ᕿᑭᖅᑕᓂᒃᑯᑦ ᖁᕕᐊᓱᓪᓚᕆᑦᑐᑦ 2022−ᒥ ᓄᓇᕗᒥ ᕿᒧᒃᓯᐅᕐᔪᐊᕐᓂᐅᓂᐊᖅᑐᒧᑦ

ᕿᑭᖅᑕᓂᒃᑯᑦ ᖁᕕᐊᓱᓪᓚᕆᑦᑐᑦ 2022−ᒥ ᓄᓇᕗᒥ ᕿᒧᒃᓯᐅᕐᔪᐊᕐᓂᐅᓂᐊᖅᑐᒧᑦ

 In media-releases-inuk

ᖁᕕᐊᓱᓪᓚᕆᑦᑐᑦ ᑐᓴᐅᒪᔭᐅᑎᑦᑎᒋᐊᔅᓴᖅ ᑕᒫᓂ ᐊᕐᕌᒍᒥ ᓄᓇᕗᒥ ᕿᒧᒃᓯᐅᕐᔪᐊᕐᓂᐅᓛᖅᑐᒥᒃ ᐄᐳᓗ 18ᒥ 25−ᒧᑦ, 2022. ᕿᒧᒃᓯᖅᑏᑦ ᐃᖏᕐᕋᓯᓛᖅᑐᑦ ᐃᒃᐱᐊᕐᔪᒻᒥᑦ ᐃᒡᓗᓕᒻᒧᑦ ᑐᕌᕐᓗᑎᒃ.

“ᑕᐃᒪᙵᑦ ᓄᖅᑲᖅᑎᑕᐅᖃᑦᑕᓚᐅᕐᓯᒪᒻᒪᑕ ᓄᓇᕗᒥ ᕿᒧᒃᓯᐅᕐᔪᐊᕐᓂᐊᖅᑐᑦ 2020−ᒥ 2021−ᒥᓗ, ᖁᕕᐊᓱᓐᓂᓴᒻᒪᕆᐅᕗᒍᑦ ᑕᑯᓐᓈᓛᕆᐊᔅᓴᖅ ᑕᒫᓂ ᐊᕐᕌᒍᒥ ᓄᓇᕗᒥ ᕿᒧᒃᓯᐅᕐᔪᐊᕐᓂᐅᓂᐊᖅᑐᒥ ᐊᒻᒪᓗ ᑐᙵᓱᑦᑎᓛᕆᐊᔅᓴᖅ ᐱᔭᕇᕐᕕᖓᓂ. ᓄᓇᕗᒥ ᕿᒧᒃᓯᐅᕐᔪᐊᕐᓂᖅ ᐃᑉᐱᒍᓱᒍᑕᐅᓲᖑᒻᒪᑦ ᐅᐱᒍᓱᓐᓂᕐᒥᒃ ᖁᕕᐊᓱᐊᒍᑎᖃᓪᓚᕆᓐᓂᒥᓪᓗ ᖃᐅᔨᒪᒐᑦᑕ ᐊᕐᕌᒍᑦ 50−ᐸᓗᐃᑦ ᐊᓂᒍᖅᑐᑦ ᑕᐃᔅᓱᒪᓂ, ᓇᓗᓇᓚᐅᕐᓯᒪᒻᒪᑦ ᐃᓄᐃᑦ ᕿᒻᒥᖏᑦ ᐱᖅᑯᓯᖏᓪᓗ ᕿᒧᒃᓯᒃᑯᑦ ᓱᒃᑲᓐᓂᑭᓴᐅᑎᖃᑦᑕᕐᓂᖅ ᐊᓐᓇᐅᒪᓂᐊᕋᓗᐊᕐᒪᖔᖅ.” ᐅᖃᖅᑐᖅ ᕿᑭᖅᑕᓂᒃᑯᑦ ᐊᖏᔪᖅᑳᖓᑦ, ᐅᓛᔪᒃ ᐊᑭᓱᒃ.

2019−ᖑᑎᓪᓗᒍ, ᑲᓇᑕᐅᑉ ᒐᕙᒪᒃᑯᖏᑦ ᒪᒥᐊᓐᓂᖃᓪᓚᑦᑖᓚᐅᕐᓯᒪᒻᒪᑕ ᕿᑭᖅᑕᓂ ᓄᓇᓕᓐᓄᑦ ᐃᓄᓐᓄᑦ ᐊᒻᒪᓗ ᐃᓕᓴᕐᓯᒍᑎᖃᖅᑐᑎᒃ ᑕᐃᔅᓱᒪᓂ ᖃᓪᓗᓈᕐᓄᑦ ᐊᐅᓚᑕᐅᓕᖅᑎᓪᓗᒋᑦ ᐱᐅᓯᕆᔭᐅᖃᑦᑕᕐᓯᒪᔪᒥᓂᕐᓂᑦ ᐊᑐᐊᒐᒥᓂᕐᓂᓪᓗ ᑕᒪᒃᑯᐊ ᐊᓯᕈᐃᒍᑕᐅᓯᒪᓪᓚᕆᒻᒪᑕ ᐃᓄᐃᑦ ᓄᓇᖓᓐᓂ ᐊᒻᒪᓗ ᐃᓅᓯᕆᕙᑦᑕᖏᓐᓂ.

ᑕᐃᔅᓱᒪᓂᓴᕐᓂᑦ ᒪᒥᐊᒍᑎᖃᕈᓐᓇᕐᓯᔪᒻᒪᑕ ᐊᒥᓱᓂᑦ ᐊᕐᕌᒍᓂᑦ ᐃᖅᑲᓇᐃᔮᖃᓚᐅᖅᑎᓪᓗᒋᑦ ᕿᑭᖅᑕᓂᒃᑯᑦ ᐊᒻᒪᓗ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ.

ᒪᒥᐊᓐᓂᖅ ᐃᓚᖃᔪᔪᖅ ᓯᕗᓪᓕᕐᒥ ᑮᓇᐅᔭᓕᕆᔾᔪᑎᔅᓴᓂᑦ ᑲᑦᑐᖓᐃᕈᑎᖃᖅᑐᑎᒃ ᕿᑭᖅᑕᓂᒃᑯᑦ ᑕᐃᒫᒃ ᐃᑲᔫᑎᖃᖃᑦᑕᕈᒫᕐᓂᐊᕐᓯᒪᒍᑎᓖᑦ $100,000−ᓂᑦ ᐊᕐᕌᒍᑕᒫᑦ, ᐱᖓᓲᔪᖅᑑᓂᐊᖅᑐᓄᑦ ᐊᕐᕌᒍᓄᑦ, ᑐᕌᖓᔪᓂᑦ ᓄᓇᕗᒥ ᕿᒧᒃᓯᐅᕐᔪᐊᕐᓂᐅᕙᑦᑐᒧᑦ.

ᑐᑭᓯᒋᐊᒃᑲᓐᓂᕈᒪᒍᔅᓯ, ᐊᑏ ᑐᑭᓯᒋᐊᕐᕕᐅᖃᑦᑕᕐᓕ:

ᑭᐅᕋᓐ ᕙᓚᕋᑎ
ᑐᑭᒧᐊᑦᑎᑦᑎᔨ, ᑐᑭᒧᐊᒍᑎᔅᓴᓄᑦ ᑐᓴᐅᒪᖃᑦᑕᐅᑎᒍᑎᓄᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
(ᐅ) 867.975.8398 ᐅᖓᓯᑦᑐᒥᓪᓘᓐᓃᑦ ᐊᑭᖃᙱᑐᒃᑯᑦ 1.800.667.2742
kflaherty@qia.ca

 

Recent Posts

ᑐᑭᓯᒋᐊᕐᕕᐅᑕ

ᑐᑭᓯᒋᐊᕆᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᓐᓄᑦ