ᕿᑭᖅᑕᓂᒃᑯᑦ ᐃᑲᔫᑎᓖᑦ $100,000ᓂᑦ ᑕᒫᓂ ᐊᕐᕌᒍᒥ ᓄᓇᕗᒥ ᐸᖓᒡᒍᔾᔨᓂᐅᓂᐊᖅᑐᒧᑦ

ᕿᑭᖅᑕᓂᒃᑯᑦ ᐃᑲᔫᑎᓖᑦ $100,000ᓂᑦ ᑕᒫᓂ ᐊᕐᕌᒍᒥ ᓄᓇᕗᒥ ᐸᖓᒡᒍᔾᔨᓂᐅᓂᐊᖅᑐᒧᑦ

 In media-releases-inuk

ᐃᖃᓗᐃᑦ, ᓄᓇᕗᑦ − ᐄᐳᓪ 7, 2021 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᖁᕕᐊᓱᑉᐳᑦ ᓇᓗᓇᐃᕐᓯᔭᕆᐊᔅᓴᖅ ᓄᓇᕗᒥ ᐸᖓᒡᒍᔾᔨᓂᖃᓛᓕᕐᒥᒻᒪᑕ ᑕᒫᓂ ᐊᕐᕌᒍᒥ ᐄᐳᓗ 26ᒥ ᒪᐃ 3ᒧᑦ ᑎᑭᓪᓗᒍ.

ᑕᒫᓂ ᐊᕐᕌᒍᒥ ᓱᑲᓐᓂᑭᓴᐅᑎᑎᑦᑎᓂᖅ ᐃᒃᐱᐊᕐᔪᒻᒥᑦ ᐃᒡᓗᓕᒻᒧᑦ ᐋᖅᑭᓯᒪᓂᐊᖅᑐᖅ.

ᕿᑭᖅᑕᓂᒃᑯᑦ ᐊᖓᔪᖅᑳᖓᑦ, ᐸᐅᓗᓯ ᐊᕿᐊᕈᖅ, ᐅᖃᖅᑐᖅ ᖁᕕᐊᓱᓪᓚᕆᓐᓂᕋᖅᑐᓂ ᓄᓇᕗᒥ ᐸᖓᒡᒍᔾᔨᓂᖃᕐᓂᐊᕐᖓᑕ ᑕᒫᓂ ᐊᕐᕌᒍᒥ ᐊᕐᕌᓂ ᓄᖅᑲᖅᑎᑕᐅᓚᐅᕐᓯᒪᒻᒪᑦ ᖃᓂᒪᓇᖅᑐᖅᑕᖃᕐᓂᖓᓄᑦ ᓄᓇᕐᔪᐊᓕᒫᒥ.

“ᓄᓇᕗᒥ ᐸᖓᒡᒍᔾᔨᓂᖅ ᐃᓄᓐᓄᑦ ᑲᑎᒍᑕᐅᕙᒻᒪᑦ ᓇᑭᑐᐃᓐᓈᕐᓯᒪᔪᓄᑦ ᕿᑭᖅᑕᓂ ᓄᓇᓕᐅᔪᓂᑦ ᖁᕕᐊᓲᑎᖃᕆᐊᖅᑐᖅᑐᓂᑦ,” ᐊᕿᐊᕈᖅ ᐅᖃᖅᑐᖅ. “ᐅᑉᐱᕈᓱᑦᑐᒍᑦ ᐃᑲᔫᑎᖃᕐᓂᖅ ᐊᑐᖅᑕᐅᓕᕐᐸᓪᓕᐊᑲᓐᓂᕐᓂᖏᓐᓄᑦ ᖁᕕᐊᓲᑕᐅᓂᖏᓐᓄᓪᓗ ᕿᒧᔅᓯᒃᑯᑦ ᓱᑲᓐᓂᑭᓴᐅᑎᖃᑦᑕᕐᓂᖅ ᐊᑑᑎᖃᓪᓚᕆᑦᑐᒋᓪᓗᒍ ᒪᒥᓴᖅᑎᑦᑎᖃᑦᑕᕐᓂᕐᒧᑦ ᕿᑭᖅᑕᓂ ᓄᓇᓕᐅᔪᓂᑦ.”

2019ᖑᑎᓪᓗᒍ, ᑲᓇᑕᐅᑉ ᒐᕙᒪᒃᑯᖏᑦ ᒪᒥᐊᓐᓂᖃᔪᒻᒪᑕ ᕿᑭᖅᑕᓂ ᓄᓇᓕᓐᓄᑦ ᐃᓄᓐᓄᑦ ᐊᒻᒪᓗ ᐃᓕᓴᕐᓯᒍᑎᖃᔪᒻᒪᑕ ᑕᐃᔅᓱᒪᓂ ᖃᓪᓗᓈᑦ ᐱᐅᓯᖏᓐᓄᑦ ᓴᖑᓴᖅᑕᐅᕙᓪᓕᐊᓚᐅᕐᓯᒪᓂᖏᓐᓄᑦ ᐊᒻᒪᓗ ᐊᑐᐊᒐᓕᐅᕐᕕᐅᓯᒪᓚᐅᕐᓯᒪᓂᖏᓐᓄᑦ ᑕᒪᓐᓇ ᐊᓯᕈᐃᒍᑕᐅᓪᓚᕆᓚᐅᕐᓯᒪᒻᒪᑦ ᐃᓄᐃᑦ ᓄᓇᖓᓐᓂ ᐃᓅᓯᖏᓐᓂᓪᓗ.

ᑖᓐᓇ ᐱᒻᒪᕆᐊᓘᓪᓗᓂ ᒪᒻᒥᐊᓐᓂᐅᔪᔪᖅ ᑲᔪᓯᑎᑕᐅᒍᓐᓇᕐᓯᔪᔪᖅ ᐊᑯᓂᐊᓗᒃ ᐊᕐᕌᒍᒐᓴᓐᓂᑦ ᐃᖅᑲᓇᐃᔮᖃᕐᓯᒪᓂᖏᓐᓄᑦ ᑕᒪᑐᒥᖓ ᕿᑭᖅᑕᓂᒃᑯᑦ ᐊᒻᒪᓗ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ. ᒪᒥᐊᓐᓂᖅ ᐃᓚᖃᔪᔪᖅ ᓯᕗᓪᓕᕐᒥ ᑮᓇᐅᔭᑎᒍᑦ ᑲᑦᑐᖓᐃᕈᑕᐅᔪᔪᓂᑦ ᕿᑭᖅᑕᓂᒃᑯᓐᓄᑦ. ᑖᒃᑯᐊ ᑮᓇᐅᔭᑦ ᐊᑐᖅᑐᒋᑦ, ᕿᑭᖅᑕᓂᒃᑯᑦ ᑐᕌᖓᑎᑦᑎᔪᑦ $100,000ᓂᑦ ᐊᕐᕌᒍᑕᒫᑦ ᑎᓴᒪᐅᔪᙱᒐᖅᑐᓄᑦ ᐊᕐᕌᒍᓄᑦ ᓄᓇᕗᒥ ᐸᖓᒡᒍᔾᔨᓂᐅᖃᑦᑕᓂᐊᖅᑐᓄᑦ.

ᐅᓘᑕ ᓈᑕᓇᐃ, ᐃᔅᓯᕙᐅᑕᐅᑉ ᑐᖏᓕᐊᓂ ᓄᓇᕗᒥ ᐸᖓᒡᒍᔾᔨᓂᕐᒧᑦ ᑲᑎᒪᔨᕋᓛᕐᓄᑦ, ᐅᖃᖅᑐᖅ ᑮᓇᐅᔭᑦ ᕿᑭᖅᑕᓂᒃᑯᓐᓃᙶᖅᑐᑦ ᑭᙴᒪᒋᓯᒪᔭᖏᓐᓄᑦ ᐊᑐᓕᖅᑎᑦᑎᔪᖅ.

“ᖁᕕᐊᓱᑦᑎᐊᖅᑐᖓ ᓱᑲᓐᓂᑭᓴᐅᑎᓂᖃᕐᓂᐊᕐᖓᑕ, ᐱᓗᐊᖅᑐᒥᑦ ᐊᕐᕌᓂ ᓄᖅᑲᖅᑎᑕᐅᒋᐊᖃᓚᐅᕐᓯᒪᑎᓪᓗᒍ,” ᓈᑕᓇᐃ ᐅᖃᖅᑐᖅ.

ᑐᑭᓯᒋᐊᒃᑲᓐᓂᕈᒪᒍᔅᓯ, ᑐᑭᓯᒋᐊᕐᕕᐅᖃᑦᑕᕐᓕ:

ᐅᐃᓪ Hᐊᑉᑭᓐᔅ,
ᑭᖑᕝᕕᐅᑎᓯᒪᑲᐃᓐᓇᖅᑐᖅ ᑐᑭᒧᐊᑦᑎᑦᑎᔨᐅᓂᕐᒧᑦ ᑐᓴᐅᒪᖃᑦᑕᐅᑎᑎᑦᑎᔨᒃᑯᓐᓂᑦ,
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ
whopkins@qia.ca
867.975.8413/1.800.667.2742

Recommended Posts

ᑐᑭᓯᒋᐊᕐᕕᐅᑕ

ᑐᑭᓯᒋᐊᕆᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᓐᓄᑦ