ᐊᔾᔨᓕᐅᖅᑕᐅᓯᒪᔪᑦ: 15 ᐃᓕᓐᓂᐊᓕᕋᑖᖅᑐᑦ ᐊᔾᔨᓕᐅᖅᑕᐅᔪᔪᑦ ᑕᕝᕗᙵᕋᑖᖅᑎᓪᓗᒋᑦ ᐊᖁᑎᐅᓂᕐᒧᑦ ᓴᓇᔪᓕᕆᓂᕐᒥ ᐃᓕᓐᓂᐊᑎᑦᑎᕕᒻᒧᑦ ᐋᓐᑎᐅᕆᐅᒥ ᐃᓕᓐᓂᐊᕐᕕᐅᕙᑦᑐᒧᑦ ᒧᐊᕆᔅᕘᒡ, ᐋᓐᑎᐅᕆᐅᒥ

ᐃᖃᓗᐃᑦ, ᓄᓇᕗᑦ – ᕖᕝᕗᐊᓕ 13, 2018 –  ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᑲᑐᔾᔨᖃᑎᒌᖏᑦ) ᑲᑐᔾᔨᖃᑎᖃᖅᑐᑎᒃ ᐹᕕᓐᓛᓐ ᓴᕕᕋᔭᔅᓴᒥᒃ ᐅᔭᕋᓐᓂᐊᖅᑎᓂᑦ (ᐹᕕᓐᓛᓐ) ᐱᒋᐊᖅᑎᑦᑎᔪᒻᒪᑕ ᕿᑭᖅᑕᓂ ᐃᓕᓐᓂᐊᑎᑦᑎᓂᕐᒧᑦ ᐱᓕᒻᒪᔅᓴᐃᓂᕐᒧᓪᓗ ᐃᖅᑲᓇᐃᔮᔅᓴᓄᑦ ᑲᑐᔾᔨᖃᑎᒌᒍᑕᐅᔪᒥᒃ ᓄᕕᐱᕆ 2017ᖑᑎᓪᓗᒍ. ᐃᓚᒋᔭᐅᓪᓗᓂ ᑖᔅᓱᒧᖓ ᑲᑐᔾᔨᖃᑎᒌᒍᑕᐅᔪᒧᑦ, ᑲᑐᔾᔨᖃᑎᖃᖅᑐᑎᒃ ᐹᕕᓐᓛᓐᑯᓐᓂᑦ ᖁᕕᐊᓱᑉᐳᑦ ᓇᓗᓇᐃᕐᓯᔭᕆᐊᔅᓴᖅ ᖁᓕᑦ ᑕᓪᓕᒪᓪᓗ ᐃᓄᐃᑦ ᑲᑐᔾᔨᖃᑎᒌᒍᑕᐅᔪᒥᒃ ᐅᖁᒪᐃᑦᑐᓕᕆᔾᔪᑎᓂᑦ ᐊᖁᑎᐅᓂᕐᒥᒃ ᐃᓕᓐᓂᐊᓕᕐᒥᒻᒪᑕ ᐊᖁᑎᐅᓂᕐᒧᑦ ᓴᓇᔪᓕᕆᓂᕐᒥ ᐃᓕᓐᓂᐊᕐᕕᒻᒥ ᐋᓐᑎᐅᕆᐅᒥ (OETIO) ᒧᐊᕆᔅᕘᒡᒥ, ᑎᓴᒪᐅᔪᖅᑐᑲᓐᓃᓪᓕ ᐃᓕᓐᓂᐊᓂᐊᖅᑐᑦ ᐱᒋᐊᕈᒫᕐᓂᐊᖅᑐᒋᔭᐅᓪᓗᑎᒃ ᕖᕝᕗᐊᓕᐅᓕᖅᑲᑦ.

ᐱᖓᓲᔪᖅᑐᓂᑦ−ᐱᓇᓱᐊᕈᓯᕐᓂᑦ ᐃᓕᓐᓂᐊᕈᑕᐅᖃᑦᑕᓂᐊᖅᑐᖅ ᐋᖅᑭᓱᖅᑕᐅᓯᒪᔪᖅ ᐃᓄᐃᑦ ᐃᓕᓐᓂᐊᖃᑦᑕᓂᐊᕐᖓᑕ ᐃᓕᒋᐊᓕᖏᓐᓂᒃ ᐅᖁᒪᐃᑦᑐᓕᕆᔾᔪᑎᓂᑦ ᐊᖁᑎᐅᓂᕐᒧᑦ ᐹᕕᓐᓛᓐᑯᓐᓂ ᓄᓘᔮᓕᕆᓂᕐᒥ. ᐃᓕᓐᓂᐊᓂᕐᒥ ᐃᓕᓐᓂᐊᕐᕕᖓᓐᓂ ᐃᓕᓐᓂᐊᖅᑎᑕᐅᖃᑦᑕᓂᐊᖅᑐᑦ, ᖃᐅᔨᓴᖅᑐᓕᕆᕕᒻᒥ ᐱᓕᕆᖃᑦᑕᕐᓗᑎᒃ ᐊᒻᒪᓗ ᐃᓕᓐᓂᐊᖅᑏᑦ ᐊᑐᕆᐅᕐᓴᑎᑕᐅᖃᑦᑕᕐᓗᑎᒃ ᐅᖁᒪᐃᑦᑐᓕᕆᔾᔪᑎᓂᑦ ᐊᖁᒍᑕᐅᓲᓂᑦ ᐅᔭᕋᓐᓂᐊᕐᕕᒻᒥ. ᐊᑐᖅᑕᐅᖃᑦᑕᓂᐊᖅᑐᑦ ᒪᑯᐊ ᖃᓗᕋᐅᑏᑦ, ᐅᓯᑲᑦᑕᐅᑎᐅᕙᑦᑐᑦ, ᓴᓕᒎᙱᑦ, ᐊᓯᒃᑲᓐᓂᖏᓪᓗ.

ᓯᕗᓪᓕᕐᐹᒃ ᒪᕐᕉᒃ ᐱᓇᓱᐊᕈᓰᒃ ᐃᓕᓐᓂᐊᕈᑕᐅᖃᑦᑕᓂᐊᖅᑑᒃ ᐃᓕᓐᓂᐊᕐᕕᒻᒥ, ᐃᓕᓐᓂᐊᖅᑏᑦ ᐃᓕᓐᓂᐊᖅᑎᑕᐅᖃᑦᑕᓂᐊᖅᑐᑎᒃ ᐊᑐᖅᑕᐅᒐᔪᑦᑐᓂᑦ ᐃᖅᑲᓇᐃᔮᕐᒥ ᐋᓐᓂᐊᖅᑕᐃᓕᓂᕐᒥᒃ ᐊᑦᑕᓇᖅᑐᒦᑦᑕᐃᓕᓂᕐᒥᓪᓗ, ᐋᖅᑭᐅᒪᑎᑦᑎᓂᕐᒥᒃ, ᐊᒻᒪᓗ ᐊᑦᑕᓇᙱᑦᑐᒥᒃ ᐋᖅᑭᔅᓯᖃᑦᑕᓂᕐᒥᒃ ᓱᓇᒃᑯᑖᓂᑦ ᐃᖏᕐᕋᔾᔪᑕᐅᓂᐊᖅᑐᒧᑦ. ᑭᖑᓪᓖᑦ ᑎᓴᒪᑦ ᐱᓇᓱᐊᕈᓰᑦ ᐊᓃᕐᓗᑎᒃ ᐱᓕᕆᖃᑦᑕᓂᐊᖅᑐᑦ, ᐃᓕᓐᓂᐊᖅᑎᑕᐅᓪᓚᑦᑖᖃᑦᑕᕐᓗᑎᒃ ᐃᓕᓐᓂᐊᖅᑏᑦ ᐃᓕᓐᓂᐊᖅᑎᑕᐅᔪᑦ ᐊᒻᒪᓗ ᐃᓕᓐᓂᐊᖅᑎᑕᐅᖃᑦᑕᕐᓗᑎᒃ ᐸᐃᑉᐹᓕᓐᓄᑦ, ᖃᐅᔨᒪᑦᑎᐊᖅᑐᓄᑦ ᐃᓕᓴᐃᔨᓄᑦ.

ᐹᕕᓐᓛᓐᑯᑦ ᑲᑦᑐᖓᐃᕐᓯᒪᔪᑦ ᐃᖅᑲᓇᐃᔭᖅᑎᑖᖃᑦᑕᓂᐊᕐᓂᕐᒧᑦ ᐃᓄᓐᓂᑦ ᐃᖅᑲᓇᐃᔭᕈᒪᔪᓂᑦ ᓄᓘᔮᓂᑦ ᐅᔭᕋᓐᓂᐊᕐᕕᒻᒥ. ᐃᓚᒋᔭᐅᓗᓂ ᑲᑦᑐᖓᐃᕈᑎᒋᓯᒪᔭᖓᓐᓄᑦ, ᐱᔭᕇᕐᓯᓚᐅᖅᑎᓪᓗᒋᑦ ᐃᓕᓐᓂᐊᖅᑕᖓᓐᓂᒃ, ᐃᓕᓐᓂᐊᕐᓯᒪᔪᑦ ᐅᖁᒪᐃᑦᑐᓕᕆᔾᔪᑎᓄᑦ ᐊᖁᑎᕈᖃᑦᑕᓂᐊᖅᑐᑦ ᐹᕕᓐᓛᓐᑯᓐᓂ ᐊᒻᒪᓗ ᐃᓕᓐᓂᐊᖅᑎᑕᐅᒃᑲᓐᓂᖃᑦᑕᕐᓂᐊᕆᓪᓗᑎᒃ ᐹᕕᓐᓛᓐᑯᓐᓂᑦ ᓄᓘᔮᓂᑦ ᐅᔭᕋᓐᓂᐊᕐᕕᒻᒥ.

ᑖᓐᓇ ᐃᓕᓐᓂᐊᕈᑕᐅᖃᑦᑕᓂᐊᖅᑐᖅ ᐃᓚᒋᔭᖅ ᐸᕐᓇᑕᐅᓯᒪᔪᓄᑦ ᐃᓚᒋᔭᐅᓪᓗᓂ ᕿᑭᖅᑕᓂ−ᐃᓕᓐᓂᐊᑎᑦᑎᓂᕐᒧᑦ ᐱᓕᒻᒪᔅᓴᐃᓂᕐᒧᓪᓗ ᐃᖅᑲᓇᐃᔮᔅᓴᓄᑦ ᑲᑐᔾᔨᖃᑎᒌᒍᑕᐅᔪᒧᑦ. ᐃᓚᒋᔭᐅᖃᑦᑕᓂᐊᕐᒥᔪᖅ ᐃᖅᑲᓇᐃᔭᖅᑎᑖᖅᑐᖃᑦᑕᓂᕐᒧᑦ ᐱᓇᓱᐊᕈᑎᒋᕙᑦᑕᖏᓐᓂᒃ ᑲᑐᔾᔨᖃᑎᒌᒍᑕᐅᔪᒥ ᑲᒪᒋᔭᐅᖃᑦᑕᓂᐊᕐᒥᔪᖅ ᑐᑦᑕᕐᕕᒃᑯᑦ, ᐃᓄᓐᓂᑦ ᐃᖅᑲᓇᐃᔭᖅᑎᐅᒍᓐᓇᖅᑐᓂᑦ ᑐᑭᓯᐅᒪᔾᔪᑎᔅᓴᖃᕐᕕᒃ.

ᑲᑐᔾᔨᖃᑎᒌᒃᑯᑦ ᐃᓘᓐᓇᖏᓐᓄᑦ ᖁᓕᓄᑦ ᐱᖓᓱᓄᓪᓗ (13) ᓄᓇᓕᓐᓅᖃᑦᑕᓂᐊᖅᑐᑦ ᕿᑭᖅᑕᓂ ᓄᓇᓕᓐᓄᑦ 2018ᒥ ᐊᑎᓕᐅᕐᓯᖃᑦᑕᓂᐊᕐᖓᑕ ᐃᓚᒋᔭᐅᓂᐊᖅᑐᓂᑦ ᐃᓄᓐᓂᑦ ᐃᖅᑲᓇᐃᔭᖅᑎᐅᒍᓐᓇᖅᑐᓂᑦ ᑐᑭᓯᐅᒪᔾᔪᑎᔅᓴᖃᕐᕕᒻᒧᑦ (ᑐᑦᑕᕐᕕᒃ) ᑖᓐᓇ ᓴᖅᑭᔮᖅᑎᑦᑎᕕᐅᖃᑦᑕᓂᐊᖅᑐᖅ ᐃᓕᓐᓂᐊᕈᑕᐅᔪᓐᓇᖅᑐᓂᑦ ᓲᕐᓗ ᕿᑭᖅᑕᓂ−ᐃᓕᓐᓂᐊᑎᑦᑎᓂᕐᒧᑦ ᐱᓕᒻᒪᔅᓴᐃᓂᕐᒧᓪᓗ  ᐃᖅᑲᓇᐃᔮᔅᓴᓄᑦ ᑲᑐᔾᔨᖃᑎᒌᒍᑕᐅᔪᖅ, ᐊᒻᒪᓗ ᐃᑲᔪᖃᑦᑕᕐᓗᑎᒃ ᐃᖅᑲᓇᐃᔭᖅᑎᖃᕐᐸᑦᑐᓂᑦ ᓇᓂᓯᖃᑦᑕᓂᕐᒥᒃ ᐃᓄᓐᓂᑦ ᐱᖃᑕᐅᔪᓐᓇᖅᑐᓂᑦ ᐃᖅᑲᓇᐃᔮᔅᓴᓂᑦ ᐅᕝᕙᓘᓐᓃᑦ ᐃᓕᓐᓂᐊᕋᔅᓴᓂᑦ.

ᑐᑭᓯᒋᐊᒃᑲᓐᓂᕈᒪᒍᔅᓯ ᖃᓄᖅ ᐊᑎᓕᐅᖃᑦᑕᕈᓐᓇᕐᒪᖔᔅᓯ ᑐᑦᑕᕐᕕᒻᒧᑦ, ᑐᑭᓯᒋᐊᖃᑦᑕᕆᔅᓯ ᑲᑐᔾᔨᖃᑎᒌ½ᑯᓐᓄᑦ ᑎᑎᕋᕐᓗᓯ ᑕᕝᕗᖓ ᖃᕋᓴᐅᔭᒃᑯᑦ ᐃᕐᖐᓈᖅᑕᐅᑎᖓᓄᑦ Tuttarvik@QIA.CA

ᕿᑭᖅᑕᓂ ᐃᓕᓐᓂᐊᑎᑦᑎᓂᕐᒧᑦ ᐱᓕᒻᒪᔅᓴᐃᓂᕐᒧᓪᓗ ᐃᖅᑲᓇᐃᔮᔅᓴᓄᑦ ᑲᑐᔾᔨᖃᑎᒌᒍᑕᐅᔪᖅ ᑮᓇᐅᔭᖃᖅᑎᑕᖅ ᐃᓚᖓᓂ ᑲᓇᑕᐅᑉ ᒐᕙᒪᒃᑯᖏᓐᓂ ᐱᓕᒻᒪᔅᓴᐃᓂᕐᒧᑦ ᑲᑐᔾᔨᖃᑎᒌᒍᑎᖃᕐᓂᒧᓪᓗ ᑮᓇᐅᔭᓂᑦ.  

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᒥᔅᓵᓄᑦ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᑲᑐᔾᔨᖃᑎᒌᖏᑦ) ᑮᓇᐅᔭᓕᐅᕋᓱᐊᖅᑎᐅᒐᑎᒃ ᑲᑐᔾᔨᖃᑎᒌᖑᒻᒪᑕ ᑭᒡᒐᖅᑐᐃᔪᑦ ᑕᒫᓂ ᐊᒥᓲᓂᓕᓐᓂᑦ ᖃᓂᒋᔭᖓᓂ 14,000 ᐃᓄᓐᓂᑦ ᕿᑭᖅᑕᓂ (ᕿᑭᖅᑖᓗᒃ) ᓄᓇᓕᓐᓂᑦ ᓄᓇᕗᒥ, ᑖᒃᑯᐊᖑᓪᓗᑎᒃ ᖁᓕᑦ ᐱᖓᓱᓪᓗ (13) ᓄᓇᓖᑦ ᑕᑉᐹᙵᑦ ᐊᐅᓱᐃᑦᑐᕐᒥᑦ ᖁᑦᑎᑦᑐᒥᑦ ᑕᐅᓄᖓ ᓴᓂᑭᓗᐊᕐᒧᑦ (ᕿᑭᖅᑕᐃᑦ) ᓂᒋᐊᓂ ᑲᓇᓐᓇᕐᐸᓯᐊᓃᑦᑐᖅ ᑕᓯᐅᔭᕐᔪᐊᑉ. ᑲᑐᔾᔨᖃᑎᒌᒃᑯᑦ ᐱᓇᓱᐊᒐᓖᑦ ᓴᐳᔾᔨᓂᕐᒥᒃ, ᐊᐅᓚᑦᑎᓂᕐᒥᓪᓗ ᓯᕗᒧᐊᑦᑎᑦᑎᓂᕐᒥᓪᓗ ᐱᔪᓐᓇᐅᑎᖏᓐᓂᒃ ᐱᕚᓪᓕᕈᑎᔅᓴᖏᓐᓂᓪᓗ ᕿᑭᖅᑕᓂ ᓄᓇᓖᑦ ᐃᓄᐃᑦ; ᐊᒻᒪᓗ ᐊᑐᖅᑎᑦᑎᒋᐊᒃᑲᓂᕐᓂᕐᒥᒃ ᐃᓄᒃᑎᑐᑦ ᐊᒻᒪᓗ ᐃᓄᐃᑦ ᐱᖅᑯᓯᖏᓐᓂᒃ, ᐊᕙᑎᓕᕆᓂᕐᒧᑦ ᐅᑉᐱᕆᔭᖏᓐᓂᒃ, ᓇᒻᒥᓂᕐᓱᕈᓐᓇᕐᓂᖏᓐᓂᒃ, ᐊᒻᒪᓗ ᒪᑭᒪᓇᓱᐊᕈᑎᑎᒍᑦ, ᐃᓅᓯᖏᑎᒍᑦ ᐃᓕᖅᑯᓯᖏᑎᒍᓪᓗ ᒪᑭᑕᑦᑎᐊᕆᐊᖃᕐᓂᖏᓐᓂᒃ ᓴᖅᑭᔮᖅᑐᒥᒃ ᐊᒻᒪᓗ ᓇᒻᒥᓂᖅ ᐊᐅᓚᑦᑎᓂᖏᑎᒍᑦ. ᐃᓛᒃᑯᑦ 39 ᒪᓕᑦᑐᒍ ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑎᓃᑦᑐᖅ, ᑲᑐᔾᔨᖃᑎᒌᖏᑦ ᐃᓱᒪᒋᔭᐅᓯᒪᒻᒪᑕ ᓇᓗᓇᐃᖅᑕᐅᓯᒪᓪᓗᑎᒃ ᐃᓄᓐᓄᑦ ᑲᑐᔾᔨᖃᑎᒌᖑᓂᖏᓐᓂᒃ (DIO) ᑲᒪᒋᔭᓖᑦ ᐊᐅᓚᑦᑎᓂᕐᒥᒃ ᐃᓄᐃᑦ ᓄᓇᖁᑎᖏᓐᓂᒃ ᕿᑭᖅᑕᓂ ᓄᓇᓕᓐᓂᑦ ᑭᒡᒐᖅᑐᐃᕕᐅᔪᒧᑦ.

ᑲᑐᔾᔨᖃᑎᒌᒃᑯᓐᓂ ᑐᓴᕋᔅᓴᐃᑦ ᒥᔅᓵᓄᑦ ᑐᑭᓯᒋᐊᖃᑦᑕᕈᓐᓇᖅᑐᓯ ᑖᔅᓱᒧᖓ:

ᓰᒪ ᓴHᐊ ᓯᐅᕋHᐃ,

ᐊᖏᔪᖅᑳᖅ ᑐᓴᐅᒪᖃᑦᑕᐅᑎᓂᕐᒧᑦ,

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ

ᐃᕐᖐᓈᖅᑕᐅᑖ: szerehi@qia.ca

ᐅᖄᓚᐅᑖ: (867) 975.8413

ᐊᑭᖃᙱᑐᒃᑯᑦ: 1.800.667.2742

ᐹᕕᓐᓛᓐ ᓴᕕᕋᔭᔅᓴᒥᒃ ᐅᔭᕋᓐᓂᐊᖅᑏᑦ ᒥᔅᓵᓄᑦ

ᑲᑐᔾᔭᐅᓪᓗᓂ ᓇᒻᒥᓂᕆᔭᖅ ᓄᓇᕗᑦ ᓴᕕᕋᔭᔅᓴᒥᒃ ᐅᔭᕋᓐᓂᐊᖅᑎᓂᑦ ᐊᒻᒪᓗ ᐋᓯᓗᒥᑐᓪᑯᓐᓂᑦ, ᐹᕕᓐᓛᓐ ᓴᕕᕋᔭᔅᓴᒥᒃ ᐅᔭᕋᓐᓂᐊᖅᑏᑦ ᐊᐅᓚᑦᑎᕙᑦᑐᑦ ᓴᕕᕋᔭᔅᓴᑦᑎᐊᕙᐅᓂᕐᐹᒥᑦ ᐅᔭᕋᑦᑕᕋᔅᓴᖅᑕᓕᒻᒥ ᐅᔭᕋᓐᓂᐊᕐᕕᒻᒥ ᕿᑭᖅᑖᓗᒻᒦᑦᑐᒥᑦ, ᓄᓇᕗᒥ. ᐅᔭᕋᓐᓂᐊᕐᕕᕗᑦ ᐅᔭᕋᓐᓂᐊᕐᕕᐅᕙᑦᑐᖅ ᐱᐅᓂᕐᐹᒥᑦ ᑐᕋᐃᓐᓇᖅᑐᒥᒃ ᐅᓯᑲᑦᑕᕈᑕᐅᕙᑦᑐᓂ ᓴᕕᕋᔭᔅᓴᒥᒃ ᓄᓇᕐᔪᐊᓕᒫᒥ. ᐹᕕᓐᓛᓐᑯᑦ ᑐᔅᓯᕋᐅᓯᐅᕐᓯᒪᔪᑦ ᐱᓕᕆᔪᓐᓇᐅᑎᓄᑦ ᐅᓄᕐᓯᒋᐊᒃᑲᓐᓂᕈᒪᓪᓗᒋᑦ ᐊᕐᕌᒍᑕᒫᑦ ᐅᓯᑲᑦᑕᕐᓂᕆᕙᑦᑕᖏᑦ 12 ᒥᓕᐊᓐ ᑕᓐᔅᓄᑦ ᐊᖏᓂᓕᓐᓄᑦ. ᐹᕕᓐᓛᓐᑯᑦ ᑲᑦᑐᖓᐃᕐᓯᒪᔪᑦ ᐊᐅᓚᑦᑎᓂᐊᕐᓂᕐᒧᑦ ᓄᓘᔮᓂᑦ ᐅᔭᕋᓐᓂᐊᕐᕕᒻᒥᑦ ᐊᕙᑎᓕᕆᓂᕐᒥᒃ ᐊᒻᒪᓗ ᐃᓄᓕᒫᓄᑦ ᑲᒪᒋᔭᖃᑦᑎᐊᕐᓗᑎᒃ ᐱᕚᓪᓕᕈᑎᖃᖅᑎᑦᑎᓂᐊᖅᑐᒥᒃ ᐃᓘᓐᓇᖏᓐᓄᑦ ᑎᒍᒥᐊᖅᑎᐅᖃᑕᐅᔪᓕᒫᓄᑦ.

ᐹᕕᓐᓛᓐᑯᓐᓂ ᑐᓴᕋᔅᓴᐃᑦ ᒥᔅᓵᓄᑦ ᑐᑭᓯᒋᐊᖃᑦᑕᕈᓐᓇᖅᑐᓯ ᑖᔅᓱᒧᖓ:

ᔭᐃᓴᓐ ᓖᑦ

ᑐᓴᐅᒪᖃᑦᑕᐅᑎᓂᕐᒧᑦ ᑲᒪᔨᓪᓗᐊᑕᖅ

Jason.leite@baffinland.com

ᐅᖄᓚᐅᑖ: (416) 364-8820 ᐅᐃᒍᖓ 5032

ᐅᖄᓚᐅᑎᕋᓛᖓ: (416) 529-2624