ᐃᖃᓗᐃᑦ, ᓄᓇᕗᑦ − ᓄᕕᐱᕆ 30, 2021 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪᓗ V ᐱᓕᕆᕕᐊᑦ ᐸᓖᓯᒃᑯᑦ ᓴᖅᑭᑎᑦᑎᓛᖅᑐᑦ ᓇᓗᓇᐃᒃᑯᑕᐅᓂᐊᖅᑐᒥᒃ ᐅᐱᒍᓲᑎᖃᕐᓗᑎᒃ ᐊᑐᖅᑕᐅᓚᐅᖅᑐᒥᒃ ᐊᒻᒪᓗ ᐃᑲᔫᑎᖃᕐᓯᒪᓂᖏᓐᓂᒃ ᐸᓖᓯᒥᐅᑕᐅᕙᑦᑐᒥᓃᑦ ᐊᒻᒪᓗ ᕿᒻᒦᑦ. ᓴᖅᑭᖅᑕᐅᓂᖃᓛᖅᑐᖅ ᓵᖓᓂ ᐸᓖᓯᒃᑯᑦ ᐊᓪᓚᕝᕕᖓᑕ ᐃᖃᓗᓐᓂ ᑎᓯᐱᕆ 2 11:30ᐸᑦ ᐅᓪᓛᒃᑯᑦ.

“ᕿᑭᖅᑕᓂᒃᑯᑦ ᐅᐱᒍᓱᑉᐳᑦ ᓴᓇᓚᐅᖅᑐᓂᑦ ᐃᓄᓐᓂᑦ ᓴᓇᙳᐊᖅᑐᓂᑦ ᑖᓐᓇ ᓴᓇᐅᒐᖅᑎᒍᑦ ᓴᖅᑭᖅᑕᐅᔪᓐᓇᓯᒻᒪᑦ ᐊᑐᖅᑕᐅᓂᑯ ᓴᓇᐅᒐᐅᓕᖅᑐᓂ,” ᐅᖃᖅᑐᖅ ᕿᑭᖅᑕᓂᒃᑯᑦ ᐊᖏᔪᖅᑳᖓᑦ ᐅᓛᔪᒃ ᐊᑭᓱᒃ. “ᐃᓕᓴᕆᔭᐅᓂᖏᑦ ᐃᓄᐃᑦ ᐸᓖᓯᒥᐅᒥᓃᑦ ᕿᒻᒦᓪᓗ ᐊᒻᒪᓗ ᐊᑐᕐᓯᒪᔭᖏᑦ ᐱᒻᒪᕆᐊᓘᓪᓗᓂ ᐱᕙᓪᓕᐊᒍᑎᒋᓂᐊᕋᑦᑎᒍ ᓴᐃᒻᒪᖃᑎᒌᓯᒪᓂᕐᒧᑦ ᓄᓇᑦᑎᓐᓂ. ᖁᕕᐊᓱᑉᐳᒍᑦ ᑕᑯᔭᕆᐊᔅᓴᖅ ᐊᑐᓕᖁᔨᔾᔪᑕᐅᓯᒪᔪᖅ #3 ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᓂᑦ ᑲᔪᓯᑎᑕᐅᔪᓐᓇᓯᒻᒪᑦ.”

“V ᐱᓕᕆᕕᐊᑦ ᐸᓖᓯᒃᑯᑦ ᐅᐱᒍᓱᑉᐳᑦ ᐃᖅᑲᓇᐃᔭᖃᑎᖃᕈᓐᓇᕐᓯᒪᒻᒪᑕ ᕿᑭᖅᑕᓂᒃᑯᓐᓂᑦ ᐊᒻᒪᓗ ᐃᓄᓐᓂᑦ ᓴᓇᙳᐊᖅᑎᓂᑦ ᑖᔅᓱᒥᖓ ᐱᐅᔪᐊᓗᒻᒥᒃ ᐱᓕᕆᐊᖑᓯᒪᔪᒥᒃ ᐃᓕᓴᕐᓯᓯᒪᒍᑕᐅᓂᐊᕐᖓᑦ ᑲᑦᑐᖓᓪᓗᑎᒃ ᐃᖅᑲᓇᐃᔮᖃᕐᓯᒪᓂᖏᓐᓄᑦ ᐃᓄᐃᑦ ᐸᓖᓯᒥᐅᒥᓃᑦ, ᐊᒻᒪᓗ ᕿᒻᒦᑦ ᐊᑐᖅᑕᐅᖃᑦᑕᕐᓯᒪᓂᖏᓐᓄᑦ, ᑭᖑᕐᖑᔾᔭᐅᓂᐊᕐᒥᒻᒪᑕ ᑭᖑᕚᕆᓂᐊᖅᑕᑎᓐᓄᑦ ᓯᕗᓂᑦᑎᓐᓂ. ᓇᓗᓇᐃᒃᑯᑕᖅ ᐱᒻᒪᕆᐊᓘᓪᓗᓂ ᐱᒋᐊᕈᑕᐅᒻᒪᑦ ᓴᐃᒻᒪᖃᑎᒌᓯᒪᓂᕐᒧᑦ, ᐋᖅᑭᔅᓱᐃᓂᕐᒧᑦ ᑕᑎᖃᕈᓐᓇᓂᕐᒥᒃ ᐊᒻᒪᓗ ᓄᑖᕈᖅᑎᑦᑎᒋᐊᕐᓂᕐᒥᒃ ᐱᓕᕆᖃᑎᖃᖃᑦᑕᕐᓂᖏᓐᓂᒃ ᐃᓄᓐᓂᑦ ᓄᓇᕗᒥ,” ᐅᖃᖅᑐᖅ V ᐱᓕᕆᕕᐊᓂ ᐸᓖᓯᒃᑯᑦ ᐸᓖᓯᐅᖃᑕᖅ ᐊᒫᓐᑕ ᔫᓐᔅ.

ᐱᒋᐊᙵᕐᓂᖏᓐᓂ 1900−ᕿᑎᖏᓐᓂ ᐃᓄᐃᑦ ᐸᓖᓯᒥᐅᒥᓃᑦ ᐃᓚᖃᖃᑦᑕᓚᐅᕐᓯᒪᒻᒪᑕ ᐸᓖᓯᒃᑯᓐᓂᑦ, ᑐᓵᔨᒋᔭᐅᕙᑦᑐᑎᒃ ᖃᐅᔨᒪᔨᒋᔭᐅᕙᑦᑐᑎᓪᓗ. ᐃᖏᕐᕋᖃᑦᑕᑎᓪᓗᒋᑦ ᐊᐅᓪᓚᖃᑦᑕᕐᓂᑰᒻᒪᑕ ᕿᒧᔅᓯᒃᑯᑦ ᐅᒥᐊᒃᑯᓘᓐᓃᑦ ᐊᒻᒪᓗ ᐸᓖᓯᒥᐅᒥᓃᑦ ᐊᖑᓇᓱᖃᑦᑕᕐᓯᒪᔪᑦ ᐸᓖᓯᒃᑯᑦ ᓂᕆᖃᑦᑕᓂᐊᕐᖓᑕ ᐊᓐᓄᕌᖃᖃᑦᑕᓂᐊᕐᖓᑕᓗ.

ᑕᒪᓐᓇ ᓯᕗᒧᐊᑦᑎᑦᑎᔪᖅ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᐊᑐᓕᖁᔨᔾᔪᑎᒋᓯᒪᔭᖓᓐᓂᒃ #3 “ᕿᑭᖅᑕᓂᒃᑯᑦ ᐸᓖᓯᒃᑯᓪᓗ ᐃᓕᓴᕐᓯᓂᖃᓪᓚᑦᑖᕆᐊᓖᑦ ᐃᑲᔪᖃᑦᑕᕐᓯᒪᓂᖏᓐᓂᒃ ᐃᓄᐃᑦ ᐸᓖᓯᒥᐅᒥᓃᑦ ᐊᒻᒪᓗ ᐃᓚᖏᑦ ᐃᖅᑲᓇᐃᔭᖅᑎᓪᓗᒋᑦ ᐸᓖᓯᒃᑯᑦ ᑕᒫᓂ ᓄᓇᓕᓐᓂᑦ.”

ᑐᑭᓯᒋᐊᒃᑲᓐᓂᕈᒪᒍᔅᓯ, ᑐᑭᓯᒋᐊᕐᕕᐅᖃᑦᑕᕐᓕ:
ᐅᐃᓪ Hᐊᑉᑭᓐᔅ,
ᑭᖑᕝᕕᐅᑎᓯᒪᔪᖅ ᑐᑭᒧᐊᑦᑎᑦᑎᔨᐅᓂᕐᒧᑦ ᑐᓴᐅᒪᖃᑦᑕᐅᑎᓂᕐᒧᑦ,
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ
whopkins@qia.ca
867.975.8413/1.800.667.2742