ᐱᔾᔪᑦ: ᕿᑭᖅᑕᓂᒥᐅᑦ ᖃᓪᓗᓈᓃᑦᑐᓄᑦ ᐃᑲᔫᑎ – ᓂᕆᔭᒃᓴᖃᑦᑎᐊᕆᐊᖃᕐᓂᕐᒧᑦ ᐃᑲᔫᑎᖓ ᒪᑐᐃᖅᑐᖅ  ᐅᓪᓗᒥ ᑐᒃᓯᕋᐅᑎᓕᐅᕈᒪᔪᓄᑦ

ᐃᖃᓗᐃᑦ, ᓄᓇᕗᑦ – ᔪᓚᐃ  5, 2021 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓃᒃᑯᑦ) ᑐᒃᓯᕋᐅᑎᓕᐅᕈᒪᔪᑦ ᑐᒃᓯᕋᐅᑎᓕᐅᕈᓐᓇᖅᓯᔪᑦ ᕿᑭᖅᑕᓂᒥᐅᑕᓄᑦ ᐃᓄᖕᓂᑦ ᖃᓪᓗᓈᓃᑦᑐᓄᑦ − ᓂᕆᔭᒃᓴᖃᑦᑎᐊᕆᐊᖃᕐᓂᕐᒧᑦ ᐃᑲᔫᑎᓂᒃ.  ᑖᒃᑯᐊ ᐃᑲᔫᑎᑦ ᐊᑕᐅᓯᐊᕐᓗᑎᒃ ᑐᓂᓯᖃᑦᑕᕐᓂᐊᖅᑐᑦ $1000ᓂ ᐊᑐᓂ ᐃᒡᓗᖃᖅᑎᐅᔪᓄᑦ, ᑕᐃᒃᑯᓄᖓ ᐱᔪᓐᓇᕐᓂᖃᖅᑐᓄᑦ ᕿᑭᖅᑕᓂᒥᐅᑕᐅᔪᓄᑦ ᐃᓄᖕᓂ.  ᑖᒃᑯᐊ ᐃᑲᔫᑎᑦ ᐃᒫᒃ ᐋᖅᑭᒃᓯᒪᓂᐊᖅᑐᑦ ᑕᐃᒃᑯᐊ ᓯᕗᓪᓕᐅᔪᑦ ᑐᒃᓯᕋᐅᑎᓕᐅᖅᑐᑦ ᐱᑎᑕᐅᖃᑦᑕᕐᓂᐊᖅᑐᑦ, ᑎᑭᓪᓗᒍ ᔪᓚᐃ 30ᒧᑦ ᐅᕝᕙᓘᓐᓃᑦ ᑮᓇᐅᔭᖃᕈᓐᓃᖅᐸᑦ.

ᕿᑭᖅᑕᓂᒥᐅᓄᑦ ᐃᑲᔫᑎᑦ ᖃᓪᓗᓈᓃᑦᑐᓄᑦ ᐊᑐᐃᓐᓇᐅᔪᑦ ᕿᑭᖅᑕᓂᒥᐅᓄᑦ ᖃᓪᓗᓈᓃᑦᑐᓂᒃ ᐊᕐᕌᒍᖃᖅᑐᓄᑦ 16ᓂ ᐅᖓᑖᓄᑦ ᐊᕐᕌᒍᑖᕐᓂᐊᖅᑐᓄᑦ  ᔪᓚᐃ 30, 2021ᒥ.  ᑖᓐᓇ ᐱᓕᕆᐊᒃᓴᖅ ᐊᑕᐅᓯᐊᖅᑕᐅᓗᓂ ᑐᒃᓯᕋᕐᕕᐅᔪᓐᓇᖅᑐᖅ . ᐊᑕᐅᓯᐅᙱᑦᑐᓂᒃ ᑐᒃᓯᕋᐅᑎᓕᐅᖅᑐᖃᖅᐸᑦ ᐃᒡᓗᖃᑎᒌᒃᑐᓂᑦ ᐊᒡᒑᖅᑕᐅᖃᑦᑕᕐᓂᐊᖅᑐᑦ.  ᐊᑭᓕᐅᓯᐊᑦ ᓯᒃᑭᒃᑯᑦ ᓴᖅᑭᑕᐅᓗᑎᒃ ᑎᑎᖅᑲᒃᑯᕕᒃᑯᑦ ᓇᒃᓯᐅᔾᔭᐅᖃᑦᑕᕐᓂᐊᖅᖢᑎᒃ.  ᑐᒃᓯᕋᖅᑐᑦ ᐅᑕᖅᑭᑦᑎᐊᖁᔭᐅᕗᑦ ᑎᑕᐅᓇᓱᖕᓂᖏᓐᓄᑦ 4ᓂ ᐱᓇᓱᐊᕈᓯᕐᓂ ᐱᓕᕆᐊᖑᒋᐊᖃᕐᓂᖓᓄᑦ.

ᑐᒃᓯᕋᐅᑎᓕᐅᕈᒪᒍᕕᑦ ᑕᑯᒋᐊᕐᓗᑎᑦ ᐅᕗᖓ  https://www.qia.ca/food-security-qikiqtani-urban-inuit-program/. ᐃᑲᔪᖅᑕᐅᒋᐊᖃᕈᕕᑦ ᑐᒃᓯᕋᐅᑎᓕᐅᕐᓂᕐᒧᑦ, ᐊᐱᖅᑯᑎᒃᓴᖃᕈᕕᓪᓘᓐᓃᑦ ᕿᑭᖅᑕᓃᒃᑯᑦ ᓄᕙᓐᓇᕐᔪᐊᖅ-19ᒧᑦ ᑐᕌᖓᔪᓂᒃ ᐱᓕᕆᐊᓂᒃ, ᖃᐅᔨᒋᐊᕐᕕᒃᓴᐅᔪᑦ ᓄᓇᓕᖕᓂᑦ ᑐᓴᐅᒪᑎᑦᑎᔨᐅᔪᑦ ᓄᓇᒋᔭᕐᓂᑦ ᐅᕝᕙᓘᓐᓃᑦ ᐅᖄᓚᓗᑎᑦ ᕿᑭᖅᑕᓃᒃᑯᑦ ᓄᕙᓐᓇᕐᔪᐊᖅ-19ᒧᑦ ᐅᖄᓚᕕᒃᓴᒧᑦ ᐅᕗᖓ  (867) 975-8383, ᐅᕝᕙᓘᓐᓃᑦ ᓇᒃᓯᐅᑎᓗᑎᑦ ᐃᕐᖐᓐᓈᕈᑎᑎᒍᑦ ᐅᕗᖓ  COVID-19@qia.ca.

ᑖᓐᓇ ᕿᑭᖅᑕᓂᒥᐅᑕᓄᑦ ᐃᓄᖕᓄᑦ ᐱᓕᕆᐊᖓ ᐅᐃᒍᒋᐊᕈᑎᒋᔭᐅᔪᖅ ᐱᓕᕆᐊᖑᖅᑳᓚᐅᖅᑐᒥᒃ ᓄᕙᓐᓇᕐᔪᐊᖅ-19ᒧᑦ ᐱᓕᕆᐊᖑᓚᐅᖅᑐᓂᒃ ᓂᕆᔭᒃᓴᖃᑦᑎᐊᕆᐊᖃᕐᓂᕐᒧᑦ ᐱᓕᕆᐊᕐᒥᑦ ᓴᖅᑭᑕᐅᓚᐅᖅᑐᒥᑦ ᐄᐳᓪ 2020ᒥ.  ᑖᒃᑯᐊ ᑮᓇᐅᔭᐃᑦ ᑕᒪᑐᒧᖓ ᐱᓕᕆᐊᕐᒥᑦ $500,000 ᖑᔪᑦ ᐊᑐᖅᑕᐅᓂᐊᖅᑐᑦ.

ᑐᑭᓯᒃᑲᓐᓂᕆᐊᖃᕈᕕᑦ, ᖃᐅᔨᒋᐊᕐᕕᒃᓴᖅ:

ᐃᓄᒃᓱᒃ ᐊᖅᓴᕐᓂᖅ
ᐱᓕᕆᐊᒃᓴᓄᑦ ᐊᐅᓚᑦᑎᔨ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
COVID-19@qia.ca
(867)975-8383 ᐅᕝᕙᓘᓐᓃᑦ
1.800.667.2742