ᐃᒪᓐᓇᐃᑎᓪᓗᒍ ᕿᑭᕐᒃᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᖁᕕᐊᓱᒍᑎᖃᕐᒪᑕ ᐊᕐᕌᒍᖃᓕᕐᓂᕐᒥᓂᒃ 50ᓂᒃ ᐊᕐᕌᒍᔪᒥ ᑕᒫᓂ 2025, ᑕᑯᒃᓴᐅᑎᑦᑎᓂᐊᕋᑦᑕ ᑭᖑᓂᑦᑎᓐᓂ, ᒫᓇᐅᔪᕐᒃ ᑲᑎᒪᔨᐅᔪᓂᒃ ᐊᒻᒪᓗ ᐊᖓᔪᖄᖑᔪᓂᒃ ᐃᑭᐊᕿᕕᒃᑯᑦ ᖃᕋᓴᐅᔭᒃᑯᓪᓗ ᑕᑯᒃᓴᐅᕝᕕᒋᕙᒃᑕᑦᑎᒍᑦ.
ᖁᔭᓕᕗᒍᑦ ᑖᑯᐊ ᐱᕕᖃᕐᒃᑎᑦᑎᕙᓚᐅᕐᑐᕐᒃ ᐊᒻᒪᓗ ᑐᓴᕈᒥᓇᖅᑐᓂᒃ ᐅᖃᐅᓯᖃᖅᐸᓚᐅᖅᑐᑦ ᖃᓄᕐᒃ ᕿᑭᕐᒃᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐱᒋᐊᓚᐅᖅᓯᒪᖕᒪᖔᑕ ᐊᒻᒪᓗ ᖃᓄᑎᒋ ᐱᕈᕐᓯᒪᓕᕐᒪᖔᑦ ᑕᐃᒪᖓᓂᑦ ᐱᒋᐊᖓᓚᐅᕐᓯᒪᑎᓪᓗᒋᑦ.
ᐅᖃᓕᒫᑦᑎᐊᕐᓂᕐᐊᐳᓯ!
ᐸᐅᓗᓯ ᕿᔪᑦᑖᖅ – ᕿᑭᖅᑕᕐᔪᐊᖅ
ᐊᖓᔪᖅᑳᖅ, 12ᓂ ᐊᕐᕌᒍᓂ (ᕿᑭᖅᑖᓗᖕᒥ ᐃᓄᐃᑦ ᑲᑐᔾᔨᖃᑎᒌᖏᑦ/ ᕿᑭᖅᑕᓃᒃᑯᑦ)
ᐸᐅᓗᓯ ᕿᔪᑦᑖᖅ ᐃᖅᑲᐅᒪᔭᐅᕗᖅ ᐊᑯᓂᐅᓂᖅᐹᒥᒃ ᐱᔨᑦᓯᕋᓚᐅᕐᓂᖓᓂᒃ ᐊᖓᔪᖅᑳᖑᓂᕐᒥᒃ ᐊᕕᒃᑐᖅᓯᒪᔪᒥᒃ ᐃᓄᐃᑦ ᑲᑐᔾᔨᖃᑎᒌᓂᑦ, ᐱᓕᕆᓪᓗᓂ ᑎᒥᐅᔪᒥᒃ ᑎᒥᙳᓵᖅᑎᓪᓗᒋᑦ ᐱᕈᖅᐸᓪᓕᐊᑎᓪᓗᒋᓪᓗ. ᓯᕗᓕᖅᑎᙳᓕᓚᐅᖅᓯᒪᔪᖅ 1970ᑎᑦ ᓄᙳᕈᔪᖓᓂᒃ, ᐱᔨᑦᓯᖄᓚᐅᖅᑎᓪᓗᒍ ᐊᖓᔪᖅᑳᑉ ᑐᖏᓕᕆᓪᓗᓂᐅᒃ. ᑕᐃᔅᓱᒪᓂ ᐊᖓᔪᖅᑳᖅ ᓄᖅᑲᖅᑎᓪᓗᒍ, ᐸᐅᓕᓯ ᑎᒃᑯᐊᖅᑕᐅᓚᐅᖅᑐᖅ ᐊᖓᔪᖅᑳᖑᑲᐃᓐᓇᕐᓂᕐᒧᑦ. ᐊᕐᕌᒍᓗᐊᕐᒥ ᐊᓂᒍᖅᑎᓪᓗᒍ ᑎᓕᔭᐅᓕᓚᐅᖅᑐᖅ ᐊᖓᔪᖅᑳᒻᒪᕆᐅᓕᖅᖢᓂ, ᓂᕈᐊᖅᑕᐅᓪᓗᓂ ᑲᑎᒪᔨᓄᑦ. ᑲᑎᓪᓗᒋᑦ, ᐱᔨᑦᓯᓚᐅᖅᑐᖅ 12ᓄᑦ ᐊᕐᕌᒍᓄᑦ ᐊᖓᔪᖅᑳᖑᓂᕐᒥᒃ ᐱᒋᐊᖅᖢᓂ 1978 ᐱᒋᐊᕐᓂᖓᓂᑦ 1979ᒧᑦ, ᑎᒥᙳᖅᓯᒪᓕᖅᑎᓪᓗᒍ ᕿᑭᖅᑖᓗᖕᒥ ᐃᓄᐃᑦ ᑲᑐᔾᔨᖃᑎᒌᖏᖑᑎᓪᓗᒍ, ᑭᖑᓂᐊᒍᓪᓗ ᐊᑎᖓ ᐊᓯᔾᔨᖅᖢᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ.
ᒪᒃᑯᒃᑑᓂᖓᓂᑦ, ᐸᐅᓗᓯ ᐅᐱᒋᔭᖃᖅᓯᒪᔪᖅ ᐃᓄᐃᑦ ᓯᕗᓕᖅᑎᐅᓂᖏᓐᓂᑦ ᐊᒻᒪᓗ ᓯᓐᓇᖅᑐᖃᑦᑕᖅᖢᓂ ᑕᐃᒫᑦ ᐱᓕᕆᖃᑕᐅᔪᒪᓛᕐᓗᓂ. ᐃᖅᑲᐅᒪᔪᖅ “ᐃᓄᖕᓂᑦ ᐱᔨᑦᓯᕈᒪᓲᖑᔪᖓ, ᒪᒃᑯᒃᑎᓪᓗᖓᓘᓐᓃᑦ”. ᐊᖓᖓᔪᖅᑳᙳᓕᖅᑎᓪᓗᒍ, ᕿᑎᐊᓃᓪᓗᐊᓕᓚᐅᖅᓯᒪᔪᖅ ᐊᓯᔾᔨᖅᐸᓪᓕᐊᔪᓂᒃ.
ᐊᑐᐃᓐᓇᕈᖅᑕᐅᓂᖏᑦ ᕿᑭᖅᑕᓃᒃᑯᑦ ᓯᕗᓕᖅᑎᖏᑦ
ᐃᓚᖓ ᐱᓕᕆᐊᕆᓚᐅᖅᑕᖓᓂᒃ ᐋᖅᑭᒋᐊᖅᓯᔪᒪᓪᓗᓂ ᓂᕈᐊᖅᑐᓕᕆᓂᕐᒧᑦ ᒪᓕᒐᕋᓛᓂᒃ. ᒪᓕᒃᖢᒋᑦ ᐊᑐᖅᑕᐅᓚᐅᖅᑐᑦ, ᑲᑎᒪᔩᓐᓇᐃᑦ ᓴᙱᓂᖃᓚᐅᕐᒪᑕ ᓂᕈᐊᕈᓐᓇᖅᖢᑎᒃ ᓯᕗᓕᖅᑎᓂᑦ ᑲᑎᒪᔨᐅᓂᐊᖅᑐᓄᑦ. ᐸᐅᓗᓯ ᓯᕗᓕᓚᐅᖅᑐᖅ ᐊᔭᐅᖅᑐᐃᕙᓪᓕᐊᓪᓗᓂ ᐊᓯᔾᔨᖅᐸᓪᓕᐊᖁᔨᓂᕐᒥᒃ ᐃᓄᐃᑦ ᐃᓚᒋᔭᐅᔪᑦ ᕿᑭᖅᑖᓗᖕᒥ ᓂᕈᐊᖃᑦᑕᕈᓐᓇᖁᓪᓗᒋᑦ. ᑭᖑᓂᐊᓂᑦ ᓂᕈᐊᖅᑕᐅᑎᓪᓗᒍ ᐃᓄᖕᓄᑦ, ᐅᖃᖅᑐᖅ ᐱᓪᓚᕆᐊᓗᒋᓚᐅᖅᑕᖓ: “ᓱᕐᓗ ᐃᓄᐃᑦ ᖃᓂᒋᓂᖅᓴᐅᓕᓚᐅᖅᓯᒪᔭᒃᑲ.” ᑖᓐᓇ ᐊᓯᔾᔨᕐᓂᐅᔪᖅ ᓴᙱᓕᖅᑎᑦᑎᓚᐅᖅᑐᖅ ᐃᓄᐃᑦ ᓂᐱᖏᓐᓂᒃ ᐊᒻᒪᓗ ᑎᒥᐅᔪᒥᒃ ᐊᖏᓂᖅᓴᒃᑯᑦ ᐱᓕᕆᔪᓐᓇᖅᓯᓪᓗᑎᒃ.
ᐋᖅᑭᒃᓱᐃᕙᓪᓕᐊᓂᖅ ᐱᕙᓪᓕᐊᔪᓕᕆᓂᕐᒥ
ᑕᐃᔅᓱᒪᓂ, ᕿᑭᖅᑕᓃᒃᑯᑦ ᐊᖏᓗᐊᓚᐅᙱᒻᒪᑕ ᖃᔅᓰᓐᓇᐅᓪᓗᑎᒃ ᐃᖅᑲᓇᐃᔭᖅᑏᑦ. ᐸᐅᓗᓯ ᑕᐅᑐᙳᐊᓚᐅᕐᒪᑦ ᐊᖏᓪᓕᒋᐊᖅᑎᑦᑎᔪᒪᓪᓗᓂ ᑭᒡᒐᑐᐃᑐᐃᓐᓇᕈᓐᓃᖅᖢᑎᒃ ᑭᓯᐊᓂ ᐱᕙᓪᓕᐊᔪᓕᕆᖃᑕᐅᔪᓇᖅᓯᓗᑎᒃ. ᐃᓕᓴᖅᓯᓯᒪᓪᓗᓂ ᕿᑭᖅᑕᓃᒃᑯᑦ ᓇᖕᒥᓂᓕᕆᔨᐅᙱᓐᓂᖏᓐᓄᑦ, ᐱᒋᐊᖅᑎᑦᑎᕙᓪᓕᐊᓪᓗᓂ ᐱᙳᖅᑎᑦᑎᕙᓪᓕᐊᓪᓗᓂ ᕿᑭᖅᑖᓗᒃ ᑯᐊᐸᕇᓴᒥᒃ 1982–83ᒥ, ᑮᓇᐅᔭᖅᑖᖅᓯᒪᓪᓗᑎᒃ ᒐᕙᒪᑐᖃᒃᑯᓐᓂᑦ.
ᕿᑭᖅᑖᓗᒃ ᑯᐊᐸᕇᓴᓐ ᐱᒋᐊᕈᑎᖃᖅᑳᓚᐅᖅᑐᑦ ᑲᓇᑕᒥ ᐃᖃᓗᓕᕆᓂᕐᒧᑦ, ᐋᔩᕋᖃᑎᖃᖅᖢᑎᒃ ᒐᕙᒪᑐᖃᒃᑯᓐᓂᑦ ᑮᓇᐅᔭᓕᐅᕋᓱᐊᕐᓂᕐᒧᑦ ᐃᖃᓗᓕᕆᓂᕐᒥᒃ ᓚᐃᓴᓐᓯᑖᕋᓱᒃᖢᑎᒃ. ᐊᑐᖅᖢᑎᒃ ᐅᒥᐊᖅᐸᓂᒃ ᐊᓯᖏᓐᓂᑦ ᓇᖕᒥᓂᕆᔭᐅᔪᓄᑦ, ᕿᑭᖅᑖᓗᒃ ᑯᐊᐸᕇᓴᒃᑯᑦ ᓯᕗᓪᓕᖅᐹᖓᓂᒃ ᓴᖅᑭᑎᑦᑎᓚᐅᖅᑐᑦ ᐃᖃᓗᓕᕆᓂᕐᒥᑦ. ᑖᒃᑯᐊ ᓯᕗᓪᓕᐅᓚᐅᖅᑐᑦ ᐃᖅᑲᓇᐃᔭᖅᑎᐅᔪᑦ ᐊᐅᓚᓂᐅᔪᒥ ᐃᓄᒻᒪᕆᐅᓚᐅᙱᑦᑐᑦ, ᐊᑯᓂᐅᓂᐊᖅᑐᒧᑦ ᑐᕌᒐᖃᖅᖢᑎᒃ ᐃᓄᖕᓂᒃ ᐃᓕᓐᓂᐊᖅᑎᑦᑎᓗᑎᒃ ᓯᕗᓕᐅᖅᑎᐅᓂᕐᒥᒃ ᐃᑲᔪᖅᑎᐅᓂᕐᒥᓗ. ᑲᑐᔾᔨᖃᑎᖃᖅᖢᑎᒃ ᒐᕙᒪᒃᑯᓐᓂᑦ, ᐃᓕᓐᓂᐊᖅᑎᑦᑎᔪᓐᓇᓚᐅᖅᑐᑦ ᐃᓄᐃᑦ ᐸᕐᓇᒃᑕᐅᓪᓗᑎᒃ ᑕᒪᒃᑯᓄᖓ ᐃᖅᑲᓇᐃᔮᒃᓴᓄᑦ. ᐱᒋᐊᕐᓂᖓᓂᑦ, ᕿᑭᖅᑖᓗᒃ ᑯᐊᐸᕇᓴᒃᑯᑦ ᐱᕈᖅᖢᑎᒃ ᐊᔾᔨᒌᙱᑦᑐᓂᒃ ᐱᓕᕆᐊᒃᓴᖃᓕᖅᖢᑎᒃ ᐱᕙᓪᓕᐊᔪᓕᕆᓂᕐᒥᒃ ᐊᒻᒪᓗ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᔾᔨᖐᙱᑦᑐᓂᒃ ᑎᒥᐅᔪᓂᑦ.
ᐃᓄᐃᑦ ᕿᑭᖅᑖᓗᒃ ᑯᐊᐸᕇᓴᒃᑯᓐᓅᖃᑦᑕᖅᖢᑎᒃ ᐃᑲᔪᖅᑕᐅᔪᒪᓪᓗᑎᒃ ᓇᖕᒥᓂᖅᑖᕋᓱᒃᖢᑎᒃ ᐊᒻᒪᓗ ᐃᖅᑲᓇᐃᔮᒃᓴᖅᓯᐅᖅᖢᑎᒃ, ᑲᑭᕙᒃ ᑲᑐᔾᔨᖃᑎᒌᖏᑦ ᓴᖅᑭᑕᐅᓪᓗᓂ. ᑲᑭᕙᒃᑯᑦ ᐃᓕᓐᓂᐊᖅᑎᑦᑎᔪᓐᓇᖅᖢᑎᒃ, ᐃᖅᑲᓇᐃᔭᖅᑐᓕᕆᓂᕐᒧᑦ ᐃᑲᔫᑎᖃᖅᑎᑦᑎᓪᓗᑎᒃ, ᐊᒻᒪᓗ ᒥᑭᔪᓂᒃ ᓇᖕᒥᓂᕐᓄᑦ ᐃᑲᔫᑎᖃᖅᑎᑦᑎᓪᓗᑎᒃ, ᓴᖅᑭᑎᑦᑎᔪᓐᓇᖅᖢᖑᑎᒃ ᐃᓄᐃᑦ ᐱᕕᒃᓴᕆᔪᓐᓇᖅᑕᖏᓐᓂ ᖃᑭᒍᓐᓇᕐᓗᑎᒃ ᐱᕙᓪᓕᐊᓂᐅᔪᓂᑦ. ᐸᐅᓗᓯᐅᑉ ᑕᐅᑐᙳᐊᖅᓯᒪᔭᖏᑦ ᑲᑎᓪᓗᒋᑦ ᐱᕙᓪᓕᐊᔪᓕᕆᓂᖅ ᐊᑕᐅᓯᒃᑯᓪᓗ ᐃᓕᓐᓂᐊᖅᑎᑦᑎᓗᑎᒃ ᐃᓄᖕᓂᒃ ᑕᒪᓐᓇ ᐅᓪᓗᒥᒧᑦ ᐊᑐᖅᑕᐅᖏᓐᓇᖅᑐᖅ ᕿᑭᖅᑕᓃᒃᑯᓐᓄᑦ.
ᐃᓄᖕᓄᑦ ᐃᓚᒌᓄᑦ ᐃᓅᓯᕐᒨᖓᔪᓂᒃ ᐃᑲᔫᑎᑦ
ᐊᖓᔪᖅᑳᖑᑎᓪᓗᒍ, ᐸᐅᓗᓯ ᐃᓕᑕᖅᓯᓯᒪᓚᐅᖅᑐᖅ ᐃᓄᐃᑦ ᐃᓅᓯᕐᓅᖓᔪᓂᒃ ᐊᒃᓱᕈᖃᑦᑕᕐᓂᖏᓐᓂᑦ ᑖᒃᑯᐊ ᐃᓚᒌᑦ ᓯᐊᒻᒪᒃᐸᓪᓕᐊᓕᖅᖢᑎᒃ ᓄᓇᓕᖕᓄᑦ. ᐃᖏᕐᕋᔾᔪᑎᒃᓴᑑᓪᓗᓂ ᖃᖓᑕᓲᒃᑯᑦ ᐊᒻᒪᓗ ᖃᖓᑦᑕᐅᑎᒃᓴᑦ ᐊᑭᑐᓪᓗᑎᒃ, ᐊᒥᓱᑦ ᐃᓄᐃᑦ ᖃᖓᑕᓲᒃᑯᑦ ᐊᐅᓚᖃᑦᑕᓚᐅᙱᑦᑐᑦ ᐊᒡᓛᑦ ᐃᓚᙵᕋᓗᐊᖅᑎᓪᓗᒋᑦ ᐃᓚᒥᓂᑦ. ᐸᐅᓗᓯ ᐱᒋᐊᖅᑎᑦᑎᓚᐅᖅᑐᖅ ᕿᑭᖅᑕᓃᒃᑯᑦ ᐃᓚᙵᖅᑐᓄᑦ ᐃᓚᓕᐊᕆᐊᓕᖕᓄᓪᓗ ᐱᓕᕆᐊᖓᓂᒃ. ᑖᓐᓇ ᐃᑲᔫᑎ ᓱᓕ ᐅᓪᓗᒥᒧᑦ ᐊᑐᖅᑕᐅᔪᖅ, ᐊᒻᒪᓗ ᐋᖅᑭᒋᐊᖅᑕᐅᓯᒪᓕᖅᖢᓂ ᐅᓪᓗᒥᓴᕐᓅᖓᔪᑦ ᒪᓕᒃᖢᒋᑦ.
ᐋᖅᑭᒃᓱᐃᓂᖅ ᓄᓇᑖᕐᓂᕐᒧᑦ ᐊᖏᕈᑎᒥ
ᐸᐅᓗᓯᐅᑉ ᓯᕗᓕᖅᑎᐅᓂᖓ ᐅᖓᑖᓅᖅᓯᒪᓚᐅᖅᑐᖅ ᕿᑭᖅᑕᓃᒃᑯᓐᓂᑦ. ᐊᖓᔪᖅᑳᖑᑎᓪᓗᒍ, ᑭᒡᒐᖅᑐᐃᓚᐅᖅᑐᖅ ᕿᑭᖅᑖᓗᖕᒥ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᓄᓇᕗᑦ ᑐᙵᕕᒃᑯᑦ ᑲᑎᒪᔨᖏᓐᓂᑦ ᑖᓐᓇ ᑎᒥᐅᔪᖅ ᓯᕗᓕᓚᐅᖅᑐᖅ ᓄᓇᑖᕐᓂᕐᒧᑦ ᐋᔩᕋᕐᓂᕐᒥᒃ. ᐃᓚᒋᔭᐅᓪᓚᕆᓚᐅᖅᑐᖅ ᐱᒋᐊᕐᓂᖓᓂᑦ ᑕᐃᑯᖓ ᑎᑭᑦᑐᒍᑦ ᐊᑎᓕᐅᖅᑕᐅᓂᖓᓄᑦ ᓄᓇᕗᑦ ᐊᖏᕈᑎᖓᓂᑦ.
ᐋᔩᕋᕐᓂᐅᔪᑦ ᐊᒃᓱᕈᓐᓇᓚᐅᖅᑐᑦ−143ᓂᒃ ᒪᒃᐱᒐᖃᖃᑦᑕᖅᖢᓂ ᕿᒥᕐᕈᔭᐅᔭᕆᐊᖃᖅᖢᑎᒃ ᐊᑐᓂ, ᐱᔾᔪᑎᖃᖅᑐᓂᒃ ᐅᒪᔪᓂᒃ, ᓄᓇᓂᒃ ᐊᐅᓚᑦᑎᓂᕐᒧᑦ, ᒐᕙᒪᓕᕆᓂᕐᒧᑦ, ᐊᒻᒪᓗ ᐊᓯᖏᑦ ᐱᒻᒪᕆᐅᔪᓂᒃ. ᐸᐅᓗᓯ ᐅᖃᖅᑐᖅ ᐱᔭᕆᑐᓚᐅᕐᓂᖓᓂᒃ: “ᐱᔭᕆᐊᑭᓚᐅᙱᑦᑐᖅ, ᐊᒥᓱᓪᓗ ᐊᒃᓱᕈᓐᓇᓚᐅᖅᑐᑦ. ᑭᓯᐊᓂ ᑕᐃᔅᓱᒪᓂ ᐱᒻᒪᕆᐅᓚᐅᖅᓯᒪᔪᖅ ᐊᖏᖃᑎᒌᒍᓐᓇᖅᓯᑎᓪᓗᒋᑦ.” ᑲᑎᒪᔩᑦ ᐃᖅᑲᓇᐃᔭᖃᑎᖃᖅᖢᑎᒃ ᒪᓕᒐᓕᕆᔨᓂᒃ ᐋᔩᕋᖅᑎᓂᓪᓗ, ᑐᑭᑖᕈᑎᖃᖅᖢᑎᒃ ᓇᓪᓕᐊᖕᓂᑦ ᐃᓛᒃᑰᖅᑐᑦ ᐃᑲᔪᖅᑐᖅᑕᐅᓂᐊᕐᓂᖏᑦ ᒪᓕᒃᖢᒋᑦ ᑭᓱᑦ ᐱᐅᓂᖅᐹᖑᔪᑦ ᐱᔨᑦᑎᑦᑎᐊᕋᔭᕐᒪᖔᑖᒃ ᐃᓄᖕᓂ.
ᓄᓇᑖᕐᓂᕐᒧᑦ ᐊᖏᕈᑎᖓ ᓴᖅᑭᑕᐅᑎᓪᓗᒍ ᑲᓇᑕᐅᑉ ᒪᓕᒐᓕᐅᕐᕕᔾᔪᐊᖓᓂᑦ, ᐸᐅᓗᓯ ᖃᐃᖁᔭᐅᓯᒪᖃᑕᐅᓚᐅᖅᑐᖅ. ᐃᖅᑲᐅᒪᔪᖅ ᑲᓇᑕᐅᑉ ᓯᕗᓕᖅᑎᖓ ᕙᕋᐃᐊᓐ ᒪᓪᕉᓂᐅᑉ ᐅᖃᐅᓯᕆᓚᐅᖅᑕᖏᑦ: ᒐᕙᒪᒃᑯᑦ ᐋᖅᑭᒋᐊᓚᐅᕐᓂᖏᑦ ᐃᓄᐃᑦ ᐱᔪᒪᔭᖏᓐᓂᒃ ᐊᒻᒪᓗ ᐃᓄᐃᑦ ᐊᑖᓃᒍᓐᓃᖅᖢᑎᒃ ᒐᕙᒪᐅᔪᒥᒃ. ᑖᒃᑯᐊ ᐃᑦᑑᑏᑦ ᑭᖑᓂᐊᓂᑦ ᑲᔪᓯᑎᑦᑎᓚᐅᖅᑐᑦ ᐊᖏᕈᑎᒥᒃ, ᑖᓐᓇ ᐊᑐᖅᑕᐅᓚᐅᖅᓯᒪᙱᑦᑐᖅ ᐊᑐᖅᑕᐅᓕᓚᐅᖅᓯᒪᔪᑦ ᐃᓄᐃᑦ ᒐᕙᒪᓕᕆᑎᓪᓗᒋᑦ ᐊᒻᒪᓗ ᐊᖅᑯᓯᐅᖅᖢᑎᒃ ᓄᓇᕗᑦ ᐱᙳᖅᑎᑕᐅᓂᒃᓴᖓᓂᒃ.
“ᒪᑭᑉᐸᓪᓕᐊᕐᓇᓚᐅᖅᑐᖅ,” ᐸᐅᓗᓯ ᐅᖃᖅᑐᖅ ᐃᓄᐃᑦ ᓯᕗᒧᐊᖅᐸᓪᓕᐊᓪᓗᑎᒃ ᓴᑐᖅᓯᔪᒪᓪᓗᑎᒃ ᓇᖕᒥᓂᖅ ᐊᐅᓚᑦᑎᕙᓪᓕᐊᒍᒪᓪᓗᒋᑦ ᐃᓅᓯᖏᑦ ᐊᒻᒪᓗ ᒐᕙᒪᓕᕆᓂᖅ.
ᐱᓕᕆᐊᖑᓯᒪᔪᑦ ᐊᒻᒪᓗ ᑕᐅᑐᙳᐊᖅᑕᐅᔪᑦ ᓯᕗᓂᒃᓴᒥ
ᐸᐅᓗᓯ ᐊᖓᔪᖅᑳᖑᑎᓪᓗᒍ, ᕿᑭᖅᑕᓃᒃᑯᑦ ᐃᖅᑲᓇᐃᔭᖅᑎᑦ ᐅᓄᖅᓯᓚᐅᖅᑐᑦ 3ᓂᑦ 23ᓄᑦ. ᑖᓐᓇ ᑎᒥᐅᔪᖅ ᑎᒍᓯᓪᓗᓂ ᓄᑖᓂᒃ ᐱᓕᕆᐊᒃᓴᓂᒃ ᐊᒻᒪᓗ ᑐᙵᕕᓕᐅᖅᖢᓂ ᑕᒪᒃᑯᐊᓪᓗ ᓴᙱᓂᖅᐹᖑᓪᓗᑎᒃ ᐃᓄᖕᓄᑦ ᑭᒡᒐᖅᑐᖅᑐᓂᒃ ᑎᒥᐅᓂᕐᒧᑦ ᑲᓇᑕᒥ.
ᐅᐱᒍᓱᑦᑎᐊᖅᑐᖅ ᓇᒧᑦ ᑎᑭᓯᒪᓕᕐᓂᖏᓐᓄᑦ ᕿᑭᖅᑕᓃᒃᑯᑦ, ᑭᓯᐊᓂ ᐃᓱᒫᓘᑎᖃᖅᑐᖅ ᐊᒃᓱᕈᓐᓇᖅᑐᓂᒃ−ᐱᓗᐊᖅᑐᒥᒃ ᑭᓱᑐᐃᓐᓇᐃᑦ ᐊᑭᑦᑐᖅᐸᓪᓕᐊᓂᖏᓐᓄᑦ ᓇᔪᖅᖢᓂ ᐅᑭᐅᖅᑕᖅᑐᒥ. “ᐊᒃᓱᕈᓐᓇᖅᓯᕙᓪᓕᐊᖕᒪᑦ ᐃᓅᓯᖃᑦᑎᐊᕋᓱᖕᓂᕐᒥᒃ,” ᐅᔾᔨᕈᓱᖁᔨᓪᓗᓂ, ᐊᔭᐅᖅᑐᐃᓪᓗᓂ ᐃᓄᐃᑦ ᑎᒥᖁᑎᖏᓐᓂᒃ ᑕᒪᒃᑯᓂᖓ ᐱᓕᕆᐊᖃᖁᓪᓗᒋᑦ ᐃᑲᔫᑕᐅᓂᐊᕐᒪᑕ ᓯᕗᓂᕐᒥᒃ ᑭᖑᕚᕇᓄᑦ.
ᓯᕗᒧᑦ ᑕᐅᑐᓪᓗᓂ, ᐸᐅᓗᓯ ᓇᓗᓇᐃᔭᖅᑐᖅ ᐃᓄᖕᓂᒃ ᒪᒃᑯᒃᑐᓂ ᓯᕗᒧᐊᖁᓪᓗᒋᑦ ᐊᒻᒪᓗ ᓂᐱᒋᔭᐅᖃᑕᐅᓗᑎᒃ ᐅᓪᓗᒥ. ᐊᑕᐅᑦᓯᒃᑯᓪᓗ, ᐃᓄᐃᑦ ᑎᒍᒥᐊᖏᓐᓇᕐᓗᑎᒃ ᐃᓕᖅᑯᓯᕐᒥᓂᒃ ᐅᖃᐅᓯᕐᒥᓂᓗ: “ᐃᓄᐃᑦ ᐃᓅᓯᖏᑦ ᑎᒍᔭᐅᓚᐅᙱᑎᓪᓗᒋᑦ, ᐋᖅᑭᐅᒪᔪᓂᒃ ᐃᓅᖃᑎᒌᖕᓂᖃᓚᐅᖅᑐᒍᑦ ᓴᙱᓪᓗᓂ ᐅᖃᐅᓯᖅ. ᐃᓕᓐᓂᐊᖅᑎᒋᐊᖃᖅᑕᕗᑦ ᕿᑐᕐᖓᕗᑦ ᐃᕐᖑᑕᕗᓪᓗ ᖃᓄᖅ ᓴᙱᑎᒋᖕᒪᖔᑦ ᐃᓄᐃᑦ ᐅᖃᐅᓯᖓ ᐃᓕᖅᑯᓯᖓᓗ, ᐱᔾᔪᑎᒋᓪᓗᒍ ᐅᕙᑦᑎᓃᙱᓐᓇᕐᒪᑦ ᑭᓇᐅᓂᕗᑦ”.
ᐸᐅᓗᓯ ᐊᖓᔪᖅᑳᖑᑎᓪᓗᒍ ᐊᑕᐅᓯᐅᖕᒪᑦ ᑕᐅᑐᙳᐊᖁᔨᓂᕆᓚᐅᖅᑕᖓ ᒪᑭᑕᐃᓐᓇᖁᔨᓪᓗᓂ, ᐊᒻᒪᓗ ᐱᔨᑦᓯᕋᑦᑎᐊᖃᑦᑕᕐᓂᖅ − ᐱᕈᖅᑎᑦᑎᕙᓪᓕᐊᓪᓗᓂ ᕿᑭᖅᑕᓃᒃᑯᓐᓂ ᒐᕙᒪᓕᕆᔨᐅᓂᕐᒧᑦ ᐊᒻᒪᓗ ᑐᙵᕕᓕᐅᖅᖢᓂ ᐃᓄᐃᑦ ᓇᖕᒥᓂᖅᓯᓕᕈᓐᓇᖁᓪᓗᒋᑦ. ᐱᓕᕆᐊᖏᑦ ᐃᑲᔪᓚᐅᖅᑐᑦ ᐃᓄᖕᓂᒃ ᐱᔪᓐᓇᐅᑎᑖᖅᑎᑕᐅᓂᖏᑦ ᐊᑐᖅᖢᓂ ᓄᓇᑖᕐᓂᕐᒧᑦ ᐊᖏᕈᑎᖓ ᓇᓗᓇᐃᖅᓯᒪᓰᓐᓇᕐᓂᕐᒥᒃ ᐱᕙᓪᓕᐊᔾᔪᑎᒃᓴᓄᑦ ᐃᓅᓯᕐᓅᖓᔪᓂᓪᓗ ᐃᑲᔫᑎᑕᖃᑦᑎᐊᖁᔨᓪᓗᓂ ᐊᑐᖅᑕᐅᓗᑎᒃ ᓄᓇᓕᖕᓂᑦ ᒪᑭᒪᔾᔪᑎᒋᔭᐅᔪᓐᓇᕐᓗᑎᒃ. ᓱᓕ ᑲᔪᓯᑎᑦᑎᓯᒪᔪᖅ ᓂᕆᐅᖕᓂᖅᑖᖅᑎᑦᑎᓪᓗᓂ ᓯᕗᓂᒃᓴᓄᑦ ᑭᖑᕚᕆᓄᑦ ᐃᓄᐃᑦ ᓯᕗᓕᖅᑎᙳᖁᓪᓗᒋᑦ ᑎᒍᒥᐊᖏᓐᓇᕐᓗᑎ ᐱᐅᓯᐅᔪᓂᒃ ᐊᒻᒪᓗ ᓄᑖᙳᖅᐸᓪᓕᐊᔪᓂᒃ ᕿᑭᖅᑕᓃᒃᑯᑦ ᓇᓗᓇᐃᖅᓯᔾᔪᑎᒋᔭᖓ ᓯᕗᒧᐊᕈᑎᒋᔭᐅᕙᓪᓕᐊᑎᓪᓗᒍ.
