ᑕᒫᓂ ᐊᐅᔭᐅᓂᐊᖅᑐᒥ, ᖁᓕᐅᙱᒐᖅᑐᓂᑦ ᐋᖅᑭᔅᓱᑐᐃᓐᓇᕆᐊᓕᓐᓂᑦ ᐃᓪᓗᔅᓴᓂᑦ ᐃᒡᓗᓕᒻᒨᕈᔾᔨᓛᖅᑐᑦ, ᓴᓇᔭᐅᒋᐊᓯᓛᖅᑐᑦ ᐅᑭᐊᔅᓵᖑᓕᖅᑲᑦ. ᑖᒃᑯᐊ ᐃᓪᓗᔅᓴᐃᑦ ᐃᓚᒋᔭᐅᕗᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐃᖅᑲᓇᐃᔮᖏᓐᓄᑦ ᐊᒥᓱᕈᒃᑲᓐᓂᖁᓪᓗᒋᑦ ᐃᓪᓗᑖᖑᖃᑦᑕᕈᓐᓇᓂᐊᖅᑐᑦ ᐊᑭᓖᑦ ᐅᓇᒻᒥᓇᕐᔫᒥᔪᓂᑦ ᐊᒻᒪᓗ ᐃᓕᖅᑯᓯᑦᑎᓐᓄᑦ ᓈᒻᒪᔾᔫᒥᔪᓂᑦ ᐃᓪᓗᔅᓴᓂᑦ ᐃᓄᓐᓄᑦ ᐃᓚᒌᓄᑦ ᓄᓇᓕᓕᒫᓂᑦ ᕿᑭᖅᑕᓂ.
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᒫᓐᓇ 21ᓂᒃ ᐋᖅᑭᔅᓱᑐᐃᓐᓇᕆᐊᓕᓐᓂᑦ ᐃᓪᓗᓕᐅᕐᖓᑕ ᐃᒃᐱᐊᕐᔪᒻᒥ, ᑲᖏᖅᑐᒑᐱᒻᒥ, ᐊᐅᓱᐃᑦᑐᕐᒥ, ᒥᑦᑎᒪᑕᓕᒻᒥᓗ, ᐱᔭᕇᖅᑕᐅᒍᒫᕐᓂᐊᖅᑐᑎᒃ ᐅᑭᐊᔅᓵᖅ 2026ᒥ. ᐱᔭᕇᕐᑕᐅᑉᐸᑕ, ᐃᓪᓗᐃᑦ ᑐᓂᔭᐅᓛᖅᑐᑦ ᐃᒡᓗᕗᒃᑯᓐᓄᑦ, ᓇᒻᒥᓂᕆᔭᐅᓛᕐᖓᑕ ᐊᐅᓚᑕᐅᓗᑎᓪᓗ ᑖᒃᑯᓇᙵᑦ. ᐃᒡᓗᕗᑦ, ᐃᒫᒃ ᑐᑭᓕᒃ “ᐃᒡᓗᕗᑦ”, ᐋᖅᑭᑦᑕᐅᕋᑖᕐᓯᒪᔪᑦ ᖃᑭᒪᒍᑎᔅᓴᓕᐅᕋᓱᐊᖅᑎᐅᒐᑎᒃ ᐃᓪᓗᓕᕆᓂᕐᒧᑦ ᑎᒥᐅᔪᑦ. ᐃᓄᐃᑦ ᑐᔅᓯᕋᐅᓯᐅᖃᑦᑕᕈᓐᓇᕐᓯᓛᕐᖓᑕ ᐃᓪᓗᑖᕈᒪᓗᑎᒃ ᑖᒃᑯᓂᖓ ᐃᓪᓗᓂᑦ. ᐃᒡᓗᕗᑦ ᑐᑭᓯᑎᑦᑎᒋᐊᒃᑲᓐᓂᓛᖅᑐᑦ ᑭᒃᑯᑦ ᑐᔅᓯᕋᖃᑦᑕᕈᓐᓇᓂᐊᕐᒪᖔᑕ, ᐊᑐᖅᑐᐊᖃᑦᑕᕈᓐᓇᓂᐊᕐᒪᖔᑕ, ᐊᒻᒪᓗ ᓯᕗᓂᔅᓴᑎᓐᓂ ᐸᕐᓇᐅᑏᑦ ᒥᔅᓴᓄᑦ ᑎᑎᕋᖅᑕᐅᑦᑎᐊᕐᓯᒪᓕᖅᑲᑕ ᑕᒪᒃᑯᐊ.
ᑖᒃᑯᐊ ᐱᔭᕇᖅᑕᐅᕙᓪᓕᐊᔪᑦ ᐃᓚᒋᔭᐅᓪᓗᑎᒃ ᓄᓇᕗᑦ ᑐᙵᑯᒃᑯᑦ ᑎᒥᖓᓐᓂ (NTI) ᐊᖏᕐᕋᑦᓴᓕᐅᓚᐅᖅᑕ − ᓄᓇᕗᒻᒥ ᐃᓄᓐᓄᑦ ᐃᓪᓗᓕᕆᓂᕐᒧᑦ ᖃᓄᖅᑑᕈᑎᔅᓴᐅᓪᓗᑎᒃ ᐸᕐᓇᐅᑏᑦ.
ᑕᒪᕐᒥᒃ, ᑖᒃᑯᐊ 30 ᓄᑖᑦ ᐋᖅᑭᔅᓱᒐᐃᑦ ᐃᓪᓗᐃᑦ ᓴᓇᔭᐅᓯᒪᔪᑦ ᐊᑑᑎᓂᖃᑦᑎᐊᖁᓪᓗᒋᑦ ᑭᙴᒪᒋᕙᑦᑕᖏᓐᓄᑦ ᐃᓄᐃᑦ ᐃᓚᒌᑦ ᐊᒻᒪᓗ ᐅᑭᐅᖅᑕᖅᑐᒥᐅᑦ ᓄᓇᖓᑕ ᖃᓄᐃᑦᑑᓂᖓᓄᑦ. ᐊᑐᓂᑦ ᐃᓪᓗᐃᑦ ᐃᓚᖃᕐᓂᐊᖅᑐᑦ ᐃᓄᐃᑦ ᐃᓅᓯᖏᓐᓄᑦ ᓴᓇᓯᒪᓗᑎᒃ ᐊᒻᒪᓗ ᖃᐅᑕᒫᑦ ᐊᑐᓪᓚᑦᑖᐸᑦᑕᖏᓐᓄᑦ ᓄᓇᕗᒻᒥ ᓄᓇᓖᑦ, ᒪᑯᐊᖑᓪᓗᑎᒃ:
- ᐱᕕᑐᔪᑦ ᐳᓛᕐᕕᖏᑦ ᐊᒻᒪᓗ ᑰᖃᕐᕕᖏᑦ, ᐃᓂᖃᑦᑎᐊᖃᑦᑕᓂᐊᕐᖓᑕ ᑭᖑᕚᕇᒡᒍᑏᑦ ᐃᓚᒌᑦ ᑲᑎᔭᕋᐃᑉᐸᑕ ᐊᒻᒪᓗ ᓂᕿᓕᕆᕕᔅᓴᓂᑦ
- 5 ᐊᓇᕐᕕᖏᑦ ᐃᓄᒋᐊᓐᓂᕐᓴᓄᑦ ᐊᑲᐅᓂᕐᓴᐅᖁᓪᓗᒋᑦ
- ᐃᓛᒃᑰᖓᔪᑦ ᐃᓪᓗᐃᑦ ᐃᓂᖃᕐᓗᑎᒃ ᐊᖑᓇᓱᑦᑐᕐᓯᐅᖏᓐᓄᑦ ᓅᓯᒪᔪᕐᓯᐅᑎᖏᓐᓄᓪᓗ ᓱᓇᒃᑯᑖᖏᓐᓄᑦ ᓯᓚᒥ
- ᓂᓪᓕᓇᖅᑐᒥᒃ ᑐᕐᓱᖃᕐᓗᑎᒃ / ᓯᕐᓗᐊᕐᒥᒃ ᑐᖅᑯᕐᓯᓯᒪᕕᔅᓴᒥᒃ ᐊᓃᖅᑐᕐᓯᐅᑎᖏᓐᓄᑦ ᐊᒻᒪᓗ ᓅᑦᑐᕐᓯᐅᑎᖏᓐᓄᑦ
- ᐊᒡᒍᐃᕕᖃᕐᓗᑎᒃ ᐊᒻᒪᓗ ᓯᕐᓗᐊᖃᕐᓗᑎᒃ ᓯᕐᓗᐊᖓᑕ ᐊᓯᐊᓂᒃ, ᓈᒪᓗᓂ ᓴᕕᕋᔭᓐᓂᒃ ᐊᒡᒍᐃᕕᖃᕐᓗᑎᒃ ᐊᒻᒪᓗ ᓴᕕᕋᔭᒻᒥᒃ ᓵᖃᕐᓗᑎᒃ ᓂᕿᓕᕆᕕᔅᓴᐅᓗᑎᒃ ᐃᓄᔅᓯᐅᑎᓂᑦ ᓂᕿᓂᑦ
- ᐱᖓᓱᓂᑦ ᐃᓪᓗᕈᓯᖃᕐᓗᑎᒃ, 1700 sq ft
- ᐃᓪᓘᑉ ᐅᖓᑖᒍᑦ ᐃᓯᕐᕕᖃᕐᓗᑎᒃ ᐃᓯᕋᔅᓴᐅᓂᐊᕐᖓᑕ ᐅᑭᐅᖑᑎᓪᓗᒍ
ᐃᓚᒋᔭᐅᓪᓗᓂ ᐃᑲᔫᑎᓄᑦ ᐃᓄᐃᑦ ᐃᓅᓯᕆᕙᑦᑕᖏᓐᓄᑦ, ᐃᓪᓗᔅᓴᐃᑦ ᓴᓇᔭᐅᓯᒪᓂᐊᖅᑐᑦ ᐊᑑᑎᖃᑦᑎᐊᕈᓐᓇᖁᓪᓗᒋᑦ ᐅᑭᐅᖅᑕᖅᑑᑉ ᓯᓚᖓᓂ ᐊᒻᒪᓗ ᐅᓯᔭᐅᔪᓐᓇᓂᐊᕐᖓᑕ ᐱᔭᕆᐊᑐᒐᓗᐊᖅᑎᓪᓗᒍ ᐅᓯᖃᑦᑕᕐᓂᖅ ᓴᓇᖃᑦᑕᓂᕐᓗ ᓄᓇᕗᒻᒥ.
ᕿᑭᖅᑕᓂᒃᑯᑦ ᓂᕆᐅᑉᐳᑦ ᑕᑯᓛᕆᐊᔅᓴᖅ ᑖᒃᑯᓂᖓ ᐃᓪᓗᓕᐊᖑᓛᖅᑐᓂᑦ ᐃᒡᓗᓕᒻᒥ ᐊᒻᒪᓗ ᐊᓯᖏᓐᓂᒃ ᖁᑦᑎᑦᑐᒥᐅᓂᑦ ᓄᓇᓕᓐᓂᑦ, ᐊᒻᒪᓗ ᑲᔪᓯᑎᑦᑎᓂᕐᒥᒃ ᑕᒪᑐᒥᖓ ᐊᒥᓱᕈᕐᐸᓪᓕᐊᖁᓪᓗᒋᑦ ᐃᓄᓐᓄᑦ−ᓯᕗᓕᕐᓯᒍᑕᐅᔪᓂᑦ ᐃᓪᓗᓕᕆᓂᕐᒧᑦ ᐋᖅᑭᓯᒪᔾᔪᑎᔅᓴᐃᑦ ᕿᑭᖅᑕᓂ ᓄᓇᓕᓕᒫᓂᑦ.
