ᐅᓪᓗᖓ ᓴᖅᑭᑕᐅᔪᖅ: ᕖᕝᕗᐊᓕ 11, 2019

ᖃᓄᐃᓕᐅᕐᓂᐊᕐᓂᖏᑦ: ᑐᒃᓯᕋᖅᑐᑦ ᑲᑎᒪᔨᐅᒍᒪᓇᔭᖅᑐᓂᒃ

ᖃᓄᐃᓕᐅᕐᓂᐊᕐᓂᖏᑦ: ᑐᒃᓯᕋᖅᑐᑦ ᑲᑎᒪᔨᐅᒍᒪᓇᔭᖅᑐᓂᒃ;

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᕿᓂᕐᒪᑕ ᐅᒻᒪᕆᒃᑐᓂ ᐱᓕᕆᑦᓯᐊᕈᓐᓇᖅᑐᓂᓗ ᐃᓄᖕᓂᑦ ᑲᑎᒪᔨᐅᓇᔭᖅᑐᓂᒃ ᑲᑎᒪᔨᐅᕝᕕᐅᔪᓂᑦ.  ᐃᓱᒪᒋᓂᐊᕈᕕᑦ, ᐱᓇᓱᖕᓂᐊᖅᑐᑦ ᐱᓕᕆᑦᑎᐊᕈᒪᓗᑎᒃ ᐊᒻᒪᓗ ᓇᓗᓇᐃᖅᓯᓯᒪᓗᑎᒃ ᐱᔪᒪᓂᖃᑦᑎᐊᕐᓗᓂ ᐱᔭᐅᔪᒪᔪᓄᑦ ᐃᓄᖕᓄᑦ ᕿᑭᖅᑕᓂ ᓄᓇᓕᖕᓂᑦ ᐊᒻᒪᓗ ᑐᑭᓯᐅᒪᓂᖃᑦᑎᐊᕐᓗᓂ ᓄᓇᕗᒥ ᐊᖏᕈᑎᐊᓂ ᑐᕌᖓᔪᓂᒃ ᐱᓕᕆᐊᒃᓴᕆᔭᐅᔪᓂᒃ ᐱᓕᕆᔾᔪᓯᕆᔭᐅᔪᓂᓗ ᐃᓂᒃᓴᓄᑦ.  

• ᑲᑭᕙᒃ ᑐᓐᓂᖅᑯᓯᐊᖏᓐᓂᒃ ᐊᒻᒪᓗ ᐊᑐᖅᑐᐊᒐᒃᓴᓂ ᐅᓐᓂᕐᓗᒃᓴᐅᑎᖃᕐᓂᕐᒧᑦ (3-ᓄᑦ ᐊᕐᕌᒍᓄᑦ)

ᑖᒃᑯᐊ ᑲᑎᒪᔨᕋᓛᑦ ᕿᒥᕐᕈᔨᒋᔭᐅᕙᑦᑐᑦ ᐅᓐᓂᕐᓗᒃᓴᐅᑎᒋᔭᐅᔪᓂᒃ ᐊᒡᒑᖅᑕᐅᓯᒪᔪᓂᒃ ᑮᓇᐅᔭᓂᒃ ᑐᒃᓯᕋᐅᑎᒋᔭᐅᔪᓄᑦ ᑲᑭᕙᒃᑯᑦ ᐊᔾᔨᒌᓐᖏᑦᑐᓄᑦ ᐱᓕᕆᐊᖏᓐᓄᑦ ᐱᔨᑦᓯᕋᕈᑎᖏᓐᓄᓪᓗ.  ᐱᓇᓱᒍᓐᓇᖅᑐᑎᑦ ᐃᖅᑲᓇᐃᔭᖅᑎᐅᓐᖏᒃᑯᕕᑦ ᑲᑭᕙᒃ ᑲᑐᔾᔨᖃᑎᒌᓐᓄᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓐᓄᑦ, ᐅᕝᕙᓘᓐᓃᑦ ᐊᓯᖏᓐᓂᑦ ᑲᑐᔾᔨᖃᑎᒌᓂᑦ ᑯᐊᐳᕇᓴᓂᓪᓘᓐᓃᑦ ᐊᐅᓚᑕᐅᔪᓂᒃ ᕿᑭᖅᑕᓃᒃᑯᓐᓄᑦ  .

• ᓄᓇᕗᒥ ᐊᕙᑎᓕᕆᓂᕐᒧᑦ ᑲᑎᒪᔨᖏᑦ (3−ᓄᑦ ᐊᕐᕌᒍᓄᑦ)

ᓄᓇᕗᒥ ᐊᕙᑎᓕᕆᓂᕐᒧᑦ ᑲᑎᒪᔨᖏᑦ (ᐊᕙᑎᓕᕆᔨᒃᑯᑦ) ᑎᒥᖁᑎᒋᔭᐅᔪᖅ ᐃᓄᖕᓄᑦ ᒐᕙᒪᐅᓪᓗᓂ ᓴᖅᑭᑎᑕᐅᓯᒪᔪᒥᒃ ᓄᓇᑖᕐᓂᕐᒧᑦ ᐊᖏᕈᑎᐊᒍᑦ ᖃᐅᔨᓴᖅᑎᒋᔭᐅᖃᑦᑕᖅᖢᑎᒃ ᐊᒃᑐᐃᒍᑕᐅᔪᓄᑦ ᑐᒃᓯᕌᖑᔪᓂᒃ ᐱᕙᓪᓕᐊᔾᔪᑎᒋᔭᐅᔪᒪᔪᓄᑦ ᓄᓇᕗᒥ ᐱᓕᕆᐊᖅ ᐊᖏᖅᑕᐅᓚᐅᓐᖏᑎᓪᓗᒍ. ᐊᑐᖅᖢᑎᒃ ᑕᐃᒪᐃᓐᓂᒃ ᐃᓄᐃᑦ ᖃᐅᔨᒪᔭᖏᓐᓂᒃ ᐊᒻᒪᓗ ᖃᓪᓗᓈᑦ ᖃᐅᔨᒪᔭᖏᓐᓂᒃ, ᑖᒃᑯᐊ ᐊᕙᑎᓕᕆᔨᒃᑯᑦ ᖃᐅᔨᓴᓲᖑᔪᑦ ᐊᕙᑎᒋᔭᐅᔪᒥᒃ ᐊᒻᒪᓗ ᐃᓅᓯᕐᓄᑦ−ᐱᕙᓪᓕᐊᓂᕐᒧᓪᓗ ᐊᒃᑐᐃᒍᑕᐅᑐᐃᓐᓇᕆᐊᖃᖅᑐᓄᑦ  ᑐᒃᓯᕋᐅᑎᒋᔭᐅᔪᒥᑦ ᐊᒻᒪᓗ ᐊᑐᓕᖁᔨᔪᒃᓴᓂᒃ ᓴᖅᑭᑎᑦᑎᔪᓐᓇᖅᑐᑦ ᐊᒻᒪᓗ ᑐᑭᑖᖅᑎᑦᑎᓗᑎᒃ ᓇᓪᓕᐊᖑᔪᖅ ᐱᓕᕆᐊᖑᔪᖅ ᑲᔪᓯᒍᓐᓇᕐᓂᐊᕐᒪᖔᑦ.. ᑖᒃᑯᐊ ᑲᑎᒪᔩᑦ ᐋᖅᑭᒃᓱᐃᒍᓐᓇᕐᒥᔪᑦ ᓇᐅᑦᓯᖅᑐᕐᓂᕐᒧᑦ ᐱᓕᕆᐊᒃᓴᓂ ᐱᓕᕆᐊᖑᔪᓄᑦ ᖃᐅᔨᓴᖅᑕᐅᓯᒪᔪᓄᑦ ᐊᖏᖅᑕᐅᓯᒪᔪᓄᓪᓗ ᑲᔪᓯᒍᓐᓇᕐᓂᖏᓐᓂᒃ.  

• ᓄᓇᕗᒥ ᑎᑎᒥᒍᑦ ᐊᔪᕈᑎᓕᖕᓄᑦ ᑲᑎᒪᔨᖏᑦ (ᓄᓇᕗᒥ ᒪᑭᓐᓇᓱᐊᖅᑏᑦ ᑲᑎᒪᔨᖏᑦ) (ᐊᑕᐅᓯᕐᒥ ᐊᕐᕌᒍᒥ)

ᑖᒃᑯᐊ ᓄᓇᕗᒥ ᑎᑎᒥᒍᑦ ᐊᔪᕈᑎᓕᖕᓄᑦ ᑲᑎᒪᔨᖏᑦ (ᓄᓇᕗᒥ ᒪᑭᓐᓇᓱᐊᖅᑏᑦ) ᖃᐅᔨᒪᑎᑦᑎᔨᐅᔪᑦ ᐅᔾᔨᖅᓱᖁᔨᓂᕐᒥᒃ, ᐱᕕᒃᓴᖃᖅᑎᑦᑎᓂᕐᒥᒃ, ᓂᕈᐊᖅᖠᕈᓐᓇᕐᓂᕐᒥᒃ ᐊᒻᒪᓗ ᐃᓚᐅᑎᑦᑎᓂᕐᒥᒃ ᓇᐅᒃᑯᑐᐃᓐᓇᐅᔪᒃᑯᑦ ᐃᓅᓯᕆᔭᐅᔪᓂᒃ ᓄᓇᕗᒥ ᑕᒪᐃᓐᓄᑦ ᐃᓄᓕᒫᓄᑦ ᑎᒥᒥᒍᑦ ᐊᔪᕈᑎᖃᖅᑐᓄᑦ, ᓇᖕᒥᓂᖅᓱᓕᕈᓐᓇᖅᓯᖁᓪᓗᒋᑦ ᐊᒻᒪᓗ ᓄᓇᓕᖕᒥᐅᑕᐅᖃᑦᑕᐅᑦᑎᐊᖁᓪᓗᒋᑦ.

• ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᖅᑐᕐᓂᕐᒧᑦ ᑲᑎᒪᔨᖏᑦ (ᓇᐅᑦᓯᖅᑐᖅᑏᑦ) (3-ᓄᑦ ᐊᕐᕌᒍᓄᑦ)

ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᖅᑐᖅᑏᑦ ᐱᓕᕆᐊᖃᖅᑐᑦ ᐱᐅᖅᓱᐊᕐᓂᕐᒥᒃ ᐱᕙᓪᓕᐊᑎᑦᑎᓂᕐᒥᒃ ᐊᒻᒪᓗ ᓴᐳᔾᔨᓂᕐᒥᒃ ᐃᓄᐃᑦ ᐃᓕᖅᑯᓯᐊᓂᒃ ᐱᖅᑯᓯᐊᓂᓗ ᐊᒻᒪᓗ ᑭᓇᐅᓂᖏᓐᓂᒃ ᓇᓗᓇᐃᔭᖅᓯᒪᑦᑎᐊᖅᑎᓪᓗᒍ ᓄᓇᕗᒥ ᐃᑦᑕᕐᓂᓴᖃᕐᕕᒋᔭᖏᓐᓂᑦ, ᐱᖁᑎᑐᖃᕆᔭᖏᓐᓂᒃ ᐊᒻᒪᓗ ᓄᓇᓂᒃ ᐊᑎᑐᖃᖅᑐᓂᒃ.

ᑖᒃᑯᐊ ᑲᑎᒪᔨᕋᓛᑦ ᑲᑎᒪᔨᒃᓴᖅᓯᐅᕐᒥᔪᑦ:

•     ᑲᑐᔾᔭᐅᓯᒪᔪᖅ ᒥᕐᖑᐃᖅᓯᕝᕕᖕᒥ ᐊᐅᓚᑦᑎᓂᕐᒥᒃ ᑲᑎᒪᔨᕋᓛᖏᑦ , ᐃᖃᓗᐃᑦ, ᖃᐅᒻᒫᕐᕕᒃ (ᐊᑕᐅᓯᕐᒧᑦ ᐊᕐᕌᒍᒧᑦ)

•     ᑲᑐᔾᐅᓯᒪᔪᖅ ᒥᕐᖑᐃᖅᓯᕝᕕᖕᒥᑦ ᐸᕐᓇᐃᔨᒃᑯᓐᓂ, ᓴᓂᑭᓗᐊᖅ (3−ᓄᑦ ᐊᕐᕌᒍᓄᑦ)

•     ᒥᕐᖑᐃᖅᓯᕝᕕᖕᒥ ᐸᕐᓇᐃᔨᒃᑯᓐᓂ,ᐊᐅᔪᐃᑦᑐᖅ (ᑭᓪᓕᖃᖅᑎᑕᐅᓐᖏᑦᑐᖅ)

ᕿᑭᖅᑕᓃᒃᑯᑦ ᓇᓗᓇᐃᖅᓯᒍᒪᕗᑦ ᐃᓘᓐᓇᖏᑦᑎᒍᑦ ᐃᓄᐃᑦ ᐃᓚᒋᔭᐅᑦᑎᐊᕐᓂᖏᓐᓄᑦ ᐊᑐᓕᖅᑎᑕᐅᕙᓪᓕᐊᑎᓪᓗᒍ ᓄᓇᕗᒥ ᐊᖏᕈᑎᐊ. ᑕᐃᒪᐃᑎᓪᓗᒍ, ᕿᑭᖅᑕᓃᒃᑯᑦ ᐊᑐᓕᖅᑎᑦᑎᓯᒪᔪᖅ ᒪᑐᐃᖓᑦᑎᐊᖅᑐᒥᒃ ᓵᓐᖓᔭᐅᕝᕕᖃᕈᓐᓇᕐᓂᐊᖅᑐᒥᓗ ᖃᓄᐃᓕᐅᕈᑎᐅᔪᓂᒃ ᐃᓱᒪᒋᔭᖃᕐᓂᐊᖅᑎᓪᓗᒋᑦ ᐱᔪᓐᓇᕐᓂᖃᑦᑎᐊᖅᑐᓂᒃ ᐱᓇᓱᒃᑐᓄᑦ ᑖᒃᑯᓂᖓ ᐃᓂᒃᓴᕆᔭᐅᔪᓂ.  ᖃᐅᔨᒪᓂᐊᖅᐳᓯ ᐱᕋᔭᒃᓯᒪᓐᖏᒃᑲᓗᐊᕐᒪᖔᖅᐱᑦ ᖃᐅᔨᓴᖅᑕᐅᔾᔪᑎᒥᒃ ᐱᔪᒪᔪᖃᑐᐃᓐᓇᕆᐊᖃᖅᑐᖅ ᑎᒃᑯᐊᖅᑕᐅᔪᒪᓂᐊᖅᑐᓄᑦ/ᓂᕈᐊᒐᒃᓴᓕᐅᖅᑕᐅᔪᒪᓂᐊᖅᑐᓄᓪᓗ.  

ᐊᑏ ᐱᓇᓱᖃᑕᐅᒍᒪᒍᕕᑦ ᐃᖅᑲᓇᐃᔮᕆᓯᒪᔭᑎᑦ ᓇᓕᖅᑲᑎᑦ ᐊᒻᒪᓗ ᑎᑎᕋᖅᓯᒪᔪᒥᒃ ᐱᖃᓯᐅᑎᓗᑎᑦ ᓱᖕᒪᑦ ᐱᓇᓱᖃᑕᐅᒍᒪᖕᒪᖔᖅᐲᑦ, ᐃᓄᒃᑎᑑᖅᓯᒪᔪᒥᒃ, ᖃᓪᓗᓈᑎᑑᖅᓯᒪᔪᒥᓪᓘᓐᓃᑦ, ᐱᔪᓐᓇᕐᓂᕆᔭᑎᑦ ᓇᓗᓇᐃᔭᖅᓯᒪᑦᑎᐊᕐᓗᑎᒃ ᓇᒃᓯᐅᔾᔨᓗᒋᑦ ᐅᕗᖓ:  

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ

ᑎᑎᖅᑲᒃᑯᕕᖓ 1340

ᐃᖃᓗᐃᑦ, ᓄᓇᕗᑦ X0A 0H0

ᐅᖄᓚᐅᑕ: (867) 975-8400

ᓱᑲᑦᑐᒃᑯᑦ: (867) 979-3238

ᐅᖄᓚᐅᑦ ᐊᑭᖃᓐᖏᑦᑐᖅ: 1-800-667-2742

ᐃᕐᖐᓐᓈᖅᑕᐅᑖ: nominations@qia.ca

ᑐᑭᓯᒃᑲᓐᓂᕈᒪᒍᕕᑦ ᑖᒃᑯᓂᖓ ᐱᕕᒃᓴᐅᔪᓂᒃ, ᖃᐅᔨᒋᐊᕐᕕᐅᔪᓐᓇᖅᑐᖅ ᕿᑭᖅᑕᓃᒃᑯᑦ ᐅᕝᕙᓘᓐᓃᑦ ᓄᓇᓕᖕᓂ ᑐᓴᐅᒪᑎᑦᑎᔨᓯ ᓄᓇᓕᔅᓯᓐᓂ.

ᐱᓇᓱᖃᑕᐅᒍᒪᓗᓂ ᑭᓪᓕᒋᔭᐅᔪᖅ ᐅᓪᓗᖓ:  ᕖᕝᕗᐊᓕ 25, 2019  5:00ᒧᐊᖅᐸᑦ ᐅᓐᓄᒃᑯᑦ.

ᑐᑭᓯᒃᑲᓐᓂᕈᒪᒍᕕᑦ ᖃᐅᔨᒋᐊᕐᕕᒃᓴᖅ :

ᓰᒪ ᓴᕼᐊᕐ ᓯᐊᕋᕼᐄ,

ᑐᑭᒧᐊᖅᑎᑦᑎᔨ ᑐᓴᐅᒪᖃᑦᑕᐅᑎᓄᑦ,

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ,

szerehi@qia.ca

(867) 975.8413

1.800.667.2742