ᓱᒻᒪᑦ ᐊᑎᓕᐅᖅᑕᐅᖃᑦᑕᕆᐊᖃᑦᑕᕐᒪᖔᔅᓯ ᓄᓇᕗᑦ ᐊᖏᖃᑎᒌᒍᑎᖏᓐᓄᑦ ᓄᓇᑖᖃᑕᐅᓯᒪᓂᕐᒧᑦ ᐊᑎᓕᐅᕐᕕᐅᕙᑦᑐᒧᑦ
ᐊᒥᓲᒻᒪᑕ ᐱᕚᓪᓕᕈᑎᔅᓴᐃᑦ ᓄᓇᕗᒻᒥᐅᓄᑦ ᐃᓄᓐᓄᑦ ᐊᑎᓕᐅᖅᑕᐅᓯᒪᑉᐸᑕ ᓄᓇᕗᒥ ᐊᖏᖃᑎᒌᒍᑎᓄᑦ ᓄᓇᑖᖃᑕᐅᓯᒪᓂᕐᒧᑦ ᐊᑎᓕᐅᕐᕕᐅᕙᑦᑐᒧᑦ ᐊᒻᒪᓗ ᑐᙵᕕᒃᑯᓐᓂᑦ ᐃᓚᒋᔭᐅᓂᕐᒧᑦ ᓇᓗᓇᐃᒃᑯᑖᖅᑖᓂᕐᒧᑦ. ᑖᓐᓇ ᐊᑎᓕᐅᕐᓯᕕᐅᕙᑦᑐᖅ ᐋᖅᑭᐅᒪᑎᑕᐅᕙᑦᑐᖅ ᓄᓇᕗᑦ ᑐᙵᕕᒃᑯᑦ ᑎᒥᖓᓐᓂᑦ (ᑐᙵᕕᒃᑯᑦ).
ᑐᙵᕕᒃᑯᓐᓂᑦ ᓇᓗᓇᐃᒃᑯᑕᖅ ᐊᑐᕈᑕᐅᔪᓐᓇᐸᑦᑐᖅ ᐊᒥᓱᓂᑦ ᐱᒻᒪᕆᐅᔪᓂᑦ ᐃᑲᔫᓯᐊᔅᓴᐅᕙᑦᑐᓂᑦ ᓲᕐᓗ ᐋᓐᓂᐊᖅᑐᓕᕆᔨᒃᑯᓐᓂᑦ ᐃᑲᔫᓯᐊᔅᓴᑦ ᐊᒻᒪᓗ ᐊᑭᑭᓪᓕᒋᐊᕈᑏᑦ ᐅᑭᐅᖅᑕᖅᑐᒥ ᖃᖓᑦᑕᐅᑎᓄᑦ. ᐃᓚᒋᔭᐅᔾᔪᑎ ᐊᑐᖅᑕᐅᔭᕆᐊᖃᓲᖑᒻᒥᔪᖅ ᐃᓚᖏᓐᓂᑦ ᐃᑲᔫᓯᐊᖅᑖᕈᑕᐅᕙᑦᑐᓂᑦ ᐃᓄᑐᖃᕐᓄᑦ ᐅᕝᕙᓘᓐᓃᑦ ᐱᓇᓱᐊᕈᑕᐅᕙᑦᑐᓄᑦ ᐃᓕᓐᓂᐊᕈᑎᓄᑦ ᓲᕐᓗ ᕿᑭᖅᑕᓂᒃᑯᓐᓂᑦ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᑦ. ᐃᓄᐃᑦ ᑐᙵᕕᒃᑯᓐᓂᑦ ᓇᓗᓇᐃᒃᑯᑕᖃᕆᐊᖃᓲᖑᒻᒥᔪᑦ ᐱᓇᓱᐊᕈᒪᓂᐊᕈᑎᒃ ᓄᓇᕗᒥ ᐊᖑᓇᓱᑦᑎᓄᑦ ᐃᑲᔫᑎᓂᑦ ᐊᒻᒪᓗ ᓂᕈᐊᕐᓇᐅᑎᓪᓗᒍ ᓂᕈᐊᕐᓂᕐᒧᑦ ᐅᕝᕙᓘᓐᓃᑦ ᓂᕈᐊᕋᔅᓴᐅᓂᕐᒧᑦ ᓄᓇᕗᒥ ᓂᕈᐊᕐᓇᐅᓕᕋᐃᒻᒪᑦ.
ᐃᓄᐃᑦ ᓇᒻᒥᓂᖅ−ᐃᖅᑲᓇᐃᔭᕐᕕᖁᑎᓖᑦ ᓄᓇᕗᑦ ᑐᙵᕕᒃᑯᓐᓂᑦ ᐃᓚᒋᔭᐅᔾᔪᑎᖃᕆᐊᓖᑦ ᐊᑎᓕᐅᖅᑕᐅᖁᔨᓂᐊᕈᑎᒃ ᐃᖅᑲᓇᐃᔭᕐᕕᖁᑎᖓᓂᒃ ᐃᓄᓐᓄᑦ−ᓇᒻᒥᓂᕆᔭᐅᓪᓗᓂ ᐃᖅᑲᓇᐃᔭᕐᕕᖁᑎᖓ.
ᐊᒥᓱᑲᓪᓚᓐᓂᑦ ᑕᖅᑭᓂᑦ ᑐᙵᕕᒃᑯᓐᓂᑦ ᓇᓗᓇᐃᒃᑯᑕᖅᑖᕋᓱᓐᓇᕐᖓᑦ, ᐱᓂᐅᔾᔨᓂᐊᙱᓚᑎᑦ ᐱᒋᐊᖃᓕᕈᕕᑦ ᑭᓯᐊᓂ ᐱᓇᓱᓛᙱᓚᑎᑦ − ᐊᑎᓕᐅᖅᑕᐅᔭᖅᑐᓂᐊᖅᑯᑎᑦ ᐅᓪᓗᒥ. ᓇᓗᓇᐃᒃᑯᑕᖃᕈᕕᑦ ᐊᑎᓕᐅᕐᓯᒪᓃᑦ ᐊᔾᔨᖃᙱᓪᓗᓂ ᒐᕙᒪᒃᑯᓐᓂᑦ ᓇᓗᓇᐃᒃᑯᑕᕐᓂᒃ, ᐊᑐᖅᑎᑕᐅᙱᑐᐃᓐᓇᕆᐊᖃᕋᕕᑦ ᐃᑲᔫᓯᐊᔅᓴᓂᑦ, ᐊᑏ ᐅᖃᕐᕕᒋᓂᐊᖅᑲᑦ ᓄᓇᔅᓯᓐᓂ ᑐᓴᐅᒪᑎᑦᑎᔨᓯ ᐅᖃᕐᕕᒋᑦᑕᐅᑎᒋᓴᕋᐃᒋᐊᕐᓗᒍ ᐋᖅᑭᑎᐊᕐᓂᐊᕐᖓᑦ ᓇᓗᓇᐃᒃᑯᑕᐃᑦ ᐃᓚᒋᔭᐅᔾᔪᑏᑦ.
ᑖᒃᑯᐊ ‘ᐊᐱᖅᑯᑏᑦ ᑭᐅᔾᔪᑎᖏᓪᓗ’ ᑐᙵᕕᒃᑯᓐᓂᑦ ᐃᓚᒋᔭᐅᔾᔪᑎᐅᑉ ᒥᔅᓵᓅᖓᔪᑦ:
ᐊ: ᑭᓇ ᐱᑖᕈᓐᓇᖅᑲ ᑐᙵᕕᒃᑯᓐᓂᑦ ᓇᓗᓇᐃᒃᑯᑕᕐᒥᒃ?
ᑭ: ᑲᓇᑕᒥᐅᑦ ᐃᓅᓪᓗᑎᒃ ᐃᓄᓐᓄᑦ ᑭᖑᕚᑦ, ᓇᓗᓇᐃᕐᓯᒪᔪᑦ ᐃᓅᓂᖏᓐᓂᒃ ᒪᓕᑦᑐᒋᑦ ᐃᓄᐃᑦ ᐱᐅᓯᖏᑦ ᐊᑐᖃᑦᑕᖅᑕᖏᓪᓗ, ᐊᒻᒪᓗ ᓄᓇᖃᕐᓯᒪᔪᑦ ᐅᕝᕙᓘᓐᓃᑦ ᓄᓇᓖᑦ ᓄᓇᓕᓐᓂᑦ ᓄᓇᕗᒥ ᓇᓗᓇᐃᖅᑕᐅᓯᒪᓂᖓᑕ ᐃᓗᐊᓂ.
ᐊ: ᖃᓄᖅ ᐊᑎᓕᐅᖅᑕᐅᔪᓐᓇᖅᑯᖓ ᑐᙵᕕᒃᑯᓐᓂᑦ ᐃᓚᒋᔭᐅᔾᔪᑎᒧᑦ?
ᑭ: ᑎᑎᕋᕐᕕᒋᓗᒍ ᐊᑎᓕᐅᖅᑕᐅᒍᒪᓂᕐᒧᑦ ᐱᓇᓱᐊᕈᑦ ᑎᑎᕋᕐᕕᔅᓴᖅ. ᓄᓇᓕᓐᓂᑦ ᐊᑎᓕᕆᔩᑦ ᑲᑎᒪᔨᕋᓛᑦ ᕿᒥᕐᕈᒐᔭᖅᑐᑦ ᐱᓇᓱᐊᕈᑎᓐᓂᒃ ᐃᓕᓐᓂᓪᓗ ᖃᐅᔨᒃᑲᐃᒐᔭᖅᑐᑦ ᑐᑭᓯᒃᑲᓐᓂᕆᐊᖃᖅᑲᑕ ᑭᓱᑐᐃᓐᓇᕐᒥᒃ. ᓄᓇᑖᕈᑎᓄᑦ−ᐃᓚᒋᔭᐅᙱᑦᑐᑦ ᑎᒍᐊᕐᓯᒪᔪᑦ ᐃᓄᒻᒥᒃ ᓱᕈᓯᕐᒥᒃ ᑐᓂᓯᒋᐊᖃᕋᔭᖅᑐᑦ ᑎᒍᐊᖅᑖᕈᑎᒥᖏᓐᓂᒃ ᐸᐃᑉᐹᓂᑦ ᐊᒻᒪᓗ ᑕᒪᑐᒧᖓ ᑐᕌᖓᔪᓂᑦ ᐃᖅᑲᖅᑐᐃᕕᒃᑯᑦ ᑎᑎᖅᑲᖅᑖᕆᓯᒪᔭᖏᓐᓂᒃ.
ᐊ: ᐃᑲᔪᖅᑕᐅᔪᓐᓇᖅᑯᑖ ᑕᒪᑐᒧᖓ?
ᑭ: ᕿᑭᖅᑕᓂᒃᑯᑦ ᓄᓇᓕᓐᓂᑦ ᑐᓴᐅᒪᑎᑦᑎᔨᖃᕐᖓᑕ (ᑐᓴᐅᒪᑎᑦᑎᔩᑦ) ᐊᑐᓂᑦ ᓄᓇᓕᓐᓂᑦ ᐃᑲᔪᕈᓐᓇᖅᑐᑎᒃ ᐋᖅᑭᑎᐊᕐᓯᓂᕐᒥᒃ ᐃᓚᒋᔭᐅᔾᔪᑎᔅᓯᓐᓂᒃ ᐅᕝᕙᓘᓐᓃᑦ ᐊᑎᓕᐅᖅᑕᐅᑎᑦᑎᓂᕐᒥᒃ ᐃᓕᔅᓯᓐᓂᒃ!
ᐊ: ᑐᙵᕕᒃᑯᑦ ᐃᑲᔪᕈᓐᓇᖅᑲᑦ ᑕᒪᑐᒧᖓ?
ᑭ: ᐅᖄᓚᕕᒋᔪᓐᓇᖅᑕᑎᑦ ᑐᙵᕕᒃᑯᑦ ᐅᖓᓯᑦᑐᒥᒃ ᐊᑭᖃᙱᑐᒃᑯᑦ ᐅᕗᖓ 1.888.220.5400.
ᐊ: ᐊᑭᖃᖅᑳ?
ᑭ: ᐊᑎᓕᐅᖅᑕᐅᓂᖅ ᐊᑭᖃᙱᑦᑐᖅ!
ᐊ: ᖃᓄᖅ ᐊᑯᓂᐅᑎᒋᔪᖅ ᐅᑕᖅᑭᔭᕆᐊᖃᕋᔭᖅᑯᖓ ᑐᙵᕕᓐᓂᒃ ᐃᓚᒋᔭᐅᔾᔪᑎᓐᓂᒃ?
ᑭ: ᐱᓇᓱᐊᕐᓯᒪᔪᑦ ᐅᑕᖅᑭᓲᑦ ᑎᓴᒪᓄᑦ ᑕᖅᑭᓄᑦ ᐊᑯᓂᐅᑎᒋᔪᓐᓇᖅᑐᓂ ᐅᕝᕙᓘᓐᓃᑦ ᐊᑯᓂᐅᓂᕐᓴᖅ ᒪᓕᑦᑐᒋᑦ ᑲᑎᒪᔨᕋᓛᑦ ᑲᑎᒪᕕᒋᕙᑦᑕᖏᑦ ᐊᒻᒪᓗ ᖃᖓᒃᑯᑦ ᐱᓇᓱᐊᕐᕕᒥᓃᑦ ᒪᓕᑦᑐᒍ .
ᐊ: ᑭᓱᒧᑦ ᑐᙵᕕᒃᑯᓐᓂᑦ ᐃᓚᒋᔭᐅᔾᔪᑎ ᐊᑐᖅᑕᐅᓲᖑᒻᒪᑦ?
ᑭ: ᐊᒥᓱᓄᑦ ᑭᓱᑐᐃᓐᓇᕐᓄᑦ ᐊᑐᖅᑕᐅᔪᓐᓇᖅᑐᑦ ᑐᙵᕕᒃᑯᓐᓂ ᐃᓚᒋᔭᐅᔾᔪᑎ − ᑖᒃᑯᐊ ᐆᑦᑑᑎᒋᓪᓗᒋᑦ:
- ᐊᑭᑭᓪᓕᒋᐊᕈᑏᑦ ᖃᖓᑦᑕᐅᑎᓄᑦ ᐅᑭᐅᖅᑕᖅᑐᒦᑦᑐᓄᑦ ᖃᖓᑦᑕᓲᓕᕆᔨᓄᑦ
- ᓂᕈᐊᕐᓂᕐᒧᑦ ᐊᒻᒪᓗ/ᐅᕝᕙᓘᓐᓃᑦ ᓂᕈᐊᕋᔅᓴᐅᓂᕐᒧᑦ ᑐᙵᕕᒃᑯᓐᓄᑦ ᐅᕝᕙᓘᓐᓃᑦ ᕿᑭᖅᑕᓂᒃᑯᓐᓄᑦ ᓂᕈᐊᕐᓇᐅᑎᓪᓗᒍ;
- ᓄᓇᕗᒥ ᐃᓄᑐᖃᐃᑦ ᐃᑲᔫᓯᐊᖅᑖᕆᕙᑦᑕᖏᓐᓄᑦ;
- ᓄᓇᕗᒥ ᐊᖑᓇᓱᑦᑎᓄᑦ ᐃᑲᔫᑎᓄᑦ;
- ᐊᑐᕐᓂᕐᒧᑦ ᐃᓄᐃᑦ ᓄᓇᖁᑎᖏᓐᓂᑦ;
- ᐊᑎᓕᐅᖅᑕᐅᓂᕐᒧᑦ ᐃᓄᓐᓂᑦ ᑎᒥᐅᓗᓂ;
- ᐃᓚᓕᐊᕆᐊᓕᓐᓄᑦ ᐃᓚᐃᖅᑐᓄᓪᓗ ᖃᖓᑦᑕᐅᑎᓄᑦ;
- ᕿᑭᖅᑕᓂᒃᑯᓐᓂᑦ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᓄᑦ ᐅᕝᕙᓘᓐᓃᑦ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᓄᑦ ᓄᓇᕗᑦ ᒐᕙᒪᒃᑯᖏᓐᓂᑦ ᐃᓕᓐᓂᐊᕐᓂᓕᕆᔨᒃᑯᓐᓂᑦ;
- ᐃᑲᔫᓯᐊᖅᑖᖃᑕᐅᔪᓐᓇᓂᕐᒧᑦ ᓇᓪᓕᐅᒃᑯᒫᖃᖅᑎᑕᐅᙱᑦᑐᓄᑦ ᐋᓐᓂᐊᖅᑐᓕᕆᓂᕐᒧᑦ ᐃᑲᔫᓯᐊᔅᓴᓂᑦ ᓄᓇᕗᑦ ᒐᕙᒪᒃᑯᖏᓐᓂ ᐋᓐᓂᐊᖅᑐᓕᕆᔨᒃᑯᓐᓂᑦ ᐃᓄᓕᕆᔨᒃᑯᓂᓪᓗ.
ᑐᑭᓯᒋᐊᒃᑲᓐᓂᕈᒪᒍᔅᓯ ᑐᑭᓯᒋᐊᖃᑦᑕᕆᔅᓯ ᑐᙵᕕᒃᑯᓐᓂᑦ ᐃᓚᒋᔭᐅᔾᔪᑏᑦ ᒥᔅᓵᓅᖓᔪᓂᑦ ᖃᐅᔨᒋᐊᕐᓗᓯ ᑐᙵᕕᒃᑯᑦ ᖃᕋᓴᐅᔭᒃᑯᑦ ᐃᑭᐊᖅᑭᕕᖓᓐᓂᑦ.