ᕿᑭᖅᑕᓂᒃᑯᑦ ᓴᖅᑭᑎᑦᑎᕗᑦ 2018-2019 ᐃᒃᐱᐊᕐᔪᒻᒥ ᓇᐅᑦᑎᖅᓱᖅᑏᑦ ᐊᕐᕌᒍᓕᒫᕐᓯᐅᑏᑦ ᐅᓂᒃᑳᖏᓐᓂᑦ: ᐃᔨᒋᔭᐅᔪᑦ ᓯᐅᑎᒋᔭᐅᔪᓪᓗ ᑕᓪᓗᕈᑎᐅᑉ ᐃᒪᖓᓂ

ᕿᑭᖅᑕᓂᒃᑯᑦ ᓴᖅᑭᑎᑦᑎᕗᑦ 2018-2019 ᐃᒃᐱᐊᕐᔪᒻᒥ ᓇᐅᑦᑎᖅᓱᖅᑏᑦ ᐊᕐᕌᒍᓕᒫᕐᓯᐅᑏᑦ ᐅᓂᒃᑳᖏᓐᓂᑦ: ᐃᔨᒋᔭᐅᔪᑦ ᓯᐅᑎᒋᔭᐅᔪᓪᓗ ᑕᓪᓗᕈᑎᐅᑉ ᐃᒪᖓᓂ

 In blog-inuk, media-releases-inuk

ᕿᑭᖅᑕᕐᔪᐊᖅ, ᓄᓇᕗᑦ − ᔫᓂ 4, 2019 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓂᒃᑯᑦ) ᖁᕕᐊᓱᑉᐳᑦ ᓴᖅᑭᑎᑦᑎᔭᕆᐊᔅᓴᖅ 2018-2019ᒥ ᐊᕐᕌᒍᓕᒫᕐᓯᐅᑎᓂᑦ ᐅᓂᒃᑳᖏᓐᓂᑦ ᐃᒃᐱᐊᕐᔪᒻᒥ ᐆᑦᑐᕋᐅᑕᐅᓪᓗᓂ ᑕᓪᓗᕈᑎᐅᑉ ᐃᒪᖓᓂ ᓇᐅᑦᑎᖅᓱᖅᑎᓂᑦ. ᐅᓂᒃᑳᑦ ᑕᑯᔭᔅᓴᐅᕗᑦ ᕿᑭᖅᑕᓂᒃᑯᑦ ᖃᕋᓴᐅᔭᒃᑯᑦ ᐃᑭᐊᖅᑭᕕᖓᓐᓂ ᐅᕙᓂ.

ᑖᒃᑯᐊ ᐃᓄᐃᑦ ᓇᐅᑦᑎᖅᓱᖅᑏᑦ ᐆᑦᑐᕋᐅᑕᐅᓪᓗᓂ ᐱᓕᕆᐊᖅ ᑮᓇᐅᔭᖃᖅᑎᑕᖅ ᓯᕗᕐᖓᒍᑦ ᐃᑲᔫᑕᐅᓪᓗᓂ ᑕᓪᓗᕈᑎᐅᑉ ᐃᒪᖓᓂ ᑲᓇᑕᒥ ᐃᒫᓂ ᓴᐳᔾᔨᕕᒻᒧᑦ ᑖᒃᑯᓇᙵᑦ ᒥᕐᖑᐃᓯᕐᕕᓕᕆᔨᒃᑯᓐᓂᑦ ᑲᓇᑕᒥ.

“ᓇᐅᑦᑎᖅᓱᖅᑏᑦ ᐱᓕᕆᓯᒪᑐᐃᓐᓇᓕᕋᓗᐊᖅᑎᓪᓗᒋᑦ ᐊᒥᓲᙱᑦᑐᓂᑦ ᑕᖅᑭᓂᑦ, ᐊᖏᔪᐊᓗᒻᒥᒃ ᐱᕙᓪᓕᖅᑎᑦᑎᓯᒪᓕᕇᕐᖓᑕ ᑕᑯᑎᑦᑎᓯᒪᓪᓗᑎᓪᓗ ᑕᐃᒪᐃᑦᑐᓂᑦ ᐱᓕᕆᐊᖅᑕᖃᕆᐊᖃᕐᓂᖓᓂᒃ ᐃᓚᖏᓐᓂᑦ ᑎᓴᒪᓂᑦ ᑕᓪᓗᕈᑎᐅᑉ ᐃᒪᖓᓂ ᓄᓇᓕᓐᓂᑦ,” ᐅᖃᖅᑐᖅ ᕿᑭᖅᑕᓂᒃᑯᑦ ᐊᖏᔪᖅᑳᖓᑦ ᐸᐅᓗᓯ ᐊᕿᐊᕈᖅ, “ᐃᖅᑲᓇᐃᔮᓖᑦ ᓇᐅᑦᑎᕐᓱᑐᐃᓐᓇᖃᑦᑕᓂᐅᙱᑦᑐᒥᒃ ᑕᒪᔅᓱᒥᖓ ᑭᓯᐊᓂᓕ ᐊᖑᓇᓱᖃᑦᑕᕐᒥᔪᑦ ᓂᕿᔅᓴᓂᑦ ᓄᓇᓕᓐᓄᑦ.”

ᓯᕗᓪᓕᕐᐹᒥ ᐊᕐᕌᒍᒥ ᐊᑐᕐᖓᑕ ᓇᐅᑦᑎᖅᓱᖅᑏᑦ ᐆᑦᑐᕋᐅᑕᐅᓪᓗᓂ ᐱᓕᕆᐊᖅ ᐅᔾᔨᕆᔭᔅᓴᐅᓪᓗᓂ ᐊᑑᑎᓂᖓᑦ ᐃᓅᓯᕐᒧᑦ ᒪᑭᒪᓇᓱᐊᕈᑎᖏᓐᓄᓪᓗ ᒪᑭᒪᔾᔪᑎᖏᓐᓄᑦ ᐃᒃᐱᐊᕐᔪᖕᒥᐅᑦ. ᑕᓪᓕᒪᑦ ᐱᖓᓲᔪᖅᑐᓂᑦ ᓇᐅᑦᑎᓱᖅᑎᓂᑦ ᐱᒪᔨᒋᔭᐅᓗᐊᖅᑐᑦ ᐃᓚᖏᓐᓄᑦ. ᐃᓘᓐᓇᑎᒃ, ᐃᑲᔪᖃᑦᑕᖅᑐᑦ ᑕᒫᓂ 11ᓂᑦ ᐃᓐᓇᕐᓂᑦ ᐊᒻᒪᓗ 22ᓂᑦ ᓱᕈᓯᕐᓂᑦ. ᑭᓯᐊᓂ ᐃᑲᔫᑎᒋᕙᑦᑕᖏᑦ ᐅᖓᑎᐊᓗᐊᓄᑦ ᑎᑭᐅᑎᕙᑦᑐᖅ ᐱᒪᔨᒋᔭᐅᓂᐅᑉ ᐃᓚᖏᑕ ᐅᖓᑖᓄᑦ.

ᐃᖃᓗᒃᐲᑦ, ᓇᑦᑏᑦ ᐊᓯᖏᓪᓗ ᐆᒪᔪᑦ ᐊᖑᓂᑦᑕᐅᖃᑦᑕᓚᐅᖅᑐᑦ ᓇᐅᑦᑎᖅᓱᖅᑎᓄᑦ ᐊᕐᕌᒍᒋᕋᑖᖅᑕᑎᓐᓂ ᓄᓇᖅᑲᖏᓐᓄᑦ ᓂᕆᕕᔾᔪᐊᑎᑦᑎᒍᑕᐅᖃᑦᑕᓚᐅᖅᑐᑦ ᐃᑲᔫᑎᒋᓪᓗᒋᑦ ᑳᑦᑐᓄᑦ. ᓂᕆᔭᔅᓴᐅᖏᓐᓂᖏᓪᓕ ᓂᕐᔪᑎᓃᙶᖅᑐᑦ ᑐᓂᔭᐅᖃᑦᑕᓚᐅᖅᑐᑦ ᒥᕐᓱᖅᑎᓄᑦ ᓴᓇᙳᐊᖅᑎᓄᓪᓗ ᒪᑭᑕᒋᐊᒃᑲᓐᓂᖁᓪᓗᒋᑦ ᓄᓇᖓᓐᓂ ᒪᑭᒪᓇᓱᐊᕈᑎᖃᕐᐸᑦᑐᑦ. ᐃᖃᓗᒃᐲᑦ ᑐᔫᑕᐅᔪᒻᒥᔪᑦ ᐋᑐᕚᒧᑦ  ᐃᓄᐃᑦ ᑕᐱᕇᒃᑯᓐᓄᑦ ᑲᓇᑕᒥ “ᐅᑭᐅᖅᑕᖅᑐᒦᙶᕐᓯᒪᔪᓂᑦ ᑕᒧᓗᑎᑦᑎᓂᐅᓂᐊᖅᑐᒧᑦ” ᐋᑐᕚᒥ.

ᓇᐅᑦᑎᖅᓱᖅᑏᑦ ᑲᓱᖅᑎᑦᑎᔪᑦ ᑲᓲᒪᙱᔾᔪᑕᐅᔪᓂᑦ ᐃᓅᓱᑦᑐᓄᑦ ᐃᓄᑐᖃᕐᓄᓪᓗ. ᐃᓕᓯᒪᔭᖏᑦ ᐊᒻᒪᓗ ᐃᓄᐃᑦ ᖃᐅᔨᒪᔭᑐᖃᖏᑦ ᖃᐅᔨᒪᔭᖏᑦ ᐱᓕᕆᖃᑎᖃᖃᑦᑕᖅᑐᑎᒃ ᐃᓄᑐᖃᕐᓂᑦ ᐊᔪᕆᕐᓯᐅᔾᔨᒍᑕᐅᓯᒪᔪᓂᑦ ᐃᓅᓱᑦᑐᓄᑦ ᐃᓄᓐᓄᑦ ᐃᓕᒍᒪᑦᑎᐊᖅᑐᓄᑦ ᓅᓯᒪᓗᓂ ᐃᓕᙵᔭᕆᐊᓕᖏᓐᓂᑦ.

ᓇᐅᑦᑎᓱᖅᑎᒋᔭᐅᑎᓪᓗᒋᑦ ᑕᓪᓗᕈᑎᐅᑉ ᐃᒪᖓᓂ, ᓇᐅᑦᑎᖅᓱᖅᑏᑦ ᖃᐅᔨᓴᕐᐸᑦᑐᑦ ᓯᑰᑉ ᖃᓄᐃᑦᑑᓂᖓᓂᒃ ᐊᖅᑯᑎᔅᓴᑦᑎᐊᕙᐅᒐᓗᐊᕐᒪᖔᖅ ᐊᒻᒪᓗ ᐃᑲᔪᖃᑦᑕᕆᓪᓗᑎᒃ ᐱᖏᓐᓇᖅᑐᓕᕆᔪᖃᓕᕋᐃᒻᒪᑦ ᐸᕐᓴᐃᓂᕐᒥᑦ ᓄᓇᖓᓐᓂ, ᐊᑐᖅᑐᑎᒃ ᖃᐅᔨᒪᔭᖏᓐᓂᑦ ᓄᓇᖅᑲᑎᖏᑕ ᐊᒻᒪᓗ ᓄᓇᓖᑦ ᓄᓇᖓᑕ ᐊᕙᑖᓂᒃ ᐸᕐᓴᐃᕙᑦᑐᑎᒃ ᐃᓄᓐᓂᑦ ᐃᑲᔪᖅᑕᐅᔭᕆᐊᓕᓐᓂᑦ.

ᑐᑭᓯᒋᐊᒃᑲᓐᓂᕈᒪᒍᔅᓯ, ᑐᑭᓯᒋᐊᕐᕕᐅᖃᑦᑕᕐᓕ:

ᓰᒪ ᓴHᐊ ᔨᐅᕋHᐃ,

ᑐᑭᒧᐊᑦᑎᑦᑎᔨ ᑐᓴᐅᒪᖃᑦᑕᐅᑎᓂᕐᒧᑦ,

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᑦ

szerehi@qia.ca

867.975.8413

1.800.667.2742

Recommended Posts

ᑐᑭᓯᒋᐊᕐᕕᐅᑕ

ᑐᑭᓯᒋᐊᕆᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᓐᓄᑦ