ᒥᕐᖑᐃᖅᓯᕝᕖᑦ ᐊᒻᒪ ᓴᐳᔾᔨᕖᓪᓗ
ᑕᓪᓗᕈᑎᐅᑉ ᐃᒪᖓ ᑲᓇᑕᒥ ᐃᒫᓂ ᓴᐳᔾᔨᕕᒻᒧᑦ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᖃᑎᒌᒍᑏᑦ:
ᑲᓇᑕᒥ ᐊᖏᓂᕐᐹᖑᓪᓗᓂ ᐃᒪᖅ ᓴᐳᔾᔨᕕᐅᔪᖅ
ᑕᓪᓗᕈᑎᐅᑉ ᐃᒪᖓ ᑲᓇᑕᒥ ᐃᒫᓂ ᓴᐳᔾᔨᕕᒃ ᐃᓕᓴᕆᔭᐅᓯᒪᓪᓗᓂ ᐱᙳᖅᑎᑕᐅᔪᔪᖅ ᐋᒡᒌᓯ 2019ᖑᑎᓪᓗᒍ ᐊᑎᓕᐅᖅᑕᐅᑎᓪᓗᒋᑦ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᖃᑎᒌᒍᑏᑦ (ᐊᖏᕈᑏᑦ) ᑖᒃᑯᓇᙵᑦ ᕿᑭᖅᑕᓂᒃᑯᓐᓂᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᓐᓂᑦ
ᑕᒫᓂ, 108,000 Km2, ᖃᓂᒋᔭᖓᓂ ᐊᖏᓂᖃᖅᑐᓂ ᑖᒃᑯᐊᑎᑐᑦ ᓅᕙ ᓯᑰᓴ ᐊᒻᒪᓗ ᓂᐅ ᕗᕋᓱᐃᒃ ᑲᑎᒻᒪᓗᒋᒃ, ᑲᓇᑕᒥ ᐊᖏᓂᕐᐹᖑᓪᓗᓂ ᐃᒪᕕᖓ ᓴᐳᔾᔨᕕᐅᔪᖅ. ᖃᐅᔨᒪᔭᐅᔾᔪᑎᓕᒃ ᐃᒫᒃ ᐅᑭᐅᖅᑕᖅᑐᒥ ᓯᕕᑐᔪᐊᓘᓪᓗᓂ ᒪᓂᕋᐅᓂᖓ ᐆᒪᔪᓄᑦ ᓇᓪᓕᐊᓄᕋᕐᕕᐅᖃᑦᑕᕐᖓᑦ, ᑕᓪᓗᕈᑎᐅᑉ ᐃᒪᖓ ᐃᓅᕕᐅᖃᑦᑕᕐᓯᒪᕗᖅ ᐊᒻᒪᓗ ᓇᔪᒐᐅᖃᑦᑕᕐᓯᒪᕗᖅ ᐃᓘᓐᓇᓕᒫᑦᑎᐊᐸᓗᖏᓐᓄᑦ ᐆᒪᔪᓄᑦ ᐅᑭᐅᖅᑕᖅᑑᑉ ᑲᓇᓐᓇᖓᓃᑦᑐᓄᑦ.
ᑕᓪᓗᕈᑎᐅᑉ ᐃᒪᖓ ᐊᓐᓇᐅᒪᑎᑦᑎᓯᒪᔪᖅ ᐃᓄᓐᓂᑦ ᑕᐃᒪᙵᓂᑐᖄᓗᒃ. ᑕᖃᕐᔪᐊᖑᕗᖅ ᑲᓲᒪᑎᑦᑎᔪᖅ ᓄᓇᓕᓐᓂᑦ ᐊᒻᒪᓗ ᐊᐅᓪᓚᕐᓯᒪᑎᑦᑎᒍᓐᓇᐸᑦᑐᓂ ᓇᒧᑐᐃᓐᓇᖅ ᖁᑦᑎᑦᑐᒥ. ᐃᒃᐱᐊᕐᔪᒃ, ᑲᖏᖅᑐᒑᐱᒃ, ᐊᐅᓱᐃᑦᑐᖅ, ᒥᑦᑎᒪᑕᓕᒃ ᐊᒻᒪᓗ ᖃᐅᓱᐃᑦᑐᖅ ᓄᓇᓖᑦ ᑖᒃᑯᐊ ᖃᓂᒋᔭᓖᑦ ᑕᓪᓗᕈᑎᐅᑉ ᐃᒪᖓᓂ.
ᐋᖅᑭᑦᑕᐅᑎᓪᓗᒋᑦ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᖃᑎᒌᒍᑏᑦ ᕿᑭᖅᑕᓂᒃᑯᑦ ᖃᐅᔨᓕᔪᔪᑦ ᐃᓱᒪᒋᓯᒪᔭᖓᓐᓂᒃ ᐃᓄᐃᑦ ᓯᕗᓕᖅᑏᑦ ᓴᐳᑎᔭᐅᖁᔨᓯᒪᔪᑦ ᑕᒪᔅᓱᒥᖓ ᐃᒪᕕᒻᒥᑦ 1960ᖏᓐᓂ ᐱᒋᐊᕐᓯᒪᓪᓗᑎᒃ ᐱᕙᓪᓕᐊᑐᐃᓐᓇᑎᓪᓗᒍ ᐅᖅᓱᐊᓗᓐᓂᐊᕐᓂᖅ ᒑᓯᔅᓴᓂᐊᕐᓂᓪᓗ.
ᕿᑭᖅᑕᓂᒃᑯᑦ ᐊᑐᖅᑎᑦᑎᔪᔪᑦ ᒐᕙᒪᒃᑯᓃᑦᑐᓕᒫᓄᑦ ᐱᓇᓱᐊᕈᑎᖃᕐᓂᕐᒥᒃ ᐋᔩᕋᕈᑎᖃᖅᑎᓪᓗᒋᑦ ᑕᓪᓗᕈᑎᐅᑉ ᐃᒪᖓᓄᑦ ᐊᖏᖃᑎᒌᒍᑎᓂᑦ. ᑖᓐᓇ ᐱᓇᓱᐊᕈᑕᐅᔪᔪᖅ ᐋᖅᑭᔾᔪᑕᐅᒃᑲᓐᓂᔪᔪᖅ ᐊᖏᖃᑎᒌᒍᑎᐅᒃᑲᓂᕐᓂᐊᖅᑐᓂᑦ ᐊᓯᖏᓐᓄᑦ ᒐᕙᒪᑐᖃᒃᑯᓐᓄᑦ ᐊᓪᓚᕝᕕᐅᔪᓄᑦ ᐱᕈᕐᐸᓪᓕᐊᑎᑦᑎᖁᓪᓗᒋᑦ ᐊᐅᓚᔾᔪᑎᔅᓴᓂᑦ ᐱᖁᑎᕐᔪᐊᓂᑦ ᓲᕐᓗ ᒪᑯᓂᖓ ᐅᒥᐊᕐᓄᑦ ᑐᓚᑦᑕᕕᔅᓴᐃᑦ ᐊᒻᒪᓗ ᓂᕿᓕᕆᕕᔅᓴᐃᑦ.
ᑲᔪᓯᑎᑕᐅᓯᒪᓂᖏᑦ ᑖᒃᑯᐊ ᐊᖏᖃᑎᒌᒍᑏᑦ ᓇᓗᓇᐃᒃᑯᑕᐅᓂᐊᕐᒥᔪᑦ ᖃᓄᖅ ᑲᔪᓯᑎᑦᑎᒍᓐᓇᕐᒪᖔᑕ ᐃᓄᐃᓪᓗ ᒐᕙᒪᑐᖃᒃᑯᓪᓗ ᐃᖅᑲᓇᐃᔭᖃᑎᒌᑎᓪᓗᖏᑦ. ᑕᒪᒃᑯᐊ ᐊᑐᖅᑕᐅᓚᐅᕐᓯᒪᙱᑦᑐᑦ ᐊᖏᖃᑎᒌᒍᑏᑦ ᖃᐅᔨᒪᒍᑕᐅᓂᐊᕐᒥᔪᑦ ᐃᓄᐃᑦ ᐊᐅᓚᑦᑎᓂᖏᓐᓂᒃ ᓴᐳᔾᔨᕕᓐᓂᑦ, ᐃᖅᑲᓇᐃᔮᔅᓴᖃᕈᑕᐅᓗᑎᒃ ᐃᓄᓐᓄᑦ ᐊᕙᑎᒥᒃ ᓇᐅᑦᑎᕐᓱᖅᑎᐅᓗᑎᒃ ᐊᒻᒪᓗ ᑮᓇᐅᔭᖃᖅᑎᑕᐅᓂᖏᓐᓂᒃ ᑲᒪᔾᔪᑎᔅᓴᓂᑦ ᐊᐅᓚᔾᔪᑎᔅᓴᓂᑦ ᐱᖁᑎᕐᔪᐊᕐᓂᑦ ᐊᑭᓕᔅᓴᓄᑦ ᖁᑦᑎᑦᑐᒥ.
ᑕᐃᔭᐅᔾᔪᓯᖓ ᑕᓪᓗᕈᑎᐅᑉ ᐃᒪᖓ ᐱᔾᔪᑎᖃᕐᖓᑦ ᐃᓄᐃᑦ ᐱᖅᑯᓯᖏᓐᓂᑦ ᐊᒻᒪᓗ ᓄᓇᖓᓐᓂᑦ. ᐃᓄᐃᑦ ᐅᑉᐱᕆᔭᖃᕐᓯᒪᒻᒪᑕ ᑕᓪᓗᕈᑎ ᑕᐅᑦᑐᖃᖅᑑᔮᕐᓂᖓᓂᒃ ᑮᓇᒃᑯᑦ ᑐᓐᓂᐅᓲᓂᑦ ᐊᓪᓕᕈᒃᑯᑦ. ᑕᓪᓗᕈᑦ ᐃᓄᒃᑎᑐᑦ ᑕᐃᔭᐅᔾᔪᓯᕆᒻᒪᒍ ᑕᓪᓗᕈᑎᐅᑉ. ᐃᒪᖓ ᐃᒫᒃ ᑐᑭᓕᒃ ᑕᒪᓐᓇ ᐃᒪᖅ ᐊᕙᑖᓃᑦᑐᖅ.
ᑎᑭᓯᒃᑲᓐᓂᕈᒪᒍᔅᓯ:
ᑕᓪᓗᕈᑎᐅᑉ ᐃᒪᖓᓂ ᑲᓇᑕᒥ ᐃᒫᓂ ᓴᐳᔾᔨᕕᒃ−ᐊᖏᖃᑎᒌᒍᑏᑦ−2019
ᐱᒻᒪᕆᐅᓂᖏᑦ ᑕᓪᓗᕈᑎᐅᑉ ᐃᒪᖓᓄᑦ ᑐᕙᐃᔪᐃᑦᑐᒧᓪᓗ ᐊᖏᖃᑎᒌᒍᑏᑦ−ᕿᑭᖅᑕᓂᒃᑯᑦ
ᐃᒃᐱᐊᕐᔪᖕᒥ ᓇᐅᑦᑎᖅᓱᖅᑏ 2018-2019 ᐊᕐᕌᒍᓕᒫᕐᓯᐅᑏᑦ ᐅᓂᒃᑳᑦ
ᑐᕙᐃᔪᐃᑦᑐᖅ ᐃᒫᓂ ᓴᐳᔾᔨᕕᒃ: ᓴᐳᔨᕕᒃ ᖁᑦᑎᑦᑑᑉ ᐃᒪᖓᓂ
ᑐᕙᐃᔪᐃᑦᑐᖅ, ᐃᒫᒃ ᑐᑭᓕᒃ “ᑐᕙᖓ ᐊᐅᓱᐃᑦᑐᖅ” ᐃᓄᒃᑎᑐᑦ, ᑕᒪᓐᓇ ᐊᕙᑎᖓ ᐱᒻᒪᕆᐅᓗᐊᙳᐊᖅᑐᖅ ᐱᔾᔪᑎᒋᓪᓗᒍ ᑕᒫᓃᖏᓐᓇᖅᑐᖅ ᐱᑐᖄᓗᒃ, ᐃᔾᔪᔪᐊᓗᒃ, ᓯᑯᑐᖄᓗᒃ. ᐆᒪᓂᓖᑦ ᑕᒫᓂᒥᐅᑕᐃᑦ ᐊᒥᓱᐊᓘᒻᒪᑕ ᖃᓄᐃᑦᑐᑐᐃᓐᓇᑦᑎᐊᖑᓪᓗᑎᓪᓗ ᐊᒻᒪᓗ ᐆᒪᑎᑦᑎᓪᓗᑎᒃ ᐆᒪᔪᕕᐅᓂᕐᓴᓂᑦ ᓲᕐᓗ ᐊᐃᕖᑦ ᐅᒡᔪᐃᓪᓗ. ᑕᒪᔅᓱᒪ ᐱᒻᒪᕆᐅᓂᖓ ᐅᑭᐅᖅᑕᖅᑑᑉ ᐊᕙᑖᓂ ᓂᕆᐅᒋᔭᐅᒻᒪᑦ ᐃᓱᒫᓗᓇᕐᓯᕙᓪᓕᐊᑐᐃᓐᓇᓂᐊᕐᓂᖓᓂᒃ ᓯᓚ ᐊᓯᔾᔨᐸᓪᓕᐊᖏᓐᓇᑎᓪᓗᒍ ᐊᐅᑦᑎᑦᑎᕙᓪᓕᐊᙳᓱᒻᒪᑦ ᑐᕙᖓᓂᒃ. ᓯᑯᑐᖄᓗᒃ ᐃᖏᕐᕋᕕᐅᖃᑦᑕᕈᓐᓇᕐᓯᒪᒻᒪᑦ ᐊᓯᕙᕐᕕᐅᖃᑦᑕᕈᓐᓇᕐᓯᒪᓪᓗᓂᓗ ᐃᓄᓐᓄᑦ ᑕᒫᓂ.
ᐋᒡᒌᓯ 1, 2019ᖑᑎᓪᓗᒍ ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓂᒃᑯᑦ) ᓇᓗᓇᐃᕐᓯᔪᔪᑦ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᖃᑎᒌᒍᑎᓂᑦ (ᐊᖏᕈᑏᑦ) ᐱᙳᖅᑎᑕᐅᓂᖓᓄᑦ ᑕᓪᓗᕈᑎᐅᑉ ᐃᒪᖓᓂ ᑲᓇᑕᒥ ᐃᒫᓂ ᓴᐳᔾᔨᕕᒃ. ᐊᖏᖃᑎᒌᒍᑏᑦ ᑎᑎᕋᕐᓯᒪᔪᖅᑕᖃᕐᖓᑕ ᓴᐳᔾᔨᕕᐅᑲᐃᓐᓇᓂᐊᕐᓂᖓᓂᒃ ᑐᕙᐃᔪᐃᑦᑐᕐᒥ ᐃᒫᓂ ᓴᐳᔾᔨᕕᒃ.
ᕿᑭᖅᑕᓂᒃᑯᑦ ᐃᑲᔪᖅᑎᒌᑦᑐᑎᒃ ᐱᓕᕆᖃᑎᓖᑦ ᓄᓇᕗᑦ ᒐᕙᒪᒃᑯᖏᓐᓂᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᓐᓂᑦ ᖃᐅᔨᓴᕐᓂᐊᕐᖓᑕ ᖃᐅᔨᓇᓱᓪᓗᑎᒃ ᐊᑐᕋᔅᓴᐅᒐᔭᖅᑐᓂᑦ ᓇᓖᕌᕋᔅᓴᓂᑦ ᐱᓇᓱᐊᕈᑎᖃᕐᓗᑎᒃ ᐃᓱᖃᙱᑦᑐᒧᑦ ᓴᐳᑎᔭᐅᓯᒪᐃᓐᓇᕈᓐᓇᖁᓪᓗᒍ ᑐᕙᐃᔪᐃᑦᑐᖅ.
ᑕᒪᕐᒥᒃ ᑲᑎᓯᒪᓪᓗᒋᒃ, ᑕᓪᓗᕈᑎᐅᑉ ᐃᒪᖓ ᐊᒻᒪᓗ ᑐᕙᐃᔪᐃᑦᑐᖅ ᐊᖏᓂᓕᒃ ᐅᖓᑖᓂ 427,000 ᑭᑉᐹᕆᑦᑐᓂᑦ ᑭᓛᒥᑐᓂᑦ ᐆᑦᑑᑎᑎᒍᑦ, ᑖᓐᓇ ᐊᖏᓂᕐᓴᒻᒪᕆᒃ ᓂᐅᕙᓐᓛᓐ ᐊᒻᒪᓗ ᓛᐸᑐᐊ ᓴᓂᐊᓂ. ᑖᒃᑯᐊ ᐊᖏᖃᑎᒌᒍᑏᑦ ᐱᔾᔪᑎᒋᓪᓗᒋᑦ, ᑕᒫᓂ 14 ᐳᓴᓐᑎᖏᑦ ᑲᓇᑕᒥ ᐃᒪᕕᖁᑎᖏᑦ ᓴᐳᑎᔭᐅᓂᖃᓕᖅᑯᑦ.
ᑎᑭᓯᒃᑲᓐᓂᕈᒪᒍᔅᓯ:
ᑕᓪᓗᕈᑎᐅᑉ ᐃᒪᖓᓂ ᑲᓇᑕᒥ ᐃᒫᓂ ᓴᐳᔾᔨᕕᒃ−ᐊᖏᖃᑎᒌᒍᑏᑦ−2019
