ᑐᔅᓯᕋᕐᓂᖅ ᐅᑭᐊᔅᓵᖅ/ᐅᑭᐅᖅ ᓄᓇᓕᓐᓂᑦ ᐊᐅᓚᔾᔭᐃᒋᐊᕐᓂᕐᒧᑦ ᐱᓕᕆᐊᕐᒥ ᑐᔅᓯᕋᐅᑎᓂᑦ
ᐃᖃᓗᐃᑦ, ᓄᓇᕗᑦ – ᐋᒡᒌᓯ 2, 2017 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᑲᑐᔾᔨᖃᑎᒌᖏᑦ) ᑐᔅᓯᕋᓕᕐᒥᔪᑦ ᐅᑭᐊᔅᓵᖑᓂᐊᖅᑐᒧᑦ ᐅᑭᐅᖑᓂᐊᖅᑐᒧᓪᓗ ᑐᔅᓯᕋᐅᑎᓂᑦ ᓄᓇᓕᖕᓂᑦ ᐊᐅᓚᔾᔭᐃᒋᐊᖅᑎᓄᑦ/ᓄᓇᓕᓐᓂᑦ ᐊᐅᓚᔾᔭᐃᒋᐊᕐᓂᕐᒧᑦ ᐱᓕᕆᐊᕐᒥ (CIP).
ᓄᓇᓕᓐᓂᑦ ᐊᐅᓚᔾᔭᐃᒋᐊᕐᓂᕐᒧᑦ ᐱᓕᕆᐊᕐᒥ ᑮᓇᐅᔭᓂᑦ ᐃᑲᔫᑎᖃᓲᖑᒻᒪᑕ ᐱᓕᕆᐊᓄᑦ ᑐᕌᖓᔪᓂᑦ ᓄᓇᓕᓐᓂᑦ ᐱᓕᕆᔪᓐᓇᕐᓯᑎᑦᑎᕙᓪᓕᐊᓂᕐᒥᒃ, ᐊᑐᖅᑎᑦᑎᒋᐊᒃᑲᓐᓂᕐᓂᕐᒧᑦ ᐃᓄᐃᑦ ᐃᓕᖅᑯᓯᖓᓐᓂᒃ, ᒪᑭᒪᓇᓱᐊᕈᑕᐅᕙᑦᑐᓂᑦ ᐱᕙᓪᓕᐊᑎᑦᑎᓂᕐᒥᒃ, ᐃᓅᓯᓕᕆᓂᕐᒥᒃ ᐱᕙᓪᓕᐊᑎᑦᑎᓂᕐᒥᒃ, ᐋᓐᓂᐊᖅᑐᓕᕆᓂᕐᒥᒃ ᐊᒻᒪᓗ ᒪᑭᒪᓂᕐᒥᒃ, ᐊᒻᒪᓗ ᓴᐳᔾᔨᓂᕐᒥᒃ ᐊᕙᑎᑦᑎᓐᓂᒃ.
“ᓄᓇᓕᓐᓂᑦ ᐊᐅᓚᔾᔭᐃᒋᐊᕐᓂᕐᒧᑦ ᐱᓕᕆᐊᖅ ᐃᑲᔫᑎᒋᕙᑦᑕᕗᑦ ᐊᖅᑯᑕᐅᓂᐊᖅᑐᒥᒃ ᐱᕙᓪᓕᐊᑎᑦᑎᓯᒪᒻᒪᑦ ᕿᑭᖅᑕᓂ ᓄᓇᓕᓐᓄᑦ ᐱᔨᑦᑎᕋᐅᑎᖃᕐᐸᑦᑐᑎᒃ ᐊᒥᓱᓂᑦ ᓄᑖᓂᑦ ᐃᓅᓱᑦᑐᓄᑦ, ᐃᓕᖅᑯᓯᑦᑎᓐᓂᒃ ᐊᒻᒪᓗ ᐱᙳᐊᖅᑐᓕᕆᓂᕐᒥᒃ ᐱᓕᕆᑎᑦᑎᒍᑕᐅᕙᑦᑐᓂᑦ ᒪᑭᑕᒋᐊᒃᑲᓐᓂᕈᑕᐅᕙᑦᑐᓂᑦ ᓄᓇᓕᖁᑎᑦᑎᓐᓂ,” ᐅᖃᖅᑐᖅ ᑲᑐᔾᔨᖃᑎᒌᒃᑯᑦ ᐊᖏᔪᖅᑳᖓᑦ ᐸᐅᓗᓯ ᐊᕿᐊᕈᖅ.
ᐊᕐᕌᒍᑕᒫᑦ ᑲᑐᔾᔨᖃᑎᒌᒃᑯᑦ ᓄᓇᓕᓐᓂᑦ ᐊᐅᓚᔾᔭᐃᒋᐊᕐᓂᕐᒧᑦ ᐱᓕᕆᐊᖓᑦ ᐃᑲᔫᑎᖃᕐᐸᒻᒪᑦ ᐊᒥᓱᓄᑦ ᐊᖑᓇᓱᖃᑦᑕᓂᕐᒧᑦ, ᐃᖃᓗᒐᓱᖃᑦᑕᓂᕐᒧᑦ, ᐱᙳᐊᖅᑐᓕᕆᓂᕐᒧᑦ, ᖁᕕᐊᒋᔭᕐᓱᓂᕐᒧᑦ ᐊᒻᒪᓗ ᓴᓇᙳᐊᓂᕐᒧᑦ ᐱᓕᕆᑎᑦᑎᒍᑕᐅᕙᑦᑐᓂᑦ ᕿᑭᖅᑕᓂ ᓄᓇᓕᓕᒫᓂᑦ ᐃᓚᒋᔭᐅᓪᓗᓂ ᑕᑯᕋᓐᓈᑎᑦᑎᓂᐅᕙᑦᑐᖅ ᓲᕐᓗ ᐸᓐᓂᖅᑑᒥ ᓂᔾᔭᐅᓯᔭᕐᓂᖅ.
“ᐃᑲᔪᖅᑕᐅᖃᑦᑕᕐᓂᖏᓐᓄᑦ ᑲᑐᔾᔨᖃᑎᒌᒃᑯᓐᓂ ᓄᓇᓕᓐᓂᑦ ᐊᐅᓚᔾᔭᐃᒋᐊᕐᓂᕐᒧᑦ ᐱᓕᕆᐊᑎᒍᑦ ᑮᓇᐅᔭᓂᑦ, ᐱᙳᐊᖅᑐᓕᕆᓂᕐᒧᑦ ᒥᕐᖑᐃᓯᕐᕕᓕᕆᓂᕐᒧᓪᓗ ᑲᑐᔾᔨᖃᑎᒌᑦ ᓄᓇᕗᒥ (RPAN) ᐱᙳᐊᖅᑐᓕᕆᓂᕐᒧᑦ ᐊᐅᓪᓚᕐᓯᒪᑎᑦᑎᒍᓐᓇᕐᓯᒪᔪᑦ, ᐃᓕᓐᓂᐊᑎᑦᑎᓪᓗᑎᓪᓗ ᓯᕗᓕᕐᓯᓂᕐᒥᓪᓗ ᐱᕙᓪᓕᐊᑎᑦᑎᓯᒪᓪᓗᑎᒃ, ᐊᒻᒪᓗᑦᑕᐅᖅ ᐊᐅᔭᖅ ᐃᖅᑲᓇᐃᔭᕈᓐᓇᑎᑦᑎᓯᒪᓪᓗᑎᒃ ᐊᒥᓱᓂᑦ ᓱᕈᓯᕐᓂᑦ ᐃᓅᓱᑦᑐᓂᓪᓗ ᕿᑭᖅᑕᓂ ᓄᓇᓕᓐᓂᑦ ᐱᖓᓱᓂᑦ ᐊᕐᕌᒍᓂᑦ ᐊᓂᒍᖅᑐᓂᑦ,” ᐅᖃᖅᑐᖅ ᑲᑐᔾᔨᖃᑎᒌᖏᓐᓂ ᓄᓇᕗᒥ ᑐᑭᒧᐊᑦᑎᑦᑎᔨᖓᑦ ᑖᓐ ᑰᕆ.
ᓄᓇᓕᓐᓂᑦ ᐊᐅᓚᔾᔭᐃᒋᐊᕐᓂᕐᒧᑦ ᐱᓕᕆᐊᕐᒥ ᑮᓇᐅᔭᑦ ᐊᑐᖅᑐᔅᓴᑦ ᓂᖏᖅᑕᕈᑎᒋᓯᒪᔭᖏᓐᓂᒃ ᑮᓇᐅᔭᖃᕐᐸᑦᑐᑦ ᑖᒃᑯᓇᙵᑦ ᑲᑐᔾᔨᖃᑎᒌᒃᑯᑦ ᑎᒥᖁᑎᖏᓐᓂᒃ: ᕿᑭᖅᑖᓗᒃ ᑯᐊᐳᕇᓴᓐ ᐊᒻᒪᓗ ᓄᓇᓯ ᑯᐊᐳᕇᓴᓐ.
ᑲᑐᔾᔨᖃᑎᒌᒃᑯᑦ ᐃᓕᖅᑯᓯᓕᕆᓂᕐᒧᑦ ᐊᒻᒪᓗ ᓄᓇᓕᓐᓂᑦ ᐊᐅᓚᔾᔭᐃᒋᐊᕐᓂᕐᒧᑦ ᐱᓕᕆᐊᕐᒥ ᑲᑎᒪᔨᕋᓛᖏᑦ ᖃᐅᔨᓴᖃᑦᑕᓲᑦ ᐊᑐᓂᑦ ᑐᔅᓯᕋᐅᑕᐅᓯᒪᔪᓂᑦ. ᓯᕗᓪᓕᐅᔾᔨᖃᑦᑕᓲᑦ ᐱᓕᕆᐊᔅᓴᓂᑦ ᒪᑯᓂᖓ:
- ᓄᓇᓕᓐᓂᑦ ᐱᓕᕆᐊᖑᓂᐊᖅᑐᒥᒃ;
- ᓇᒻᒥᓂᖅ−ᐋᖅᑭᐅᒪᑎᑕᐅᒋᐊᖃᕋᔭᖅᑐᓂ ᐊᑐᕐᓂᖓᓂ, ᐅᕝᕙᓘᓐᓃᑦ ᐃᑲᔫᑎᖃᐃᓐᓇᕆᐊᖃᕋᔭᖅᑐᓂ ᓄᓇᓕᓐᓂᑦ ᐱᓕᕆᐊᖅ ᐱᔭᕇᕐᓯᒪᓕᕋᓗᐊᖅᑎᓪᓗᒍ ᐊᒻᒪᓗ ᑮᓇᐅᔭᐃᑦ ᓄᖑᓯᒪᓕᕋᓗᐊᖅᑎᓪᓗᒋᑦ;
- ᐱᒻᒪᕆᐊᓗᒻᒥᒃ ᐊᑦᑐᐃᓂᖃᕐᓂᐊᕐᓗᓂ ᑲᒪᔾᔪᑕᐅᓗᓂ ᐊᑲᐅᙱᓕᐅᕈᑕᐅᕙᑦᑐᓄᑦ ᐃᓄᓐᓄᑦ ᓄᓇᓕᓐᓂᑦ ᐅᕝᕙᓘᓐᓃᑦ ᕿᑭᖅᑕᓂ ᓄᓇᓕᓐᓂᑦ;
ᖃᓄᖅ ᐱᓇᓱᐊᕐᕕᔅᓴᐅᒻᒪᖔᖅ:
ᓄᓇᓖᑦ ᐊᒻᒪᓗ ᑲᑐᔾᔨᖃᑎᒌᑦ ᕿᑭᖅᑕᓂ ᓄᓇᓕᓐᓃᑦᑐᑦ ᑐᓂᓯᖃᑦᑕᕈᓐᓇᖅᑐᑦ ᑐᔅᓯᕋᐅᑎᖏᓐᓂᒃ ᓇᓗᓇᐃᕐᓯᓯᒪᓗᑎᒃ ᐱᓕᕆᐊᔅᓴᖓᑕ ᖃᓄᐃᓕᖓᓂᕆᓂᐊᖅᑕᖓᓂᒃ ᐃᓱᒪᔅᓴᕐᓯᐅᕈᑕᐅᒐᔭᕐᖓᑦ.
ᑐᔅᓯᕋᐅᑎᓂᑦ ᑎᑎᕋᕐᕕᔅᓴᓂᑦ ᐱᖃᑦᑕᕈᓐᓇᖅᑐᓯ ᓄᓇᔅᓯᓐᓂ ᑲᑐᔾᔨᖃᑎᒌᒃᑯᑦ ᑐᓴᐅᒪᑎᑦᑎᔨᖏᓐᓂ, ᐅᖄᓚᓗᓯ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ (1-800-667-2742/info@qia.ca), ᐅᕝᕙᓘᓐᓃᑦ ᑲᑐᔾᔨᖃᑎᒌᒃᑯᑦ ᖃᕋᓴᐅᔭᒃᑯᑦ ᐃᑭᐊᖅᑭᕕᖓᓐᓂ (qia.ca).
ᒪᑐᕕᔅᓴᓕᒃ ᑐᔅᓯᕋᐅᓯᐅᕐᓂᕐᒧᑦ ᐋᒡᒌᓯ 23, 2017.
2017/2018 ᓄᓇᓕᓐᓂᑦ ᐊᐅᓚᐃᔾᔭᒋᐊᕐᓂᕐᒧᑦ ᐱᓕᕆᐊᕐᒥ ᐃᑲᔫᓯᐊᕐᓯᒪᔪᑦ ᐅᓪᓗᒥᒧᑦ ᑎᑭᑦᑐᒍ
ᑐᑭᓯᒋᐊᒃᑲᓐᓂᕈᒪᒍᔅᓯ, ᑐᑭᓯᖏᐊᒃᑲᓂᕐᕕᔅᓴᖅ:
ᓰᒪ ᓴHᐊ ᓯᐅᕆHᐃ, ᐊᖏᔪᖅᑳᖅ ᑐᓴᐅᒪᖃᑦᑕᐅᑎᓂᕐᒧᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ
szerehi@qia.ca, (867) 975.8413, 1.800.667.2742
