ᕿᑭᖅᑕᓃᒃᑯᑦ ᐊᖓᔪᖅᑳᖓ ᐃᖅᑲᓇᐃᔭᖅᑏᓪᓗ ᐳᓛᕆᐊᓚᐅᖅᑐᑦ ᓴᓂᑭᓗᐊᕐᒧᑦ

ᕿᑭᖅᑕᓃᒃᑯᑦ ᐊᖓᔪᖅᑳᖓ ᐃᖅᑲᓇᐃᔭᖅᑏᓪᓗ ᐳᓛᕆᐊᓚᐅᖅᑐᑦ ᓴᓂᑭᓗᐊᕐᒧᑦ

 In blog-inuk

 

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓃᒃᑯᑦ) ᐊᖓᔪᖅᑳᖓ ᐲᔨᐊ ᐊᕿᐊᕈᖅ ᓯᕗᒃᑲᖅᑎᒋᔭᐅᓪᓗᓂ ᐳᓛᕆᐊᓚᐅᖅᑐᑦ ᓴᓂᑭᓗᐊᕐᒧᑦ ᐱᓇᓱᐊᕈᓯᑦᑎᓐᓂ ᐅᖃᐅᓯᖃᕆᐊᖅᑐᖅᓯᒪᓪᓗᓂ ᕿᑭᖅᑕᓃᒃᑯᑦ ᐱᓕᕆᐊᖏᑕ ᒥᒃᓵᓄᑦ ᐊᒻᒪᓗ ᐅᖃᐅᓯᕆᓪᓗᒋᑦ ᓯᕗᓪᓕᐅᔾᔭᐅᔪᒪᓂᐊᖅᑐᓂᒃ 2020ᒥ.  ᐊᖓᔪᖅᑳᖅ ᐊᕿᐊᕈᖅ ᐃᖅᑲᓇᐃᔭᖅᑎᓕᔭᖅᖢᓂ ᐱᖃᓯᐅᑎᓪᓗᒍ ᐄᕙ ᐋᕆᐊᒃ.  ᕿᑭᖅᑕᓃᒃᑯᑦ ᐃᖅᑲᓇᐃᔭᖅᑎᖏᑦ ᑲᑎᒪᖃᑎᖃᕈᓐᓇᓚᐅᖅᑐᑦ ᐅᒪᔪᕐᓂᐊᖅᑎᒃᑯᑦ ᑲᑎᒪᔨᖏᓐᓂᒃ, ᒪᐃᔭᒥᒃ ᑲᑎᒪᔨᖏᓪᓗ.  ᑖᒃᑯᐊ ᐃᖅᑲᓇᐃᔭᖅᑎᑦ ᑐᙵᓴᐃᓚᐅᕐᒥᔪᑦ ᑭᓇᒃᑯᑐᐃᓐᓇᕐᓄᑦ ᓴᓂᑭᓗᐊᕐᒥᐅᓂ ᐊᒻᒪᓗ ᐃᓕᓐᓂᐊᖅᑎᑦᓯᓚᐅᖅᖢᑎᒃ ᐃᓕᓐᓂᐊᖅᑎᓂ ᖁᕝᕙᐅᒪᓂᖅᓴᒥᒃ ᐃᓕᓐᓂᐊᖅᑎᐅᔪᓄᑦ.

ᕿᑭᖅᑕᓃᒃᑯᑦ ᐱᒋᐊᕈᑎᖃᓚᐅᖅᑐᑦ ᑲᑎᒪᑎᑦᓯᓪᓗᑎᒃ ᕼᐊᒻᓚᒃᑯᑦ ᑲᑎᒪᕕᐊᓂ ᔭᓐᓄᐊ 27ᒥ 20ᑎᓂ ᓄᓇᓕᖕᒥ ᓯᕗᓕᖅᑎᐅᔪᓂ ᑲᑎᒪᖃᑎᒋᔭᐅᓪᓗᑎᒃ.  ᑖᓐᓇ ᑲᑎᒪᓂᖅ ᐱᕕᒃᓴᕆᔭᐅᓚᐅᕐᒪᑦ ᕿᑭᖅᑕᓃᒃᑯᓐᓄᑦ ᐅᖃᐅᓯᖃᕈᓐᓇᖅᖢᑎᒃ ᖃᓄᖅ ᐱᓕᕆᐊᖑᓯᒪᓚᐅᕐᒪᖔᑦ ᐱᔪᓐᓇᖅᓯᑎᓪᓗᒋᑦ ᑕᓪᓗᕈᑎᐅᑉ ᐃᒪᖓᓄᑦ ᐊᒻᒪ ᑐᕙᐃᔪᐃᑦᑐᕐᒧᓪᓗ ᐊᖏᕈᑎᓂ ᐊᒻᒪᓗ ᑐᓴᕈᒪᓪᓗᑎᒃ ᓄᓇᓕᖕᒥᐅᓂᒃ ᐸᕐᓇᐅᑎᒋᔭᖏᑕ ᒥᒃᓵᓄᑦ.

ᐅᓐᓅᓕᖅᑎᓪᓗᒍ, ᓄᓇᓕᖕᒥᐅᑦ ᑲᑎᓚᐅᖅᑐᑦ ᓄᓇᓕᐅᑉ ᑲᑎᑦᑕᕐᕕᐊᓂ ᕿᑭᖅᑕᓃᒃᑯᑦ ᑐᙵᓱᒃᑎᑦᓯᓂᐊᕐᒪᑕ.  ᑖᓐᓇ ᖃᓄᐃᓕᐅᕈᑎᐅᔪᖅ ᐱᒋᐊᕈᑎᖃᓚᐅᖅᑐᖅ ᐃᓄᒃᓯᐅᑎᓂᒃ ᓂᕿᑑᒪᓚᐅᖅᖢᑎᒃ ᐊᒻᒪᓗ ᐊᓯᖏᓐᓂᒃ ᓂᕆᔭᒃᓴᓂ ᕿᑭᖅᑕᓃᒃᑯᓐᓂᑦ, ᐅᒪᔪᕐᓂᐊᖅᑎᒃᑯᑦ ᑲᑎᒪᔨᖏᓐᓂᑦ ᐊᒻᒪᓗ ᑯᐊᐸᒃᑯᓐᓂᑦ.

ᓂᕆᒌᕐᒪᑕ, ᕿᑭᖅᑕᓃᒃᑯᑦ ᐃᖅᑲᓇᐃᔭᖅᑎᖏᑦ ᑕᕆᔭᖅᑎᑦᓯᓚᐅᖅᑐᑦ ᓇᐃᑦᑐᒥᒃ ᐊᒻᒪᓗ ᓴᖅᑭᔮᖅᑎᑦᓯᓪᓗᑎᒃ ᑐᑭᓯᒍᑎᒃᓴᓂ ᓇᓗᓇᐃᔭᐃᔪᓂᒃ ᐱᓕᕆᐊᖑᓚᐅᖅᑐᓂᒃ 2019ᒥ ᐊᒻᒪᓗ ᓇᓗᓇᐃᔭᐃᓯᒪᓪᓗᑎᒃ ᐱᓕᕆᐊᒃᓴᕆᔭᕗᑦ ᐱᔭᒃᓴᕆᓂᐊᖅᑕᕗᓪᓗ 2020ᒥ.  ᐱᔭᕇᕈᑎᖃᓚᐅᖅᑐᑦ ᓇᓚᐅᑦᑖᖅᑎᑦᓯᓪᓗᑎᒃ ᓄᓪᓗᒐᒃᓴᓂᒃ ᓱᕐᓗ ᕿᓯᖕᓂ, ᖃᕆᓴᐅᔭᕋᓛᓂ ᐊᒻᒪᓗ ᓂᔾᔭᐅᓯᔭᐅᑎᓂᒃ ᐅᖃᓕᒫᒐᓂᓗ ᓴᓇᔭᐅᓯᒪᔪᓂᑦ ᕿᑭᖅᑕᓃᒃᑯᑦ ᐃᑲᔫᑎᒋᕙᒃᑕᖏᓐᓂᑦ.

ᖃᐅᖕᒪᑦ ᐅᓪᓛᒃᑯᑦ, ᕿᑭᖅᑕᓃᒃᑯᑦ ᐸᑦᓵᓕᒃ ᐃᓕᓐᓂᐊᕐᕕᖕᒨᓚᐅᖅᑐᑦ ᐃᓕᓐᓂᐊᖅᑎᑦᓯᔭᖅᑐᖅᖢᑎᒃ ᐃᓕᓐᓂᐊᖅᑎᓂ ᒍᕇᑦ 7ᒥᑦ 12ᒧᑦ, ᐅᖃᐅᓯᐅᓚᐅᖅᑐᑦ ᐱᖃᓯᐅᑎᓚᐅᖅᑐᑦ 2018-19ᒥ ᐊᕐᕌᒍᒥ ᖃᓄᐃᓕᐅᕈᑎᒋᔭᐅᓯᒪᔪᓂᑦ ᑕᕐᕆᔭᒃᓴᑎᒍᑦ.  ᐅᖃᐅᓯᕆᓚᐅᖅᑕᕗᑦ ᐱᓕᕆᐊᒃᓴᕆᔭᕗᑦ ᐱᔭᒃᓴᕗᓪᓗ ᐊᒻᒪᓗ ᐅᖃᐅᓯᕆᓪᓗᒋᑦ ᐱᕕᒃᓴᐅᔪᓐᓇᖅᑐᓂᒃ ᐃᓅᓱᒃᑐᓄᑦ ᓱᕐᓗ ᑖᒃᑯᐊ ᐃᓕᓐᓂᐊᕐᓂᕐᒧᑦ ᐃᑲᔫᓯᐊᒃᓴᑦ ᐊᒻᒪᓗ ᕿᑭᖅᑕᓃᒃᑯᑦ ᐱᓕᒻᒪᒃᓴᐃᓂᕐᒧᑦ ᐃᓕᓐᓂᐊᖅᑎᑦᓯᓂᕐᒧᓪᓗ ᐃᖅᑲᓇᐃᔮᒃᓴᓄᑦ ᑲᑐᔾᔨᒍᑎᒋᔭᐅᓯᒪᔪᒥᒃ.

ᐳᓛᕆᐊᖅᓯᒪᓂᖏᑦ ᐱᔭᕇᕈᑎᒋᔭᐅᓚᐅᖅᑐᑦ ᓄᓇᓕᐊᕈᔾᔭᐅᓪᓗᑎᒃ ᐅᒪᔪᕐᓂᐊᖅᑎᒃᑯᓐᓄᑦ.  ᕿᑭᖅᑕᓃᒃᑯᑦ ᐃᖅᑲᓇᐃᔭᖅᑎᖏᑦ ᐆᒃᑐᕈᓐᓇᓚᐅᖅᑐᑦ ᓂᕆᓪᓗᑎᒃ ᐃᒪᕐᒥᐅᑕᓂᒃ ᐊᑐᐃᓐᓇᐅᔪᓄᑦ ᓴᓂᑭᓗᐊᕐᒥ ᐊᒻᒪᓗ ᐃᓕᒃᑲᓐᓂᕈᓐᓇᓚᐅᖅᖢᑎᒃ ᐅᒪᔪᖁᑎᒋᔭᐅᔪᓂ ᓴᓂᑭᓗᐊᕐᒥ.

ᖁᔭᓐᓇᒦᒃ ᑐᙵᓱᒃᑎᑦᓯᑦᓯᐊᓚᐅᕋᔅᓯ ᓴᓂᑭᓗᐊᕐᒥᐅᑦ, ᓂᕆᐅᓕᕇᖅᑐᒍᑦ ᑭᖑᓪᓕᕐᒥ ᐳᓛᕆᐊᓛᕐᓂᑦᑎᓐᓄᑦ!

 

Recommended Posts

ᑐᑭᓯᒋᐊᕐᕕᐅᑕ

ᑐᑭᓯᒋᐊᕆᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᓐᓄᑦ