ᐃᖃᓗᐃᑦ, ᓄᓇᕗᑦ − ᕖᕝᕗᐊᓕ 5, 2021 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓂᒃᑯᑦ) ᑐᓂᓯᐅᖅᑲᐃᔪᑦ $731,250ᕌᖅᑐᓂᑦ ᕿᑭᖅᑕᓂ ᓄᓇᓕᓐᓄᑦ ᐃᓄᓐᓄᑦ ᐃᓚᒌᓄᑦ ᐃᓄᓕᕆᔨᒃᑯᑎᒍᑦ ᐃᑲᔫᓯᐊᖅᑖᕐᓯᒪᔪᓂᑦ ᑎᓯᐱᕆ 2020ᑎᓪᓗᒍ.

“ᑖᓐᓇ ᐱᓇᓱᐊᕈᑕᐅᔪᖅ ᐃᑲᔫᑎᖃᕐᓂᐊᖅᑐᖅ ᐃᓄᓐᓄᑦ ᐃᓚᒌᓄᑦ ᐃᑲᔪᖅᑕᐅᔭᕆᐊᖃᕐᓂᕐᐹᓄᑦ” ᐅᖃᖅᑐᖅ ᕿᑭᖅᑕᓂᒃᑯᑦ ᐊᖓᔪᖅᑳᖓᑦ ᐸᐅᓗᓯ ᐊᕿᐊᕈᖅ, “ᑲᒪᒋᔭᖃᕋᑦᑕ ᖃᐅᔨᒪᑦᑎᐊᕈᒪᓪᓗᑕ ᐃᓄᓕᒫᑦ ᑭᓇᑐᐃᓐᓇᐅᒐᓗᐊᖅᑲᑦ ᑭᑭᑕᐅᓯᒪᖁᓇᒋᑦ ᑕᒪᑐᒥᖓ ᖃᓂᒪᓇᖅᑐᖅᑕᖃᖅᑎᓪᓗᒍ ᓄᓇᕐᔪᐊᓕᒫᒥ.”

ᕿᑭᖅᑕᓂᒃᑯᑦ ᐱᔨᑦᑎᕋᐅᑎᓖᑦ ᑖᒃᑯᓂᖓ ᐃᑲᔫᑎᓂᑦ ᑲᑐᔾᔨᖃᑎᖃᖅᑐᑎᒃ ᓄᓇᕗᑦ ᒐᕙᒪᒃᑯᖏᓐᓂ ᐃᓄᓕᕆᔨᒃᑯᓐᓂᑦ − ᐃᑲᔫᓯᐊᖅᑖᑎᑦᑎᔨᒃᑯᓐᓂᑦ, ᐅᑭᐅᖅᑕᖅᑐᒥ ᓂᐅᕕᖅᑎᑯᓐᓂᑦ (ᓂᐅᕕᕐᕕᒻᒥᑦ), ᐊᒻᒪᓗ ᐅᑭᐅᖅᑕᖅᑐᒥ ᐃᓚᒌᔅᓴᒃᑯᑦ ᑎᒥᖓᓐᓂᒃ.

ᑖᒃᑯᐊ ᐃᑲᔫᑏᑦ ᐃᓚᒌᓄᑦ ᑐᕌᖓᔪᑦ ᐃᓄᓕᕆᔨᒃᑯᓐᓂᑦ ᐃᑲᔫᓯᐊᖅᑖᕐᓯᒪᔪᓂᑦ ᓄᓇᕗᑦ ᒐᕙᒪᒃᑯᖏᓐᓂ ᑎᓯᐱᕆ 2020ᑎᓪᓗᒍ. ᐃᓚᒌᑦ ᐱᖃᑕᐅᔪᓐᓇᖅᑐᑦ ᐊᑕᐅᓯᐊᕐᓗᑎᒃ $423ᓂᑦ ᓂᕿᓂᑦ ᓂᐅᕕᐅᑎᔅᓴᖅᑖᓛᖅᑐᑦ ᐅᑭᐅᖅᑕᖅᑐᒥ ᐃᓚᒌᔅᓴᑯᓐᓂᑦ ᐅᕝᕙᓘᓐᓃᑦ ᓂᐅᕕᕐᕕᒻᒥᑦ.

ᓂᕿᓂᑦ ᓂᐅᕕᐅᑎᔅᓴᐃᑦ ᐱᔭᔅᓴᐅᓕᓛᖅᑐᑦ ᕖᕝᕗᐊᓕ 2, 2021ᒥ. ᐃᓚᒌᑦ ᐊᐃᔅᓯᖃᑦᑕᕈᓐᓇᖅᑐᑦ ᓂᐅᕕᐅᑎᔅᓴᓂᑦ ᓂᐅᕕᕐᕕᒻᒥᑦ ᐊᐃᔅᓯᕐᕕᒋᔪᔭᖏᓐᓂ ᑎᓯᐱᕆ 2020ᒥ ᐃᓄᓕᕆᔨᒃᑯᑎᒍᑦ ᐃᑲᔫᓯᐊᖅᑖᖏᓐᓂᒃ.

ᑖᒃᑯᐊ ᐃᑲᔫᑏᑦ ᐃᓚᒋᔭᐅᔪᔪᑦ ᐱᖓᔪᒋᓕᖅᑕᖓᓂ ᕿᑭᖅᑕᓂᒃᑯᑦ ᖃᓂᒪᓇᖅᑐᖅᑕᖃᕐᓂᖓᓂ ᐱᓇᓱᐊᕈᑎᖏᓐᓄᑦ. ᑖᒃᑯᐊ ᑮᓇᐅᔭᑦ ᕿᑭᖅᑕᓂᒃᑯᑦ ᖃᓂᒪᓇᖅᑐᖅᑕᖃᕐᓂᖓᓂ ᖃᓄᖅᑑᕈᑎᒋᓪᓗᒋᑦ ᐸᕐᓇᐅᑎᒋᓯᒪᔭᖏᑦ ᐅᑯᓇᙶᕐᓯᒪᔪᑦ ᐱᖓᔪᖏᓐᓂ ᓄᓇᖃᖅᑐᑐᖃᐃᑦ ᓄᓇᓕᖏᓐᓄᑦ ᐃᑲᔫᑎᓄᑦ ᑮᓇᐅᔭᓂᑦ (ICSF) ᓇᓗᓇᐃᖅᑕᐅᓚᐅᕐᓯᒪᔪᑦ ᒐᕙᒪᑐᖃᒃᑯᓐᓂᑦ. ᕿᑭᖅᑕᓂᒃᑯᑦ ᐃᑲᔫᑎᔅᓴᖅᑖᕆᓯᒪᔭᖏᑦ ᑖᒃᑯᓇᙵᑦ ᑮᓇᐅᔭᓂᑦ ᐊᒥᓲᓂᓖᑦ ᐃᒪᓐᓇᓂᑦ $2,008,101.

ᑐᑭᓯᒋᐊᒃᑲᓐᓂᕈᒪᒍᔅᓯ, ᑐᑭᓯᒋᐊᕐᕕᐅᖃᑦᑕᕐᓕ:

ᐅᐃᓪ Hᐊᑉᑭᓐᔅ, ᑭᖑᕝᕕᐅᑎᓯᒪᔪᖅ ᑐᑭᒧᐊᑦᑎᑦᑎᔨᐅᓂᕐᒧᑦ ᑐᓴᐅᒪᖃᑦᑕᐅᑎᓂᕐᒧᑦ,
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ
whopkins@qia.ca
867.975.8413 or
1.800.667.2742