒪᓕᐅᕈᑎᒋᓚᐅᖅᑕᖏᓐᓂᒃ ᐹᕕᓐᓛᓐ 2022 ᐲᔭᖅᑕᐅᔪᑦ ᐅᓄᖅᓯᒋᐊᖁᔭᐅᓂᖏᓐᓄᑦ ᑐᒃᓯᕋᐅᑎᓂᒃ (2022 PIP ᑐᒃᓯᕋᐅᑏᑦ).

ᕿᑭᖅᑕᓂᒃᑯᑦ ᖁᕕᐊᒋᔭᓖᑦ ᑕᑯᒋᐊᒃᓴᖅ ᑲᒪᒋᔭᖃᖅᑐᖅ ᒥᓂᔅᑕ, ᐃᓄᓕᕆᔨᑐᖃᒃᑯᑦ ᒥᓂᔅᑕᖓ ᑖᓐ ᕚᓐᑎᐅᓪ, ᐃᓚᓕᐅᔾᔨᓯᒪᓚᐅᖅᑐᖅ ᐊᒥᓱᒐᓚᓐᓂᒃ ᓄᑖᓂᒃ ᐊᖏᕈᑕᐅᒋᐊᓕᓐᓂᒃ 2022 PIP ᑐᒃᓯᕋᐅᑎᓂ ᐋᖅᑭᒍᑎᒃᓴᓂᒃ ᐃᓱᒫᓘᑕᐅᔪᓄᑦ ᐊᒃᑐᐃᓯᒪᔪᓂᒃ ᐃᓄᐃᑦ ᐱᔪᓐᓇᐅᑎᖏᓐᓂᒃ. ᕿᑭᖅᑕᓂᒃᑯᑦ ᐃᑲᔪᖅᓱᐃᔪᑦ 2022 PIP ᑐᒃᓯᕋᐅᑏᑦ ᑲᔪᓯᖁᓪᓗᒋᑦ, ᐊᑐᕐᓗᒋᑦ ᒥᓂᔅᑕᐅᑉ ᐃᓱᒪᓕᐅᕈᑎᒋᓚᐅᖅᑕᖏᑦ ᐃᓚᓕᐅᔾᔭᐅᓗᑎᒃ ᓄᑖᑦ ᐊᖏᕈᑕᐅᒋᐊᓖᑦ ᐊᒻᒪᓗ ᐊᖏᔪᒻᒪᕆᒻᒥᒃ ᐋᖅᑭᒋᐊᖅᑕᐅᓗᑎᒃ ᐱᓕᕆᐊᒧᑦ ᓇᓗᓇᐃᒃᑯᑕᑦ, ᑕᒪᓐᓇ ᓱᖅᑯᐃᕈᑕᐅᒻᒪᑦ ᐱᔪᓐᓇᐅᑎᖏᑦ ᐱᔪᒪᔭᖏᓪᓗ ᐃᓄᐃᑦ ᓈᒻᒪᑦᓯᐊᖁᓪᓗᒋᑦ ᐃᓚᓕᐅᔾᔭᐅᓯᒪᓗᑎᒃ 2022 PIP ᑐᒃᓯᕋᐅᑎᒧᑦ.

ᕿᑭᖅᑕᓂᒃᑯᑦ, ᓇᓗᓇᐃᖅᑕᐅᓯᒪᓂᖏᓐᓄᑦ ᐃᓄᐃᑦ ᑲᑐᔾᔨᖃᑎᒌᓂᒃ, ᐱᓕᕆᐊᒃᓴᖃᕐᒪᑕ ᑭᒡᒐᖅᑐᐃᓂᕐᒥᒃ ᐃᓄᐃᑦ ᐱᔪᓐᓇᐅᑎᖏᓐᓂᒃ ᐊᒃᑐᐃᓯᒪᔪᓂᒃ ᖃᐅᔨᓴᕐᓂᕐᒥᒃ ᐊᒻᒪᓗ ᐃᑲᔫᑎᓄᑦ ᐊᖏᖃᑎᒌᒍᑎᓂᒃ ᐅᔭᕋᓐᓂᐊᕐᓂᐅᔪᓂ ᕿᑭᖅᑕᓂ ᓄᓇᖓᓂ. ᐱᓗᐊᖅᑐᒥ ᐱᒻᒪᕆᐅᔪᖅ ᐊᐅᓚᑕᐅᔪᓂ ᐃᓄᐃᑦ ᓄᓇᖁᑎᖏᓐᓂ ᐊᒻᒪᓗ ᑎᒍᓯᖃᑦᑕᓂᕐᒥᒃ ᐅᔭᕋᓐᓂᐊᕋᑦᓴᓂᒃ ᐃᓄᐃᑦ ᓇᖕᒥᓂᖁᑎᖏᓐᓂᒃ ᐅᔭᕋᓐᓂᐊᕋᑦᓴᓄᑦ ᐱᔪᓐᓇᐅᑎᖃᕐᕕᒋᔭᖏᓐᓂᒃ. ᕿᑭᖅᑕᓂᒃᑯᑦ ᐃᓱᒪᓕᐅᕈᑎᖏᑦ ᑐᓴᖅᑎᑕᐅᓯᒪᓂᕐᒥᒍᑦ ᐅᖃᐅᓯᐅᓯᒪᔪᓂᒃ ᓄᓇᓖᑦ ᑲᑎᒪᔨᖏᓐᓂᒃ, ᑐᓴᖅᑎᑕᐅᓂᒃᑯᑦ ᓄᓇᓖᑦ ᐃᓄᖏᓐᓂᒃ, ᑕᑯᓐᓇᒐᖏᓐᓂᒃ ᓄᓇᓖᑦ ᑲᑐᔾᔨᖃᑎᒌᖏᓐᓂᒃ ᓲᕐᓗ HTO ᐊᒻᒪᓗ ᕼᐊᒻᓚᐃᑦ, ᐃᓱᕐᕆᐅᑎᓕᕆᔩᑦ ᒪᓕᒐᕐᓂᐊᑏᓪᓗ ᐅᖃᐅᓯᕆᓯᒪᔭᖏᓐᓂᒃ, ᐊᑐᖅᑕᐅᖃᑦᑕᖅᓯᒪᔪᓂᒃ, ᐊᒻᒪᓗ ᑲᑐᔾᔨᖃᑎᒌᑦ ᖃᐅᔨᒪᓂᖏᓐᓂᒃ.

ᐅᔾᔨᕐᓇᓗᐊᕐᓂᖏᑕ ᐃᓚᖏᑦ ᖃᐅᔨᒃᑲᐃᒍᑕᐅᒋᐊᓖᑦ ᒥᓂᔅᑕᐅᑉ ᐃᓱᒪᓕᐅᕈᑎᒋᓚᐅᖅᑕᖓᓄᑦ ᐃᓚᒋᔭᐅᓗᑎᒃ ᐊᒥᓱᒐᓚᐃᑦ ᐅᔾᔨᕐᓇᓗᐊᖅᑐᑦ ᓄᑖᑦ ᐊᒻᒪᓗ ᐋᖅᑭᒋᐊᖅᑕᐅᓯᒪᔪᑦ ᒪᓕᒐᑦᓴᑦ ᑖᒃᑯᓇᓂ NIRB ᐱᓕᕆᐊᒧᑦ ᓇᓗᓇᐃᒃᑯᑕᖏᓐᓂ:

• ᐋᖅᑭᒋᐊᖅᑕᐅᓂᖏᑦ ᑕᕆᐅᓕᕆᔨᒃᑯᑦ ᓄᓇᒥᐅᑕᓕᕆᔨᒃᑯᓪᓗ ᐱᔭᕆᐊᑭᓪᓕᑎᕆᔨᖏᑦ, ᐃᓚᒋᔭᐅᓗᑎᒃ ᑎᒃᑯᐊᖅᓯᖃᑦᑕᕐᓂᖅ ᓇᖕᒥᓂᖅᓱᖅᑐᒥᒃ ᐃᒃᓯᕙᐅᑕᖅᑖᑐᐃᓐᓇᐅᓗᑎᒃ ᑕᒪᒃᑮᒃ ᐱᔭᕆᐊᑭᓪᓕᑎᕆᔩᒃ
• ᓄᑖᑦ ᒪᓕᒐᑦᓴᑦ ᐊᑦᑐᐊᔪᑦ ᓯᑯ ᓯᖁᒻᒫᔭᐅᖃᑦᑕᕐᓂᖓᓄᑦ ᐅᒥᐊᔪᐊᖅᑕᐅᖃᑦᑕᓂᕐᒥᓪᓗ, ᐋᖅᑭᒋᐊᕈᑎᒃᓴᒥᒃ ᒥᑦᑎᒪᑕᓕᒃ ᐊᒻᒪᓗ HTO ᐃᓱᒫᓘᑎᖏᑦ ᑐᑭᓯᓇᑦᓯᐊᓂᖅᓴᐅᔪᓂᒃ ᑭᒡᓕᖃᖅᑎᑕᐅᒋᐊᖃᕐᓂᖓᓂᒃ ᓯᑯ ᓯᖁᒻᒫᔭᐅᖃᑦᑕᕐᓂᖓᓄᑦ.
• ᓄᑖᖅ ᐳᔪᕐᓗᓕᕆᓂᕐᒧᑦ ᒪᓕᒐᑦᓴᖅ ᐊᒻᒪᓗ ᒪᓕᑦᑕᐅᔭᕆᐊᖃᓪᓚᑖᖅᑐᒥᒃ ᐳᔪᕐᓗᒃ ᖃᐅᔨᓴᖃᑦᑕᕆᐊᖃᕐᓂᖓ.
• ᓄᑖᑦ ᒪᓕᒐᑦᓴᑦ ᐋᖅᑭᑦᓯᐊᕆᐊᖃᕈᑏᑦ ᑲᔪᓯᑎᑕᐅᓂᖓᓂᒃ ᐊᖏᕈᑕᐅᓯᒪᔪᑦ ᑖᑦᓱᒧᖓ ᐱᓕᕆᐊᒧᑦ, ᐃᓚᒋᔭᐅᓗᑎᒃ ᑎᒃᑯᐊᖅᓯᖃᑦᑕᕆᐊᖃᕐᓂᖅ ᓇᖕᒥᓂᖅᓱᖅᑐᒥᒃ ᐱᓕᕆᐊᒥᒃ ᓇᐅᑦᓯᑐᖅᑎᒥᒃ
• ᐊᖏᕈᑕᐅᓯᒪᔪᑦ ᐊᑐᕋᑦᓴᓕᐅᕈᑕᐅᓯᒪᓗᑎᒃ ᐱᐊᓂᒃᑕᐅᒍᑎᒃᓴᖏᓐᓂᒃ ᐃᓄᓐᓄᑦ− ᓯᕗᓕᖅᑕᐅᔪᑦ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᖃᐅᔨᓴᕐᓂᕐᒧᑦ ᐊᒃᑐᖅᑕᐅᓯᒪᔪᓂ ᓄᓇᓕᓐᓂ
• ᐅᓄᖅᑐᑦ ᐊᖏᕈᑕᐅᓯᒪᔪᑦ ᐊᒃᑐᐊᔪᑦ ᓇᐅᑦᓯᑐᕐᓂᕐᒧᑦ ᐃᑯᓪᓚᕈᑎᒃᓴᓂᓪᓗ ᐋᖅᑭᒋᐊᕈᑎᒃᓴᓄᑦ ᐳᔪᕐᓗᒧᑦ,
• ᐊᖏᕈᑎᖃᖅᓯᒪᓂᖅ ᐋᖅᑭᑦᓱᐃᓂᕐᒥᒃ ᑲᔪᓯᑎᑦᓯᓂᕐᒥᓪᓗ ᓄᑖᒥᒃ ᑐᑦᑐᑦ ᓴᐳᔾᔭᐅᓯᒪᒍᑎᒃᓴᖏᓐᓂᒃ ᑐᖔᓂ ᓄᕐᕆᐅᕐᓂᐅᓂᐊᖅᑑᑉ (ᓲᕐᓗ, ᑐᖔᓂ ᐄᑉᕈ 2023).
• ᐊᑭᓕᖅᓱᐃᔾᔪᑎᒃᓴᓄᑦ ᐸᕐᓇᐅᑏᑦ ᐊᑭᓕᖅᑕᐅᒪᐃᑦᑐᓄᑦ ᑮᓇᐅᔭᑎᒍᑦ ᐊᑭᓕᕆᐊᓕᓐᓂᒃ ᐃᓚᒋᔭᐅᓗᑎᒃ ᐊᑭᓕᖅᓲᑎᑦ $1-ᒥᓕᔭᓐ ᒥᑦᑎᒪᑕᓕᒃ HTO−ᖓᓄᑦ, ᐊᒻᒪᓗ ᐊᑭᓕᖅᓲᑎᑦ $12-ᒥᓕᔭᓃᑦᑐᓂᒃ ᑐᕌᖓᔪᓂᒃ ᒥᑦᑎᒪᑕᓕᒃ ᓴᓇᑐᓕᓴᕐᕕᖓᓄᑦ

“ᖁᔭᒋᔪᒪᔭᒃᑲ ᐃᓄᐃᑦ ᐊᒻᒪᓗ ᓄᓇᓕᓐᓂ ᐊᖑᓇᓱᑦᑐᓕᕆᔨᒃᑯᑦ ᑲᑐᔾᔨᖃᑎᒌᖏᑦ ᑐᓂᓯᒪᑦᓯᐊᖃᑦᑕᓚᐅᕐᓂᖏᓐᓄᑦ ᐃᓱᒪᑦᓴᖅᓯᐅᖅᓯᒪᑦᓯᐊᖅᑐᑎᒃ ᑭᒡᒍᑎᒃᓴᓂᒃ ᑖᑦᓱᒧᖓ ᓄᑖᖑᓂᖅᐹᒧᑦ ᐹᕕᓐᓛᓐ ᑐᒃᓯᕋᐅᑎᖓᓄᑦ. ᑖᓐᓇ 7-ᒋᓕᖅᑕᖓ ᑐᒃᓯᕋᐅᑦ ᖁᓕᓂ ᐊᕐᕌᒍᓂ ᐊᓯᔾᔩᒐᓱᐊᕐᓂᕐᒧᑦ ᐊᖏᓕᒋᐊᕆᒐᓱᐊᕐᓂᒧᓪᓘᓐᓃᑦ ᓄᓘᔮᓐᓂ ᐱᓕᕆᐊᒧᑦ ᐊᒻᒪᓗ ᓯᕘᕋᓂᖅᑕᖃᖃᑦᑕᖅᓯᒪᕗᖅ ᑐᓴᖃᑦᑕᕐᓗᓂ ᐹᕕᓐᓛᓐ ᐅᖃᖃᑦᑕᖅᓯᒪᓂᖓᓂᒃ ᓄᖅᑲᑎᑦᓯᒋᐊᖃᕐᓂᐊᓂᕐᒥᓂᒃ ᐃᓄᓐᓂᒃ ᐃᖅᑲᓇᐃᔭᖅᑎᓂᒃ ᑳᓐᑐᓛᒃᑕᐅᓯᒪᔪᓂᓪᓗ. ᒥᓂᔅᑕ ᓈᓚᑦᑐᒥᓂᐅᓇᓱᒋᔭᕋ ᐃᓄᐃᑦ ᑕᑯᓐᓇᒐᖏᓐᓂᒃ ᐃᓱᒪᓕᐅᕈᑎᖃᓕᕋᒥ” ᐅᖃᖅᑐᖅ ᐅᓛᔪᒃ ᐊᑭᓱᒃ, ᕿᑭᖅᑕᓂᒃᑯᑦ ᐊᖓᔪᖅᑳᖓ.

ᑕᒪᒃᑯᐊ ᐊᓯᔾᔨᕈᑏᑦ NIRB ᐱᓕᕆᐊᖅ ᓇᓗᓇᐃᒃᑯᑕᖓᓄᑦ ᐊᒻᒪᓗ ᐊᓯᖏᓐᓄᑦ ᓄᑖᓄᑦ ᑲᔪᓯᑎᒐᑦᓴᐅᔪᓄᑦ ᐊᖏᕈᑕᐅᔪᓄᑦ ᓄᓘᔮᓐᓂ ᐱᓕᕆᐊᒧᑦ ᐋᖅᑭᑦᓯᒍᑕᐅᔪᑦ ᓄᑖᒥᒃ ᐊᑐᕋᑦᓴᒥᒃ ᓴᐳᔾᔨᓯᒪᓂᕐᒧᑦ ᐃᓄᐃᑦ ᐱᔪᓐᓇᐅᑎᖏᓐᓂᒃ ᑕᕝᕙᙶᖅᑐᓂᒃ ᑐᕋᐃᓐᓇᕐᕕᐅᓪᓗᑎᒃ ᐃᓄᐃᑦ ᐃᓚᐅᑎᑕᐅᓂᖏᓐᓄᑦ ᐱᓕᕆᐊᖅ ᖃᐅᔨᓴᖅᑕᐅᓂᖓᓄᑦ ᓇᐅᑦᓯᑐᖅᑕᐅᓂᖓᓄᓪᓗ.

ᕿᑭᖅᑕᓂᒃᑯᑦ ᑲᑎᒪᔨᖏᑦ ᓂᕆᐅᒋᔭᓖᑦ ᑲᒪᒋᔭᐅᒋᐊᖃᕐᓂᐊᓕᖅᑐᓂᒃ ᐊᒻᒪᓗ ᐸᕐᓇᐅᑎᓂᒃ ᑐᕌᖓᔪᓂᒃ ᐱᓕᕆᐊᕆᓪᓗᐊᑕᕆᐊᓕᖕᒥᓂᒃ ᐃᖅᑲᓇᐃᔭᖃᑎᖃᕐᓂᕐᒥᒃ ᐃᓄᓐᓂᒃ ᐊᒃᑐᖅᑕᐅᓯᒪᔪᓂ ᓄᓇᓕᓐᓂ ᐊᒻᒪᓗ ᓄᓇᓕᓐᓂ ᐊᖑᓇᓱᑦᑐᓕᕆᔨᒃᑯᑦ ᑲᑐᔾᔨᖃᑎᒌᖏᑦ ᑲᔪᓯᑎᑦᓯᓗᑎᒃ ᐊᑭᓕᖅᓱᐃᑎᑦᓯᓂᕐᒥᒃ, ᓇᓗᓇᐃᕈᑎᓂᒃ, ᐊᒻᒪᓗ ᐊᑐᖅᑕᐅᑎᑦᓯᓂᕐᒥᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᑐᑭᒧᐊᒍᑎᒃᓴᑦᓯᐊᕙᐅᓂᖅᐹᖑᓂᖓᓂᒃ ᐃᓄᐃᑦ ᐱᔪᓐᓇᐅᑎᖏᓐᓄᑦ ᐃᓕᖅᑯᓯᖓᓄᓪᓗ ᓴᐳᔾᔭᐅᓯᒪᑦᓯᐊᖁᓪᓗᒋᑦ ᐃᓱᒪᓕᐅᕈᑕᐅᒋᐊᓕᓐᓄᑦ ᐊᐅᓚᓂᖓᓄᑦ ᒫᓐᓇ ᓄᓘᔮᓐᓂ ᐱᓕᕆᐊᖅ.

ᕿᑭᖅᑕᓂ ᐃᓄᐃᑦ ᐊᑐᕈᓐᓇᓚᐅᖅᑐᑦ ᑖᑦᓱᒥᖓ ᐱᔭᕐᓃᑦᑐᒥᒃ ᖃᓄᐃᓐᓂᐅᔪᒥᒃ ᐊᑕᐃᓐᓇᓂᐊᖅᑐᒥᒃ ᐊᒻᒪᓗ ᐊᖏᔪᒥᒃ ᐊᓯᔾᔨᕈᑎᓂᒃ ᐱᓕᕆᐊᒧᑦ ᓇᓗᓇᐃᒃᑯᑕᕐᒥ ᒪᓕᒐᑦᓴᓂᒃ ᐊᐅᓚᑦᓯᔾᔪᑎᓂᓪᓗ, ᑕᒪᓐᓇ ᐊᑲᕐᕆᔮᒃᑲᓐᓂᕈᑎᒋᓂᐊᖅᑕᕗᑦ ᐊᒥᓲᓂᖅᓴᑦ ᐃᖅᑲᓇᐃᔭᐅᑏᑦ ᐃᓕᔭᐅᓯᒪᓕᕐᓂᖏᓐᓂᒃ ᐋᖅᑭᑦᓯᒍᑎᒃᓴᑦ ᐃᓄᐃᑦ ᐃᓱᒫᓘᑎᖏᓐᓂᒃ.

ᐱᕙᓪᓕᐊᔪᓂᒃ ᑐᑭᓯᒋᐊᒃᑲᓂᕐᕕᒃᓴᖅ, ᖃᐅᔨᒋᐊᕐᕕᒋᓗᒍ:

ᑭᐅᕆᓐ ᕙᓚᐅᕋᑎ
ᑐᑭᒧᐊᒃᑎᑦᑎᔨ, ᑐᑭᒧᐊᒍᑎᒃᓴᓂᒃ ᑐᓴᐅᒪᔾᔪᑎᓕᕆᓂᕐᒧᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ
(ᐅ) 867.975.8398 ᐅᕝᕙᓘᓐᓃᑦ ᐊᑭᖃᙱᑦᑐᒧᑦ 1.800.667.2742
kflaherty@qia.ca