ᐊᕐᕌᒍᑕᒫᑦ, ᐃᓄᒃᑎᑐᑦ ᐅᖃᐅᓯᓕᕆᓂᕐᒧᑦ ᑕᖅᑭᕐᒥ ᕖᕝᕗᐊᓕᒥ, ᑲᑐᔾᔨᖃᑎᖃᓲᖑᒐᑦᑕ ᐅᖃᓕᒫᒐᓕᐅᖅᑎᐅᕙᑦᑐᓂᑦ Inhabit Media−ᑯᓐᓂᑦ ᑕᑯᔅᓴᐅᑎᑦᑎᓂᕐᒧᑦ ᐃᓄᒃᑎᑑᖓᔪᓂᑦ ᐅᖃᓕᒫᒐᕐᓂᑦ ᐊᒻᒪᓗ ᓴᓇᔭᐅᓯᒪᔪᓂᑦ ᐊᑐᖃᑦᑕᕋᔅᓴᓂᑦ ᓱᕈᓯᕗᑦ ᐅᖃᓕᒫᕈᓐᓇᕐᓯᕙᓪᓕᐊᓂᐊᕐᖓᑕ ᐊᕐᕌᒍᑕᒫᑦ ᐅᖃᓕᒫᒐᓕᐅᕐᐸᑦᑐᑦ ᐊᑎᓕᐅᖅᑎᑕᐅᖃᑦᑕᓲᖑᒻᒪᑕ ᐃᖃᓗᓐᓂ. ᑕᒫᓂ ᐊᕐᕌᒍᒥ ᐊᑎᓕᐅᖅᑎᑦᑎᖃᑦᑕᓚᐅᕐᖓᑕ ᕖᕝᕗᐊᓕ 15ᖑᑎᓪᓗᒍ ᕗᕉᐱᓴ ᑐᔪᕐᒥᕕᒻᒥ ᐊᒻᒪᓗ ᓯᕕᑦᑐᕆᐊᖅᑕᐅᓯᒪᔪᒻᒪᑦ ᐃᓚᒋᔭᐅᓂᐊᕐᖓᑕ ᓄᓇᕗᒥ ᓱᕈᓯᕐᓄᑦ ᑐᕌᖓᔪᓂᑦ ᑕᑯᓐᓇᕋᔅᓴᓕᕆᔩᑦ ᑕᑯᕋᓐᓈᑎᑦᑎᒍᓐᓇᓂᐊᕐᖓᑕ ᐊᑯᓂᐅᙱᑦᑐᖅ ᑕᑯᓐᓇᖃᑦᑕᕋᔅᓴᓂᑦ ᐃᓄᒃᑎᑑᖓᔪᓂᑦ.

ᓱᕈᓰᑦ ᐅᐸᒍᑎᖃᑦᑕᓚᐅᕐᖓᑕ ᑕᑯᔭᖅᑐᖅᑐᑎᒃ ᐅᖃᓕᒫᒐᓕᐅᕐᓯᒪᔪᓂᑦ ᖁᕕᐊᒋᓂᕐᐹᖏᓐᓂᒃ ᐊᒻᒪᓗ ᐅᖃᓕᒫᒐᖏᓐᓂᑦ ᐊᑎᓕᐅᖅᑎᑦᑎᖃᑦᑕᖅᑐᑎᒃ. ᕿᑭᖅᑕᓂᒃᑯᑦ ᐃᓂᖃᔪᒻᒪᑕ ᑕᐃᑲᓂ ᐊᒻᒪᓗ ᐃᑲᔪᔪᔪᑦ ᖁᕕᐊᓲᑎᖃᖅᑎᓪᓗᒋᑦ ᑕᒪᑐᒥᖓ ᑐᓂᓯᐅᖅᑲᐃᖃᑦᑕᖅᑐᑎᒃ ᓵᓚᖃᐅᓯᐅᕐᓂᑦ ᐃᓚᒋᔭᐅᓯᒪᔪᓄᑦ.

ᑲᑐᔾᔨᖃᑎᖃᖃᑦᑕᕐᓯᒪᒐᑦᑕ ᐅᖃᓕᒫᒐᓕᐅᖅᑎᓂᑦ Inhabit Media−ᑯᓐᓂᑦ ᐊᕐᕌᒍᑦ ᖁᓕᑦ ᐅᖓᑖᓂ ᓴᐳᑎᔭᐅᖁᓪᓗᒍ ᐊᑐᖅᑕᐅᒋᐊᒃᑲᓐᓂᖁᓪᓗᒍᓗ ᐃᓄᒃᑎᑑᖃᑦᑕᕐᓂᖅ, ᐱᓗᐊᖅᑐᒥᑦ ᓱᕈᓰᑦ ᐅᖃᓕᒫᖅᑎᒋᕙᑦᑕᕗᑦ. ᑕᒫᓂ ᑕᖅᑭᕆᕋᑖᖅᑕᑎᓐᓂ ᓴᖅᑭᑎᑦᑎᖃᑦᑕᓚᐅᖅᑐᒍᑦ ᐊᔾᔨᒌᙱᑐᒡᒍᑎᓂᑦ ᐅᖃᓕᒫᒐᕐᓂᑦ ᖃᐅᑕᒫᑦ ᕿᑭᖅᑕᓂᒃᑯᑦ ᐃᓄᓕᒫᓄᑦ ᖃᕋᓴᐅᔭᒃᑯᑦ ᑐᑭᓯᒋᐊᕈᑎᖃᕐᕕᒋᕙᑦᑕᖏᑎᒍᑦ ᖃᐅᔨᒃᑲᐃᔾᔪᑎᒋᓪᓗᒋᑦ ᑭᒃᑯᑐᐃᓐᓇᕐᓄᑦ ᐱᐅᔫᑎᐊᓗᓐᓂᑦ ᐅᖃᓕᒫᕈᒥᓇᖅᑐᓂᑦ ᐊᒻᒪᓗ ᐊᑐᖅᑕᐅᖃᑦᑕᕈᓐᓇᖅᑐᓂᑦ ᐱᔭᔅᓴᐅᔪᓂᑦ ᓱᕈᓯᕐᓄᑦ ᐃᓚᒌᓄᓪᓗ.

ᑎᓴᒪᖓᓐᓂ ᐊᕐᕌᒍᑕᒫᑦ ᐃᙱᐅᓯᐅᓕᐅᑎᑎᑦᑎᓂᖅ ᐊᒻᒪᓗ ᐅᖃᓗᕋᐅᔭᐅᓕᐅᑎᑎᑦᑎᓂᖅ ᐅᖓᕙᕆᐊᖅᑕᐅᓚᐅᕐᖓᑦ ᒪᑐᕕᔅᓴᖓ ᒫᑦᓯ 6, 2020ᒧᑦ, ᑭᒃᑯᑐᐃᓐᓇᓕᒫᑦᑎᐊᑦ ᐱᓇᓱᐊᕈᓐᓇᖁᓪᓗᒋᑦ ᑎᑎᕋᕐᓯᒪᔭᖏᓐᓄᑦ. ᐃᓚᒋᔭᐅᓂᐊᖅᑐᑦ ᑎᓕᐅᖅᑕᐅᕗᑦ ᓇᒻᒥᓂᖅ ᓴᓇᐅᒐᖏᓐᓂᒃ ᓇᐃᑦᑑᑎᓂᑦ ᐃᙱᐅᓯᕐᓂᑦ ᐅᕝᕙᓘᓐᓃᑦ ᐅᖃᓗᕋᐅᔭᐅᑎᓂᑦ (50ᓂᑦ ᐅᖃᐅᓯᖅᑕᓕᓐᓂᑦ ᐅᕝᕙᓘᓐᓃᑦ ᑐᖔᓂ) ᑐᓂᓯᖃᑦᑕᖁᔭᐅᓪᓗᑎᒃ ᕿᑭᖅᑕᓂᒃᑯᓐᓄᑦ ᖃᕋᓴᐅᔭᒃᑯᑦ ᐃᓄᓕᒫᓄᑦ ᑐᓴᕋᔅᓴᓕᕆᕕᒋᕙᑦᑕᖏᑎᒍᑦ (Facebook, Twitter, Instagram) ᐊᑐᕐᓗᑎᒃ ᑖᔅᓱᒥᖓ ᓇᓗᓇᐃᒃᑯᑕᕐᒥᒃ #QIAinuk20. ᓵᓚᔅᓴᖅᑐᖅ ᓵᓚᖃᐅᓯᐊᕋᔭᖅᑐᖅ $400ᓂᑦ, ᑐᖏᓕᐊ $300ᓂᑦ, ᐊᒻᒪᓗ ᐱᖓᔪᐊᑦ $200ᓂᑦ. ᑐᑭᓯᑎᑦᑎᓛᖅᑐᒍᑦ ᓵᓚᔅᓴᖅᑐᑦ ᓂᕈᐊᖅᑕᐅᓯᒪᓕᖅᑲᑕ.