QIA ELECTIONS - Our homeland, our future, our vote. Remember to cast your ballot. Learn More

ᕿᑭᖅᑕᓃᒃᑯᑦ ᓂᕈᐊᕐᓂᖓ - ᐊᖏᕐᕋᕗᑦ, ᓯᕗᓂᒃᓴᕗᑦ ᐊᒻᒪᓗ ᓂᕈᐊᕐᓂᕗᑦ. ᓂᕈᐊᕆᐊᖅᑐᕐᓂᐊᖅᐳᑎᑦ. ᑐᑭᓯᒃᑲᓐᓂᕆᑦ

ᕿᑭᖅᑕᓃᒃᑯᑦ ᐅᖃᐅᓯᖏᑦ ᓄᓇᕐᔪᐊᕐᒥ ᐳᕙᓪᓕᓗᕆᓂᕐᒧᑦ ᐅᓪᓗᒋᔭᖓᓂ

ᕿᑭᖅᑕᓃᒃᑯᑦ ᐅᖃᐅᓯᖏᑦ ᓄᓇᕐᔪᐊᕐᒥ ᐳᕙᓪᓕᓗᕆᓂᕐᒧᑦ ᐅᓪᓗᒋᔭᖓᓂ

 In blog-inuk, blog-inuk

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓃᒃᑯᑦ) ᓇᓗᓇᐃᖅᓯᓯᒪᖕᒪᑕ ᓄᖅᑲᖅᑎᑦᑎᒍᒪᓯᒪᓪᓗᑎᒃ ᐳᕙᓪᓗᓂᕐᒥᒃ ᓄᓇᑦᑎᓐᓂ, ᐊᒻᒪᓗ ᐃᓄᐃᑦ ᓄᓇᖓᓂ.  ᐳᕙᓪᓗᓕᖅᑎᑦᑎᑦᑕᐃᓕᒪᓂᕐᒥᒃ ᐊᒻᒪᓗ ᒪᒥᓴᖅᑕᐅᔪᓐᓇᖅᖢᓂ.  ᑭᓯᐊᓂ, ᐳᕙᓪᓗᖕᓂᖅ ᐆᒪᐃᓐᓇᕈᓐᓇᖅᑐᖅ ᐊᔪᖅᓴᕐᓂᖅᓴᐅᔪᓄᑦ.  ᖃᐅᔨᒪᔪᒍᑦ ᓄᖅᑲᖅᑎᑦᑎᓂᕐᒥᒃ ᐳᕙᓪᓗᖕᓂᕐᒥᒃ ᓄᓇᓕᑦᑎᓐᓂ ᐱᓕᕆᔪᖃᕆᐊᖃᕋᔭᕐᒪᑦ ᐊᒥᓱᓄᑦ ᐊᔾᔨᒌᑎᑦᑎᓗᑎᒃ ᐃᓪᓗᓕᕆᓂᕐᒥᒃ, ᓂᕿᒃᓴᖃᑦᑎᐊᕆᐊᖃᕐᓂᕐᒥᒃ, ᐃᓄᐃᑦ ᐃᖅᑲᓇᐃᔭᖅᑎᑕᐅᓂᖏᑦ ᐊᒻᒪᓗ ᐊᑐᐃᓐᓇᖃᖅᑎᑦᑎᓗᑎᒃ ᐃᓄᖕᓄᑦ ᑐᕌᖓᓂᐊᖅᑐᓂᒃ ᐊᒻᒪᓗ ᐃᓕᖅᑯᓯᑎᒍᑦ ᐊᑦᑕᕐᓇᓐᖏᑦᑐᒃᑯᑦ ᐸᕙᓪᓗᓕᕆᓂᕐᒥᒃ ᑲᒪᒋᔭᐅᓗᑎᒃ.  

ᑕᕝᕙᓂ ᑕᖅᑭᕐᒥ, ᑲᓇᑕᐅᑉ ᓯᕗᓕᖅᑎᖓ ᔭᔅᑎᓐ ᑐᕉᑑ ᒪᒥᐊᓐᓂᖃᓚᐅᕐᒪᑦ ᐃᓄᖕᓄᑦ ᐊᐅᓚᑕᐅᓂᕆᔭᐅᓚᐅᖅᑐᓂᒃ ᐳᕙᓪᓗᓚᐅᖅᓯᒪᔪᓂᒃ 1940ᓂᑦ 1960ᓂᓗ.  ᑖᓐᓇ ᒪᒥᐊᓐᓂᐅᔪᖅ ᐱᒻᒪᕆᐋᓗᒋᔭᐅᓚᐅᕐᒪᑦ, ᐊᒻᒪᓗ ᐱᖃᓯᐅᑎᓯᒪᓪᓗᓂ ᓄᑖᓂᒃ ᒐᕙᒪᑐᖃᒃᑯᓐᓂᑦ ᑮᓇᐅᔭᓂᒃ ᐊᑐᕐᓂᐊᖅᑐᓄᑦ ᓇᓂᓚᕗᑦ ᐱᒋᐊᕈᑎᒋᓯᒪᔭᖓᓂᒃ, ᐃᓄᖕᓄᑦ ᓯᕗᒃᑲᖅᑕᐅᔪᒥᒃ ᐃᑲᔪᖅᑐᖅᑕᐅᓪᓗᓂ ᒐᕙᒪᑐᖃᒃᑯᓐᓄᑦ.

ᑖᒃᑯᐊ ᓇᓂᓚᕗᑦ ᐱᒋᐊᕈᑎᖓ ᐃᑲᔪᕐᓂᐊᖅᑐᖅ ᐃᓄᖕᓂ ᐃᓚᒌᓄᑦ ᒪᒥᓴᖅᐸᓪᓕᐊᓕᕈᓐᓇᕐᓗᑎᒃ ᐊᒻᒪᓗ ᐃᓚᒋᔭᐅᓚᐅᖅᑐᓂᒃ ᓇᓂᓯᓇᓱᒍᓐᓇᖅᓯᓗᑎᒃ ᐳᕙᓪᓗᓚᐅᖅᓯᒪᔪᓂᑦ 1940ᓂᑦ 1960ᓄᑦ.  ᓇᓂᓚᕗᑦ ᐱᓕᕆᐊᖓ ᐃᑲᔪᖅᑐᖅ ᕿᓂᖅᑕᐅᓂᖏᓐᓂᒃ ᐃᓚᒋᔭᐅᓚᐅᖅᓯᒪᔪᑦ ᐅᖃᐅᔾᔪᐃᓪᓗᑎᒃ, ᖃᕆᓴᐅᔭᓂ ᐊᑐᐃᓐᓇᖃᕐᓂᕐᒥᒃ ᐊᒻᒪᓗ ᑮᓇᐅᔭᑎᒍᑦ ᐃᑲᔪᕈᑎᒃᓴᓂ ᑖᒃᑯᐊ ᐃᓚᒋᔭᐅᔪᑦ ᖃᓪᓗᓈᓕᐊᕈᓐᓇᖁᓪᓗᒋᑦ ᐃᓚᒋᔭᖏᑕ ᐃᓗᕕᖏᓐᓂᒃ ᑕᑯᔭᖅᑐᖅᑎᑕᐅᔪᓐᓇᖅᖢᑎᒃ.   

ᐅᓪᓗᒥ, ᕿᑭᖅᑕᓂ ᐃᓄᐃᑦ ᓱᓕ ᐊᒃᑐᖅᑕᐅᖃᑦᑕᖅᑐᑦ ᐳᕙᓪᓗᖕᓂᕐᒥᒃ 300ᓗᐊᖑᓪᓗᓂ ᐊᒥᓲᓂᖅᓴᐅᔪᑦ ᑕᐃᒃᑯᓂᖓᓐᓂᐅᖓᓂᑦ ᐊᓯᕗᑦ ᑲᓇᑕᒥᐅᑕᐅᔪᓂᒃ ᓄᓇᖃᖅᑳᖑᓐᖏᑦᑐᓂᒃ.  ᕿᑭᖅᑕᓃᒃᑯᑦ ᑲᔪᓰᓐᓇᖅᑐᒥᒃ ᐊᐅᔭᐅᖅᑐᖏᓐᓇᖅᑐᑦ ᑐᐊᕕᐊᖃᖁᔨᓪᓗᑎᒃ ᑮᓇᐅᔭᖃᖅᑎᑦᑎᓂᕐᒥᒃ ᕿᑭᖅᑖᓗᖕᒧᑦ ᐃᓄᐃᑦ ᐃᓅᓯᖏᑦ ᖃᑭᒋᐊᕈᓐᓇᕐᓂᐊᕐᒪᑕ ᐊᒻᒪᓗ ᐊᔾᔨᒌᓕᖅ ᑎᑕᐅᓗᑎᒃ ᐊᔾᔨᒌᑎᑕᐅᓐᖏᓗᐊᖅᑎᓪᓗᒋᑦ ᕿᑭᖅᑕᓇᒥᐅᑦ ᐊᓯᖏᓐᓂᐅᖏᓐᓂᑦ ᑲᓇᑕᒥᐅᓂᒃ.

ᕿᑭᖅᑕᓃᒃᑯᑦ ᐃᖅᑲᓇᐃᔭᖃᑎᖃᖅᑐᑦ ᓄᓇᓕᖕᓂᑦ, ᓄᓇᕗᑦ ᒐᕙᒪᒃᑯᓐᓂ ᓄᓇᕗᒥ, ᐊᒻᒪᓗ ᓄᓇᕗᑦ ᑐᓐᖓᕕᒃᑯᓐᓂ ᓴᖅᑭᑎᑦᑎᔪᓐᓇᕐᓂᐊᕐᒪᑕ ᓄᓇᕗᒥ ᐳᕙᓪᓗᓕᖅᑎᑦᑎᑕᐃᓕᓂᕐᒧᑦ ᐸᕐᓇᐅᑎᒥᒃ.  ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᐊᒻᒪᓗ ᒐᕙᒪᑐᖃᒃᑯᑦ ᐅᕙᒍᓪᓗ ᓇᓗᓇᐃᖅᓯᓯᒪᔪᒍᑦ: ᓄᖑᑎᖁᓪᓗᒍ ᐳᕙᓪᓗᖕᓂᖅ ᐃᓄᐃᑦ ᓄᓇᖏᓐᓂᒃ 50 ᐳᓴᓐᑎᓗᐊᒥᒃ 2025ᖑᖅᓴᓂᖓᓄᑦ ᐊᒻᒪᓗ ᓄᖅᑲᖓᑎᑦᑎᓕᕈᓐᓇᖅᓯᓗᑎᒃ ᐃᓄᐃᑦ ᓄᓇᖏᓐᓂᒃ 2030ᒥ.

ᑖᒃᑯᐊ ᑐᕌᒐᓱᐊᖅᑕᕗᑦ ᐊᒻᒪᓗ ᑲᔪᓯᒍᓐᓇᕋᓱᒋᓪᓗᑎᒍᑦ.  ᓄᖅᑲᖅᑎᑕᐅᓂᖓ ᐳᕙᓪᓗᓂᖅ ᕿᑭᖅᑕᓂ ᓄᓇᓕᖕᓂᑦ ᑮᓇᐅᔭᖃᖅᑎᑦᑎᓗᑎᒃ ᑭᓯᐊᓂ ᑖᒃᑯᐊ ᐱᑕᖃᓐᖏᓈᕐᓂᐅᔪᑦ ᐊᔾᔨᒌᒃᑐᒥᒃ ᐱᑎᑕᐅᓗᑎᒃ.  ᐅᓪᓗᒥᒧᑦ, ᐃᓄᐃᑦ ᖃᓄᐃᓕᐅᖅᑕᖏᑦ ᑲᔪᖏᕐᓇᖅᑐᑦ, ᑭᓯᐊᓂ ᓈᒻᒪᓐᖏᓗᐊᖅᑐᖅ.  ᐅᓪᓗᒥ, ᐱᒻᒪᕆᐅᖕᒪᑦ ᒐᕙᒪᑐᖃᒃᑯᓐᓄᑦ ᐊᒻᒪᓗ ᓄᓇᕗᑦ ᓇᓗᓇᐃᖅᓯᒃᑲᓐᓂᕐᓗᑎᒃ ᐃᓄᐃᑦ ᐃᓪᓗᑭᒃᓴᕐᓂᖏᓐᓂᒃ, ᐊᒻᒪᓗ ᓴᓐᖏᓕᒋᐊᕐᓗᒋᑦ ᐃᑲᔪᕈᑎᐅᔪᑦ ᐃᓄᖕᓄᑦ ᓂᕿᒃᓴᖃᑦᑎᐊᖏᓐᓇᕆᐊᖃᕐᓂᕐᒥᒃ ᐊᒻᒪᓗ ᐃᖅᑲᓇᐃᔮᒃᓴᖃᖅᑎᑦᑎᓂᕐᒥᒃ ᐃᓄᖕᓄᑦ.  ᑖᓐᓇ ᓇᓗᓇᐃᖅᑕᐅᓯᒪᔪᓂᑦ ᖃᓄᐃᓕᐅᕆᐊᖅᑕᐅᓂᖓ, ᕿᑭᖅᑕᓃᒃᑯᑦ ᓇᓗᓇᓐᖏᑦᑐᑦ ᑲᑐᔾᔨᓗᑕ ᓄᖅᑲᖅᑎᑦᑎᔪᓐᓇᖅᑐᒍᑦ ᐳᕙᓪᓗᖕᓂᕐᒥᒃ ᐃᓄᐃᑦ ᓄᓇᖏᓐᓂᒃ.  ᒫᓐᓇ ᐱᒋᐊᖅᑕᐅᑲᐅᑎᒋᒋᐊᖃᖅᖢᓂ.  

ᓱᓕᔪᑦ ᖃᐅᔨᒪᔭᐅᔪᑦ:

  • ᐳᕙᓪᓗᓚᐅᖅᑐᑦ ᑲᓇᑕᒥ ᓄᓇᖃᖅᑳᖑᓐᖏᑦᑐᓂᒃ 0.6/100,000ᖑᓚᐅᖅᑐᑦ 2016ᒥ. ᐳᕙᓪᓗᓚᐅᖅᑐᑦ ᑲᓇᑕᒥ ᐃᓄᐃᑦ ᐊᒥᓲᑎᒋᐅᓚᐅᖅᑐᑦ 170/100,000  2016ᒥ.
  • ᓄᓇᕗᒥ, ᐳᕙᓪᓗᖃᑦᑕᖅᑐᑦ ᐊᒥᓲᔪᑦ ᕿᑭᖅᑕᓂ ᓄᓇᓕᖏᓐᓂᒃ, ᐳᕙᓪᓗᖃᑦᑕᖅᑐᑦ ᐅᓄᕐᓂᖏᑦ  305.1ᖑᔪᑦ 100,000ᓂ ᐃᓄᖃᖅᑐᓂᒃ ᐅᓄᕐᓂᕆᔭᐅᔪᓂᑦ  2006-2016ᒧᑦ.
  • 56%ᖑᓂᖏᑦ ᓄᓇᕗᒥ ᐃᓄᐃᑦ ᓇᔪᖅᑐᑦ ᐃᓪᓗᓂ ᓂᓐᓂᐅᖅᑐᓂᒃ. 32%ᖑᓂᖏᑦ ᓄᓇᕗᒥ ᐃᓄᐃᑦ ᐃᓪᓗᖃᓐᖏᑦᑐᓂᒃ ᓇᔪᖅᑎᑦᑎᑲᐃᓐᓇᖃᑦᑕᖅᓯᒪᔪᑦ ᐊᕐᕌᒎᓚᐅᖅᑐᒥᒃ.  ᐊᑕᐅᓯᕐᒥ ᐃᓪᓗᓕᓐᓂ ᓂᓐᓂᐅᓚᕆᒃᑐᑦ ᑕᐃᒪᐃᒻᒪᑦ ᐳᕙᓪᓗᓕᕈᑕᐅᔪᓐᓇᓲᖑᖕᒪᑦ.  .
  • 70%ᖑᓂᖏᑦ ᐃᓄᐃᑦ ᐃᓪᓗᖃᖅᑐᑦ ᓄᓇᕗᒥ ᓂᕿᒃᓴᖃᑦᑎᐊᖅᐸᓐᖏᑦᑐᑦ.  8%ᖑᓂᖏᑦ ᐃᓪᓗᖃᖅᑎᐅᔪᑦ ᑲᓇᑕᒥ ᓂᕿᒃᓴᖃᑦᑎᐊᕐᓂᕋᖅᑕᐅᓪᓗᑎᒃ.  ᓂᕿᑦᓯᐊᕙᓂᒃ ᓂᕆᖃᑦᑕᓐᖏᑦᑐᑦ ᐳᕙᓪᓗᓕᕈᑕᐅᑐᐃᓐᓇᕆᐊᖃᕐᒥᔪᑦ.  
  • ᕿᑎᕈᔪᐊᓂ ᑮᓇᐅᔭᓕᐅᕐᓂᖃᖅᑐᑦ ᐃᓄᐃᑦ, ᐃᓄᐃᑦ ᓄᓇᖏᓐᓂᒃ ᑮᓇᐅᔾᔭᒃᓴᖅᑐᑦ $23,485ᖑᔪᖅ. ᕿᑎᕈᔪᐊᓂ ᑮᓇᐅᔭᓕᐅᕐᓂᖃᖅᑐᑦ ᐃᓅᓐᖏᑦᑐᓄᑦ, ᐃᓄᐃᑦ ᓄᓇᖓᓃᑦᑐᓂᒃ $92,011ᖑᓪᓗᓂ. ᐳᕙᓪᓗᖕᓂᖅ ᐊᑲᐅᓐᖏᓕᐅᕈᑎᒻᒪᕆᒃ ᐃᓅᓯᕐᓂᑦ ᐊᔾᔨᒌᑎᑦᑎᓐᖏᓗᐊᕐᓂᖓᓄᑦ.  
Recommended Posts

ᑐᑭᓯᒋᐊᕐᕕᐅᑕ

ᑐᑭᓯᒋᐊᕆᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᓐᓄᑦ