ᕿᑭᖅᑕᓂᒃᑯᑦ & ᐹᕕᓐᓛᓐᑯᑦ ᑐᓴᖅᑎᑦᓯᔪᑦ ᐱᕚᓪᓕᕈᑕᐅᔪᓂᒃ ᓄᓘᔮᓐᓂ IIBA−ᓄᑦ

ᕿᑭᖅᑕᓂᒃᑯᑦ & ᐹᕕᓐᓛᓐᑯᑦ ᑐᓴᖅᑎᑦᓯᔪᑦ ᐱᕚᓪᓕᕈᑕᐅᔪᓂᒃ ᓄᓘᔮᓐᓂ IIBA−ᓄᑦ

 In media-releases-inuk

ᐃᖃᓗᐃᑦ, ᓄᓇᕗᑦ − ᐆᑦᑑᑉᕙ 3, 2018 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ (ᕿᑭᖅᑕᓂᒃᑯᑦ) ᐊᒻᒪᓗ ᐹᕕᓐᓛᓐ ᓴᕕᒃᓴᓂᒃ ᐅᔭᕋᓐᓂᐊᖅᑏᑦ ᑯᐊᐳᕇᓴᒃᑯᑦ ᑐᓴᖅᑎᓯᖅᑲᐅᔪᑦ ᓇᓗᓇᐃᖅᑐᕐᓯᒪᔪᓂᒃ ᐋᖅᑭᒋᐊᕐᓯᒪᔪᓂᒃ ᐊᖏᖃᑎᒌᒍᑎᓂᒃ ᓄᓘᔮᓐᓄᑦ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐃᑲᔫᓯᐊᖅᑖᓂᕐᒧᓪᓗ ᐊᖏᖃᑎᒌᒍᑎᓂᒃ (IIBA).

“ᖁᕕᐊᒋᔭᒃᑲ ᐃᑲᔫᓯᐊᒃᓴᑦ ᑎᒍᒍᓐᓇᓚᐅᖅᑕᕗᑦ ᕿᑭᖅᑕᓂ ᐃᓄᖏᓐᓄᑦ ᐋᔩᕋᕈᑕᐅᒃᑲᓂᕐᓂᖓᒍᑦ ᓄᓘᔮᓐᓄᑦ IIBA,” ᐅᖃᖅᑐᖅ ᕿᑭᖅᑕᓂᒃᑯᑦ ᐊᖓᔪᖅᑳᖓ ᐲᔭᐃ ᐊᕿᐊᕈᖅ, “ᑐᕌᒐᓕᐊᕆᓚᐅᖅᑕᕗᑦ ᐱᕚᓪᓕᕈᑎᒃᓴᓄᑦ ᐱᓕᒪᓴᕐᓂᕐᒧᑦ ᐃᖅᑲᓇᐃᔮᑦᓴᓄᓪᓗ ᐊᒻᒪᓗ ᑕᒪᓐᓇ ᑲᔪᓯᑎᓚᐅᖅᑕᕗᑦ ᐊᓯᖏᓪᓗ.”

ᐃᓛᒃᑯᑦ 22.2 IIBA−ᓂ ᐹᕕᓐᓛᒃᑯᑦ ᐊᒻᒪᓗ ᕿᑭᖅᑕᓂᒃᑯᑦ, ᐅᖃᕐᓯᒪᔪᖅ IIBA ᕿᒥᕐᕈᔭᐅᖃᑦᑕᕆᐊᓕᒃ ᐊᕐᕌᒍᑦ ᐱᖓᓱᑦ ᓈᒐᐃᑉᐸᑕ ᐋᖅᑭᒋᐊᕋᑦᓴᖅᑕᖃᕐᒪᖔᖅ ᐱᕚᓪᓕᕈᑎᒃᓴᓂᓪᓗ ᐊᖏᖃᑎᒌᒍᑎᓄᑦ. ᑕᑉᕙᓐᖓᑦ ᕿᒥᕐᕈᔭᐅᓂᖓᓂᒃ, ᐊᕐᕌᒍᑦᑎᓐᓂ, ᐃᓚᖏᑦ ᐃᓛᒃᑰᖓᓂᖏᑦ IIBA ᐋᔩᕋᕈᑕᐅᒃᑲᓐᓂᓚᐅᖅᑐᑦ.

ᐄᑉᕈᖑᕋᑖᖅᑐᒥ ᕿᑭᖅᑕᓂᒃᑯᓐᓂ ᐱᓕᕆᔩᑦ ᓯᕗᓕᖅᑕᐅᓪᓗᑎᒃ ᐄᕙ ᐋᕆᐊᒃ, IIBA ᐊᐃᕙᔨᒻᒪᕆᖓ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᓄᓘᔮᓕᕆᓂᕐᒧᑦ ᓄᓇᓕᖕᓄᖃᑦᑕᓚᐅᖅᑐᖅ ᐊᒃᑐᖅᑕᐅᓯᒪᔪᓄᑦ ᐅᔭᕋᓐᓂᐊᕕᖕᒧᑦ ᑐᓴᕐᕙᕆᐊᕐᓱᓂ ᓄᓇᓖᑦ ᐅᖃᐅᓯᒃᓴᖏᓐᓂᒃ. ᐊᑐᓕᖁᔨᔾᔪᑏ ᐅᖃᐅᓯᐅᖃᑦᑕᓚᐅᖅᑐᓪᓗ ᐳᓚᕋᕐᓂᖓᓂ ᐊᑐᖅᑕᐅᓚᐅᖅᑐᑦ ᐋᖅᑭᑦᓱᐃᒍᑕᐅᓪᓗᑎᒃ ᕿᑭᖅᑕᓂᒃᑯᑦ ᐃᓘᓐᓈᒍᑦ ᐊᔩᕋᓂᕐᒧᑦ ᑐᑭᒧᐊᒍᑎᒃᓴᓄᑦ.

“ᐅᐱᒍᓱᑦᑐᖓ ᐃᖅᑲᓇᐃᔭᕆᐊᓕᒻᒪᕆᐅᓂᑦᑎᓐᓂᒃ ᐱᕚᓪᓕᕈᑎᒃᓴᖏᓐᓄᑦ IIIBA ᑖᒃᑯᓇᓐᖔᖅᑐᓂᒃ ᑐᑭᒧᐊᒍᑎᒃᓴᓂᒃ ᒪᓕᒃᑕᐅᖁᔭᐅᓚᐅᖅᑐᓂᒃ ᐃᓄᓐᓄᑦ,” ᐄᕙ ᐋᕆᐊᒃ, “ᐊᒻᒪᓗ ᖁᔭᒋᒻᒥᔭᒃᑲ ᑲᖐᑦᓴᒍᓐᓇᓚᐅᕐᓂᖏᑦ ᐹᕕᓐᓛᓐᑯᑦ ᐃᖅᑲᓇᐃᔮᕆᓪᓗᓂᒋᑦ ᐅᖃᐅᓯᐅᓪᓗᐊᑕᖃᑦᑕᓚᐅᖅᑐᑦ ᕿᓚᒥᐅᔪᒃᑯᑦ ᐊᒻᒪᓗ ᐃᖅᑲᓇᐃᔭᖃᑎᒌᓐᓂᒃᑯᑦ.”

ᑎᓕᔭᐅᓚᐅᕐᓂᕐᒥᒍᑦ ᑕᓪᓕᒪᓄᑦ ᐊᒃᑐᖅᑕᐅᓯᒪᔪᓄᑦ ᓄᓇᓕᓐᓄᑦ, ᕿᑭᖅᑕᓂᒃᑯᑦ ᐱᓇᓱᐊᒐᕆᓚᐅᖅᑕᖓ ᐋᔩᕋᕈᑎᖃᒃᑲᓂᖅᑎᓪᓗᒋᑦ ᐱᓕᒻᒪᓴᕐᓂᖅ ᐃᓕᓐᓂᐊᓂᕐᓗ ᐊᒻᒪᓗ ᐃᖅᑲᓇᐃᔮᑦ ᑳᓐᑐᓛᓪᓗ.

ᐋᖅᑭᒋᐊᕐᓯᒪᔪᓂ IIBA−ᓃᖃᑕᐅᔪᑦ ᐅᓄᖅᑐᑦ ᐱᐅᓯᒋᐊᕈᑏᑦ ᐃᑲᔫᓯᐊᓄᑦ ᑖᒃᑯᓇᓂ ᐃᓄᐃᑦ ᑎᒍᓯᒃᑲᓐᓂᕈᓐᓇᖁᓪᓗᒋᑦ ᐃᖅᑲᓇᐃᔮᓂᒃ ᐅᔭᕋᓐᓂᐊᕕᒻᒥ.

ᐃᓚᖏᑦ ᐅᔾᔨᕐᓇᓗᐊᓚᐅᖅᑐᑦ ᐋᔩᕋᕈᑕᐅᒃᑲᓂᕐᓂᖓᓂ ᓄᓘᔮᓄᑦ IIBA ᐃᓚᒋᔭᐅᓪᓗᑎᒃ:

  • $10 ᒥᓕᔭᓐ ᑐᕌᖓᔪᑦ ᓴᓇᒻᒪᖓᓄᑦ ᓴᓇᔭᐅᓂᖓᓄᓪᓗ ᐊᕕᑦᑐᕐᓯᒪᓂᕐᒥ ᐱᓕᒻᒪᓴᕐᕕᒃᓴᖅ ᒥᑦᑎᒪᑕᓕᒻᒥ
  • ᐅᔾᔨᓇᖅᑐᒥᒃ ᐊᖏᓪᓕᒋᐊᖅᑕᐅᓂᖏᑦ ᐃᓄᐃᑦ ᐱᓕᒻᒪᓴᕐᓂᕐᒧᑦ ᑮᓇᐅᔭᖅᑑᑎᒃᓴᑦ
    • $2.25 ᒥᓕᔭᓐ ᐊᕐᕌᒍᑕᒫᑦ 2018−ᒥᓂᒃ 2021-ᒧᓄᑦ
    • $1.5 ᒥᓕᔭᓐ ᐊᐅᓚᑕᐅᓂᖓᓄᑦ ᐱᓕᒻᒪᓴᕐᓂᖅ ᐃᓄᓐᓄᑦ 2021-ᒥᓂᒃ 2031-ᒧᓄᑦ
  • ᑕᕆᐅᒃᑯᑦ ᐱᖁᑎᕐᔪᐊᓕᕆᓂᖅ ($300,000/ᐅᒥᐊᕐᔪᐊᖅ)
    • ᐊᕐᕌᒍᑦ ᐱᖓᓱᑦ ᓈᒐᐃᒻᒪᑕ ᐹᕕᓐᓛᓐᑯᑦ ᓂᐅᕕᖃᑦᑕᓂᐊᖅᑐᑦ ᓄᒃᑎᕆᓗᑎᓪᓗ ᓇᖕᒥᓂᖁᑎᖃᕐᓂᕐᒥᒃ ᖃᐅᔨᓴᕈᑎᒥᒃ ᐅᒥᐊᕐᔪᐊᒥᒃ ᒥᑦᑎᒪᑕᓕᒻᒧᑦ, ᐃᑉᐱᐊᕐᔪᒃ, ᑲᖏᕐᖢᒑᐱᒃ, ᐃᒡᓗᓕᒃ ᐊᒻᒪᓗ ᓴᓂᕋᔭᒃ
    • ᑐᕌᒐᖅ 12-ᓂ ᐊᕐᕌᒍᓂ ᐊᑐᓂᑦ ᓄᓇᓖᑦ ᑐᓂᔭᐅᓯᒪᓂᐊᖅᑐᑦ ᖃᐅᔨᓴᕈᑎᒃᓴᒥᒃ ᐅᒥᐊᕐᔪᐊᒥᒃ
  • ᖃᐅᔨᓇᓱᐊᕐᓂᕐᒧᑦ ᑮᓇᐅᔭᑦ ($200,000/ᐊᕐᕌᒍ)
  • ᑖᒃᑯᐊ ᑮᓇᐅᔭᑦ ᑐᕌᖓᔪᑦ ᒥᑦᑎᒪᑕᓕᒻᒧᑦ ᐊᒻᒪᓗ ᐃᑲᔫᑎᓂᐊᖅᑐᑦ ᓇᖕᒥᓂᕐᓱᓂᒃᑯᑦ ᖃᐅᔨᓇᓱᐊᓂᕐᕐᒥᒃ ᐱᓕᕆᐊᒃᓴᒥᒃ. ᑕᑉᕙᓐᖓᑦ ᐱᓕᕆᐊᒥᒃ ᓴᖅᑭᖅᑐᑦ ᐊᑐᖅᑕᐅᓂᐊᖅᑐᑦ ᐃᑲᔫᑎᒃᓴᓄᑦ ᐊᓯᔾᔨᖅᑐᓂᒃ ᐃᑯᓪᓚᕈᑕᐅᓗᑎᒃ ᐅᑉᕙᓘᓐᓃᑦ ᐊᒃᑐᐃᓂᖃᑦᑕᐃᓕᒪᑎᑦᓯᓂᕐᒧᑦ ᐱᓕᕆᐊᑎᒍᑦ.

ᐊᑎᓕᐅᖅᑕᐅᓯᒪᓕᑐᐊᕐᐸᑦ, ᐋᖅᑭᒋᐊᕐᓯᒪᔪᑦ ᐊᖏᖃᑎᒌᒍᑏᑦ ᐃᓇᖐᓂᐊᖅᑐᑦ ᓄᓘᔮᓐᓂ IIBA−ᓂᒃ, ᐊᑎᓕᐅᖅᑕᐅᒋᐊᓐᖓᓚᐅᕐᓯᒪᔪᓂᒃ ᓯᑉᑎᒻᕙ 2013-ᒥ.

ᕿᑭᖅᑕᓂᒃᑯᑦ ᓂᕆᐅᑦᑐᑦ ᐱᓇᓱᐊᖃᑎᖃᐃᓐᓇᓂᐊᕐᓂᕐᒥᒃ ᐹᕕᓐᓛᑯᓐᓂᒃ ᑲᑐᔾᔨᓂᒃᑯᑦ ᐱᓕᕆᐊᓂᒃ ᐃᑲᔫᑎᖃᕈᓐᓇᖅᑐᓂᒃ ᐃᓄᓐᓂᒃ.

ᐋᖅᑭᒋᐊᕐᓯᒪᔪᖅ ᐊᖏᖃᑎᒌᒍᑦ ᐃᓚᒋᔭᐅᔪᖅ ᐅᓄᖅᑐᓂᒃ ᓴᖅᑭᕐᓯᒪᔪᓂᒃ ᐊᒃᑐᐊᔪᓂᒃ “ᐱᓕᕆᐊᑦ ᑐᓐᖓᕕᖃᑦᓯᐊᕈᑎᒃᓴᖏᓐᓂᒃ ᐊᐅᓚᑕᐅᓂᖏᑦ” ᐋᖅᑭᓱᖅᑕᐅᓚᐅᖅᑐᒥᒃ ᕿᑭᖅᑕᓂᒃᑯᓐᓂᒃ ᐊᒻᒪᓗ ᐹᕕᓐᓛᑯᓐᓂᒃ 2018 ᕿᑎᐊᓂ. ᑖᓐᓇ ᐊᐅᓚᑕᐅᓂᖓ ᓯᕗᓪᓕᐅᔾᔭᐅᔭᕆᐊᖃᓚᐅᖅᑐᖅ ᑲᒪᒋᐊᕐᓂᖅ ᐃᓄᐃᑦ ᐱᔪᒪᔭᖏᓐᓂᒃ ᐊᒻᒪᓗ ᐊᑐᖅᑕᐅᖃᑦᑕᕐᓯᒪᔪᓂᒃ ᓯᕗᓂᑦᑎᓐᓄᑦ ᐅᔭᕋᓐᓂᐊᓂᕐᒧᑦ ᐸᕐᓇᐅᑎᓄᑦ.

ᐊᓯᖏᑦ ᓴᖅᑭᕐᓯᒪᖃᑕᐅᔪᑦ ᐊᑕᐅᓯᐅᖃᑎᒌᓐᓂᒃᑯᑦ ᐊᑐᕋᑦᓴᓕᐊᖑᓯᒪᔪᑦ ᐊᖅᑭᑦᓱᐃᒍᑕᐅᓗᑎᒃ ᑲᓕᒐᕐᓄᑦ ᐊᑐᕆᐊᒥᒃ, ᐱᕚᓪᓕᕈᑕᐅᓗᓂ ᓄᓇᓖᑦ ᐃᓚᒋᔭᐅᓂᖏᑦ, ᐋᖅᑭᒋᐊᕈᑏᑦ ᐊᑐᖅᑕᐅᔪᓄᑦ ᓂᖏᖅᑕᐅᑎᓄᑦ ᐊᖏᖃᑎᒌᒍᑎᓄᑦ, ᐊᒻᒪᓗ ᕿᒥᕐᕈᔭᐅᓂᖏᑦ 2018 ᓴᖅᑭᖅᑕᐅᔪᑦ ᐅᓄᕐᓯᒋᐊᕈᑎᒃᓴᑦ ᑐᒃᓯᕋᐅᑎᑦ. ᑭᖑᓪᓕᖅ ᑲᑐᔾᔨᓂᒃᑯᑦ ᓯᕗᓪᓕᐅᔾᔭᐅᔭᕆᐊᓕᖁᑎᒋᓂᐊᖅᑕᖓ ᐱᓇᓱᐊᖃᑎᒌᑦ ᐃᓂᖅᑕᐅᓂᖓ IIBA ᐊᑐᓕᖅᑎᑕᐅᔾᔪᑎᒃᓴᖏᓐᓄᑦ ᐊᑐᐊᕐᓯᔾᔪᑎᑦ, ᐊᒻᒪᓗ, ᑲᔪᓯᑎᑕᐅᓂᖓ ᐃᒥᕐᒧᑦ ᐊᑭᓖᒍᑎᓄᑦ ᐊᖏᖃᑎᒌᒍᑏᑦ.

ᐊᔾᔨ

ᐊᔾᔨᓕᐅᖅ: ᐹᕕᓐᓛᓐ ᓴᕕᒃᓴᓂᒃ ᐅᔭᕋᓐᓂᐊᖅᑏᑦ ᑯᐊᐳᕇᓴᒃᑯᑦ ᐊᖓᔪᖅᑳᖓ ᐊᐅᓚᑦᓯᔨᒻᒪᕆᐅᓯᓐᓈᑦ ᕗᕋᐃᔭᓐ ᐱᐊᓂ ᐊᔾᔨᓕᐅᖅᑕᐅᖃᑎᓕᒃ ᐲᔭᐃ ᐊᕿᐊᕈᕐᒥᒃ, ᐊᖓᔪᖅᑳᖓ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ, _____ ᑐᓴᖅᑎᑦᓯᒍᑕᐅᓚᐅᖅᑎᓪᓗᒋᑦ ᐋᖅᑭᒋᐊᖅᑕᐅᓯᒪᔪᑦ ᓄᓘᔮᓐᓂ ᐱᓕᕆᐊᓄᑦ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐃᑲᔫᓯᐊᖅᑖᕈᑎᒃᓴᓄᓪᓗ ᐊᖏᖃᑎᒌᒍᑏᑦ.

ᕿᑭᖅᑕᓂᒃᑯᑦ ᒥᑦᓵᓄᑦ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ (ᕿᑭᖅᑕᓂ), ᑮᓇᐅᔭᓕᐅᕋᓱᐊᖅᑎᐅᖏᑦᑐᑦ ᓴᓴᐃᔭᑎ ᑭᒡᒐᖅᑐᐃᔪᑦ 14,000-ᓃᑦᑐᓂᒃ ᐃᓄᓐᓂᒃ ᕿᑭᖅᑕᓂ ᓄᓇᖓᓂ (ᕿᑭᖅᑖᓗᒃ) ᓄᓇᕗᒻᒥ, ᐃᓚᒋᔭᐅᔪᑦ ᑕᑉᕗᖓ 13 ᓄᓇᓖᑦ ᐊᐅᓱᐃᑦᑐᒥᒃ ᖁᑦᑎᑦᑐᒦᑦᑐᒥᒃ ᑕᐅᓄᖓ ᓴᓂᑭᓗᐊᒧᑦ (ᓴᓂᑭᓗᐊᖅ ᕿᑭᖅᑕᖏᓐᓄᑦ). ᕿᑭᖅᑕᓂᒃᑯᑦ ᑐᕌᒐᖓ ᐊᑦᑕᓇᐃᕐᓯᓯᒪᓂᖅ, ᐊᐅᓚᑦᓯᓂᖅ ᓯᕗᒧᐊᒃᑎᑦᓯᕙᓪᓕᐊᓂᕐᓗ ᐱᔪᓐᓇᐅᑎᖏᓐᓂᒃ ᐃᑲᔫᓯᐊᒃᓴᖏᓐᓂᓪᓗ ᕿᑭᖅᑕᓂ ᐃᓄᐃᑦ.

ᐱᕙᓪᓕᐊᔪᓅᖓᔪᓂᒃ ᖃᐅᔨᒋᐊᖃᑦᑕᕕᒃᓴᖅ;

ᓰᒪ ᓴᕼᐊ ᔨᐅᕆᕼᐃ

ᑐᑭᒧᐊᒃᑎᑦᑎᔨ ᑐᓴᐅᒪᔾᔪᑎᓕᕆᓂᕐᒧᑦ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ

szerehi@qia.ca

(867) 975.8413

1.800.667.2742

 

Recommended Posts

ᑐᑭᓯᒋᐊᕐᕕᐅᑕ

ᑐᑭᓯᒋᐊᕆᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᓐᓄᑦ