ᐃᓄᒃ−ᑲᓇᑕᒥᐅᑕᖅ, ᐱᑦᓯᐅᓛᖅ ᐊᓲᓇ, ᓯᑕᒪᐅᔪᖅᑑᔪᓂᒃ ᐃᓄᖕᓂᑦ ᐃᓱᒪᒋᔭᐅᖃᑕᐅᔪᖅ ᐃᓕᔭᐅᔪᒃᓴᒫᖑᓂᐊᖅᑐᒥᒃ $5ᑖᓚᒧᑦ.  ᐊᓲᓇ, ᐃᓅᓚᐅᖅᓯᒪᔪᖅ ᑐᔾᔮᓂ ᕼᐊᑦᓴᓐ ᓱᓪᓗᐊᓗᖓᓂ, ᓯᕗᓪᓕᖅᐹᖑᓪᓗᓂ ᐃᓕᓴᕆᔭᐅᓚᐅᖅᓯᒪᔪᖅ ᓴᓇᙳᐊᖅᑎᐅᓂᖓᓂᒃ ᑭᙵᕐᓂ.  ᑭᙵᕐᓂ ᓄᓇᑖᓚᐅᖅᓯᒪᔪᖅ 1960ᓂ ᐊᒻᒪᓗ 17ᓂ ᕿᑐᕐᖓᖅᑖᖅᓯᒪᓪᓗᓂ, ᐃᓚᖏᓪᓗ ᓴᓇᙳᐊᖅᑎᙳᖅᓯᒪᓪᓗᑎᒃ.

ᐊᔪᙱᑦᑎᐊᖅᑐᖅ ᓴᓇᙳᐊᖅᑎᐅᓪᓗᓂ ᓴᓇᓯᒪᔪᖅ 9,000ᕈᔪᖕᓂ ᓴᓇᙳᐊᒐᓂ 20ᓂ ᐊᕐᕌᒍᓂ ᑭᙵᕐᒥᐅᖑᓕᖅᑎᓪᓗᒍ.  ᑎᑎᖅᑐᒐᖏᑦ ᐅᖃᓕᒫᒐᓄᑦ ᐃᓕᔭᐅᖅᑳᓚᐅᖅᓯᒪᔪᑦ 1960ᓂ.

ᓴᓇᙳᐊᖅᑎᐅᑎᓪᓗᒍ, ᐱᑦᓯᐅᓛᖅ ᐃᓕᓴᕆᔭᐅᔾᔪᑎᑖᖅᓯᒪᔪᖅ ᐊᔾᔨᒌᙱᑦᑐᓂᒃ.  1971ᒥ ᑖᒃᑯᐊ ᑲᓇᑕᒥ ᑕᕐᕆᔭᒃᓴᓕᐅᖅᑎᒻᒪᕆᒃᑯᑦ ᑕᕐᕆᔭᒃᓴᓕᐅᓚᐅᖅᓯᒪᔪᑦ ᐅᖃᓕᒫᒐᓕᐊᖓᑕ ᒥᒃᓵᓄᑦ, “ᐱᑦᓯᐅᓛᕐᒥᒃ” ᐊᔾᔨᙳᐊᑦ ᐃᓅᓯᕆᓚᐅᖅᑕᓐᓂ”. 1974ᒥ ᓂᕈᐊᖅᑕᐅᓚᐅᖅᓯᒪᔪᖅ ᐃᓚᒋᔭᐅᓕᖅᖢᓂ ᑲᓇᑕᒥ Royal Academy ᐊᒻᒪᓗ ᑐᓂᔭᐅᓪᓗᓂ ᐃᓕᓴᕆᔭᐅᔾᔪᑎᒥᒃ ᐳᖅᑐᓂᖅᐹᖑᔪᒥᒃ 1977ᒥ.

ᐱᑦᓯᐅᓛᖅᑐᖅ ᑐᖁᓚᐅᖅᓯᒪᔪᖅ 1983ᒥ ᐊᒻᒪᓗ ᐃᓗᕕᖅᑕᐅᓯᒪᓪᓗᓂ ᐊᔪᕆᖅᓱᐃᔨᒃᑯᑦ ᑐᒃᓯᐊᕐᕕᖓᑕ ᑐᓄᐊᓂ ᑭᙵᕐᓂ.  ᑎᑎᖅᑐᒐᖅᓯᒪᔭᖏᑦ ᒫᓐᓇ ᐊᑐᖅᑕᐅᔪᖅ ᒪᒃᒪᐃᑯᓪ ᓴᓇᙳᐊᖅᓯᒪᔪᓂᒃ ᑕᑯᔭᖃᕐᕕᖕᒥ ᐊᔾᔨᓕᐅᖅᑕᐅᕙᓪᓕᐊᓪᓗᑎᒃ, ᑎᑎᕋᐅᓯᕆᔭᐅᓪᓗᑎᒃ ᐊᒻᒪᓗ ᓴᖅᑭᔮᖅᑎᑕᐅᓪᓗᑎᒃ.

ᑮᓇᐅᔭᖅ $5ᑖᓚᐅᑉ ᒥᒃᓵᓄᑦ ᑐᑭᓯᒍᑎᒃᑲᓐᓃᑦ

ᑖᓐᓇ ᐃᓕᓴᕆᔭᐅᓂᖓ ᓴᖅᑭᓯᒪᔪᖅ ᑐᑭᓯᒋᐊᕆᐊᖃᑦᑕᖅᑎᓪᓗᒋᑦ ᔭᓐᓄᐊᓕ 2020ᒥ.  ᑖᒃᑯᐊ ᑲᓇᑕᒥ ᑮᓇᐅᔭᒃᑯᕕᕐᔪᐊᖏᑦ ᐱᒋᐊᖅᑎᑦᑎᓚᐅᖅᑐᒥᒃ ᑕᒪᑐᒥᖓ ᐊᒻᒪᓗ ᐱᔫᒥᓵᕈᑎᖃᖅᖢᑎᒃ ᑲᓇᑕᒥᐅᓂᒃ ᑭᓇᒥᒃ ᑕᑯᒍᒪᒐᔭᕐᓂᖏᓐᓄᑦ ᑮᓇᐅᔭᒥᒃ $5ᑖᓚᐅᔫᑉ ᖄᖓᓂᒃ.

45,000ᑲᓴᐃᑦ ᐃᓄᐃᑦ ᑭᐅᔾᔪᑎᖃᓚᐅᖅᑐᑦ, ᑕᐃᒪᐃᒻᒪᑦ 600 ᐅᖓᑖᓂ ᓂᕈᐊᒐᒃᓴᓕᐅᖅᑎᑦᑎᓯᒪᓪᓗᑎᒃ.  ᑖᒃᑯᐊ ᓂᕈᐊᒐᒃᓴᐅᖃᑕᐅᔪᑦ ᕿᒥᕐᕈᔭᐅᓪᓗᑎᒃ ᐃᓛᒃᑰᖅᑐᒥᒃ ᑲᑎᒪᔨᓂᑦ ᑎᓕᔭᐅᓯᒪᔪᓄᑦ ᑮᓇᐅᔭᒃᑯᕕᖕᒧᑦ.

ᐃᓄᐃᑦ ᐃᓱᒪᒋᔭᖏᓐᓂᒃ ᐊᑐᖅᖢᑎᒃ ᐊᒻᒪᓗ ᖃᐅᔨᓴᖅᖢᑎᒃ, ᐊᒻᒪᓗ ᐋᔩᕋᕈᑎᒋᔭᐅᓚᐅᖅᑎᓪᓗᓂ ᐊᒻᒪᓗ ᐃᓱᒪᒋᔭᐅᔪᑦ ᐅᖃᐅᓯᐅᓪᓗᑎᒃ ᐊᒻᒪᓗ ᐊᑐᖅᑕᐅᓯᒪᔪᑦ, ᑖᒃᑯᐊ ᑲᑎᒪᔩᑦ ᑭᖑᓪᓕᖅᐹᖅᓯᐅᑎᓂᒃ ᐊᑎᕐᓂᒃ ᓇᓗᓇᐃᔭᐃᓪᓗᑎᒃ.  ᐅᒃᐱᕈᓱᒃᑐᑦ ᑖᒃᑯᐊ ᐊᑎᓕᐅᖅᓯᒪᔪᑦ ᐊᔾᔨᒌᙱᑦᑐᓂᙶᖅᓯᒪᔪᑦ ᐊᒻᒪᓗ ᐱᒻᒪᕆᐋᓗᒃᑯᑦ ᑐᓂᓯᓯᒪᓪᓗᑎᒃ ᑲᓇᑕᐅᑉ ᑕᐃᔅᓱᒪᓂᑦ ᐊᑐᖅᓯᒪᔭᖏᓐᓄᑦ.

ᑖᒃᑯᐊ ᓯᑕᒪᐅᔪᖅᑑᔪᑦ ᓂᕈᐊᒐᒃᓴᐅᔪᑦ ᐅᕝᕙᐅᕗᑦ:

• ᐱᑦᓯᐅᓛᖅ ᐊᓲᓇ
• ᕋᕗᑏᓐ ᐱᐊᕆ (“ᕗᕋᓐᓱᐊ”)
• ᐱᓈᔅᓱᐃ (ᕗᕌᓐᓯᔅ ᐱᒐᒪᒐᐳ)
• ᕚᓐ ᐊᓕᒃᓵᓐᑐᑦ ᑲᒻᔭᐅ
• ᑎᐊᕆ ᕚᒃᔅ
• ᓛᑕ ᕼᐃᑦᔅᓯᒪᓄᕙ
• ᐃᓴᐳ-ᒧᓰᑲ (ᑯᕉᕗᑦ)
• ᐅᓇᓐᑏᐅ (ᕕᑐᕆᒃ ᐅᓪᒍᕕ ᓛᕝᑦ)

ᓂᕈᐊᖅᑕᐅᔪᖅ ᓇᓗᓇᐃᖅᑕᐅᓛᖅᑐᖅ 2021 ᐱᒋᐊᓕᓵᖅᑎᓪᓗᒍ, ᒥᓂᔅᑕ ᑮᓇᐅᔭᓕᕆᓂᕐᒧᑦ ᑭᖑᓪᓕᖅᐹᒥᒃ ᑐᑭᑖᖅᓯᒪᓕᖅᑎᓪᓗᒍ.  ᑖᓐᓇ ᑮᓇᐅᔭᖅ ᑎᑎᖅᑐᖅᑕᐅᕙᓪᓕᐊᓂᖓᑦ ᐱᒋᐊᓕᕋᔭᖅᖢᑎᒃ, ᑖᓐᓇ ᑮᓇᐅᔭᖅ ᐊᑐᓕᖅᑎᑕᐅᓇᔭᖅᖢᓂ ᐊᕐᕌᒍᓂ ᖃᐃᔪᓂᒃ.