ᕿᑭᖅᑕᓂᒃᑯᑦ ᐃᕐᖐᓐᓇᖅ ᑭᐅᔾᔪᑎᖓᑦ ᐹᕕᓐᓛᓐᑯᑦ ᑐᑭᑖᕈᑎᖓᓐᓄᑦ ᓄᖅᑲᑎᑦᑎᒋᐊᖃᕐᓂᐊᓂᕐᒧᑦ ᖃᐅᔨᒃᑲᐃᔾᔪᑎᓂᑦ ᑐᓂᓯᐅᖅᑲᐃᓂᐊᕐᓂᖏᓐᓂᒃ ᐃᖅᑲᓇᐃᔭᖅᑎᓄᑦ

ᕿᑭᖅᑕᓂᒃᑯᑦ ᐃᕐᖐᓐᓇᖅ ᑭᐅᔾᔪᑎᖓᑦ ᐹᕕᓐᓛᓐᑯᑦ ᑐᑭᑖᕈᑎᖓᓐᓄᑦ ᓄᖅᑲᑎᑦᑎᒋᐊᖃᕐᓂᐊᓂᕐᒧᑦ ᖃᐅᔨᒃᑲᐃᔾᔪᑎᓂᑦ ᑐᓂᓯᐅᖅᑲᐃᓂᐊᕐᓂᖏᓐᓂᒃ ᐃᖅᑲᓇᐃᔭᖅᑎᓄᑦ

 In Uncategorized

ᐃᖃᓗᐃᑦ, ᓄᓇᕗᑦ, ᒪᐃ 27, 2022 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓂᒃᑯᑦ) ᖃᐅᔨᒃᑲᖅᑕᐅᓯᒪᒻᒪᑕ ᐹᕕᓐᓛᓐ ᓴᕕᕋᔭᔅᓴᓂᑦ ᐅᔭᕋᓐᓂᐊᖅᑑᑦ (ᐹᕕᓐᓛᓐᑯᑦ) ᑐᓂᓯᐅᖅᑲᐃᓂᐊᕐᓂᖏᓐᓂᒃ ᓄᖅᑲᑎᑦᑎᒋᐊᖃᕐᓂᐊᓂᕐᓂᕐᒧᑦ ᐃᖅᑲᓇᐃᔭᖅᑎᓂᑦ ᒥᓂᔅᑕ ᐃᓄᓕᕆᔨᑐᖃᒃᑯᓐᓄᑦ ᐊᖏᖅᑕᐅᑎᒋᙱᑉᐸᑦ ᑲᔪᓯᑎᑦᑎᒍᒪᓯᒪᑎᓪᓗᒋᑦ ᐅᔭᕋᓐᓂᐊᓂᕐᒥᒃ 6 ᒥᓕᐊᓐ ᑕᓐᔅᓂᒃ ᐊᖏᓂᓕᓐᓂᑦ ᐊᕐᕌᒍᑕᒫᑦ (mtpa) 2022ᒥ.

ᕿᑭᖅᑕᓂᒃᑯᑦ ᐅᖃᐃᓐᓇᖃᑦᑕᕐᓯᒪᒻᒪᑕ ᐃᑲᔪᕐᓰᓂᕋᖅᑐᑎᒃ ᐅᔭᕋᓐᓂᐊᓂᕐᒥᒃ ᐱᓕᕆᐊᖑᔪᑦ ᐊᑑᑎᓂᖃᑦᑎᐊᑐᐊᖅᑲᑕ ᒪᑯᓄᖓ ᐃᓄᐃᑦ ᐱᔪᓐᓇᐅᑎᖏᓐᓄᑦ, ᐅᑉᐱᕆᔭᖏᓐᓄᑦ, ᐊᒻᒪᓗ ᐱᔾᔪᑎᒋᕙᑦᑕᖏᓐᓄᑦ. ᒪᓕᑦᑐᒋᑦ ᒫᓐᓇ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᕈᑏᑦ ᐊᒻᒪᓗ ᐃᓄᓐᓄᑦ ᓇᓗᓇᐃᕐᓯᓯᒪᑦᑎᐊᕐᓂᕐᒧᑦ ᐊᖏᕈᑏᑦ, ᐹᕕᓐᓛᓐᑯᑦ ᑲᒪᒋᔭᔅᓴᖃᕐᖓᑕ ᐃᓚᒋᔭᐅᑎᑦᑎᖃᑦᑕᓂᕐᒥᒃ ᐃᓄᓐᓂᑦ ᓯᕗᕐᖓᒍᑦ ᑐᓂᓯᓚᐅᙱᓐᓂᖏᓐᓂ ᑐᔅᓯᕋᐅᑎᓪᓚᑦᑖᕐᒥᒃ ᓄᓇᕗᒥ ᐊᕙᑎᓕᕆᓂᕐᒧᑦ ᑲᑎᒪᔨᓄᑦ (NIRB). ᑖᒃᑯᐊ ᐱᔪᓐᓇᐅᑏᑦ ᐱᒻᒪᕆᐅᒻᒪᑕ ᐅᕙᑦᑎᓐᓄᑦ, ᐊᓯᖏᑦ ᑕᒪᒃᑯᐊᖑᒐᓗᐊᕐᒥᑎᓪᓗᒋᑦ, ᐃᓱᒪᔅᓴᕐᓯᐅᕈᑕᐅᔪᓐᓇᐸᒻᒪᑕ ᐃᓄᐃᑦ ᖃᐅᔨᒪᑐᔭᖃᖏᑕ ᒥᔅᓵᓄᑦ ᓯᕗᕐᖓᒍᑦ ᑐᓂᓯᓚᐅᖅᑎᓐᓇᒋᑦ ᓱᓕ ᑐᔅᓯᕋᐅᑎᓪᓚᑦᑖᖓᓐᓂᒃ ᐊᕙᑎᓕᕆᔨᒃᑯᓐᓄᑦ. ᑭᓯᐊᓂᓕ, ᑕᒪᓐᓇ ᐱᒻᒪᕆᐅᓂᓕᒃ ᑲᒪᒋᔭᐅᔭᕆᐊᖃᕐᓯᒪᔪᖅ ᑲᒪᒋᔭᐅᓯᒪᙱᒻᒪᑦ.

ᑐᖏᓕᐊᓂ ᐱᓕᕆᐊᔅᓴᑦ ᒥᔅᓵᑦ ᑲᑎᒪᔩᑦ ᐅᓂᒃᑳᖏᑦ, ᐊᕙᑎᓕᕆᔨᒃᑯᑦ ᓇᓗᓇᐃᕐᓯᓯᒪᔪᑦ ᐊᒥᓱᓂᑦ ᓈᒻᒪᖏᑦᑐᓂᑦ ᒫᓐᓇ ᐱᓕᕆᐊᕐᒥ ᐃᒫᒃ ᐊᖏᓂᓕᒻᒥᒃ 4.2mtpa ᑖᒃᑯᐊ ᑲᒪᒋᔭᐅᔭᕆᐊᖃᕐᖓᑕ ᖃᓄᑐᐃᓐᓇᖅ ᐊᖏᓪᓕᒋᐊᕐᓯᒍᒪᓂᕐᒨᖓᔪᓂᑦ ᐃᓱᒪᔅᓴᕐᓯᐅᕈᑎᖃᓚᐅᙱᓐᓂᖏᓐᓂ.

  • 2018, ᕿᑭᖅᑕᓂᒃᑯᑦ ᐱᓕᕆᖃᑎᖃᔪᔪᑦ ᒥᑦᑎᒪᑕᓕᒻᒥᐅᓂᑦ ᕿᒥᕐᕈᓂᐊᕐᖓᑕ ᐊᒻᒪᓗ ᐃᑲᔪᕐᓰᓂᐊᕐᖓᑕ, ᒪᓕᑦᑐᒋᑦ ᖃᓄᐃᓕᖓᓂᐅᔪᑦ, ᐊᑐᑲᐃᓐᓇᓂᐊᖅᑐᒥᒃ ᐊᖏᓪᓕᒋᐊᕐᓯᑎᑦᑎᓯᒪᓂᕐᒧᑦ ᓴᕕᕋᔭᔅᓴᒥᒃ ᐅᔭᕋᓐᓂᐊᖅᑕᐅᕙᑦᑐᒥᒃ ᐃᒪᓐᓇᓂᑦ 4.2mtpa ᐃᒪᓐᓇᓄᑦ 6mtpa.
  • 2020, ᕿᑭᖅᑕᓂᒃᑯᑦ ᐊᒻᒪᓗ ᐊᑑᑎᕕᐅᔪᑦ ᓄᓇᓖᑦ ᐃᑲᔪᕐᓰᓯᒪᔪᑦ ᑲᔪᓯᑎᑦᑎᓂᕐᒧᑦ ᐅᔭᕋᓐᓂᐊᕐᓂᐅᕙᑦᑐᒥᒃ 6mtpa ᐊᖏᓂᓕᒻᒥᒃ 2020ᒥ 2021ᒥᓗ, ᑕᐃᒫᒃ ᑎᒥᐅᔪᖅ ᐊᐅᓚᓂᖃᕐᓂᐊᕐᖓᑦ ᑐᖏᓕᐊᓂ ᐱᓕᕆᐊᔅᓴᓄᑦ ᑐᑭᑖᕈᑎᖃᖅᑐᕋᓱᓐᓂᖓᓂ.
  • ᔪᓚᐃ 2021, ᐹᕕᓐᓛᓐᑯᑦ ᖃᐅᔨᒃᑲᐃᔪᔪᑦ ᕿᑭᖅᑕᓂᒃᑯᓐᓂᑦ ᑐᔅᓯᕋᐅᓯᐅᕈᑎᖃᔾᔮᖏᓐᓂᖏᓐᓂᒃ ᐊᖏᓪᓕᒋᐊᕐᓯᑲᓐᓂᕈᒪᒐᔭᕐᓂᕐᒧᑦ ᑕᐃᒫᒃ ᐊᖏᓂᓕᒻᒧᑦ 6mtpa
  • ᑎᓯᐱᕆ 31, 2021 ᐹᕕᓐᓛᓐᑯᑦ ᐱᓕᕆᔪᓐᓇᐅᑎᖓᑦ ᐅᔭᕋᑦᑕᕈᓐᓇᓂᕐᒧᑦ ᐊᒻᒪᓗ ᐅᓯᑲᑦᑕᕈᓐᓇᓂᕐᒧᑦ  6mtpa ᐊᖏᓂᓕᒻᒥᒃ ᐃᓱᓕᓯᒪᓕᕐᖓᑦ

ᕿᑭᖅᑕᓂᒃᑯᑦ ᐅᖃᐅᔾᔨᓪᓚᕆᖃᑦᑕᕐᓯᒪᒻᒪᑕ ᐹᕕᓐᓛᓐᑯᑦ ᑐᔅᓯᕋᐅᑎᓪᓚᑦᑖᕐᒥᒃ ᐅᐸᓗᖓᐃᔭᐃᖁᓪᓗᒋᑦ ᐊᕙᑎᓕᕆᔨᒃᑯᓐᓄᑦ ᐅᖓᕙᕆᐊᖅᑕᐅᓂᐊᕐᖓᑦ ᑖᓐᓇ 6mtpa.

ᕿᑭᖅᑕᓂᒃᑯᑦ ᐅᑉᐱᕈᓱᑦᑐᑦ ᐋᔩᖃᑎᒌᒍᑕᐅᓯᒪᔪᓂᑦ ᓄᓇᕗᒥ ᐊᖏᕈᑎᓂᑦ ᐊᒻᒪᓗ NuPPAA ᓄᓇᕗᒥ ᐸᕐᓇᐃᓂᕐᒧᑦ ᐱᓕᕆᐊᔅᓴᒥᓪᓗ ᖃᐅᔨᓴᕐᓂᕐᒧᑦ ᒪᓕᒐᕐᒥᑦ ᕿᒥᕐᕈᓂᕐᒧᑦ ᑐᔅᓯᕋᐅᑎᓂᑦ ᓲᕐᓗ ᑖᔅᓱᒥᖓᑎᑐᑦ ᖃᐅᔨᒪᒋᐊᑦᑎᐊᕈᑎᐅᒻᒪᑦ ᓈᒻᒪᑦᑐᒥᒃ ᐱᓕᕆᐊᖑᒐᓗᐊᕐᒪᖔᖅ ᐊᒻᒪᓗ ᐃᓄᐃᑦ ᐅᖃᐅᓯᖏᑦ ᑐᓴᖅᑕᐅᔪᓐᓇᖁᓪᓗᒋᑦ. ᕿᑭᖅᑕᓂᒃᑯᑦ ᖁᓅᒻᒥᕐᓯᒪᔪᑦ ᐃᖅᑲᓇᐃᔭᖅᑏᑦ ᐃᖅᑲᓇᐃᔭᖅᑐᑦ ᓄᓘᔮᓕᕆᓂᕐᒥ ᑐᓂᓯᔭᐅᓂᐊᕐᖓᑕ ᓄᖅᑲᑎᑦᑎᒋᐊᖃᕐᓂᐊᕐᓂᖏᓐᓄᑦ ᖃᐅᔨᒃᑲᐃᔾᔪᑎᓂᑦ ᐱᔾᔪᑎᒋᓪᓗᒍ ᐹᕕᓐᓛᓐᑯᑦ ᐅᐸᓗᖓᐃᕐᓯᒪᑦᑎᐊᖏᓐᓂᖏᓐᓄᑦ ᑎᑎᕋᕐᓂᕐᒧᑦ ᐊᒻᒪᓗ ᑐᓂᓯᓂᕐᒧᑦ ᑐᔅᓯᕋᐅᑎᓪᓚᑦᑖᕐᒥᒃ ᐊᕙᑎᓕᕆᔨᒃᑯᓐᓄᑦ ᐅᖓᕙᕆᐊᖅᑕᐅᖁᓗᒍ ᑖᓐᓇ 6mtpa.

“ᕿᑭᖅᑕᓂᒃᑯᑦ ᓱᓕ ᐊᖏᕐᓯᒪᔪᑦ ᐊᑐᓕᖅᑎᑦᑎᕙᓪᓕᐊᒍᒪᓂᕐᒧᑦ ᐃᓄᐃᑦ ᐱᔪᓐᓇᐅᑎᖏᓐᓂᒃ ᓄᓘᔮᓕᕆᓂᕐᒨᖓᔪᓂᑦ. ᑕᐃᒫᒃ ᐊᒥᓱᐊᖅᑎᖅᑐᖓ ᐅᖃᖃᑦᑕᕐᓯᒪᒐᒪ, ᐃᓄᐃᑦ ᐊᒻᒪᓗ ᕿᑭᖅᑕᓂᒃᑯᑦ ᐊᑭᕋᖅᑐᖏᑦᑐᑦ ᐅᔭᕋᓐᓂᐊᓂᕐᒥᒃ ᓄᓇᑦᑎᓐᓂ. ᓂᕆᐅᑦᑐᒍ ᐱᓕᕆᖃᑎᖃᕐᓂᐊᕆᐊᔅᓴᖅ ᐊᑑᑎᕕᐅᔪᓂᑦ ᓄᓇᓕᓐᓂᑦ, ᐹᕕᓐᓛᓐᑯᓐᓂᑦ, ᓄᓇᕗᒥ ᒐᕙᒪᑐᖃᒃᑯᓐᓂᓗ ᒐᕙᒪᐅᔪᓂᑦ ᖃᐅᔨᒪᑦᑎᐊᕈᒪᓪᓗᑕ ᒫᓐᓇ ᐱᓕᕆᐊᖑᔪᒥᒃ ᐊᒻᒪᓗ ᖃᓄᑐᐃᓐᓇᖅ ᓯᕗᓂᔅᓴᑎᓐᓂ ᐊᖏᓪᓕᒋᐊᕐᓯᓂᕐᒧᑦ ᐱᓕᕆᐊᖑᒐᔭᖅᑐᑦ ᓈᒻᒪᓈᕐᓯᒪᑦᑎᐊᕋᓗᐊᕐᒪᖔᑕ ᐃᓄᐃᑦ ᑕᑯᓐᓈᖅᑕᖏᓐᓄᑦ ᐋᖅᑭᐅᒪᑎᑦᑎᓂᕐᒥᒃ ᐱᕙᓪᓕᐊᑎᑦᑎᓂᕐᒥᒃ”, ᐅᖃᖅᑐᖅ ᐅᓛᔪᒃ ᐊᑭᓱᒃ, ᐊᖏᔪᖅᑳᖅ ᕿᑭᖅᑕᓂᒃᑯᓐᓂᑦ.

ᕿᑭᖅᑕᓂᒃᑯᑦ ᑲᒪᒋᔭᖃᕐᐸᓪᓕᐊᓕᖅᑐᑦ ᑭᐅᔾᔪᑎᒋᓂᐊᖅᑕᖏᓐᓄᑦ ᐸᕐᓇᐃᓂᕐᒥᒃ ᐊᒻᒪᓗ ᑐᓴᐅᒪᑎᑦᑎᒍᑎᖃᓛᖅᑐᑦ ᐃᓄᓐᓄᑦ ᐊᒻᒪᓗ ᐊᑑᑎᕕᐅᔪᓄᑦ ᓄᓇᓕᓐᓄᑦ ᑐᑭᓯᓯᒪᔾᔪᑎᔅᓴᑲᓐᓃᑦ ᓇᓗᓇᐃᕐᓯᒪᓕᖅᑲᑕ ᐹᕕᓐᓛᓐᑯᓐᓄᑦ ᒪᓕᑦᑐᒋᑦ ᒫᓐᓇ ᐊᖏᕈᑕᐅᓯᒪᔪᑦ IIBA.

ᕿᑭᖅᑕᓂᒃᑯᑦ ᓇᓗᓇᐃᖅᑕᓯᐅᒪᓪᓗᑎᒃ ᐃᓄᓐᓄᑦ ᑲᑐᔾᔨᖃᑎᒌᖑᒻᒪᑕ ᑖᔅᓱᒧᖓ ᐱᓕᕆᐊᕐᒧᑦ. ᐃᒫᒃ ᑐᑭᓕᒃ ᕿᑭᖅᑕᓂᒃᑯᑦ ᖃᓄᓕᒫᖅ ᑲᒪᒋᔪᓐᓇᖅᑕᖏᓐᓂᒃ ᑲᒪᒋᔭᖃᕐᓂᐊᖅᑐᑦ ᖃᐅᔨᒪᑦᑎᐊᕈᒪᓪᓗᑎᒃ ᒫᓐᓇ ᓄᓘᔮᓕᕆᓂᖅ ᐊᒻᒪᓗ ᓇᓕᑐᐃᓐᓇᖏᓐᓂᒃ ᑐᔅᓯᕋᐅᑕᐅᓯᒪᔪᑦ ᓈᒻᒪᒃᑲᓗᐊᕐᒪᖔᑕ ᐃᓄᓐᓄᑦ ᐊᒻᒪᓗ ᐃᑉᐱᒍᓱᑦᑎᐊᕋᓗᐊᕐᒪᖔᑕ ᐃᓄᐃᑦ ᑲᒪᒋᔭᖃᕆᐊᖃᕐᓂᖏᓐᓂᒃ ᑐᑭᑖᕈᑎᖃᖃᑦᑕᕆᐊᖃᕐᓂᖏᓐᓂᓪᓗ ᐱᔾᔪᑕᐅᔪᓂᑦ ᐃᓄᐃᑦ ᐊᑑᑎᕕᐅᓪᓚᕆᙳᓱᑦᑎᓪᓗᒋᑦ.

ᑐᑭᓯᒋᐊᒃᑲᓐᓂᕈᒪᒍᔅᓯ, ᑐᑭᓯᒋᐊᕐᕕᐅᖃᑦᑕᕐᓕ:


ᑭᐅᕋᓐ ᕙᓚᕋᑎ

ᑐᑭᒧᐊᑦᑎᑦᑎᔨ, ᑐᑭᒧᐊᒍᑎᔅᓴᓄᑦ ᑐᓴᐅᒪᖃᑦᑕᐅᑎᒍᑎᓄᑦ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ
(P) 867.975.8398

(tf) 1.800.667.2742

Recent Posts

ᑐᑭᓯᒋᐊᕐᕕᐅᑕ

ᑐᑭᓯᒋᐊᕆᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᓐᓄᑦ