QIA ELECTIONS - Our homeland, our future, our vote. Remember to cast your ballot. Learn More

ᕿᑭᖅᑕᓃᒃᑯᑦ ᓂᕈᐊᕐᓂᖓ - ᐊᖏᕐᕋᕗᑦ, ᓯᕗᓂᒃᓴᕗᑦ ᐊᒻᒪᓗ ᓂᕈᐊᕐᓂᕗᑦ. ᓂᕈᐊᕆᐊᖅᑐᕐᓂᐊᖅᐳᑎᑦ. ᑐᑭᓯᒃᑲᓐᓂᕆᑦ

ᕿᑭᖅᑕᓂᒃᑯᓐᓂ 2022ᒥ ᐃᓄᒃᑎᑐᑦ ᐃᙱᐅᓯᐅᓕᐅᑎᑎᓂᕐᒥ ᐅᖃᓗᕋᐅᔭᐅᑎᓕᐅᑎᑎᑦᑎᓂᕐᒥ ᓵᓚᔅᓴᖅᑐᑦ

ᕿᑭᖅᑕᓂᒃᑯᓐᓂ 2022ᒥ ᐃᓄᒃᑎᑐᑦ ᐃᙱᐅᓯᐅᓕᐅᑎᑎᓂᕐᒥ ᐅᖃᓗᕋᐅᔭᐅᑎᓕᐅᑎᑎᑦᑎᓂᕐᒥ ᓵᓚᔅᓴᖅᑐᑦ

 In blog-inuk, Uncategorized

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓂᒃᑯᑦ) ᖁᕕᐊᓱᑉᐳᑦ ᓇᓗᓇᐃᕐᓯᔭᕆᐊᔅᓴᖅ ᓵᓚᔅᓴᖅᑐᓂᑦ 2022 ᐅᕙᒍᑦ ᐃᓄᒃᑎᑐᑦ ᐃᙱᐅᓯᐅᓕᐅᑎᑎᑦᑎᓂᖓᓐᓂ/ᐅᖃᓗᕋᐅᔭᐅᑎᓕᐅᑎᑎᑦᑎᓂᖓᓐᓂ. ᓵᓚᔅᓴᑎᑦᑎᒐᓱᓐᓂᖅ ᐃᓚᒋᔭᐅᓚᐅᖅᑐᖅ ᐃᓄᒃᑎᑐᑦ ᐅᖃᐅᓯᓕᕆᓂᕐᒧᑦ ᑕᖅᑭᕆᓚᐅᖅᑕᑎᓐᓂ ᐱᓕᕆᓂᐅᓚᐅᖅᑐᓂᑦ ᐊᒻᒪᓗ ᑎᓕᐅᕆᖃᑦᑕᓚᐅᕋᑦᑕ ᑐᓂᓯᖃᑦᑕᖁᔨᓪᓗᑕ ᐊᑭᑦᑎᒍᑕᐅᓂᐊᖅᑐᓂᑦ ᓇᑭᑐᐃᓐᓇᖅ ᕿᑭᖅᑕᓂ ᓄᓇᓕᐅᔪᓂᑦ.

ᖁᔭᓐᓇᒦᕈᒪᔭᕗᑦ ᐱᖃᑕᐅᓚᐅᖅᑐᓕᒫᑦ ᑐᓂᓯᖃᑦᑕᓚᐅᖅᑐᑦ ᐃᙱᐅᓯᓕᐊᖏᓐᓂᑦ ᐅᖃᓗᕋᐅᔭᐅᑎᓕᐊᖏᓐᓂᓪᓗ ᑕᒫᓂ ᐊᕐᕌᒍᒥ ᐊᑭᑦᑐᕋᐅᑎᑎᑦᑎᓂᑦᑎᓐᓂ. ᖁᕕᐊᓇᓪᓚᕆᖃᑦᑕᕐᖓᑦ ᑕᑯᖃᑦᑕᕆᐊᔅᓴᖅ ᐅᖃᐅᓯᑦᑎᓐᓂᒃ ᐃᓚᓕᐅᔾᔭᐅᑎᓪᓗᒍ ᓂᔾᔭᐅᓯᔭᕈᑎᓂᑦ ᐅᖃᓗᕋᐅᔭᐅᑎᓂᓪᓗ.

ᕿᑭᖅᑕᓂᒃᑯᑦ ᑐᑭᓯᐅᒪᔪᑦ ᐱᒻᒪᕆᐅᓂᖏᓐᓂᒃ ᐅᖃᐅᓯᑦᑕ ᐃᓕᖅᑯᓯᑦᑕᓗ, ᐊᒻᒪᓗ ᑭᒡᒐᖅᑐᐃᔨᐅᓪᓗᑕ ᑕᒫᓂ ᓄᓇᑦᑎᓐᓂ ᑲᒪᒋᔭᖃᖃᑦᑕᓂᐊᕐᒥᒐᑦᑕ ᑕᒪᒃᑮᓐᓂᒃ ᐊᑐᕐᓗᑕ ᐅᖃᐅᓯᑦᑎᓐᓂᒃ ᐃᓕᖅᑯᓯᑦᑎᓂᓪᓗ ᐊᑑᑎᖃᕐᓂᕐᐹᓂᑦ ᐱᓕᕆᔾᔪᓯᐅᕙᑦᑐᓂᑦ ᐊᑐᕈᓐᓇᕐᕕᓕᒫᑦᑎᓐᓂ ᒫᓐᓇ ᓯᕗᓂᔅᓴᑎᓐᓂᓗ ᑭᖑᕚᕆᓂᐊᖅᑕᑎᓐᓄᑦ

ᑕᕝᕙᐅᑯᐊ 2022ᒥ ᐃᙱᐅᓯᐅᓕᐅᑎᑎᑦᑎᓂᕐᒥ ᐅᖃᓗᕋᐅᔭᐅᑎᓕᐅᑎᑎᑦᑎᓂᕐᒥᓪᓗ ᓵᓚᔅᓴᖅᑐᑦ.

$2500 ᓯᕗᓪᓕᕐᐹᖑᓪᓗᓂ ᓵᓚᔅᓴᖅᑐᖅ, ᓴᐃᓚ ᐱᔭᒥᓂ

ᓴᐃᓚ ᑐᓂᓯᔪᔪᖅ ᐅᖃᓗᕋᐅᔭᐅᑎᓕᐊᖓᓂᒃ ᑕᐃᒎᓯᖃᖅᑐᓂ ᐃᒫᒃ “ᐸᓂᒐ”, ᐃᔅᓯᕚᖅᑐᓂ ᓂᕐᕆᕕᖓᑕ ᓵᖓᓂ. ᑕᑯᓐᓈᖅᑐᓂ ᐸᓂᖏᓐᓂᒃ ᑕᕝᕙᓂ ᐃᓪᓗᕈᓯᕐᒥ, ᑖᓐᓇ ᐅᖃᓗᕋᐅᔭᐅᑎᓕᐊᕆᓐᓂᔪᔭᖓ − ᐅᖃᕐᓯᒪᔪᖅ ᑖᓐᓇᒎᖅ ᑎᑎᕋᖅᑕᒥᓂᖓ ᐆᒻᒪᑎᒃᑯᑦ ᐃᑉᐱᒋᓚᐅᖅᑕᖓᓂᒃ ᑕᐃᔅᓱᒪᓂ ᑕᑯᓐᓈᖅᑐᓂᒋᒃ ᐸᓂᖏᒃ ᐱᙳᐊᖅᑑᒃ.

ᐸᓂᒐ

ᐸᓂᒐ ᐱᐅᔪᑯᓗᒃ

ᖁᖓᒐᐃᒻᒪ

ᓄᓇᕐᔪᐊᕋ ᖃᐅᒻᒪᓲᕐᒃ

ᐸᓂᒐ ᐱᒃᑲᑯᓗᒃ

ᓄᓇᕐᔪᐊᓕᒫᒥ

ᐊᓯᔾᔨᕐᒃᓯᓛᕐᒃᑐᕐᒃ

ᐸᓂᒐ ᓇᓪᓕᓇᕐᒃᑐᑯᓗ

ᐃᕿᒐᐃᒻᒫᖓ

ᐆᒻᒪᑎᒐ ᓴᐃᓕᓲᕐᒃ

ᖁᕕᐊᒃᑯᑎᕙᑦᑎᒋᑦ ᓴᐃᓛ!

$1750 ᑐᖏᓕᕆᔭᐅᓪᓗᓂ ᓵᓚᔅᓴᖅᑐᖅ, ᔫᑎ ᔪᐊᓇᔅ

ᔪᐊᓇᔅ ᑲᖏᖅᑐᒑᐱᒻᒥᐅᑕᖅ, ᑐᓂᓯᔪᔪᖅ ᐅᖃᓗᕋᐅᔭᐅᑎᓕᐊᖓᓂᒃ ᑕᐃᒎᓯᖃᖅᑐᓂ ᐃᒫᒃ “ᐊᕐᕌᒍᒥ ᓯᓚᕗᑦ”. ᐱᖅᓯᖅᑐᐊᓘᖃᑦᑕᓚᐅᖅᑎᓪᓗᒍ ᑲᖏᖅᑐᒑᐱᒻᒥ ᑕᒫᓂ ᐅᑭᐅᖑᕋᑖᖅᑐᒥ, ᓂᕆᐅᒋᔭᖃᓯᓐᓂᕐᖓᑦ ᐅᖅᑰᓯᒃᑲᓐᓂᕈᒫᕐᓂᖓᓂᒃ, ᖁᕕᐊᓱᐊᔾᔪᑎᒋᓕᖅᑐᒋᑦ ᐸᐅᕐᖓᑯᓗᐃᑦ ᐱᕈᓛᖅᑐᑯᓗᐃᑦ ᐊᐱᓯᒪᕕᐅᑎᒻᒪᑦ ᑕᒫᓂ ᐅᑭᐅᖅ. ᖁᔭᓕᓪᓗᓂ ᐊᔾᔨᒌᖃᑦᑕᖏᒻᒪᑕ ᑕᖅᑮᑦ, ᖃᐅᔨᒪᓪᓗᓂ ᓯᓚᑦᑎᐊᕙᐅᖃᑦᑕᓛᕐᒥᒻᒪᑦ ᑕᒪᒃᑯᐊ ᓂᕆᐅᒋᔭᔅᓴᐅᒻᒪᑕ.

ᑕᕝᕙ ᔫᑎᐅᑉ ᐅᖃᓗᕋᐅᔭᐅᑎᖓ.

ᐊᕐᕌᒍᒥ ᓯᓚᕗᑦ

ᐅᐱᕐᖔᒃᑯᑦ ᓂᒃᐸᑲᑕᒃᐸᒃᐳᒍᑦ

ᓇᑦᑎᐊᕕᓂᑯᓗᖕᓂ ᓂᒃᓯᒃᓯᑲᑕᒃᑐᑕ;

ᐱᒋᐊᖅᑕᐅᕗᖅ, ᐊᓕᐊᓇᐃᑦ ᐱᔭᐅᖏᑦᑐᖅ

ᖃᐃᓂᐊᖅᑐᑯᓘᓕᖅᐳᖅ.

* ᖁᕕᐊᓇᖅ ᑕᒪᓐᓇ ᐊᖅᑯᓵᕐᒥᔭᕗᑦ

ᐊᓕᐊᓇᐃᑦ ᐊᔾᔨᒌᖏᑦᑐᑦ ᑕᑯᕙᒃᑕᕗᑦ

ᐱᐅᔪᐊᓗᐃᑦ ᐃᓗᓕᖏᑦ ᓄᓇᕐᔪᐊᑦᑕ

ᕿᒥᕐᕈᐊᖃᑦᑕᕐᓚᕗᑦ ᑐᓂᕐᕈᓯᐊᑯᓗᒃᐳᑦ.

 

ᐊᐅᔭᕐᒪᑦ  ᐅᖅᑰᑯᓗᖔᒃ,

ᑭᒃᑐᕆᐊᕌᓗᐃᑦ ᐸᕝᕕᓇᖅᐳᑦ;

ᓄᓇᕋᑯᓗᐃᑦ ᐊᔾᔨᒌᖏᑦᑐᐊᓗᐃᑦ ᐱᕈᓕᖅᐳᑦ,

ᐅᖅᓱᐊᖅᑐᑯᓘᕙᒃᑐᓂᓗ.

 

ᐅᑭᐊᒃᓴᕆᕗᖅ, ᐸᐅᕐᖓᑯᓗᐃᑦ

ᒥᑭᑦᑑᑎᐅᒐᓗᐊᑦ ᒪᒪᖅᓯᕗᑦ;

ᐅᓪᓛᑯᑦ ᐊᐱᐊᖅᓯᒪᕙᓕᖅᑐᓂ,

ᓯᒡᔭᖅᓱᓐᓂᑯᓗᖔᒃ.

 

ᐅᑭᐅᖅᑐᐊᓘᕗᖅ ᐱᖅᓯᐊᓗᒃ ᑕᐃᒪ,

ᖃᓗᕋᒐᒃᓵᓗᒃ ᐱᕈᖅᑐᐊᓘᒋᕗᖅ;

ᕿᒧᒡᔪᐊᓗᐃᑦ ᖃᓗᖅᑲᑯᐊᓗᐃᓪᓗ,

ᐅᓐᓃᑦ ᓯᕿᓂᐅᑉ ᐊᐅᓛᕐᒥᔭᑯᓗᐊ.

ᖁᕕᐊᒃᑯᑎᕙᑦᑎᒋ ᔫᑏ!

$750 ᐱᖓᔪᒋᔭᐅᓪᓗᓂ ᓵᓚᔅᓴᖅᑐᖅ, ᔮᔅᓕᓐ ᐋᕆᐊᒃ

ᔮᔅᓕᓐ ᒫᓐᓇ ᐃᖃᓗᓐᓂ ᓄᓇᓕᒃ ᐊᒻᒪᓗ ᑐᓂᓯᔪᔪᖅ ᐃᙱᐅᓯᕐᒥᒃ ᐃᒫᒃ ᑕᐃᒎᓯᖃᖅᑐᓂ “ᓴᐃᒪᓂᐊᓕᕆᑦ”. ᐅᖃᕐᓯᒪᔪᖅ ᑖᓐᓇᒎᖅ ᐃᙱᐅᓯᓕᐊᒥᓂᖓ ᐃᓱᒪᒋᓪᓗᒍ ᐊᖏᔪᓂ ᓲᓛ.

ᑕᕝᕙ ᔮᔅᓕᓐ ᐃᙱᐅᓯᓕᐊᒥᓂᖓ:

ᓴᐃᒪᓂᐊᓕᕆᑦ

ᑕᑯᔪᒪᕙᒌᑦ ᑕᑯᔪᒪᕙᒌᑦ.

ᐃᓱᒪᒋᑦᑕᐃᓕᔭᒋᑦ  ᐆᒻᒪᑎᒃᑯᑦ ᓱᓕ ᐃᒃᐱᒋᔭᒋᑦ.

ᐃᖅᑲᐅᒪᔭᒋᑦ ᐃᖅᑲᐅᒪᔪᖓ ᐱᖃᑎᒋᓪᓗᒋᑦ ᓱᓕ  ᐆᒪᓪᓗᑎᑦ.

ᐃᓄᑦᑎᐊᕙᐅᕘᑏᑦ ᐃᓄᑦᑎᐊᕙᐅᕗᑏᑦ.

ᓇᒡᓕᒋᕙᒋᑦ ᐃᖅᑲᐅᒪᔭᒋᑦ  ᐋᓐᓂᕐᓇᖅᑐᐊᓗᒃ  ᐆᒻᒪᑎᒃᑯᑦ

ᐃᖅᑲᐅᒪᕙᒋᑦ ᐊᒃᓱᐊᓗᒃ.  ᐃᖅᑲᐅᒪᕙᒋᑦ ᐊᒃᓱᐊᓗᒃ.

ᓴᐃᒪᐃᓐᓇᓕᕇᑦ  ᓴᐃᒪᐃᓐᓇᓕᕆᑦ.

ᑕᑯᔪᒪᕙᒋᑦ ᑕᑉᐹᓂ.  ᑕᐹᓂ ᐆᒪᔪᑏᑦ.

ᒎᑏ ᐊᑖᑖᒃ ᓴᐳᑎᓂᐊᖅᐸᐃᑦ ᐊᖓᔪᒑ

ᖁᔭᓐᓇᒦᒃ  ᖁᔭᓐᓇᒦᒃ.

ᐊᖓᔫᒃ  ᓴᐃᒪᓂᐊᓕᕇᑦ.

 

ᖁᕕᐊᒃᑯᑎᕙᑦᑎᒋᑦ ᔮᔅᓕᓐ!

 

Recent Posts

ᑐᑭᓯᒋᐊᕐᕕᐅᑕ

ᑐᑭᓯᒋᐊᕆᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᓐᓄᑦ