ᐅᓂᒃᑳᑦ: ᑐᑭᓯᑎᑦᑎᒋᐊᕈᑎᑦ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᒥᒃᓵᓅᖓᔪᓂ ᐱᒋᐊᕈᑎᒋᔭᐅᓯᒪᔪᑦ
ᐊᒥᓱᓄᑦ ᐊᕐᕌᒍᓄᑦ, ᒐᕙᒪᑐᖃᒃᑯᑦ ᐊᒡᒑᖏᓐᓇᖃᑦᑕᓚᐅᕐᒪᑕ ᐃᓄᐃᑦ ᓈᓚᖕᓂᖃᖁᔨᑎᓪᓗᒋᑦ ᑕᐃᔅᓱᒪᓂ ᖃᓄᐃᓕᐅᖅᑕᐅᕙᓚᐅᕐᓂᖏᓐᓄᑦ ᐊᓯᔾᔨᓚᐅᖅᑐᒥᒃ ᐃᓄᐃᑦ ᐊᖏᕐᕋᕆᔭᖓᓂ ᐊᒻᒪ ᐱᐅᓯᕆᔭᖏᓐᓂ ᐃᓕᖅᓯᖅᑯᕐᒥ.
ᓄᐊᓴᖅᑕᐅᓂᐊᕐᒪᑕ ᐃᓄᐃᑦ ᐊᑐᖅᓯᒪᔭᖏᑦ ᓇᖕᒥᓂᖅ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᑦ ᓴᖅᑭᑎᑦᑎᓚᐅᖅᑐᑦ ᐃᓛᒃᑰᖓᔪᒥᒃ ᓱᓕᔪᒥᒃ ᑭᓪᓕᓯᓂᐊᖅᑎᓂ ᐱᓕᕆᐊᖃᕐᓗᑎ ᖃᓄᐃᓕᐅᕈᑕᐅᓯᒪᔪᓄᑦ 1950ᓂᑦ 1975ᓄᑦ. 350ᑲᓴᐅᓚᐅᖅᑐᑦ ᐃᓄᐃᑦ ᐅᓄᕐᓂᖅᓴᐅᓪᐅᓗᑎᒃ ᐅᓐᓂᕐᓗᒃᓴᓚᐅᖅᑐᑦ, ᐃᓄᖕᓂᑦ ᓈᓚᖕᓂᖅᑕᖃᖅᑎᓪᓗᒍ ᓴᖅᑭᑕᐅᖁᓪᓗᒋᑦ ᓱᓕᔪᑦ ᓅᑕᐅᔪᕕᓂᕐᓂᑦ ᐊᒻᒪ ᐃᓚᒌᑦ ᐊᕕᑕᐅᓂᖏᓐᓂᑦ, ᕿᒻᒦᔭᖅᑕᐅᓂᖏᑦ ᐊᒻᒪᓗ ᐊᓯᖏᑦ ᐊᓯᔾᔨᖅᓯᓯᒪᔪᓂᒃ ᐃᓄᐃᑦ ᐃᓅᓯᖏᓐᓂ. 
ᖁᓕᓂᑦ ᐊᕐᕌᒍᓂᑦ ᐱᓕᕆᐊᖄᓂᒃᑎᓪᓗᒋᑦ ᕿᑭᖅᑕᓃᒃᑯᑦ ᓴᖅᑭᑎᑦᑎᓚᐅᖅᑐᑦ ᐅᓄᖅᑐᓂᒃ ᓈᒪᔪᓂᒃ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᒥᒃᓵᓄᑦ ᐅᓂᒃᑳᓂ 2013ᒥ, ᐱᖃᓯᐅᑎᓪᓗᒍ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᑭᖑᓪᓕᖅᐹᓂ ᐅᓂᒃᑲᓂ: ᓴᐃᒻᒪᖃᑎᒌᒍᓐᓇᖅᓯᓂᖅ. ᐅᓂᒃᑲᑦ ᐃᓕᓗᖃᖅᑐᑦ ᐱᖓᓱᓂᒃ ᐊᕐᕌᒍᓂ ᐊᐱᖅᓱᖅᑕᐅᔪᕕᓂᕐᓂᑦ, ᐅᓐᓂᕐᓗᒃᑐᓂᑦ, ᐊᒻᒪᓗ ᖃᐅᔨᓴᖅᑕᐅᓯᒪᔪᓂᒃ ᐊᑐᖅᑕᐅᓯᒪᔪᓄᑦ ᕿᑭᖅᑕᓂ ᐃᓄᖕᓄᑦ 1950ᓂᑦ 1975ᒧᑦ.
ᓯᕗᓕᖅᐹᖓᑦᓂ ᐊᑐᓕᖁᔭᐅᓯᒪᔪᓂᑦ ᐅᓂᒃᑳᓂᑦ, ᕿᑭᖅᑕᓃᒃᑯᑦ ᐱᓕᕆᒋᐊᓯᑲᐅᑎᒋᓚᐅᖅᑐᑦ ᐊᔭᐅᖅᑐᐃᓕᖅᖢᑎᒃ ᒐᕙᒪᑐᖃᒃᑯᓐᓂ. ᓯᕗᓪᓕᖅᐹᒥᒃ, ᑐᓂᓯᓪᓗᑎᒃ ᐅᓂᒃᑳᓂ ᑲᓇᑕᐅᑉ ᓯᕗᓕᖅᑎᖓᓄᑦ, ᒥᓂᔅᑕᐅᑎᓄᓪᓗ, ᐊᒻᒪ ᒐᕙᒪᒋᔭᐅᔫᑉ ᐊᑭᕋᕆᔭᐅᔪᖏᓐᓄᑦ. ᑭᖑᓂᐊᒍᑦ ᐊᒥᓱᓂ ᐊᕐᕌᒍᓂ ᐱᓕᕆᐊᖃᖅᖢᑎᒃ ᒪᒥᐊᖁᔨᓂᕐᒥ ᕿᒻᒦᔭᖅᑕᐅᓯᒪᔪᓄᑦ. ᐊᓪᓗᕆᐊᕈᑎᒋᔭᐅᓚᐅᖅᑐᖅ 2017ᒥ ᐃᓄᐃᓪᓗ ᒐᕙᒪᑐᖃᒃᑯᓪᓗ ᑲᑐᔾᔨᖃᑎᒌᖕᓂᕐᒧᑦ ᑲᑎᔨᕋᓛᓂ. ᑖᒃᑯᐊ ᑲᑎᒪᔨᕋᓛᑦ ᓴᖅᑭᑕᐅᓂᖏᑦ ᓇᓗᓇᕈᓐᓃᓚᐅᖅᑐᖅ ᐊᓯᔾᔨᖅᑐᖃᕐᓂᐊᕐᓂᖓᓂ ᓯᕗᓂᕐᒥ.
ᒪᒥᐊᓐᓂᖅ
ᐊᒡᒌᓯ 14, 2019ᒥ, ᒐᕙᒪᑐᖃᒃᑯᑦ ᐊᖏᓚᐅᖅᑐᖅ ᕿᑭᖅᑕᓃᒃᑯᑦ ᖃᓄᐃᓕᐅᖁᓯᒪᔭᖏᓐᓂ ᓇᓗᓇᐃᖅᓯᓗᑎᒃ ᒪᒥᐊᓪᓗᑎᓪᓗ ᐃᓄᖕᓄᑦ ᖃᓄᐃᓕᐅᖅᑕᐅᕙᓚᐅᕐᓂᖏᓐᓄᑦ ᕿᑭᖅᑖᓗᒻᒥ 1950ᓂᑦ 1975ᒧᑦ.
ᑐᙵᕕᒋᓪᓗᒋᑦ ᐱᓕᕆᐊᖑᓯᒪᔪᑦ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᒃᑯᓐᓄᑦ, ᕿᑭᖅᑕᓃᒃᑯᑦ ᖃᓄᖅᑑᕆᐊᓚᐅᖅᐳᑦ ᓴᙱᓕᖅᑎᑦᑎᔪᒪᓂᕐᒥᒃ ᐃᓄᐃᑦ ᐊᐅᓚᑦᑎᓂᖏᓐᓄᑦ ᐊᒻᒪᓗ ᐃᑲᔪᖅᑐᕐᓗᒋᑦ ᓄᓇᓖᑦ ᖃᓄᐃᙱᑦᑎᐊᖁᓪᓗᒋᑦ. ᓯᕗᒧᐊᕈᑎᒋᔭᐅᓂᐊᕐᒪᑦ ᓴᐃᒻᒪᖃᑎᒌᖕᓂᖅ. ᕿᑭᖅᑕᓃᒃᑯᑦ ᐋᔩᕋᕈᑎᖃᖅᖢᑎᒃ ᐊᖏᖃᑎᒌᒍᑎᒥᒃ ᒐᕙᒪᑐᖃᒃᑯᓪᓗ ᐊᒻᒪᓗ ᐅᑯᓂᖓ ᐃᓗᓕᖃᖅᖢᓂ:
- $15 ᒥᓕᔭᓐ ᐃᓕᔭᐅᓗᑎᒃ ᓴᐃᒻᒪᖃᑎᒌᖕᓂᕐᒧᑦ ᑮᓇᐅᔭᓄᑦ
- $2.9 ᒥᓕᔭᓐ ᕿᒻᒦᑦ ᐱᒋᐊᖅᑕᐅᒃᑲᓐᓂᕐᓂᖏᓐᓄᑦ
- $2 ᒥᓕᔭᓐ ᐅᖓᑖᓂ ᐃᓄᐃᑦ ᑕᐃᔅᓱᒪᓂ ᖃᓄᐃᓕᐅᖅᓯᒪᔭᖏᓐᓂᒃ ᐊᒻᒪ ᐊᐅᓚᑦᑎᓂᕐᒧᑦ ᐱᓕᕆᐊᒃᓴᓄᑦ
- $1.2 ᒥᓕᔭᓐ ᐃᖏᕐᕋᓂᕐᒧᑦ ᒪᒥᓴᕐᓂᕐᒧᓪᓗ
ᐊᑐᖅᑕᐅᓂᖏᑦ ᕿᑭᖅᑕᓃᒃᑯᑦ ᓴᐃᒻᒪᖃᑎᒌᖕᓂᕐᒧᑦ ᑮᓇᐅᔭᓂ
ᐊᖏᖃᑎᒌᒍᑎᒋᔭᐅᓯᒪᔫᑉ ᐃᓚᒋᓪᓗᓂᐅᒃ, ᒐᕙᒪᑐᖃᒃᑯᑦ ᑐᓂᓯᔪᑦ ᓯᕗᓪᓕᖅᐹᓂᒃ ᑐᓐᓂᖅᑯᓯᐊᒥᒃ $15 ᒥᓕᔭᓂ ᐊᑐᕐᓂᐊᖅᑐᓂᒃ ᕿᑭᖅᑕᓃᒃᑯᑦ ᓴᖅᑭᑎᑦᑎᓂᖏᓐᓄᑦ ᓴᐃᒻᒪᖃᑎᒌᖕᓂᕐᒧᑦ ᑮᓇᐅᔭᓂ ᑐᖅᑯᖅᓯᒪᓂᐊᖅᑐᓂᒃ ᐊᑐᕐᓂᐊᖅᑐᑦ ᓴᐃᒻᒪᖃᑎᒌᖕᓂᕐᒧᑦ ᐱᓕᕆᐊᒃᓴᓄᑦ.
ᕿᒻᒦᑦ ᐱᒋᐊᖅᑎᑕᐅᒃᑲᓐᓂᕐᓂᖏᑦ
ᐊᑐᓕᖁᔨᔾᔪᑎᓃᙱᒃᑲᓗᐊᖅᑎᓪᓗᒍ, ᕿᑭᖅᑕᓃᒃᑯᑦ ᑲᑎᒪᔨᖏᑦ ᐃᒃᐱᒍᓱᓚᐅᕐᒪᑕ ᐱᒻᒪᕆᐅᑎᑦᑎᓪᓗᑎᒃ ᐃᑲᔪᖅᑐᖅᑕᐅᓗᓂ ᕿᒻᒦᑦ ᐱᒋᐊᖅᑕᐅᒃᑲᓐᓂᕐᓂᖏᓐᓂ.
ᕿᒻᒦᑦ ᐱᒋᐊᖅᑕᐅᒃᑲᓐᓂᕐᓂᖏᑦ ᐱᓕᕆᐊᖓ ᐱᒋᐊᖅᑕᐅᓚᐅᖅᑐᖅ 2020ᒥ ᐊᒻᒪᓗ ᐅᓪᓗᒥᑦ ᐱᓕᕆᐊᖃᖅᓯᒪᔪᑦ:
- ᕿᒻᒦᑦ ᐱᒋᐊᖅᑕᐅᒃᑲᓐᓂᕐᓂᖏᓐᓄᑦ ᑲᒪᔨᖃᓕᖅᑐᑦ
- ᕿᒻᒥᒃᓯᖃᖅᑐᑦ ᐊᑎᓕᐅᖅᓯᒪᓂᖏᑦ ᖃᕆᓴᐅᔭᒃᑯᑦ
- ᕿᑭᖅᑕᓂ ᕿᒧᒃᓯᖅᑏᑦ ᐱᓕᕆᐊᖓ
- ᐃᑲᔫᑎᖃᖅᑎᑦᑎᓂᖅ ᓄᓇᕗᒥ ᐸᖓᒍᔾᔨᓂᕐᒧᑦ
- ᕿᑭᖅᑖᓗᖕᒥ ᕿᒻᒥᖃᖅᑎᓂ ᑲᑎᒪᑎᑦᑎᓂᖅ
ᓯᕗᓕᖅᐹᖑᓗᓂ ᖃᓄᖅᑑᖁᔭᐅᓯᒪᔪᓂᒃ ᕿᒻᒦᑦ ᐱᒋᐊᖅᑕᐅᒃᑲᓐᓂᕐᓂᖏᓐᓄᑦ ᑭᒃᑰᓂᖏᓐᓂᒃ ᓇᓗᓇᐃᔭᐃᓂᕐᒥᒃ. ᖃᐅᔨᒪᒐᓗᐊᖅᖢᑎᒃ ᐊᒥᓱᑦ ᕿᒻᒥᖃᕐᓂᖏᑦ ᕿᑭᖅᑖᓗᒻᒥ, ᐱᓗᐊᖅᑐᒥᒃ ᕿᑭᖅᑖᓘᑉ ᐅᐊᖕᓇᖓᓂ ᐊᕐᕌᒍᑕᒫᑦ ᕿᒧᒃᓯᕐᔪᐊᖅᑎᑦᑎᖃᑦᑕᕐᒪᑕ ᐅᐱᕐᖔᒃᑯᑦ − ᓄᓇᕗᒥ ᐸᖓᒍᔾᔨᓂᖅ.
ᕿᑭᖅᑕᓃᒃᑯᑦ ᐃᖅᑲᓇᐃᔭᖅᑎᑦ 45ᖑᓇᓱᒋᔭᐅᓪᐅᓗᑎᒃ ᕿᒻᒥᖃᖅᑎᐅᔪᑦ ᕿᑭᖅᑖᓘᖕᒥ. ᕿᒻᒦᑦ ᐱᒋᐊᖅᑕᐅᒃᑲᓐᓂᕐᓂᖏᓐᓄᑦ ᑲᒪᔨᖓ ᐊᑐᓂ ᕿᒻᒥᖃᖅᑎᐅᔪᓂᒃ ᑐᓴᕐᕕᖃᖅᓯᒪᓕᖅᑐᑦ ᐊᒻᒪ ᓇᓗᓇᐃᓚᐅᖅᖢᑎᒃ ᕿᒧᒃᓯᖃᑦᑕᐃᓐᓇᖃᑦᑕᕐᓂᖏᓐᓄᑦ, ᐊᒻᒪᓗ ᑐᑭᓯᕕᐅᓪᓗᑎᒃ ᕿᒻᒥᖃᖅᑐᑦ ᐅᑯᓂᖓ:
- ᖃᔅᓯᓂ ᕿᒻᒥᖃᕐᓂᖏᓐᓄᑦ
- ᖃᔅᓯᐅᓂᖏᑦ ᕿᒧᒃᑎᑕᐅᖃᑦᑕᕐᓂᖏᑦ
- ᖃᔅᓯᓂ ᐃᑲᔪᖅᑎᖃᕐᓂᖏᑦ (ᐃᑲᔪᖅᑎᖃᖅᐸᑕ)
- ᖃᔅᓯᐅᓂᖏᑦ ᐃᑲᔪᖅᑎᖏᑦ ᐃᓄᒻᒪᕆᓂᖏᑦ
ᐅᑑᕙ 2020ᒥ, ᓴᖅᑭᑕᐅᑎᓪᓗᒍ ᕿᑭᖅᑕᓂ ᕿᒧᒃᓯᖅᑏᑦ ᐱᓕᕆᐊᖓᓂᒃ, ᕿᑭᖅᑕᓃᒃᑯᑦ ᑐᑭᓯᓯᒪᓕᖅᑐᑦ 63ᖑᓂᖏᑦ ᕿᒧᒃᓯᖃᖅᑐᑦ ᕿᑭᖅᑖᓗᖕᒥ. ᕿᒻᒥᖃᖅᑐᑦ ᐅᓄᖅᓯᕙᓪᓕᐊᑐᐃᓐᓇᖅᑐᑦ.
ᑖᓐᓇ ᕿᒻᒦᑦ ᐱᒋᐊᖅᑕᐅᒃᑲᓐᓂᕐᓂᖏᓐᓄᑦ ᑐᕌᖓᔪᓂᒃ ᑮᓇᐅᔭᓂᒃ ᒪᒥᔪᖃᖅᑐᖅ ᕿᑭᖅᑕᓂ ᐃᓄᐃᑦ ᕿᒻᒧᒃᓯᖃᖅᑐᓄᑦ, ᕿᒻᒥᓄᑦ ᐊᑐᕐᓂᐊᖅᑐᓄᑦ. ᑖᓐᓇ ᐱᓕᕆᐊᖓ ᐱᖓᓱᓄᑦ ᐊᕐᕌᒍᓄᑦ ᐱᓕᕆᐊᖑᓂᐊᖅᑐᖅ ᐃᓱᓕᓪᓗᓂ 2023ᒥ.
ᐃᓚᒋᖃᑕᐅᓪᓗᒍ ᕿᒻᒦᑦ ᐱᒋᐊᖅᑕᐅᒃᑲᓐᓂᕐᓂᖏᓐᓄᑦ ᐱᓕᕆᐊᖓᓂ, ᕿᑭᖅᑕᓃᒃᑯᑦ ᓇᓗᓇᐃᖅᓯᓯᒪᔪᑦ ᑐᓂᓯᖃᑦᑕᕐᓂᐊᕐᓗᑎᒃ $100,000ᓂ ᓄᓇᕗᑦ ᐸᖓᒍᔾᔨᓂᕐᒧᑦ 7ᓄᑦ ᐊᕐᕌᒍᓄᑦ. ᓄᓇᕗᒥ ᐸᖓᒍᔾᔨᓂᖅ ᓄᖅᑲᖅᑎᑕᐅᓚᐅᖅᑐᖅ 2020ᒥ 2021ᒥᓗ ᓄᕙᓐᓇᕐᔪᐊᖅ-19 ᐱᔾᔪᑎᒋᓪᓗᒍ. ᓱᒃᑲᓴᐅᑎᓚᐅᙱᒃᑲᓗᐊᖅᑎᓪᓗᒋᑦ ᒪᕐᕉᓂ ᐊᕐᕌᒍᓄᑦ, ᓄᓇᕗᑦ ᐸᖓᒍᔾᔨᓂᕐᒧᑦ ᑐᕌᖓᔪᑦ ᑮᓇᐅᔭᐃᑦ ᐊᕐᕌᒍᓄᑦ ᓯᕗᓂᕐᒥ ᐊᑐᕈᓐᓇᓛᕐᓗᑎᒃ. ᐃᑲᔪᖅᑐᐃᓂᖏᑦ ᕿᑭᖅᑕᓃᒃᑯᑦ 2021ᒥ ᑮᓇᐅᔭᓂᒃ ᑐᓂᓯᓚᐅᖅᐅᑐᑦ ᐊᑎᓕᐅᖅᓯᒪᔪᓄᑦ ᕿᒻᒥᖃᖅᑎᐅᔪᓄᑦ ᓱᒃᑲᓴᐅᑎᓂᐊᖅᑐᓄᑦ ᐅᑎᖅᑕᐅᓪᓗᑎᒃ ᑕᐃᒃᑯᐊ ᑮᓇᐅᔭᐃᑦ ᐊᑐᖅᑕᐅᓚᐅᖅᑐᑦ ᐸᕐᓇᒃᐸᓪᓕᐊᒍᑎᒋᔭᐅᔪᑦ ᐸᖓᒍᔾᔨᖃᑕᐅᓂᐊᓚᐅᖅᑐᓄᑦ.
ᐃᓄᐃᑦ ᑕᐃᔅᓱᒪᓂ ᐊᑐᖅᓯᒪᔭᖏᑦ ᐊᒻᒪ ᐊᐅᓚᑦᑎᔾᔪᑎᓕᕆᓂᒧᑦ ᐱᓕᕆᐊᑦ
ᐊᖏᖃᑎᒌᒍᑎ ᐊᑎᓕᐅᖅᑕᐅᓚᐅᖅᑎᓪᓗᒍ ᐊᒡᒌᓯ 14, 2019ᒥ, ᕿᑭᖅᑕᓃᒃᑯᑦ ᑲᑎᒪᖃᑎᖃᖃᑦᑕᖅᑐᑦ ᐊᓯᖏᓐᓂᑦ ᑎᒥᐅᔪᓂᑦ, ᐅᖃᓯᕆᔭᐅᓪᓗᑎᒃ ᐱᓕᕆᐊᒃᓴᖃᕆᐊᖃᕐᓂᖓ ᐊᒻᒪᓗ ᐃᓕᓐᓂᐊᒐᒃᓴᖃᕐᓗᑎᒃ ᐃᓄᐃᑦ ᑐᑭᓯᓂᐊᕐᒪᑕ ᐊᓯᖏᓪᓗᑦ ᐊᑐᖅᑕᐅᓯᒪᔪᓂᑦ. ᐱᖃᓯᐅᑎᓗᒋᑦ ᐃᓕᓐᓂᐊᕈᑎᒃᓴᓕᐅᕐᓂᖅ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᒥᒃᓵᓄᑦ.
ᔫᓐ 4, 2021, ᓄᓇᕗᑦ ᒐᕙᒪᒃᑯᑦ ᕿᑭᖅᑕᓃᒃᑯᓪᓗ ᑐᑭᓯᐅᒪᖃᑦᑕᐅᑎᓂᕐᒧᑦ ᐊᖏᖃᑎᒌᒍᑎᒥᒃ ᐊᑎᓕᐅᕆᓚᐅᖅᑐᑦ ᑲᑐᔾᔨᓗᑎᒃ ᓴᖅᑭᑎᑦᑎᖃᑦᑕᕐᓂᐊᕐᒪᑕ ᐃᓕᓐᓂᐊᕈᑎᒃᓴᓂ ᑐᙵᕕᖃᖅᑐᒥᒃ ᐃᓄᐃᑦ ᐃᓕᖅᑯᓯᖓᓂ ᐅᖃᐅᓯᖓᓂᓗ ᐃᓕᓐᓂᐊᖅᑐᓄᑦ ᐃᓕᓐᓂᐊᕐᓂᐊᓕᓵᖅᑐᓄᑦ ᐃᓕᓐᓂᐊᓕᓵᖅᑐᓄᓪᓗ ᒍᕇᑦ 12ᒧᑦ ᐊᒻᒪᓗᑦ ᐃᓐᓇᕐᓄᑦ ᐃᓕᓐᓂᐊᒐᒃᓴᐅᔪᓐᓇᕆᓪᓗᑎᒃ.
“ᑖᓐᓇ ᐊᖏᖃᑎᒌᒍᑎ ᐱᒻᒪᕆᐋᓗᒃᑯᑦ ᓯᕗᒧᐊᕈᑎᒋᔭᐅᓯᒪᔪᖅ ᐱᓕᕆᐊᖃᐃᓐᓇᖅᑎᓪᓗᒋᑦ ᕿᑭᖅᑕᓃᒃᑯᑦ ᒪᑭᒪᑎᑦᑎᑦᑎᐊᕋᓱᒃᖢᑎᒃ ᐃᓄᐃᑦ ᐃᓕᖅᑯᓯᖓᓂᒃ ᕿᑭᖅᑖᓗᖕᒥ,” ᐅᖃᖅᑐᖅ ᕿᑭᖅᑕᓃᒃᑯᑦ ᐊᖓᔪᖅᑳᖓ ᐸᐅᓗᓯ ᐊᕿᐊᕈᖅ. “ᓂᕆᐅᒋᔭᖃᑦᑎᐊᖅᑐᒍᑦ ᑲᑐᔾᔨᓗᑕ ᐃᖅᑲᓇᐃᔭᖃᑎᒌᑦᑎᐊᕐᓂᐊᕋᑦᑕ ᒐᕙᒪᒃᑯᑦ ᐃᓕᓐᓂᐊᕐᓂᓕᕆᔨᖏᓪᓗ ᐃᓄᐃᑦ ᕿᑐᕐᖓᖏᑦ ᓯᕗᓂᒃᓴᖃᑦᑎᐊᕈᓐᓇᖃᑕᐅᖁᓪᓗᒋᑦ.
ᕿᑭᖅᑕᓃᒃᑯᑦ ᐃᖅᑲᓇᐃᔭᖃᑎᖃᖅᑐᑦ ᓄᓇᕗᑦ ᒐᕙᒪᒃᑯᓐᓂ ᐃᓄᐃᑦ ᐅᖃᐅᓯᖓ, ᑭᓇᐅᓂᖏᑦ ᐊᒻᒪ ᐃᓕᖅᑯᓯᖓ ᒪᑭᒪᑦᑎᐊᖁᓪᓗᒍ ᓄᓇᓕᖕᓂ.
ᐃᖏᕐᕋᓂᖅ ᒪᒥᓴᕐᓂᕐᓗ
ᒪᓕᒃᖢᒍ ᐃᖏᕐᕋᓂᕐᒧᑦ ᒪᒥᓴᕐᓂᕐᒧᓪᓗ ᐱᓕᕆᐊᖓ, ᕿᑭᖅᑕᓃᒃᑯᑦ ᐃᖅᑲᓇᐃᔭᖃᑎᖃᖃᑦᑕᕐᓂᐊᖅᑐᑦ ᐃᓚᒌᓂ ᐊᒃᑐᖅᑕᐅᓯᒪᔪᓂᒃ Dundas Harbour ᒥᑦ ᓅᑕᐅᔪᕕᓂᕐᓂᑦ ᐊᒻᒪᓗ ᒪᑐᔭᐅᑎᓪᓗᒋᑦ ᑭᕕᖅᑑ, ᐹᓪᓚᕕᒃ ᐊᒻᒪᓗ South Camp ᐋᖅᑭᒃᓯᒪᓗᑎᒃ ᐳᓛᕆᐊᕐᕕᐅᔪᓐᓇᖅᓯᓛᕐᓗᑎᒃ ᐊᒻᒪ ᒪᒥᓴᕐᓂᕐᒧᑦ ᐱᓕᕆᐊᒃᓴᓄᑦ.
ᐱᓕᕆᐊᒃᓴᑦ ᓴᖅᑭᑕᐅᔪᒃᓴᒫᑦ
ᓄᕙᓐᓇᕐᔪᐊᖅ-19 ᐊᒃᑐᐃᓯᒪᖕᒪᑦ ᐱᕙᓪᓕᐊᓂᕆᔭᑦᑎᓐᓂ ᓴᐃᒻᒪᖃᑎᒌᖕᓂᕐᒧᑦ ᐱᓕᕆᐊᒃᓴᓂ. ᕿᑭᖅᑕᓃᒃᑯᑦ ᐋᖅᑭᒃᓯᐊᓂᒐᓱᐊᖅᑐᑦ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᓂᑦ ᐱᓕᕆᐊᒃᓴᐅᓂᐊᖅᑐᓄᑦ ᐃᖅᑲᓇᐃᔭᕐᓂᐊᖅᑐᓄᑦ. ᓱᓕ ᒫᓐᓇ ᐃᖅᑲᓇᐃᔭᖅᑎᒃᓴᖅᓯᐅᖅᑐᒍᑦ ᑲᒪᔨᒃᓴᓂ ᐱᕙᓪᓕᐊᑎᑕᐅᒍᓐᓇᖅᓯᓂᐊᕐᒪᑕ ᐱᓕᕆᐊᒃᓴᐅᓂᐊᖅᑐᓄᑦ ᐃᓄᐃᑦ ᑕᐃᔅᓱᒪᓂ ᐊᑐᕙᓚᐅᖅᑕᖏᑦ ᐊᒻᒪᓗ ᐊᐅᓚᑦᑎᔾᔪᑎᓕᕆᓂᖅ ᐊᒻᒪᓗ ᐃᖏᕐᕋᓂᖅ ᒪᒥᒃᓴᕐᓂᕐᒥᓗ ᐱᓕᕆᐊᒃᓴᓂ.
ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᒥᒃᓵᓄᑦ ᑐᑭᓯᒍᑎ
ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᓯᕗᓪᓕᖅᐹᖑᓪᓗᓂ ᐃᓄᖕᓄᑦ-ᑮᓇᐅᔭᖃᖅᑎᑕᐅᔪᒧᑦ ᓯᕗᒃᑲᖅᑕᐅᔪᒧᓪᓗ ᐱᓕᕆᐊᕆᔭᐅᒧᓪᓗ ᐃᓄᖕᓄᑦ ᑕᐃᒪᐃᑦᑐᒥᒃ ᐱᓕᕆᐊᖃᖅᑐᓂᒃ. ᑖᓐᓇ ᐊᔾᔨᐅᙱᑦᑐᒥᒃ ᐆᒃᑑᑎᑦᑎᐊᕙᐅᕗᖅ ᓈᒪᔪᒥᒃ ᐃᓅᓯᕐᓄᑦ ᐊᒃᑐᐃᓂᐅᔪᓄᑦ ᓇᓛᖕᓂᖃᖅᑎᑦᑎᓂᕐᒥᒃ ᐱᓕᕆᐊᖑᔪᒧᑦ ᓄᓇᖃᖅᑐᑐᖃᓂᙶᖅᑐᒥᒃ ᑎᒥᐅᔪᒧᑦ. ᑐᑭᓯᒃᑲᓐᓂᕈᒪᒍᕕᑦ ᑕᑯᒋᐊᕈᒃ Qikiqtani Truth Commission website or QIA’s website.
