ᐃᖃᓗᐃᑦ, ᓄᓇᕗᑦ, ᓯᑎᐱᕆ 24, 2025 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓃᒃᑯᑦ) ᖁᕕᐊᓱᒃᖢᑎᒃ ᑐᓴᖅᑎᑦᑎᕗᑦ ᐃᓕᓐᓂᐊᕆᐊᒃᑲᓐᓂᕈᑎᒃᓴᖅᑖᖅᑎᑕᐅᔪᓂᑦ ᐊᕐᕌᒍᒥ 2025-2026ᒥ ᐃᓕᓐᓂᐊᕐᓇᐅᔪᒧᑦ. ᑕᐃᒪᙵᓂᑦ 2016ᒥᑦ, ᕿᑭᖅᑕᓃᒃᑯᑦ ᑐᓂᓯᓯᒪᔪᑦ $1.6 ᒥᓕᐊᓂᒃ ᐃᓕᓐᓂᐊᕆᐊᒃᑲᓐᓂᕈᑎᒃᓴᓂ ᐃᑲᔫᑎᓂᒃ ᐃᓄᖕᓄᑦ ᕿᑭᖅᑕᓂᒥᐅᓄᑦ ᐃᓕᓐᓂᐊᖅᑎᓄᑦ
ᐊᕐᕌᒍᑕᒫᑦ, ᕿᑭᖅᑕᓃᒃᑯᑦ ᐊᕙᒃᑯᑎᖃᖃᑦᑕᖅᑐᑦ $205, 000ᓂ ᐃᓕᓐᓂᐊᕆᐊᒃᑲᓐᓂᕈᑎᒃᓴᓂ ᐃᓄᖕᓄᑦ ᕿᑭᖅᑕᓂᒥᐅᓄᑦ ᓯᓚᑦᑐᖅᓴᕐᕕᖕᓄᑦ ᐃᓕᓐᓂᐊᕐᓂᐊᖅᑐᓄᑦ. ᑖᒃᑯᓇᙵᑦ ᑮᓇᐅᔭᓂᑦ,, $200,000ᑖᓚ ᐊᒡᒍᖅᑕᐅᕙᒃᑐᑦ 80ᑎᓂᒃ ᐃᓕᓐᓂᐊᕆᐊᒃᑲᓐᓂᕈᑎᒃᓴᖃᖅᖢᑎᒃ ᐊᑐᓂ ᐊᑭᖃᖅᖢᓂ $2,500, ᑐᓂᔭᐅᕙᒃᑐᑦ ᓯᕗᓪᓕᖅᐹᓄᑦ ᑕᑕᑎᖅᓯᖅᑳᖅᑐᓂᒃ.
ᓱᓕ, ᕿᑭᖅᑕᓃᒃᑯᑦ ᑐᓂᓯᕙᒻᒥᔪᑦ ᔮᓐ ᐊᒪᕈᐊᓕᒃ ᐃᓕᓐᓂᐊᕆᐊᒃᑲᓐᓂᕈᑎᒥᒃ, ᐊᑭᖃᖅᑐᒥᒃ $5,000ᑖᓚᓂᒃ ᐊᑕᐅᓯᕐᒧᑦ ᐃᓕᓐᓂᐊᖅᑎᒧᑦ ᐱᕙᓪᓕᐊᔪᓕᕆᔨᐅᒋᐅᖅᓴᖅᑐᒥᒃ ᐅᕝᕙᓘᓐᓃᑦ ᐃᓕᓐᓂᐊᖅᑐᓂᒃ ᖃᑭᒪᑎᑦᑎᓂᐊᖅᑐᒥᒃ ᐃᓄᐃᑦ ᐅᖃᐅᓯᖓᓂᒃ ᐃᓕᖅᑯᓯᖓᓂᓪᓗ. ᑖᓐᓇ ᐃᓕᓐᓂᐊᕆᐊᒃᑲᓐᓂᕈᑎᒃᓴᖅ ᓴᖅᑭᑕᐅᓯᒪᔪᖅ ᐅᐱᒋᔭᐅᓪᓗᓂ ᔮᓐ ᐊᒪᕈᐊᓕᒃ ᑐᓂᓯᓯᒪᖃᑦᑕᓚᐅᕐᖓᓂᒃ ᐊᒻᒪᓗ ᐃᓄᖕᓂᑦ ᓄᓇᕗᒥᐅᓂᒃ ᓯᕗᒧᐊᖅᑎᑦᑎᒐᓱᖃᑦᑕᖅᖢᓂ, ᐊᒻᒪᓗ ᐱᓗᐊᖅᑐᒥᒃ ᐃᓄᐃᑦ ᕿᑭᖅᑖᓗᖕᒥᐅᑦ.
ᑕᕝᕙ ᐊᕐᕌᒍᒥ, ᑖᓐᓇ ᔮᓐ ᐊᒪᕈᐊᓕᒃ ᐃᓕᓐᓂᐊᕆᐊᒃᑲᓐᓂᕈᑎᒃᓴᖅ ᑐᓂᔭᐅᓚᐅᖅᑐᖅ ᑯᕆᔅᑎ ᐊᕿᐊᕈᕐᒧᑦ ᐃᖃᓗᒻᒥᐅᑕᐅᒧᑦ, ᑐᓵᔨᐅᓂᕐᒧᑦ ᑐᑭᓕᐅᕆᔨᐅᓂᕐᒧᓪᓗ ᐃᓕᓐᓂᐊᖅᑎᓪᓗᒍ ᑐᓪᓕᕆᔭᖓᓂᑦ ᓄᓇᕗᒥ ᓯᓚᑦᑐᖅᓴᕐᕕᖕᒥ.
ᕿᑭᖅᑕᓃᒃᑯᑦ ᐅᐱᒍᓱᒃᐳᑦ ᐃᑲᔪᖅᑐᐃᔪᓐᓇᕐᒪᑕ 2025-2026ᒥ ᐊᕐᕌᒍᖓᓂ ᐃᓕᓐᓂᐊᕆᐊᒃᑲᓐᓂᕈᑎᒃᓴᖅᑖᖅᓯᒪᔪᓄᑦ ᐊᒻᒪᓗ ᐃᓕᓐᓂᐊᖅᑕᒥᓂᒃ ᓯᓚᑦᑐᖅᓴᕐᕕᖕᒥ ᑲᔪᓯᑦᑎᐊᖁᓇᖅᖢᑎᒃ.
ᑐᓴᒃᑲᓐᓂᕈᒪᒍᕕᑦ, ᖃᐅᔨᒋᐊᕐᕕᒃᓴᖅ:
ᑭᐊᕋᓐ ᕙᓚᕋᑎ ᑐᑭᒧᐊᒃᑎᑦᑎᔨ ᑐᑭᒧᐊᒍᑎᒃᓴᓂ ᑐᓴᐅᒪᖃᑦᑕᐅᑎᓄᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᐅᖄᓚᐅᑖ) 867.975.8398 ᐊᑭᖃᙱᑦᑐᒧᓪᓘᓐᓃᑦ 1.800.667.2742
kflaherty@qia.ca
