ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑲᑎᒪᔨᔅᓴᓂᑦ ᑭᙴᒪᑦᑎᔪᑦ ᐋᔪᕋᖅ ᓴᐳᔾᔨᕕᒻᒧᑦ ᑮᓇᐅᔭᓄᑦ ᑲᑐᔾᔨᖃᑎᒌᓄᑦ
ᐃᖃᓗᐃᑦ, ᓄᓇᕗᑦ − ᒪᐃ 7, 2026 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (QIA) ᑲᑎᒪᔨᔅᓴᒥᒃ ᑭᙴᒪᑦᑎᔪᑦ ᐊᑕᐅᓯᕐᒥᒃ ᑲᑎᒪᔨᐅᖃᑕᐅᒐᔭᖅᑐᒥᒃ ᐋᔪᕋᖅ ᓴᐳᔾᔨᕕᒻᒧᑦ ᑮᓇᐅᔭᓄᑦ ᑲᑎᒪᔨᓄᑦ.
ᑲᑐᔾᔨᖃᑎᒌᑦ ᐃᑲᔫᓯᐊᔅᓴᓄᑦ ᑎᒥᐅᔪᑦ ᐃᑲᔪᖅᑐᑎᒃ ᐃᓄᓐᓄᑦ−ᓯᕗᓕᕐᓯᕕᐅᔪᒥᒃ ᓴᐳᔾᔨᕕᒻᒥᑦ ᕿᑭᖅᑕᓂ ᐊᒻᒪᓗ, ᐊᑐᕐᕕᖓᓂ, ᐊᓯᖏᓐᓂᒃ ᐃᒪᕕᓐᓂᑦ ᑲᓇᑕᒥ. ᑲᑎᒪᔩᑦ ᑐᑭᒧᐊᑦᑎᑦᑎᖃᑦᑕᓂᐊᖅᑐᑦ ᑮᓇᐅᔭᓄᑦ ᑐᑭᑖᕈᑕᐅᕙᑦᑐᓄᑦ ᐃᓄᓐᓄᑦ−ᓯᕗᓕᕐᓯᕕᐅᔪᓂᑦ ᐊᐅᓚᑦᑎᓂᕐᒥᒃ, ᓇᐅᑦᑎᕐᓱᖃᑦᑕᓂᕐᒥᒃ, ᐊᒻᒪᓗ ᐱᖁᑎᕐᔪᐊᓂᑦ, ᐊᒻᒪᓗ ᑲᒪᒋᔭᖃᖃᑦᑕᕐᓗᑎᒃ ᐱᕈᕐᐸᓪᓕᐊᑎᑦᑎᓂᕐᒧᑦ ᑐᑭᑖᕈᑕᐅᕙᑦᑐᓂᑦ.
ᐱᓇᓱᑦᑐᑦ ᐃᒪᐃᒋᐊᓖᑦ:
• ᑲᑎᒪᔨᐅᖃᑕᐅᒍᓐᓇᕆᐊᓖᑦ ᑲᓇᑕᒥ ᖃᑭᒪᒍᑎᔅᓴᓕᐅᕋᓱᐊᖅᑎᐅᖏᑦᑐᓄᑦ ᓄᓇᕗᒻᒥ ᑲᑐᔾᔨᖃᑎᒌᓄᑦ;
• ᑕᑯᑎᑦᑎᔭᕆᐊᓖᑦ ᐅᕝᕙᓘᓐᓃᑦ ᐊᖏᕐᓯᒪᔭᕆᐊᓖᑦ ᐱᕙᓪᓕᐊᑎᑦᑎᓂᕐᒧᑦ ᖃᐅᔨᒪᓂᕆᔭᖏᓐᓂᒃ ᐃᓄᐃᑦ ᐱᔪᓐᓇᐅᑎᖏᑕ ᒥᔅᓵᓄᑦ, ᐊᑐᕐᓯᒪᔭᖏᑕ ᒥᔅᓵᓄᑦ, ᐊᒻᒪᓗ ᑕᑯᓐᓈᕈᓯᖏᑕ ᒥᔅᓵᓄᑦ;
• ᐃᓕᑉᐸᓪᓕᐊᒍᓐᓇᕆᐊᓕᒃ ᐅᕝᕙᓘᓐᓃᑦ ᐊᖏᕐᓯᒪᔭᕆᐊᓕᒃ ᐃᓕᑉᐸᓪᓕᐊᓂᐊᕐᓂᕐᒧᑦ ᐅᖃᓕᒫᖃᑦᑕᓂᕐᒧᑦ ᑮᓇᐅᔭᓕᕆᔾᔪᑎᒥᓂᕐᓂᑦ ᐊᒻᒪᓗ ᐱᕈᕐᐸᓪᓕᐊᑎᑦᑎᔾᔪᑕᐅᔪᓂᑦ ᓇᓗᓇᐃᕐᓯᒪᔪᓂᑦ; ᐊᒻᒪᓗ
• ᐱᔨᑦᑎᕐᓯᒪᔭᕆᐊᓕᒃ ᐃᓄᑐᐃᓐᓇᐅᓗᓂ.
ᑲᒪᒋᔭᖃᖃᑦᑕᕐᓯᒪᑉᐸᑦ ᐊᑕᐅᓯᕐᒥᒃ ᐅᕝᕙᓘᓐᓃᑦ ᐊᒥᓲᓂᕐᓴᓂᑦ ᑖᒃᑯᓇᙵᑦ ᐊᑑᑎᖃᕐᓂᐊᕐᒥᔪᖅ:
• ᐃᓄᐃᑦ ᐃᓕᖅᑯᓯᖓᓐᓂᒃ ᒪᓕᒐᖏᓐᓂᓪᓗ;
• ᓄᓇᕗᒻᒥ ᐅᕝᕙᓘᓐᓃᑦ ᐃᓄᐃᑦ ᓄᓇᖓᓐᓂ ᖃᐅᔨᒪᑦᑎᐊᖅᑐᖅ;
• ᐱᓕᕆᐊᔅᓴᒥᒃ ᐸᕐᓇᐃᓂᕐᒥᒃ ᑲᔪᓯᑎᑦᑎᓂᕐᒥᓪᓗ ᓄᓇᕗᒻᒥ;
• ᓴᐳᔾᔨᕕᒻᒥᑦ ᐊᒻᒪᓗ ᓇᐅᑦᑎᕐᓱᖃᑦᑕᓂᕐᒥᒃ (ᐊᕙᑎᒥᒃ ᑲᒪᑦᑎᓂᐊᓂᕐᒥᒃ);
• ᑮᓇᐅᔭᓕᕆᓂᕐᒥᒃ ᐅᕝᕙᓘᓐᓃᑦ ᐱᕈᕐᐸᓪᓕᐊᑎᑦᑎᓂᕐᒥᒃ;
• ᐱᓕᕆᐊᔅᓴᒧᑦ ᐊᑭᓕᖅᑕᐅᓯᒪᑲᐃᓐᓇᕈᑎᔅᓴᓕᕆᓂᖅ (ᒪᑭᒪᔾᔪᑎᔅᓴᓕᕆᓂᖅ)
• ᓴᐳᔾᔨᕕᒻᒧᑦ ᑮᓇᐅᔭᓂᑦ ᐸᐸᑦᑎᓂᕐᒥᒃ;
• ᐊᐅᓚᑦᑎᔾᔪᑎᓕᕆᓂᕐᒥᒃ ᐅᕝᕙᓘᓐᓃᑦ ᒪᓕᒐᓕᕆᓂᕐᒥᒃ ᖃᐅᔨᒪᑦᑎᐊᖅᑐᖅ.
ᐱᔪᒪᒍᕕᑦ ᐱᓇᓲᑎᒥᒃ ᑎᑎᕋᕐᕕᔅᓴᒥᒃ, ᐊᑏ ᑖᓐᓇ ᓇᕿᓪᓗᒍ ᑐᕌᕈᑎᖓ: https://www.qia.ca/applications/aajuraq-application/
ᐅᖃᕐᕕᒋᔪᓐᓇᕐᒥᔭᐃᑦ ᑭᐅᕋᓐ ᕙᓚᕋᑎ ᑐᓂᓯᔪᒪᒍᕕᑦ ᐱᔭᕇᕐᓯᒪᔪᒥᒃ ᑐᔅᓯᕋᐅᓯᐅᕈᑎᓐᓂᒃ. ᑐᑭᓯᒋᐊᒃᑲᓐᓂᕈᒪᒍᕕᑦ ᐱᓇᓱᐊᕈᒪᒍᕕᓪᓘᓐᓃᑦ, ᐊᑏ ᖃᐅᔨᒃᑲᕈᒃ ᑎᑎᕋᕐᕕᒋᓗᒍ ᐅᕗᖓ kflaherty@qia.ca ᐅᕝᕙᓘᓐᓃᑦ ᐅᖄᓚᕕᒋᓗᒍ 975-8398-ᒧᑦ.
ᒪᑐᕕᔅᓴᖓ: ᒪᐃ 15, 2025, 5:00 ᐅᓐᓄᓴᒃᑯᑦ ᑲᓇᓐᓇᐅᑉ ᓯᕿᙳᔭᖓ ᒪᓕᑦᑐᒍ, ᓯᕗᓪᓕᐅᔾᔭᐅᖃᑦᑕᓂᐊᖅᑐᑦ ᐃᓄᐃᑦ ᐱᓇᓱᑦᑐᑦ ᕿᑭᖅᑕᓂ ᓄᓇᓕᑦ.
ᑐᓴᕋᔅᓴᐅᑉ ᒥᔅᓵᓄᑦ ᑐᑭᓯᒋᐊᕈᒪᒍᕕᑦ, ᐊᑏ ᑐᑭᓯᒋᐊᕐᕕᒋᒍᒃ:
ᑭᐅᕋᓐ ᕙᓚᕋᑎ
ᑐᑭᒧᐊᑦᑎᑦᑎᔨ, ᑐᓴᐅᒪᖃᑦᑕᐅᑎᔾᔪᑎᓄᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ (ᐅ) 867.975.8398 ᐊᑭᖃᙱᑐᒃᑯᓘᓐᓃᑦ ᐅᖓᓯᑦᑐᒥᑦ 1.800.667.2742
kflaherty@qia.ca