ᖃᓄᐃᓕᐅᖅᑎᑦᓯᓃᑦ ᐊᐅᔭᖅᑐᐃᓂᖅ
ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ
ᒥᐊᕝᕕᐅᓂᖏᑦ ᕿᑭᖅᑕᓂ ᐃᓄᐃᑦ
ᐊᒡᒌᓯ 14, 2019ᒥ ᒐᕙᒪᑐᖃᒃᑯᑦ ᓇᓗᓇᐃᖅᓯᓚᐅᖅᑐᑦ ᐊᒻᒪᓗ ᒪᒥᐊᖦᖢᑎᒃ ᖃᓄᐃᓕᐅᕙᓚᐅᖅᑕᖏᓐᓂᒃ ᐱᓕᕆᔾᔪᓯᕆᓚᐅᖅᑕᖏᓐᓂᒃ ᐊᒻᒪᓗ ᐊᑐᐊᒐᕆᓚᐅᖅᑕᖏᓐᓂᒃ ᐊᓯᔾᔩᒻᒪᕆᓚᐅᖅᑐᓂᒃ ᐃᓄᖕᓂᑦ ᐊᖏᕋᕆᔭᖏᓐᓂᒃ ᐊᒻᒪᓗ ᐃᓅᓯᕆᕙᓚᐅᖅᑕᖏᓐᓂ.
1950 ᐊᒻᒪ 1975 ᐊᑯᓐᓂᖓᓂ, ᒐᕙᒪᑐᖃᒃᑯᑦ ᐊᑐᓕᖅᑎᑦᓯᓚᐅᖅᓯᒪᔪᑦ ᖃᓄᐃᓕᐅᖅᐸᓪᓕᐊᓪᓗᑎᒃ ᐃᓄᖕᓂ ᕿᑭᖅᑕᓂ ᓄᓇᓕᖕᓂᑦ, ᐱᖃᓯᐅᑎᓪᓗᒍ ᓅᑎᑦᓯᓂᕐᒥᒃ, ᐃᓚᒌᑦ ᐊᕕᑕᐅᓂᖏᑦ ᐊᒻᒪᓗ ᕿᒻᒦᔭᖅᖢᑎᒃ (ᕿᒧᒃᓯᐅᑎᓂ).
ᐃᓚᒋᖃᑕᐅᓪᓗᓂ ᒪᒥᐊᓐᓂᐅᓚᐅᖅᑐᒥ, ᑲᓇᑕ ᐊᒻᒪᓗ ᕿᑭᖅᑕᓃᒃᑯᑦ ᐊᑎᓕᐅᖅᖢᑎᒃ ᑐᑭᓯᐅᒪᖃᑦᑕᐅᑎᓂᕐᒧᑦ ᐊᖏᕈᑎᒥᒃ ᑲᑐᔾᔨᓂᐊᖅᖢᑎᒃ ᐊᑯᓂᐅᓂᐊᖅᑐᒧᑦ ᒪᑭᒪᐃᓐᓇᕈᓐᓇᕐᓂᐊᖅᑐᓂᓗ ᑭᐅᔾᔪᑎᓂᒃ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᒃᑯᑦ ᖃᐅᔨᓚᐅᖅᑕᖏᓐᓂᑦ. ᑮᓇᐅᔭᐃᑦ ᐊᖏᕈᑕᐅᓯᒪᔪᑦ ᑲᓇᑕᒃᑯᓐᓄᑦ ᕿᑭᖅᑕᓃᒃᑯᓐᓄᓗ ᐃᒪᐃᓕᖓᔪᑦ:
- $15ᓂ ᐃᓕᔭᐅᓂᐊᖅᑐᑦ ᕿᑭᖅᑕᓃᒃᑯᑦ ᑐᖅᓯᒪᔪᓂ ᑮᓇᐅᔭᓄᑦ
- $2ᒥᓕᔭᓐ ᐅᖓᑖᓄᑦ ᐃᓄᐃᑦ ᑕᐃᔅᓱᒪᓂ ᖃᓄᐃᓕᐅᕙᓚᐅᖅᑕᖏᓐᓂᒃ ᖃᐅᔨᒪᑎᑦᓯᓂᕐᒧᑦ ᐊᒻᒪᓗ ᐊᐅᓚᑦᑎᔾᔪᑎᒃᓴᓄᑦ ᐱᓕᕆᐊᒃᓴᓂ
- $2.9 ᒥᓕᔭᓂᒃ ᕿᒻᒥᓂᒃ ᐆᒻᒪᖅᑎᑦᓯᒃᑲᓐᓂᕐᓂᕐᒥᒃ, ᐱᖃᓯᐅᑎᓗᒋᑦ $100,000 ᐊᕐᕌᒍᑕᒫᑦ ᑮᓇᐅᔭᖃᖅᑎᑦᓯᓂᕐᒥᒃ ᓄᓇᕗᒥ ᐸᖓᒍᔾᔨᔨᒃᑯᓐᓄᑦ (2020ᒥᑦ-2027ᒧᑦ). ᑖᓐᓇ ᓄᓇᕗᒥ ᐸᖓᒍᔾᔨᓂᖅ ᐊᕐᕌᒍᑕᒫᒃᑯᑦ ᕿᒧᒃᓯᕐᔪᐊᕐᓂᐅᕙᒃᑐᖅ ᐱᒋᐊᖅᑕᐅᓚᐅᖅᓯᒪᔪᒥᒃ 1999ᒥ. ᑖᓐᓇ ᐸᖓᒍᔾᔨᓂᖅ ᐃᓕᖅᑯᓯᕐᓂᒥᒃ ᓴᖅᑭᔮᖅᑎᑦᓯᓂᐅᔪᖅ. ᑖᓐᓇ ᐸᖓᒍᔾᔨᓂᖅ ᐊᔾᔨᒌᙱᑦᑐᓂᒃ ᓄᓇᓕᖕᓂᑦ ᐊᓪᓚᖅᑐᖃᓲᖅ ᐊᒻᒪᓗ ᓂᑭᑦᑖᖅᑕᐅᓪᓗᓂ ᕿᑭᖅᑕᓂ ᓄᓇᓕᖏᓐᓄᑦ.
- $ 1.2 ᒥᓕᔭᓐ ᐅᖓᑖᓂ ᐃᖏᕐᕋᔾᔪᑎᒃᓴᓄᑦ ᐊᒻᒪᓗ ᒪᒥᓴᕐᓂᕐᒧᑦ ᐃᓄᖕᓄᑦ ᐊᒃᑐᖅᑕᐅᓯᒪᔪᓂᒃ ᑕᓪᓗᕈᑎᒥ ᓅᑕᐅᓚᐅᖅᑐᑦ, ᐊᒻᒪᓗ ᒪᑐᔭᐅᓂᖓ ᑭᕕᖅᑑᖅ, ᐹᓪᓚᕕᒃ, ᐊᒻᒪᓗ South Campᒥ ᓄᓇᓖᑦ.
ᑐᑭᓯᔾᔪᑎᑦ ᖃᓄᐃᓕᐅᖅᓯᒪᓂᖏᑦ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ:
ᐊᒥᓱᓄᑦ ᐊᕐᕌᒍᓄᑦ ᑲᓇᑕ ᖁᔭᓈᖅᓯᓯᒪᓚᐅᕐᒪᑦ ᕿᑭᖅᑕᓃᒃᑯᑦ ᑐᒃᓯᕋᐅᑎᒋᓯᒪᔭᖓᓂᑦ ᓈᓚᖕᓂᖃᖁᔨᓪᓗᑎᒃ ᒐᕙᒪᑐᖃᒃᑯᑦ ᐊᑐᐊᒐᖏᓐᓂᒃ ᐊᒻᒪᓗ ᐱᓕᕆᔾᔪᓯᕆᓚᐅᖅᑕᖏᓐᓂ ᕿᑭᖅᑕᓂ ᐃᓄᖕᓄᑦ 1950ᓂᑦ 1975ᒧᑦ ᐊᒻᒪᓗ ᑕᐃᒪᐃᒻᒪᑦ ᑎᓕᐅᕆᖔᖅᖢᑎᒃ ᐸᓖᓯᒃᑯᓐᓂᑦ ᖃᐅᔨᓴᖁᔨᓪᓗᑎᒃ ᑖᒃᑯᓂᖓ ᐸᓯᔭᐅᔾᔪᑎᒋᔭᐅᔪᓂ.
ᕿᑭᖅᑕᓃᒃᑯᑦ ᓈᒻᒪᒃᓴᙱᕕᔾᔪᐊᓚᐅᖅᑐᑦ ᐸᓖᓯᒃᑯᑦ ᐅᓂᒃᑳᓕᐊᖏᓐᓂᑦ, ᓱᓕᒍᓐᓃᖅᑎᑦᓯᑎᓪᓗᒋᑦ ᐃᓄᐃᑦ ᐊᑐᓚᐅᖅᑕᖏᓐᓂᒃ ᑕᐃᔅᓱᒪᓂ. ᑭᐅᔾᔪᑎᒋᓪᓗᒍ ᐸᓖᓯᒃᑯᑦ ᐅᓂᒃᑳᖏᑦ, ᕿᑭᖅᑕᓃᒃᑯᑦ ᐋᖅᑭᒃᓯᓚᐅᖅᑐᑦ ᐃᓛᒃᑰᖅᑐᒥᒃ ᓱᓕᔪᒥᒃ ᑭᓪᓕᓯᓂᐊᖅᑎᓂ. 350−ᓗᐊᑦ ᐃᓄᐃᑦ ᐃᓚᐅᓚᐅᖅᑐᑦ ᓈᓚᖕᓂᖃᖅᑎᓪᓗᒋᑦ ᑐᑭᓯᒍᒪᓪᓗᑎᒃ ᓱᓕᔪᓂᒃ ᐱᔾᔪᑎᒋᓪᓗᒋ ᒐᕙᒪᑐᖃᒃᑯᑦ ᐊᑐᐊᕆᓚᐅᖅᑕᖏᑦ ᐱᓕᕆᔾᔪᓯᕆᓚᐅᖅᑕᖏᓐᓂᓗ. ᑖᒃᑯᐊ ᖃᐅᔨᔭᐅᓯᒪᔪᑦ ᑎᑎᕋᐅᓯᐅᓯᒪᔪᑦ ᐊᒻᒪᓗ ᐊᑐᐃᓐᓇᐅᓪᓗᑎᒃ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᐃᑭᐊᖅᑭᕕᖓᓂ
ᐃᓱᒪᒋᓪᓗᒍ ᓴᐃᒻᒪᖃᑎᒌᒃᐸᓪᓕᐊᓂᖅ, ᕿᑭᖅᑕᓃᒃᑯᑦ ᑐᒃᓯᕋᓚᐅᖅᑐᑦ ᒐᕙᒪᑐᖃᒃᑯᓐᓂᑦ ᓇᓗᓇᐃᖅᓯᖁᓪᓗᒋᑦ ᐊᒃᓱᕈᖅᑎᑦᓯᓚᐅᕐᓂᖏᓐᓄᑦ ᐃᓄᖕᓂᑦ ᑕᐃᒪᐃᒻᒪᑦ ᐱᕕᖃᖅᑎᑦᓯᓚᐅᕐᒪᑕ ᐃᓱᒪᒋᔪᓐᓃᕐᕕᖃᕐᓂᕐᒥᒃ ᐊᒻᒪ ᒪᒥᓴᕐᓂᕐᒥᓗ. ᓴᐃᒻᒪᖃᑎᒌᒃᐸᓪᓕᐊᓂᖅ, ᐃᓄᖕᓄᑦ ᕿᑭᖅᑕᓂ ᓄᓇᓕᖕᓂᑦ, ᑐᑭᖃᕐᒪᑦ ᐱᒋᐊᕆᐊᕐᓂᕐᒥᒃ ᕿᑭᖅᑕᓂ ᓱᓕᓗᒥᒃ ᑭᓪᓕᓯᓂᐊᖅᑏᑦ ᑭᖑᓪᓕᖅᐹᖓᓐᓂᒃ ᐅᓂᒃᑳᖏᑦ:
ᓴᐃᒻᒪᖃᑎᒌᒃᐸᓪᓕᐊᓂᖅ (2010)
ᑐᑭᓯᒃᑲᓐᓂᕈᒪᒍᕕᑦ:
ᖃᓄᐃᓕᐅᕆᐊᕐᑕᐅᓂᖏᑦ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᐅᓂᒃᑳᖏᑦ
ᐃᖃᓗᐃᑦ, ᓄᓇᕗᑦ, ᐅᑐᐱᕆ 8, 2020- ᕿᑭᖅᑕᓂ ᐃᓄᐃᒃ ᑲᑐᔾᔨᖃᑎᒌᖏᑦ ᐊᓕᐊᓇᐃᒍᓱᒃᐳᑦ ᕿᑭᖅᑕᓂ ᕿᒧᒃᓯᖅᑏᑦ ᐆᑦᑐᕋᐅᑕᐅᓪᓗᓂ ᐱᓕᕆᐊᖅ ᐃᑲᔪᖅᑕᐅᖁᓪᓗᒋᑦ ᐃᓄᐃᑦ ᕿᒧᒃᓯᖃᖅᑎᐅᕙᒃᑐᑦ. ᐃᓄᐃᑦ ᕿᑭᖅᑕᓂᕐᒥᐅᑦ ᑕᓪᓕᒪᓂᒃ ᐅᖓᑖᓄᓪᓗ ᕿᒻᒥᖃᓱᕈᑎᒃ ᐃᑲᔫᓯᐊᖅᑖᕋᓱᖃᑕᐅᔪᓐᓇᖅᑐᑦ. ᑐᒃᓯᕋᐅᑏᑦ.
ᑕᒪᓐᓇ ᐊᕌᒍᓄᑦ ᐱᖓᓱᓄᒃ ᐊᐅᓚᑕᐅᓂᐊᖅᖢᓂ ᐃᓄᐃᑦ ᕿᑭᑖᓗᖕᒥ ᕿᒻᒥᖃᖅᑎᐅᖏᓐᓇᖁᓪᓗᒋᑦ ᕿᒧᒃᓯᕈᓐᓇᐅᑎᓂᒃ. ᑐᒃᓯᕋᐅᑎ ᐊᑕᐅᓯᖅ ᐱᔭᐅᔪᓐᓇᖅᑐᖅ $3,500 ᐊᑕᐅᓯᐊᕐᓗᓂ ᐃᑲᔫᓯᖅᑖᕈᑕᐅᖃᑦᑕᕐᓂᐊᖅᑐᖅ. ᑕᒪᓐᓇ ᕿᑭᖅᑕᓂ ᓱᓕᔪᒥᒃ ᑭᒡᒐᖅᑐᐃᓂᕆᔭᖓᓂᖔᖅᑐᖅ.
ᑐᑭᓯᒃᑲᓐᓂᕈᒪᒍᔅᓯ ᐅᕝᕙᓘᓐᓃᑦ ᑐᔅᓯᕋᐅᓯᐅᕈᑦ ᐱᔪᒪᒍᔅᓯᐅᒃ ᐅᕙᙵᑦ ᐱᔭᔅᓴᐅᕗᑦ:
ᕿᑭᖅᑕᓂ ᕿᒧᒃᓯᖅᑏᑦ ᐆᑦᑐᕋᐅᑕᐅᓪᓗᓂ ᐱᓕᕆᐊᖅ
ᓂᕿᓂᑦ ᐊᐅᓚᑦᑎᔾᔪᑎᖃᕐᓂᖅ
ᓴᙱᓂᖅᑖᖅᑎᑦᓯᓂᕐᒥᒃ ᐃᓄᖕᓂᑦ ᓂᕿᒃᓴᖃᖅᑎᑦᓯᓂᐊᕐᒪᑕ ᓄᓇᓕᖏᓐᓂ
ᓄᓇᕗᒥᐅᑦ ᓂᕿᒃᓴᖃᑦᑎᐊᖅᐸᙱᑦᑐᑦ. 70ᐳᓴᑎᐅᑉ ᐅᖓᑖᓂ ᓄᓇᕗᒥᐅᑦ ᓂᕆᔭᒃᓴᖃᖅᐸᙱᑦᑐᑦ. ᒫᓐᓇ ᑐᕌᒐᕆᔭᐅᓯᒪᔪᑦ ᐋᖅᑭᔾᔪᑕᐅᓂᐊᖅᑐᓂᒃ ᑖᔅᓱᒥᖓ, ᓱᕐᓗ ᐊᑭᑭᓪᓕᒋᐊᕈᑎᓂᑦ ᑎᑭᓴᖅᑕᐅᔪᓂᒃ ᓂᕿᓄᑦ, ᑲᔪᓯᑦᑎᐊᙱᑦᑐᖅ. ᓄᓇᕗᑦ ᐃᓱᒪᐅᓯᖏᑦ ᐊᓯᔾᔨᕆᐊᖃᓕᖅᑐᑦ ᓂᕿᒃᓴᖃᑦᑎᐊᙱᓐᓂᓕᕆᓂᕐᒧᑦ ᓂᕿᓂᒃ ᐊᐅᓚᑦᑎᔾᔪᑎᖃᕈᓐᓇᖅᓯᓂᕐᒧᑦ − ᓴᙱᓂᖅᑖᖅᑎᑕᐅᓂᐊᕐᒪᑕ ᐃᓄᐃᑦ ᓂᕿᖃᑎᑦᓯᓂᖏᓐᓂᒃ ᓄᓇᓕᖏᓐᓂ.
ᓄᓇᕗᒥ ᐊᖏᕈᑎᖓ ᐱᔪᓐᓇᐅᑎᖃᖅᑎᑦᓯᒪᔪᖅ ᐃᓄᖕᓂᑦ ᐊᐅᓚᑦᑎᒍᓐᓇᕐᓗᑎᒃ ᓄᓇᒥᖔᖅᑐᓂᒃ ᐊᒻᒪᓗ ᓂᕿᒃᓴᖃᖅᑎᑦᓯᓂᕐᒥᒃ. ᐃᓄᖕᓂᑦ ᓇᐅᑦᑎᖅᓱᖃᖅᑐᑦ ᓇᐅᑦᑎᖅᓱᖅᑐᓂ ᓄᓇᑦᑎᓐᓂ ᐃᒪᖁᑎᑦᑎᓐᓂᓗ, ᐊᒻᒪᓗ ᐊᐅᓚᑦᑎᓪᓗᑎᒃ ᒥᕐᖑᐃᖅᓯᕝᕕᑦᑎᓐᓂ ᓴᐳᔾᔨᕕᑦᑎᓐᓂᓗ, ᐊᒃᑐᐊᖓᓗᒃᑖᖅᑐᑦ ᐅᒪᔪᓂᒃ ᓂᕿᒃᓴᕆᔭᑦᑎᓐᓂ.
ᕿᑭᖅᑕᓃᒃᑯᑦ ᑕᑯᓇᙳᐊᖅᑐᑦ ᓂᕿᓂᒃ ᐊᐅᓚᑦᑎᔾᔪᑎᖃᕈᓐᓇᕐᓂᖅ ᑲᔪᓯᒍᓐᓇᖅᑐᑦ ᑭᓯᐊᓂ ᐅᑯᐊ ᐱᓕᕆᐊᖑᑉᐸᑕ:
- ᓄᑖᙳᖅᑎᑕᐅᓗᑎᒃ ᐊᑐᐊᒐᐃᑦ ᐋᖅᑭᒃᓱᖅᓯᒪᔭᖏᓐᓂᒃ ᐊᒻᒪᓗ ᑮᓇᐅᔭᐃᑦ ᖃᓄᐃᓕᖓᓂᖏᑦ ᐃᓚᐅᑎᑦᓯᓂᐊᕐᒪᑦ ᐃᓄᓕᖅᑕᓂ ᓂᕿᓂᒃ ᐃᓄᐃᑦ ᐃᓕᖅᑯᓯᕆᖕᒪᒍ, ᐱᕙᓪᓕᐊᓂᕐᒧᑦ, ᐊᒻᒪᓗ ᖃᓄᐃᑦᑕᐃᓕᒪᓂᕐᒧᑦ
- ᑮᓇᐅᔭᖃᖅᑎᑦᓯᓂᖅ ᐊᖑᓇᓱᒃᑎᓄᑦ ᐱᕕᒃᓴᖃᖅᑎᑦᓯᓂᕐᒥᒃ ᐱᖁᑎᕐᔪᐊᖃᕐᓂᖅ, ᐊᔾᔨᒌᙱᑦᑐᓂᒃ ᐊᑐᖅᑕᐅᔪᓐᓇᖅᑐᓄᑦ ᐃᒡᓗᕐᔪᐊᓂ, ᓂᕿᓕᕆᕝᕕᓂ, ᐃᓕᓐᓂᐊᕐᕕᒃᓴᓂᓗ
- ᑮᓇᐅᔭᖃᖅᑎᑦᓯᓂᖅ ᓄᒃᑕᖅᑎᓄᑦ ᐊᒻᒪᓗ ᓇᐅᑦᑎᖅᓱᖅᑎᓄᑦ ᐱᓕᕆᐊᒃᓴᓂ ᑮᓇᐅᔭᓕᐅᖅᑎᑦᓯᓂᐊᖅᑐᓂᒃ ᓄᒃᑕᖅᑎᓂ ᐊᒻᒪᓗ ᓇᐅᑦᑎᖅᓱᖅᑎᓂ, ᐱᖁᑎᖃᖅᑎᑦᓯᓂᖅ ᐊᒻᒪᓗ ᐱᓕᕆᐊᒃᓴᓂ ᐃᓐᓇᕐᓄᑦ ᐃᓅᓱᒃᑐᓂᓗ
ᑐᑭᓯᒃᑲᓐᓂᕈᒪᒍᕕᑦ:
ᐃᓄᒃᑎᑐᑦ ᐅᖃᐅᓯᖓᓂ ᑕᖅᑭᖓ
ᐱᕈᖅᑎᑦᓯᓂᕐᒥᒃ ᐊᒻᒪ ᓴᐳᔾᔨᓂᕐᒥᓗ ᐃᓄᒃᑎᑐᑦ ᐅᖃᐅᓯᐊᓂ
ᕿᑭᖅᑕᓃᒃᑯᑦ ᐱᕈᖅᑎᑦᓯᒪᐃᓐᓇᖅᑐᑦ ᐃᓄᒃᑎᑑᒻᒥᒃ ᐊᑐᖅᖢᑎᒍ ᐊᕐᕌᒍᑕᒫᑦ ᐃᓄᒃᑎᑐᑦ ᐅᖃᐅᓯᖓ ᑕᖅᑭᕆᔭᖓᓂᑦ ᖃᓄᐃᓕᐅᖅᑎᑦᓯᓪᓗᑎᒃ ᕖᕝᕗᐊᓕᒥ. ᑕᖅᑭᒥ ᖃᓄᐃᓕᐅᖅᑎᑦᓯᓂᐅᔪᑦ ᐱᖃᓯᐅᑎᓯᒪᔪᑦ ᖃᐅᑕᒫᒃᑯᑦ ᓴᖅᑭᔮᖅᑎᑦᓯᓂᕐᒥᒃ ᐃᓄᒃᑎᑑᖅᑐᓂᒃ ᓱᕈᓯᕐᓄᑦ ᑐᕌᖓᔪᓂᒃ ᐅᖃᓕᒫᒐᓕᐊᓂᒃ ᓴᖅᑭᑕᐅᓯᒪᔪᓄᑦ ᕿᑭᖅᑕᓃᒃᑯᓐᓄᑦ/ᐃᓐᕼᐋᐱᑦ ᒦᑎᐊᒃᑯᓐᓄᑦ ᑲᑐᔾᔨᓪᓗᑎᒃ, ᐊᕐᕌᒍᑕᒫᕐᒥᓗ ᐅᖃᓕᒫᒐᓕᐊᓂᒃ ᑕᑯᒃᓴᐅᑎᑦᓯᕙᒃᖢᑎᒃ.
ᕿᑭᖅᑕᓃᒃᑯᑦ ᓴᖅᑭᓯᒪᔭᖓᑦ ᑕᒪᑐᒪᓂᑦ ᑕᖅᑭᕐᒥ ᑖᓐᓇ ᐊᕐᕌᒍᑕᒫᑦ ᐃᙱᐅᓯᐅᕐᓂᕐᒥᒃ ᐅᖃᓗᕋᐅᔭᓕᐅᕐᓂᕐᒥᓪᓗ. ᐊᕐᕌᒍᑕᒫᑦ ᑐᓂᔭᐅᕙᒃᑐᒍᑦ ᐱᖃᑕᐅᔪᓂᒃ ᖁᕕᐊᓲᑎᒋᔭᐅᓪᓗᑎᒃ ᐊᔪᙱᓐᓂᖏᑦ ᕿᑭᖅᑕᓂ ᐃᓄᐃᑦ ᐊᒻᒪᓗ ᖃᓄᐃᓕᐅᕐᓂᕆᕙᒃᑕᖏᓪᓗ ᐅᖃᐅᓯᖓ ᐊᑐᖅᖢᒍ.
ᖃᐅᔨᒋᐊᖃᑦᑕᕆᑦ ᓄᑖᓂᒃ ᑐᑭᓯᒍᑎᒃᓴᓂ ᐊᕐᕌᒍᑕᒫᕐᒥᒃ ᓵᓚᖃᕋᓱᐊᕐᓂᕐᒥᒃ.
ᓵᓚᖃᖅᓯᒪᔪᑦ:
ᓄᓇᕗᒥ ᐃᑦᑕᕐᓂᓴᖃᕐᕕᒃ
ᓴᐳᔾᔨᓂᕐᒥᒃ ᓄᓇᕗᒥ ᐃᑦᑕᕐᓂᓴᖏᑦ
ᓄᓇᕗᑦ ᓄᓇᑑᓪᓗᓂ ᐸᕕᓐᓯᓂᑦ ᐊᕕᒃᑐᖅᓯᒪᔪᓂ ᓄᓇᓕᖕᓂᑦ ᐅᑭᐅᖅᑕᖅᑐᒥ ᐃᑦᑕᕐᓂᓴᖃᕐᕕᖃᙱᑦᑐᑐᐊᑦ ᓴᖅᑭᔮᖅᑎᑦᓯᔪᓐᓇᖅᑐᒥᒃ ᐅᐊᑦᑎᐊᕈᓐᓂᓴᓂᒃ. ᒫᓐᓇ ᐱᑕᖃᖅᑐᖅ 140,000ᓂ ᐱᖁᑎᑐᖃᓂᒃ ᐃᑦᑕᕐᓂᓴᓂᒃ ᐱᖁᑎᒋᔭᐅᔪᓄᑦ ᓄᓇᕗᒥᐅᓄᑦ ᐸᐸᑕᐅᔪᓂᒃ ᐊᓯᖏᓐᓂᑦ ᓄᓇᓕᖕᓂ ᓄᓇᕘᑉ ᓯᓚᑖᓂ.
ᕿᑭᖅᑕᓃᒃᑯᑦ ᐊᒻᒪᓗ ᓄᓇᕗᑦ ᑐᙵᕕᒃᑯᑦ ᓇᓗᓇᐃᖅᓯᓯᒪᔪᑦ ᑐᓂᓯᓂᐊᖅᖢᑎᒃ $5ᒥᓕᔭᓂᒃ ᓄᓇᕗᒥ ᐃᑦᑕᕐᓂᓴᕐᕕᒃᓴᒥ ᓇᑉᐸᖅᑐᖃᕈᓐᓇᖅᓯᖁᓪᓗᒍ. ᕿᑭᖅᑕᓃᒃᑯᑦ ᐱᓕᕆᓯᒪᔪᑦ ᓯᕗᓪᓕᐅᑎᑦᓯᓪᓗᑎᒃ ᓴᖅᑎᑦᓯᖁᔨᓪᓗᑎᒃ ᓄᓇᕗᒥ ᐃᑦᑕᕐᓂᓴᖃᕐᕕᒃᓴᒥ ᐊᒻᒪᓗ ᑕᑯᙳᐊᖅᖢᑎᒃ ᓴᓇᔭᐅᒐᔭᕐᓂᖓᓂᒃ ᐃᓄᐃᑦ ᓄᓇᖁᑎᖏᓐᓂ ᐃᖃᓗᓐᓂ.
ᓄᕖᕝᕙ 2017ᒥ, ᕿᑭᖅᑕᓃᒃᑯᑦ ᐊᒻᒪ ᕿᑭᖅᑖᓗᒃ ᑯᐊᐳᕇᓴᒃᑯᑦ ᐊᑎᓕᐅᓚᐅᖅᓯᒪᔪᑦ ᐊᑐᖅᑐᐊᕈᑎᒥᒃ ᐱᕙᓪᓕᐊᑎᑦᓯᒍᒪᓪᓗᑎᒃ ᐃᓄᐃᑦ ᓄᓇᖁᑎᖓᓂᒃ ᒥᕝᕕᓕᐊᕆᐊᑉ ᐊᑐᕆᐊᖓᑕ ᓴᓂᕌᓂ ᐃᖃᓗᓐᓂ. ᑖᓐᓇ ᓄᓇ ᓇᓗᓇᐃᖅᑕᐅᓯᒪᔪᖅ ᐊᖏᕐᕋᕆᔭᐅᔪᒃᓴᒫᖑᓂᐊᖅᑐᒥᒃ ᓄᓇᕗᒥ ᐃᑦᑕᕐᓂᓴᖃᕐᕕᖕᒥ.
ᓂᕈᐊᕐᓂᕗᑦ
ᓂᕈᐊᖅᑐᓕᒫᑦ ᐊᑐᖅᑐᑦ
2017ᒥ, ᕿᑭᖅᑕᓃᒃᑯᑦ ᓴᖅᑭᑎᑦᓯᓚᐅᖅᑐᑦ “ᓂᕈᐊᕐᓂᕗᑦ” ᑲᔪᖏᖅᓴᐃᒍᒪᓪᓗᑎᒃ ᕿᑭᖅᑕᓂ ᐃᓄᖕᓂᑦ 2017ᒥ ᓄᓇᕗᒥ ᓂᕈᐊᕐᓂᖓᓄᑦ ᓂᕈᐊᖃᑕᐅᖁᓪᓗᒋᑦ. ᑕᐃᒪᙵᓂᑦ, ᕿᑭᖅᑕᓃᒃᑯᑦ ᐊᑐᖅᓯᒪᔪᑦ ᑖᔅᓱᒥᖓ “ᓂᕈᐊᕐᓂᕗᑦ”−ᒥ ᑲᔪᖏᖅᓴᐅᑎᒋᔭᐅᓪᓗᓂ ᕿᑭᖅᑕᓂ ᐃᓄᖕᓂᑦ ᓂᕈᐊᖃᑕᐅᖃᑦᑕᖁᓪᓗᒋᑦ ᓄᓇᓕᖕᓂ ᒐᕙᒪᕋᓛᒃᑯᑦ, ᓄᓇᕗᑦ ᒐᕙᒪᒃᑯᑦ ᐊᒻᒪ ᒐᕙᒪᑐᖃᒃᑯᓪᓗ ᓂᕈᐊᕐᓂᖏᓐᓄᑦ ᐊᒻᒪᓗ ᓯᕗᓕᖅᑎᒃᓴᓄᑦ ᓂᕈᐊᕐᓂᐅᕙᒃᑐᓂ ᕿᑭᖅᑕᓃᒃᑯᓐᓄᑦ ᐊᒻᒪᓗ ᓄᓇᕗᑦ ᑐᙵᕕᒃᑯᓐᓄᑦ.
ᑐᕌᒐᖃᖅᑐᖅ ᓂᕈᐊᖃᑦᑕᖁᔨᓂᕐᒥᒃ ᑲᔪᖏᖅᓴᖅᑕᐅᓪᓗᑎᒃ ᓂᕈᐊᕆᐊᖅᑐᖁᓪᓗᒋᑦ ᕿᑭᖅᑕᓂ ᐃᓄᐃᑦ ᐊᒻᒪᓗ ᐱᔪᓐᓇᕐᓂᖃᖁᓪᓗᒋᑦ ᑐᑭᓯᐅᒪᑦᓯᐊᕐᓗᑎᒃ ᓂᕈᐊᖅᖠᕈᓐᓇᕐᓂᕐᒥᒃ ᓂᕈᐊᕐᓇᐅᑉ ᐅᓪᓗᖓᓂ.
ᐅᑭᐅᖅᑕᖅᑐᒧᑦ ᐊᑐᐊᒐᖓ ᐋᖅᑭᒃᓱᖅᓯᒪᓂᕆᔭᖓ
ᓄᑖᖑᓪᓗᓂ ᐸᕐᓇᐅᑎᐅᔪᖅ ᐅᑭᐅᖅᑕᖅᑐᕐᒧᑦ
ᐊᑯᓂᐅᔪᒥᒃ ᐊᔾᔨᒌᑎᑦᓯᖏᓐᓂᕐᒧᑦ ᐱᑕᖃᐅᕐᒪᑦ ᐃᖏᕐᕋᔪᓕᕆᓂᕐᒥᒃ, ᐊᐅᓚᔪᓐᓇᐅᑎᓕᕆᓂᕐᒥᒃ, ᑐᓴᐅᒪᖃᑦᑕᐅᑎᓕᕆᓂᕐᒥᒃ, ᐃᖅᑲᓇᐃᔭᖅᑐᓕᕆᓂᕐᒥᒃ, ᓄᓇᓕᖕᓂ ᐱᖁᑎᕐᔪᐊᓕᕆᓂᕐᒥᒃ, ᐋᓐᓂᐊᖃᕐᓇᙱᑦᑐᓕᕆᓂᕐᒥᒃ, ᐃᓕᓐᓂᐊᕐᓂᓕᕆᓂᕐᒥᓗ. ᓄᑖᒥᒃ ᐅᑭᐅᖅᑕᖅᑐᒧᑦ ᐊᑐᐊᒐᐅᑉ ᐋᖅᑭᒃᓱᖅᓯᒪᓂᕆᓕᖅᑕᖓ ᑖᒃᑯᓂᖓ ᐊᔾᔨᒌᑎᑕᐅᙱᓗᐊᖅᑐᓂᒃ ᐱᓕᕆᐊᖑᓂᐊᖅᑐᓂ ᓯᕗᓪᓕᖅᐹᒥ ᐱᓂᐊᕐᓂᐅᓚᐅᖅᓯᒪᔪᖅ ᓕᕗᕈᒃᑯᑦ ᒐᕙᒪᐅᑎᓪᓗᒋᑦ ᑭᖑᓂᐊᓂ 2015ᒥ ᓂᕈᐊᕐᓂᐅᓚᐅᖅᑐᒥᑦ.
ᒐᕙᒪᑐᖃᒃᑯᑦ ᑕᑯᑎᑦᓯᓚᐅᖅᑐᑦ “ᓴᙱᔫᒍᓐᓇᖅᑐᒍᑦ ᑲᑐᔾᔨᖃᑎᖃᕐᓗᑕ: ᐊᒻᒪᓗ ᐅᑭᐅᖅᑕᖅᑐᒥ ᐊᑐᐊᒐᐅᑉ ᐋᖅᑭᒃᓱᖅᓯᒪᓂᖓ ᑲᓇᑕᒧᑦ” ᓇᓗᓇᐃᖅᑕᐅᓚᐅᖅᑐᒥᒃ ᑎᑎᕋᕆᐊᕐᖓᖅᑕᐅᓯᒪᔪᓂᒃ ᑎᓯᐱᕆ 14, 2018ᒥ.
ᕿᑭᖅᑕᓃᒃᑯᑦ ᑭᐅᔾᔪᑎᖃᖅᖢᑎᒃ ᓇᓗᓇᐃᖅᓯᓂᖏᓐᓄᑦ ᑎᑎᕋᕆᐊᕐᖓᖅᓯᒪᔪᒥᒃ ᔭᓐᓄᐊᓕ 2019ᒥ. ᕿᑭᖅᑕᓃᒃᑯᑦ ᑭᐅᔾᔪᑎᒋᔭᖓᑦ ᐅᖃᐅᓯᖃᓚᐅᖅᑐᖅ ᑖᓐᓇ ᐅᑭᐅᖅᑕᖅᑐᒥ ᐊᑐᐊᒐᐅᑉ ᐋᖅᑭᒃᓱᖅᓯᒪᓂᖓ ᐃᓗᓕᖃᕆᐊᓕᒃ ᐃᓄᐃᑦ ᖃᐅᔨᒪᔭᑐᖃᖏᓐᓂ (ᐃᓄᐃᑦ ᖃᐅᒪᔨᔭᖏᑦ), ᐊᒻᒪᓗ ᐃᓗᓕᖃᕐᓗᓂ ᒪᒥᓴᐃᓂᕐᒥᒃ ᐊᒻᒪᓗ ᓴᐃᒻᒪᖃᑎᒌᒃᐸᓪᓕᐊᓂᕐᒥᒃ ᑕᒻᒪᕈᑎᒋᔭᐅᓚᐅᖅᑐᓂᑦ ᑕᐃᔅᓱᒪᓂ ᐊᑦᑕᐅᑦᓯᒃᑯᓪᓗ ᕿᒥᕐᕈᓂᕐᒥᒃ ᓯᕗᓂᒃᓴᒥ ᐱᕈᖅᑎᑦᓯᕙᓪᓕᐊᓗᑎᒃ ᒪᑭᒪᐃᓐᓇᕐᓂᐊᖅᑐᒥᒃ ᐱᕙᓪᓕᐊᔾᔪᑎᒃᓴᕆᔭᐅᔪᓐᓇᖅᑐᓄᑦ.
ᐱᓗᐊᖅᑐᒥᒃ, ᕿᑭᖅᑕᓃᒃᑯᑦ ᐃᒪᓕᐅᖁᔨᓯᒪᔪᑦ:
- ᖃᓄᐃᓕᐅᕆᐊᖅᑕᐅᓂᖏᑦ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ. ᐊᒡᒌᓯ 14, 2019ᒥ ᒐᕙᒪᑐᖃᒃᑯᑦ ᓇᓗᓇᐃᖅᓯᓪᓚᕆᓚᐅᖅᑐᑦ ᒪᒥᐊᖦᖢᑎᒡᓗ ᖃᓄᐃᓕᐅᖅᐸᓚᐅᕐᓂᖏᓐᓄᑦ ᐊᔾᔨᕈᑎᒋᔭᐅᓚᐅᖅᑐᓂᒃ ᐃᓄᐃᑦ ᓄᓇᖏᓐᓂᒃ ᐃᓕᖅᑯᓯᖏᓐᓂᓗ 1950ᒥᑦ 1975ᒧᑦ. ᑐᑭᓯᒃᑲᓐᓂᕈᒪᒍᕕᑦ ᖃᐅᔨᒋᐊᕐᓗᒍ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ.
- ᓄᑖᓂᒃ ᐊᑐᐊᒐᐃᑦ ᐋᖅᑭᒃᓱᖅᓯᒪᓂᕆᔭᖏᓐᓂ ᐊᒻᒪᓗ ᑮᓇᐅᔭᖃᖅᑎᑦᓯᓗᑎᒃ, ᐱᖃᓯᐅᑎᓗᒋᑦ ᑐᑭᓯᒋᐊᕆᐊᕐᓂᕐᒥᒃ ᐊᒻᒪ ᐃᓚᐅᑎᑕᐅᓗᑎᒃ ᐃᓄᐃᑦ ᑎᒥᖁᑎᖏᑦ ᐊᒻᒪᓗ ᐊᑯᓂᐅᓂᐊᖅᑐᒧᑦ ᐋᖅᑭᐅᒪᐃᓐᓇᕐᓂᐊᖅᑐᓂ ᑮᓇᐅᔭᖃᖅᑎᑦᓯᓂᕐᒥᒃ
- ᑮᓇᐅᔭᖃᖅᑎᑦᓯᓂᕐᒥᒃ ᐱᒻᒪᕆᐅᔪᓂᒃ ᐱᕙᓪᓕᐊᔾᔪᑎᒃᓴᓂ ᐱᖁᑎᕐᔪᐊᓂ, ᓱᕐᓗ ᐃᒪᕕᖕᒥ ᑐᓚᑦᑕᕐᕕᓂ, ᒥᕝᕕᓕᕆᓂᖅ, ᑐᓴᐅᒪᖃᑦᑕᐅᑎᔾᔪᑎᑦ, ᐊᒻᒪᓗ ᓴᓗᒪᔪᓂᒃ ᐊᐅᓚᔪᓐᓇᐅᑎᖃᕐᓂᖅ
- ᑮᓇᐅᔭᖃᖅᑎᑦᓯᓂᖅ ᓴᐳᔾᔨᓂᕐᒧᑦ ᐱᕙᓪᓕᐊᔾᔪᑎᒃᓴᓂ, ᐱᖃᓯᐅᑎᓗᒋᑦ ᑮᓇᐅᔭᐃᑦ ᐱᖁᑎᕐᔪᐊᓪᓗ ᐃᑲᔪᕐᓂᐊᖅᑐᓂᒃ ᓂᕿᓂ ᐊᐅᓚᑦᑎᔾᔪᑎᖃᕐᓂᕐᒥᒃ ᐊᒻᒪᓗ ᐃᓕᓐᓂᐊᖅᓯᒪᔪᓂᒃ ᐃᖅᑲᓇᐃᔭᕈᓐᓇᖅᑐᓂ
- ᐃᓅᓯᕐᒧᑦ ᐊᒻᒪᓗ ᐃᓕᖅᑯᓯᕐᒧᓪᓗ ᐱᖁᑎᕐᔪᐊᓂ ᐃᑲᔪᕐᓂᐊᖅᑐᓂᒃ ᓴᐃᒻᒪᖃᑎᒌᖕᓂᕐᒧᑦ. ᑖᓐᓇ ᐱᖁᑎᕐᔪᐊᖅ ᒪᓕᖕᓂᐊᖅᑐᖅ ᐱᓕᕆᐊᒃᓴᓂ ᓄᓇᕗᒥ ᐊᖏᕈᑎᐊᓂ, ᓴᙱᓕᖅᑎᑦᓯᓂᕐᒥᒃ ᐃᓄᐃᑦ ᓄᓇᓕᖏᓐᓂ ᐊᒻᒪᓗ ᐃᒃᐱᒋᔭᐅᓗᑎᒃ ᐃᓄᐃᑦ ᖃᐅᔨᒪᔭᑐᖃᖏᑦ.
ᓯᑎᐱᕆ 10, 2019ᒥ ᑲᓇᑕᐅᑉ ᐅᑭᐅᖅᑕᖅᑐᖓᓄᑦ ᐊᒻᒪᓗ ᐅᑭᐅᖅᑕᖅᑐᒥ ᐊᑐᐊᒐᐅᑉ ᐋᖅᑭᒃᓱᖅᓯᒪᓂᖓ ᓴᖅᑭᑕᐅᓚᐅᖅᑐᖅ.
ᑐᑭᓯᒃᑲᓐᓂᕈᒪᒍᕕᑦ:
ᕿᑭᖅᑕᓃᒃᑯᑦ ᑭᐅᔾᔪᑎᒋᔭᖓ “ᓴᖏᔫᖃᑎᒌᖕᓂᖅ: ᐅᑭᐅᖅᑕᖅᑐᒧᑦ ᐊᑐᐊᒐᐅᑉ ᐋᖅᑭᒃᓱᖅᓯᒪᓂᕆᔭᖓ ᑲᓇᑕᒧᑦ.”
ᐳᕙᓪᓗᖕᓂ/ᓇᓂᓚᕗᑦ
ᐳᕙᒡᓗᖕᓂᕐᒥᒃ ᓄᖅᑲᖅᑎᑦᓯᓂᖅ
ᕿᑭᖅᑕᓃᒃᑯᑦ ᓇᓗᓇᐃᖅᓯᓯᒪᔪᑦ ᓄᖅᑲᖅᑎᑦᓯᒍᒪᓪᓗᑎᒃ ᐳᕙᒡᓗᖕᓂᕐᒥᒃ ᕿᑭᖅᑕᓂ ᓄᓇᓕᖕᓂ ᐊᒻᒪᓗ ᓄᓇᕗᒥ. ᐅᓪᓗᒥ ᕿᑭᖅᑕᓂ ᐃᓄᐃᑦ ᐊᒃᑐᖅᑕᐅᓯᒪᔪᑦ ᐳᕙᒡᓗᖕᓂᕐᒥ 300ᓗᐊᖑᔪᓂᒃ ᐊᒥᓲᓂᖅᓴᐅᔪᑦ ᑲᓇᑕᒥᐅᑕᔪᓂᒃ ᓄᓇᖃᖅᑳᖑᙱᑦᑐᓄᑦ. ᐳᕙᒡᓗᖕᓂᖅ ᓄᖅᑲᖓᑎᑕᐅᔪᓐᓇᖅᑐᖅ ᐊᒻᒪᓗ ᒪᒥᓴᒐᒃᓴᐅᓪᓗᓂ.
ᕿᑭᖅᑕᓃᒃᑯᑦ ᐃᖅᑲᓇᐃᔭᖃᑎᖃᖅᑐᑦ ᐊᔾᔨᒌᙱᑦᑐᓕᒃ ᑎᒥᐅᔪᓂᒃ ᐱᖃᓯᐅᑎᓪᓗᒍ ᐃᓄᐃᑦ ᑕᐱᕇᑦ ᑲᓇᑕᒥᒃᑯᑦ, ᓄᓇᕗᑦ ᑐᙵᕕᒃᑯᑦ, ᐊᒻᒪᓗ ᓄᓇᕗᑦ ᒐᕙᒪᒃᑯᑦ ᑕᒪᓐᓇ ᐱᓕᕆᐊᖑᖁᓪᓗᒍ ᓄᓇᕗᒥ. ᕿᑭᖅᑕᓃᒃᑯᑦ ᓇᓗᓇᐃᖅᓯᓯᒪᔪᑦ ᒥᒃᖠᑎᑦᓯᒍᒪᓪᓗᑎᒃ ᐊᒥᓲᓂᕆᔭᖏᓐᓂᒃ ᐳᕙᒡᓗᒃᑐᓂᒃ 50ᐳᓴᓐᑎᒧᑦ 2025ᖑᖅᓴᓂᖓᓄᑦ ᐊᒻᒪᓗ ᓄᖅᑲᖅᑎᑕᐅᒻᒪᕆᒡᓗᓂ ᐃᓄᐃᑦ ᓄᓇᖏᓐᓂᒃ 2030ᒥ.
ᓇᓂᓚᕗᑦ:
ᒫᑦᓯᒥ 2019ᒥ, ᑲᓇᑕᐅᑉ ᓯᕗᓕᖅᑎᕐᔪᐊᖓ, ᔭᔅᑎᓐ ᑐᕉᑑ, ᒪᒥᐊᓚᐅᕐᒪᑕ ᐃᓄᖕᓄᑦ ᑭᒡᒐᖅᑐᐃᓪᓗᓂ ᑲᓇᑕᐅᑉ ᒐᕙᒪᒃᑯᖏᓐᓂ ᖃᓄᐃᓕᐅᕐᓂᕆᖃᑦᑕᓚᐅᖅᓯᒪᔭᖏᓐᓄᑦ ᑕᐃᔅᓱᒪᓂ ᐳᕙᒡᓗᒃᑐᐋᓘᑎᓪᓗᒋᑦ 1940ᓂᑦ 1960ᓄᑦ. ᑕᐃᔅᓱᒪᓂᓗ, ᑕᐅᓴᓃᑦᑐᑦ ᐃᓄᐃᑦ ᐊᐅᓪᓚᖅᑎᑕᐅᓪᓗᑎᒃ ᓄᓇᓕᒋᔭᖏᓐᓂᑦ ᐳᕙᒡᓗᒡᕕᖕᓄᑦ ᖃᓪᓗᓈᓄᑦ, ᐊᖏᕐᕋᕆᔭᖓᑕ ᐅᖓᓯᒋᔭᖓᓄᑦ, ᐅᖃᐅᓯᕆᔭᖓᓄᑦ ᐃᓕᖅᑯᓯᕆᔭᖓᓄᓪᓗ. ᐃᓛᓐᓂᒃᑯᑦ ᐃᓄᐃᑦ ᑐᖁᖃᑦᑕᓚᐅᖅᑐᑦ ᒪᒥᓴᖅᑎᓪᓗᒋᑦ ᐊᒻᒪᓗ ᐃᓗᕕᖅᑕᐅᓪᓗᑎᒃ ᐊᖏᕐᕋᕆᙱᑦᑕᒥᓂ, ᖃᓄᐃᓐᓂᖏᑦ ᐊᒻᒪᓗ ᐃᓗᕕᕐᕕᐅᔪᑦ ᖃᐅᔨᒪᔭᐅᙱᖦᖢᑎᒃ ᐃᓚᒋᔭᖏᓐᓄᑦ.
ᐃᓚᒋᓪᓗᒍ ᒪᒥᐊᓐᓂᐅᔪᒥᒃ, ᑲᓇᑕᐅᑉ ᓯᕗᓕᖅᑎᕐᔪᐊᖓ ᑐᓴᖅᑎᑦᓯᓚᐅᖅᑐᖅ ᓴᖅᑭᑕᐅᓂᐊᕐᓂᖓᓂᒃ ᓇᓂᓚᕗᒻᒥ ᐱᓕᕆᐊᖓᓂ. ᑖᓐᓇ ᐱᒋᐊᕈᑎᒋᔭᐅᔪᖅ ᐃᑲᔪᕈᓐᓇᕐᓂᐊᖅᑐᖅ ᐃᓚᒋᔭᐅᔪᓂᒃ ᑐᑭᓯᒃᑲᓐᓂᕈᑕᐅᔪᓐᓇᕐᓂᐊᖅᑐᖅ ᐃᓚᒌᓄᑦ ᑐᑭᓯᑎᑕᐅᔪᓐᓇᖅᓯᓗᑎᒃ ᖃᓄᐃᓕᖓᓂᖏᓐᓄ ᐃᓚᒋᔭᖏᑦ ᐊᐅᓪᓚᖅᑎᑕᐅᓚᐅᖅᓯᒪᔪᓂᑦ.
ᑐᑭᓯᒃᑲᓐᓂᕈᒪᒍᕕᑦ:
ᐃᓄᒃᑎᑐᑦ ᐅᖃᐅᓯᖓ
ᕿᑭᖅᑕᓃᒃᑯᑦ ᓇᓗᓇᐃᖅᓯᓯᒪᔪᑦ ᐃᑲᔪᕈᒪᓪᓗᑎᒃ ᓴᐳᔾᔨᒍᒪᓪᓗᒍ ᐊᒻᒪᓗ ᖃᑭᓯᒪᑎᑕᐅᓗᓂ ᐃᓄᒃᑎᑐᑦ ᐅᖃᐅᓯᐊ ᐊᑐᕐᓗᒋᑦ ᐱᓕᕆᐊᒃᓴᑦ ᐊᒻᒪᓗ ᐅᔾᔨᕈᓱᓕᖅᑎᑦᓯᓂᕐᒥᒃ. ᐃᓄᒃᑎᑐᑦ ᐊᒃᑐᐊᖓᓪᓚᕆᖕᒪᑦ ᐃᓕᖅᑯᓯᕐᒧᑦ ᐱᔭᐅᔪᒪᔪᓄᓪᓗ. ᐃᓄᒃᑎᑐᑦ ᐅᖃᐅᓯᖅ ᐅᖃᐅᓯᕆᔭᐅᓪᓗᐊᑕᖅᑐᑦ ᕿᑭᖅᑕᓂ ᓄᓇᓕᖕᓂᑦ ᐊᒻᒪᓗ ᐃᓕᖅᑯᓯᕐᒥ ᐅᐱᒍᓲᑎᒋᔭᐅᓪᓗᓂ, ᓴᙱᓕᖅᑎᑦᓯᓪᓗᓂ ᐃᓄᐃᑦ ᑭᓇᐅᓂᖏᓐᓂᒃ ᐊᒻᒪᓗ ᐱᕕᒃᓴᖃᖅᑎᑦᓯᔪᓐᓇᖅᖢᓂ ᐃᓄᖕᓄᑦ ᓯᕗᓕᖅᑎᐅᔪᒪᔪᓂᑦ ᓇᐅᒃᑯᑐᐃᓐᓇᖅ ᐃᖅᑲᓇᐃᔮᖑᔪᓂᒃ ᐊᒻᒪᓗ ᐊᐅᓚᑦᑎᓂᕐᒧᑦ.
70ᐳᓴᓐᑎᑦ ᕿᑭᖅᑕᓂ ᐅᓄᕐᓂᖏᑦ ᐅᖃᓕᒪᔪᑦ ᐃᓄᒃᑎᑐᑦ, 60 ᐳᓴᓐᑎᓐᓇᐃᑦ ᐊᖏᕐᕋᒥᒃ ᐃᓄᒃᑎᑑᖅᑐᑦ ᑭᓯᐊᓂ ᓈᓴᐅᑎᖓ ᑲᑕᓚᐅᖅᑐᑦ 10 ᐳᓴᓐᑎᒧᑦ. ᑕᐃᒪᐃᖏᓐᓇᖅᐸᑦ ᓇᓚᐅᑦᑖᖅᑕᐅᓯᒪᔪᑦ 2050ᑎᐅᓕᖅᐸᑦ, ᐃᓄᒃᑎᑐᑦ ᐅᖃᐅᓯᐊ ᐊᖏᕐᕋᓂ ᐅᖃᐅᓯᕆᔭᐅᓂᐊᖅᑐᖅ 10 ᐳᓴᓐᑏᓐᓇᕐᓄᑦ ᐃᓄᖕᓄᑦ ᓄᓇᕗᒥᐅᓄᑦ.
ᓄᓇᖃᖅᑐᑐᖃᐃᑦ ᐅᖃᐅᓯᖏᑦ ᔭᒐᑉᐸᓪᓕᐊᔪᑦ. ᐊᒥᓱᑦ ᓄᓇᖃᖅᑐᑐᖃᐃᑦ ᐅᖃᐅᓯᖏᑦ ᐊᑐᖅᑕᐅᓗᐊᕈᓐᓃᖅᑐᑦ ᐱᔾᔪᑎᒋᓪᓗᒍ ᖃᓪᓗᓈᙳᖅᓴᕋᓱᒃᑎᓪᓗᒋᑦ ᒐᕙᒪᒃᑯᑦ ᐊᑐᐊᒐᖏᑦ.
ᕿᑭᖅᑕᓃᒃᑯᑦ ᐱᔾᔪᑎᓂᒃ ᐱᓕᕆᐊᒃᓴᓂᓪᓗ ᐱᑕᖃᕐᒪᑕ ᓴᐳᔾᔨᓂᐊᖅᑐᓂᒃ ᖃᑭᐅᒪᑎᑦᓯᓂᐊᖅᑐᓂᓪᓗ ᐃᓄᒃᑎᑑᒻᒥ ᐃᖃᓯᐅᑎᓗᒋᑦ ᐅᑯᐊ:
ᐃᒡᓗᓕᕆᓂᖅ
ᐊᑐᖅᖢᒍ ᐱᕕᒃᓴᓄᑦ ᑮᓇᐅᔭᐃᑦ, ᕿᑭᖅᑕᓃᒃᑯᑦ ᐅᐱᒍᓱᒃᖢᑎᒃ ᐃᑲᔪᖃᑕᐅᔪᑦ ᐅᖂᑕᖅ ᐊᖑᑎᓄᑦ ᓯᓂᒃᑕᕐᕕᒃᓴᖓᓄᑦ ᐃᖃᓗᓐᓂ. ᕿᑭᖅᑕᓃᒃᑯᑦ ᓇᓗᓇᐃᖅᓯᓯᒪᔪᑦ ᐃᑲᔪᖅᑐᒍᒪᖕᒪᑕ ᑎᒥᐅᔪᓂᒃ ᐃᒡᓗᑭᒃᓴᕐᓂᖅ ᐃᑯᓪᓚᓕᖁᓪᓗᒍ.
ᓄᓇᕗᒥ ᐱᖁᑎᖏᑦ ᐋᖅᑭᒃᓱᖅᑕᐅᔭᕆᐊᓖᑦ ᐊᒻᒪᓗ ᐅᐃᒍᒋᐊᖅᑕᐅᓗᑎᒃ ᐱᔪᓐᓇᕐᓂᖃᑦᓯᐊᕈᓐᓇᕐᓂᐊᕐᒪᑕ ᐃᓄᐃᑦ ᐅᓄᕐᓂᕆᔭᖏᑦ ᐅᓄᖅᓯᕙᓪᓕᐊᑎᓪᓗᒋᑦ. ᐃᒡᓗᑭᒃᓴᐃᓐᓇᖅᑐᑦ ᓄᓇᕗᑦ ᑕᐃᒪᙵᓂᑦ ᓄᓇᕗᙳᓚᐅᕋᒥ ᐊᒻᒪ ᐱᕙᓪᓕᐊᑐᐃᓐᓇᖅᖢᓂ. ᑐᐊᕕᐊᖑᒋᐊᖃᖅᖢᑎᒃ ᓴᓇᐅᔭᓗᑎᒃ 3,500 ᓗᐊᓂᒃ ᐃᒡᓗᓂ, ᑮᓇᐅᔭᐃᑦ ᐊᑐᐃᓐᓇᕈᕈᓐᓇᖅᑐᑦ ᑭᓯᐊᓂ ᑲᓇᑕᒥ ᑐᐊᕕᕐᓇᖅᑐᒃᑯᑦ ᓯᕗᓪᓕᐅᑎᔭᐅᔪᒪᔪᓂᒃ ᐱᓕᕆᐊᖑᓗᑎᒃ.
ᓅᑕᐅᑎᓪᓗᒋᑦ ᐊᒻᒪᓗ ᖃᓪᓗᓈᙳᖅᑎᑕᐅᓕᖅᑎᓪᓗᒋᑦ 1950ᓂᑦ 1975ᓄᑦ ᑖᒃᑯᐊ ᒐᕙᒪᑐᖃᒃᑯᑦ ᑐᙵᕕᓕᐅᓚᐅᖅᓯᒪᔪᑦ ᐃᒡᓗᑭᒃᓴᓕᓛᕐᓂᕐᒥᒃ ᐊᑐᖅᑕᐅᓕᖅᑐᒥᒃ ᐅᓪᓗᒥ. ᑖᒃᑯᐊ ᑐᙵᕖᑦ ᐱᕈᖅᓯᒪᔪᖅ ᑮᓇᐅᔭᖃᑦᑎᐊᖅᑎᑕᐅᖏᓐᓂᖏᓐᓄᑦ ᐊᒻᒪᓗ ᐋᖅᑭᐅᒪᑎᑕᐅᓯᒪᙱᓗᐊᕐᓂᖏᓐᓄᑦ. ᓴᐃᒻᒪᖃᑎᒌᒃᐸᓪᓕᐊᓂᖅ ᐱᓕᕆᐊᖑᔭᕆᐊᓕᒃ ᑖᒃᑯᐊ ᑕᒻᒪᕈᑎᒋᔭᐅᓚᐅᖅᑐᑦ ᐋᖅᑭᒃᑕᐅᕙᓪᓕᐊᓗᑎᒃ ᓯᕗᓂᒃᓴᖃᑦᑎᐊᕈᓐᓇᖁᓪᓗᒋᑦ. ᐱᖁᑎᑦ ᐃᑲᔪᕐᓂᐊᖅᑐᓂᒃ ᐃᓄᐃᑦ ᐊᑐᕆᐊᖃᖅᑕᖏᓐᓂᒃ ᓱᕐᓗ ᐃᒡᓗᖃᕐᓂᖅ, ᐊᑦᑕᕐᓇᖅᑐᒦᑦᑕᐃᓕᓂᖅ ᐊᒻᒪᓗ ᓴᐳᔾᔭᐅᓯᒪᒋᐊᖃᕐᓂᖅ ᐱᒻᒪᕆᐅᔪᑦ ᐊᒻᒪᓗ ᐃᒡᓗᓕᐅᖅᑐᖃᕆᐊᖃᕐᓂᐊᕐᒪᑦ ᒪᑭᒪᔾᔪᑎᒋᔭᐅᓂᐊᖅᑐᓂᒃ ᐊᒻᒪ ᐱᕈᕈᑎᒋᔭᐅᓗᓂ ᓄᓇᕗᒥ.
ᐃᒡᓗᑭᒃᓴᕐᓂᖅ ᑐᓗᖅᑕᕈᑎᓪᓚᕆᐅᖕᒪᑦ ᓴᙱᓂᖅᑖᕈᓐᓇᖅᓯᓂᖏᓐᓄᑦ ᐃᓄᐃᑦ ᐊᒻᒪᓗ ᐱᕙᓪᓕᐊᓂᕐᒧᑦ ᐃᓅᓯᕐᒧᓪᓗ ᐱᕈᕐᓂᕐᒧᑦ ᓄᖅᑲᖓᔾᔪᑎᒋᔭᐅᓪᓗᓂ ᓄᓇᕗᒥ. 50 ᐅᖓᑖᓄᑦ ᐃᓄᐃᑦ ᐃᒡᓗᓕᕆᔨᒃᑯᑦ ᐃᒡᓗᖏᓐᓃᑦᑐᑦ ᐊᒻᒪᓗ ᐃᓱᒪᒋᓗᒋᑦ ᓄᓇᓖᑦ ᓇᓪᓕᖓ 75ᐳᓴᓐᑎᐅᔪᑦ ᐃᒡᓗᓕᕆᔨᒃᑯᑦ ᐃᒡᓗᖏᓐᓃᑦᑐᑦ ᓂᓐᓂᐅᓪᓚᕆᒃᑐᑦ.
ᕿᑭᖅᑕᓃᒃᑯᑦ ᑭᒡᒐᖅᑐᐃᕙᒃᑐᑦ ᕿᑭᖅᑕᓂ ᐃᓄᖕᓂ ᑮᓇᐅᔭᖃᖁᔨᓪᓗᑎᒃ ᐃᒡᓗᓕᕆᓂᕐᒧᑦ.
ᑐᑭᓯᒃᑲᓐᓂᕈᐊᕈᕕᑦ:
ᐱᖁᑎᕐᔪᐊᑦ
ᐱᖁᑎᕐᔪᐊᓂ ᐊᒥᒐᖅᓯᔪᑦ ᓄᓇᕗᒥ. ᑖᒃᑯᐊ ᐱᑕᖃᙱᓈᕐᓂᐅᔪᑦ ᐱᖁᑎᕐᔪᐊᑦ ᐊᔾᔨᒌᙱᑦᑐᓂᒃ ᑐᕌᖓᔪᑦ ᓱᕐᓗ ᐃᒪᑦᑎᐊᕙᓂ ᐊᒻᒪᓗ ᑭᓈᓗᖃᕐᕕᓂ, ᑐᓴᐅᒪᖃᑦᑕᐅᑎᔾᔪᑎᓂ, ᐃᖏᕐᕋᔪᓕᕆᓂᖅ ᐊᒻᒪᓗ ᐃᓕᖅᑯᓯᓕᕆᓂᕐᒧᑦ ᐱᖁᑎᓂ
ᐱᖁᑎᕐᔪᐊᑦ ᑐᙵᕕᓪᓗᐊᑕᕆᔭᐅᖕᒪᑕ ᐱᕙᓪᓕᐊᓂᕐᒧᑦ ᐱᓕᕆᐊᒃᓴᐅᓂᐊᖅᑐᓂᒃ. ᓄᓇᕗᑦ ᐸᕐᓇᐅᑎᖃᕆᐊᖃᖅᑐᖅ ᑐᑭᒧᐊᒍᑎᒃᓴᓂᓗ ᐊᑯᓂᐅᓂᐊᖅᑐᒧᑦ ᑮᓇᐅᔭᖃᖅᑎᑕᐅᓗᑎᒃ ᐱᖁᑎᕐᔪᐊᓂᒃ ᐱᕈᕈᑎᒋᔭᐅᔪᓐᓇᕐᓂᐊᖅᑐᓄᑦ ᐱᕙᓪᓕᐊᔾᔪᑎᒃᓴᓂ ᐊᒻᒪᓗ ᐃᓕᖅᑯᓯᕐᒥᒃ ᒪᑭᒪᑎᑦᓯᓂᕐᒥᒃ ᐃᑲᔪᖅᑕᐅᑦᓯᐊᖅᐸᑕ ᓄᓇᕗᑦ.
ᕿᑭᖅᑕᓃᒃᑯᑦ ᐊᔭᐅᖅᑐᐃᕙᒃᑐᑦ ᐊᑐᐊᒐᓕᐅᖁᔨᖃᑦᑕᖅᑐᑦ, ᐱᓕᕆᐊᒃᓴᓂ ᓴᖅᑭᑎᑦᓯᖁᔨᕙᒃᑐᑦ ᐊᒻᒪᓗ ᑮᓇᐅᔭᖃᖁᔨᔪᑦ ᑕᒪᓐᓇ ᐱᑕᖃᙱᓐᓈᕐᓂᐅᔪᑦ ᐋᖅᑭᒋᐊᖅᑕᐅᖁᓪᓗᒍ ᐱᕙᓪᓕᐊᔾᔪᑎᒃᓴᓂ ᓴᖅᑭᑎᑦᓯᔪᓐᓇᖁᓪᓗᒋᑦ ᐃᓄᖕᓄᑦ ᓄᓇᖁᑎᑦᑎᓐᓄᑦ ᐊᒻᒪ ᓄᓇᕗᓕᒫᒧᑦ.
ᑐᑭᓯᒃᑲᓐᓂᕈᐊᕈᕕᑦ:
ᕿᑭᖅᑕᓃᒃᑯᑦ ᑭᐅᔾᔪᑎᖏᑦ “ᓴᙱᔫᓂᖅ ᑲᑐᔾᔨᓂᒃᑯᑦ: ᐅᑭᐅᖅᑕᖅᑐᒧᑦ ᐊᑐᐊᒐᐅᑉ ᐋᖅᑭᒃᓱᖅᓯᒪᓂᕆᔭᖓᑦ ᑲᓇᑕᒥ.”
