ᓄᓇᓕᖕᓂ ᐅᐊᑦᑎᔨ ᐃᓄᐃᑦ ᐸᐸᖅᑎᓂᖏᖕᓄᑦ – ᑲᖏᖅᑐᒑᐱᒃ, ᓄᓇᕗᑦ
ᑲᑐᔾᔨᖃᑎᒌᒥᒃ/ᓯᓚᑖᓂᓗ ᓴᖅᑭᔮᖅᑎᑕᐅᔭᕆᐊᓕᒃ
ᐃᖅᑲᓇᐃᔮᕆᔭᐅᖏᓐᓇᓂᐊᖅᑐᖅ
ᓄᓇᓕᖕᓂ ᐅᐊᑦᑎᔨ ᑲᒪᖃᑦᑕᕋᔭᖅᑐᖅ ᑕᒪᐃᓐᓂᓕᒫᑦᑎᐊᖅ ᓇᐅᑦᑎᖅᓱᖅᑏᑦ ᐱᓕᕆᐊᖓᓂᒃ ᓄᓇᓕᐅᔪᒥ, ᐱᖃᓯᐅᑎᓪᓗᒋᑦ ᐸᕐᓇᖃᑦᑕᕐᓗᓂ ᐊᒻᒪᓗ ᐋᖅᑭᒃᓱᐃᖃᑦᑕᕐᓗᓂ ᐱᓕᕆᐊᕐᒧᑦ ᖃᓄᐃᓕᐅᕈᑕᐅᓂᐊᖅᑐᓂᒃ, ᐅᐊᑦᑎᖃᑦᑕᕐᓗᓂ ᐊᒻᒪᓗ ᐃᑲᔪᖅᑐᐃᖃᑦᑕᕐᓗᓂ ᐃᓄᐃᑦ ᐸᐸᑦᑎᔨᖏᖕᓂᒃ, ᐋᖅᑭᒃᓱᖃᑦᑕᕐᓗᓂ ᒪᒃᑯᒃᑐᑦ ᐱᖃᑕᐅᑎᑕᐅᓂᖏᖕᓄᑦ ᖃᓄᐃᓕᐅᕈᑎᐅᔪᓂᒃ, ᑲᒪᖃᑦᑕᕐᓗᓂ ᓱᓇᒃᑯᑖᓂᒃ, ᑐᑭᓯᒋᐊᕈᑏᑦ ᖃᓄᐃᓕᐅᖅᑕᐅᔭᕆᐊᓖᑦ ᑲᒪᒋᖃᑦᑕᕐᓗᓂᒋᑦ ᐊᒻᒪᓗ ᐅᓂᒃᑳᓕᐅᖃᑦᑕᕐᓗᓂ. ᐃᖅᑲᓇᐃᔮᓕᒃ ᐊᖓᔪᖅᑳᖃᖃᑦᑕᕋᔭᖅᑐᖅ ᐃᓄᐃᑦ ᐸᐸᑦᑎᔩᑦ ᐊᐅᓚᑦᑎᔨᖓᓂᒃ ᐃᖃᓗᓐᓂ, ᐊᒻᒪᓗ ᐱᒻᒪᕆᐅᔪᒃᑯᑦ ᐱᓕᕆᐊᖃᖃᑦᑕᕋᔭᖅᑐᖅ ᐅᐊᑦᑎᓗᓂ ᐊᒻᒪᓗ ᐊᐅᓚᑦᑎᖃᑦᑕᕐᓗᓂ ᓇᐅᑦᑎᖅᓱᖅᑏᑦ ᐱᓕᕆᐊᖓᓂᒃ ᑲᖏᖅᑐᒑᐱᖕᒥ.
ᑖᓐᓇ ᓯᕗᓕᖅᑎᐅᓗᓂ ᐃᖅᑲᓇᐃᔮᖑᖕᒪᑦ ᐊᓯᔾᔩᕈᓘᔭᖃᑦᑕᕆᐊᖃᖃᑦᑕᕋᔭᖅᑐᖅ ᑭᓱᑐᐃᓐᓇᕐᓂᒃ ᓄᑖᖑᓂᖓᓄᑦ ᐊᒻᒪᓗ ᐋᖅᑭᓱᖅᐸᓪᓕᐊᓂᐊᕐᓂᖓᓄᓪᓗ ᐱᓕᕆᐊᖅ. ᓄᓇᓕᖕᓂ ᐅᐊᑦᑎᔨ ᓄᓇᓕᖕᓂ ᐃᑲᔪᖅᑐᐃᔨᐅᓪᓗᐊᑕᕐᓂᐊᕐᒪᑦ ᓇᐅᑦᑎᖅᓱᖅᑎᓄᑦ ᐊᒻᒪᓗ ᑐᓴᐅᒪᖃᑎᒌᑦᑎᑦᑎᔨᐅᖃᑦᑕᕐᓗᓂ ᐃᓄᐃᑦ ᐸᐸᑦᑎᔨᖏᖕᓂᒃ ᐊᒻᒪᓗ ᓄᓇᓕᒥᐅᑕᐅᔪᓂᑦ. ᐃᓄᒃᑎᑑᕈᓐᓇᕆᐊᓕᒃ ᐊᒻᒪᓗ ᖃᓪᓗᓈᑎᑑᕈᓐᓇᕆᐊᓕᒃ.
ᐃᖅᑲᓇᐃᔭᖅᑎᑖᕆᔭᐅᒐᔭᖅᑐᖅ ᐅᑯᓂᖓ ᐱᔭᕇᖅᓯᒪᒐᔭᖅᐳᖅ ᐊᔪᙱᓐᓂᖃᕐᓗᓂᓗ:
- ᑕᒪᒃᑮᑦ ᐃᓕᓐᓂᐊᖅᓯᒪᓂᑰᓗᓂ ᐊᒻᒪᓗ/ᐅᕝᕙᓘᓐᓃᑦ ᐃᖅᑲᓇᐃᔮᖃᖃᑦᑕᕐᓂᑰᓗᓂ ᓯᕗᓕᖅᑎᐅᓗᓂ, ᖁᑦᑎᓂᖅᐹᒥ 12-ᒥ ᐃᓕᓐᓂᐊᕇᖅᓯᒪᔭᕆᐊᑐᙱᑦᑐᖅ
- ᑕᑯᒃᓴᐅᑎᑦᑎᓯᒪᓗᓂ ᐅᖃᓪᓚᖃᑎᖃᕈᓐᓇᕐᓂᖓᓂᒃ ᐊᒥᓱᓂᒃ ᐊᑦᑐᖅᑕᐅᓯᒪᓂᖃᖅᑐᓂᒃ
- ᐃᖅᑲᓇᐃᔮᖃᖃᑦᑕᕐᓂᑰᓗᓂ ᓄᓇᕗᑦ ᓄᓇᓕᖏᖕᓂ
- ᖃᐅᔨᒪᓂᖃᕐᓗᓂ ᓄᓇᒥ ᐊᒻᒪᓗ ᐃᒪᖏᖕᓂᒃ ᑲᖏᖅᑐᒑᐱᒻᒥ ᐊᒻᒪᓗ ᖃᓂᒋᔭᖓᓂ
- ᖃᐅᔨᒪᓂᖃᕐᓗᓂ ᐊᕙᑎᓕᕆᓂᕐᒧᑦ ᖃᐅᔨᓴᕈᓐᓇᕐᓂᖓᓂᒃ, ᐅᐊᑦᑎᒍᓐᓇᕐᓂᖓᓂᒃ ᐊᒻᒪᓗ ᐸᐸᑦᑎᓂᕐᒧᑦ ᐱᔾᔪᑎᓂᒃ ᖃᐅᔨᒪᓗᓂ
- ᐃᖅᑲᓇᐃᔭᖃᑎᖃᖅᓯᒪᓂᑰᓗᓂ ᐃᓐᓇᑐᖃᕐᓂᒃ ᐊᒻᒪᓗ ᒪᒃᑯᒃᑐᓂᒃ
ᐃᖅᑲᓇᐃᔮᖅᑖᖅᑐᖅ ᐃᖅᑲᓇᐃᔭᖅᑎᒋᔭᐅᒐᔭᕐᒪᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᖕᓂᒃ ᐃᖅᑲᓇᐃᔭᖃᑦᑕᕐᓗᓂ ᐃᑲᕐᕋᓂᒃ ᐊᓯᔾᔨᖅᑕᕋᓗᐊᕐᓗᑎᑦ ᓈᒻᒪᓪᓗᑎᑦ ᓄᓇᒥ ᑐᙵᕕᖃᕐᓗᑎᑦ ᖃᓄᐃᓕᐅᕈᓘᔭᕈᑕᐅᖃᑦᑕᕋᔭᖅᑐᓂᒃ ᐊᕐᕌᒍᓗᒃᑖᕐᒥ.
ᐊᐱᖅᓱᖅᑕᐅᒐᔭᖅᑐᑦ ᐃᖅᑲᓇᐃᔮᖅᑖᕋᓱᐊᖅᑐᑦ ᐊᑯᕐᖓᖏᖕᓂ ᔮᓐᓄᐊᕆ 16 – 28, 2020, ᓇᐅᑦᑎᖅᓱᖅᑏᑦ ᐱᓕᕆᐊᖓᓄᑦ ᑲᖏᖅᑐᒑᐱᖕᒥ.
ᐃᖅᑲᓇᐃᔮᒧᑦ ᐱᓇᓱᐊᕈᑏᑦ ᐊᐅᓪᓚᖅᑎᑕᐅᔪᓐᓇᖅᑐᑦ ᓱᑲᑦᑐᒃᑯᑦ, ᖃᕋᓴᐅᔭᒃᑯᑦ, ᐃᓄᒃᑎᒍᑦ, ᐅᕝᕙᓘᓐᓃᑦ ᑎᑎᖅᑲᓂᐊᕐᕕᒃᑯᑎᒍᑦ ᐅᕗᖓ ᐊᐅᓪᓚᖅᑎᑕᐅᓗᑎᑦ:
ᓄᓇᓕᒻᒥᐅᓂᒃ ᑐᓴᐅᒪᖃᑎᒌᑦᑎᑦᑎᔨᑉ ᐊᓪᓚᕝᕕᖓ ᑲᖏᖅᑐᒑᐱᒻᒥ
ᐅᕝᕙᓘᓐᓃᑦ
ᑕᐃᕕᑎ ᒪᒃᐋᑕᒻᔅ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
ᐃᒡᓗᕗᑦ, 2nd ᖄᖅᑎᖓ
ᑎᑎᖅᑲᒃᑯᕕᖓ 1340
ᐃᖃᓗᐃᑦ, ᓄᓇᕗᑦ X0A 0H0
ᐅᖄᓚᐅᑎᖓ: (867) 975-8400
ᓱᑲᑦᑐᒃᑯᑦ: (867) 979-3238
ᖃᕋᓴᐅᔭᒃᑯᑦ: Resumes@qia.ca
ᒪᑐᕕᒃᓴᖓᑕ ᐅᓪᓗᖓ: ᔮᓐᓄᐊᕆ 15, 2020