ᐃᒪᓐᓇᐃᑎᓪᓗᒍ ᕿᑭᕐᒃᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᖁᕕᐊᓱᒍᑎᖃᕐᒪᑕ ᐊᕐᕌᒍᖃᓕᕐᓂᕐᒥᓂᒃ 50ᓂᒃ ᐊᕐᕌᒍᔪᒥ ᑕᒫᓂ 2025, ᑕᑯᒃᓴᐅᑎᑦᑎᓂᐊᕋᑦᑕ ᑭᖑᓂᑦᑎᓐᓂ, ᒫᓇᐅᔪᕐᒃ ᑲᑎᒪᔨᐅᔪᓂᒃ ᐊᒻᒪᓗ ᐊᖓᔪᖄᖑᔪᓂᒃ ᐃᑭᐊᕿᕕᒃᑯᑦ ᖃᕋᓴᐅᔭᒃᑯᓪᓗ ᑕᑯᒃᓴᐅᕝᕕᒋᕙᒃᑕᑦᑎᒍᑦ.
ᖁᔭᓕᕗᒍᑦ ᑖᑯᐊ ᐱᕕᖃᕐᒃᑎᑦᑎᕙᓚᐅᕐᑐᕐᒃ ᐊᒻᒪᓗ ᑐᓴᕈᒥᓇᖅᑐᓂᒃ ᐅᖃᐅᓯᖃᖅᐸᓚᐅᖅᑐᑦ ᖃᓄᕐᒃ ᕿᑭᕐᒃᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐱᒋᐊᓚᐅᖅᓯᒪᖕᒪᖔᑕ ᐊᒻᒪᓗ ᖃᓄᑎᒋ ᐱᕈᕐᓯᒪᓕᕐᒪᖔᑦ ᑕᐃᒪᖓᓂᑦ ᐱᒋᐊᖓᓚᐅᕐᓯᒪᑎᓪᓗᒋᑦ.
ᐅᖃᓕᒫᑦᑎᐊᕐᓂᕐᐊᐳᓯ!
ᒪᓕᑦᑐ ᓚᐃᑕ – ᑭᒻᒥᕈᑦ
ᒪᓕᑦᑐ ᑲᑎᒪᔨᐅᒋᐊᕐᖓᓚᐅᖅᑐᖅ 1978ᒥ ᑖᓐᓇ ᑎᒥᐅᔪᖅ ᖃᐅᔨᒪᔭᐅᑎᓪᓗᒍ ᕿᑭᖅᑖᓗᖕᒥ ᐃᓄᐃᑦ ᑲᑐᔾᔨᖃᑎᒌᖑᑎᓪᓗᒍ (BRIA). ᑲᑎᒪᔨᐅᓚᐅᖅᑐᖅ ᑎᑭᑦᑐᒍ 1980ᓄᑦ, ᐃᖅᑲᐅᒪᔪᖅ ᐊᒃᓱᕈᓐᓇᓚᐅᕐᓂᖓᓂᒃ ᐊᑑᑎᖃᖅᖢᓂ ᑭᓯᐊᓂ ᐊᑎᖓ ᐊᓯᔾᔨᓚᐅᖅᑐᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ. (ᕿᑭᖅᑕᓃᒃᑯᑦ).
ᐃᖅᑲᐅᒪᔪᖅ ᑲᑎᒪᔨᐅᖃᑎᒋᓚᐅᖅᑕᖏᓐᓂᑦ, ᐱᖃᓯᐅᑎᓗᒍ ᔭᐃᒥᓯ ᐊᕐᕚᓗᒃ ᐊᓯᖏᓪᓗ ᑐᖁᖓᓕᑦᑐᓂ, ᐅᖃᖅᑐᖅ ᑕᐃᔅᓱᒪᓂ “ᑕᒪᑦᑕ ᒪᒃᑯᒃᑑᓚᐅᖅᑐᒍᑦ.” ᐅᓪᓗᕐᓂᑦ ᓯᕗᓪᓕᕐᓂᑦ, ᐱᓕᕆᐊᖃᕐᓂᖅᓴᐅᓚᐅᖅᑐᑦ ᓴᖅᑭᑎᑦᑎᕙᓪᓕᐊᓪᓗᑎᒃ ᐊᑐᐊᒐᕐᓂᒃ ᒪᓕᒐᕋᓛᓂᓪᓗ ᑐᙵᕕᒋᔭᐅᓂᐊᖅᑐᓄᑦ ᓯᕗᓂᕐᒥᒃ ᐃᓄᐃᑦ ᐊᐅᓚᑦᑎᔪᓐᓇᖅᓯᓗᑎᒃ. ᒪᓕᑦᑐ ᐅᖃᖅᑐᖅ ᑖᒃᑯᐊ ᑲᑎᒪᔩᑦ ᓇᓗᓇᐃᖅᓯᔪᒪᓚᐅᕐᒪᑕ ᐅᔭᕋᕐᓂᐊᕈᒪᔪᑦ ᐅᖅᓱᐊᓗᓐᓂᐊᕈᒪᔪᓪᓗ, ᓱᕋᐃᖁᓇᒋᑦ ᓄᓇᓂᒃ ᐅᒪᔪᓂᓗ. ᓴᐳᔾᔨᓪᓗᑎᒃ ᐊᕙᑎᒥᒃ ᐊᒻᒪᓗ ᐃᓄᐃᑦ ᐱᔪᒪᔭᖏᑦ ᐱᒻᒪᕆᐅᓚᐅᖅᑐᑦ ᐅᖃᐅᓯᐅᒐᔪᒃᖢᑎᒃ.
ᒪᓕᑦᑐ ᐃᖅᑲᐅᒪᔪᖅ ᑮᓇᐅᔭᖅᑕᖃᑦᑎᐊᙱᑎᓪᓗᒍ ᑎᒥᙳᓵᖅᑎᓪᓗᒍ. ᑲᑎᒪᔩᑦ ᐊᒃᓱᕈᖅᖢᑎᒃ ᑮᓇᐅᔭᓂᒃ ᕿᓂᖃᑦᑕᓚᐅᖅᑐᑦ, ᑭᓯᐊᓂ ᓇᓂᓯᖃᑦᑕᕈᓐᓇᓚᐅᙱᑦᑐᑦ. ᖃᐅᑕᒫᑦ ᑲᑎᒪᓂᕐᓂᑦ ᑲᑎᒪᔾᔪᓯᐊᖅᑖᖃᑦᑕᓚᐅᖅᑐᑦ $25ᑖᓚᓂ, ᐱᖃᓯᐅᑎᓯᒪᙱᖦᖢᑎᒃ ᓂᕆᔾᔪᑎᑦ, ᐊᒻᒪᓗ ᑕᐃᒃᑯᐊ ᑲᑎᒪᔩᑦ ᐃᖃᓗᐃᑦ ᓯᓚᑖᓂᙶᖅᑐᑦ ᑐᔪᕐᒥᖃᑦᑕᖅᖢᑎᒃ ᐃᓚᒋᔭᖏᓐᓂᒃ ᑐᔪᕐᒥᕕᖕᒦᙱᓐᓂᖅᓴᐅᓪᓗᑎᒃ, ᑮᓇᐅᔭᑭᓪᓕᐅᕐᒪᑕ. ᑕᒪᒃᑯᐊ ᐊᒃᓱᕈᓐᓇᖅᑑᓚᐅᕋᓗᐊᖅᑎᓪᓗᒋᑦ, ᐅᖃᖅᑐᖅ “ᑲᔪᓯᑦᑎᐊᙱᓐᓇᓚᐅᖅᑐᒍᑦ” ᐱᓕᕆᓇᓱᐊᓐᓇᖅᖢᑎᒃ ᐃᓄᐃᑦ ᓯᕗᓂᒃᓴᖃᑦᑎᐊᖁᓪᓗᒋᑦ.
ᑲᑎᒪᔨᐅᑎᓪᓗᒍ ᐃᓕᓐᓂᐊᕆᐊᖃᓚᐅᖅᑐᖅ ᐱᕈᖅᐸᓪᓕᐊᒋᐊᖃᖅᖢᓂ. ᑲᑎᒪᔨᐅᓂᖓ ᐊᑐᖅᖢᓂᐅᒃ ᐃᓕᓐᓂᐊᓚᐅᖅᑐᖅ ᐊᐅᓚᑦᑎᔾᔪᑎᓕᕆᓂᕐᒥᒃ, ᐱᓕᕆᑦᑎᐊᕆᐊᖃᕐᓂᕐᒥᒃ, ᐊᒻᒪᓗ ᑲᑐᔾᔨᖃᑎᖃᕐᓂᕐᒥᒃ ᐱᐅᔪᓂᒃ ᓴᖅᑭᑎᑦᑎᖃᑦᑕᕐᓂᐊᕐᒪᑕ. ᐃᖅᑲᐅᒪᔪᖅ ᑎᒥᐅᔪᖅ ᒪᑭᑖᓂᖕᓂᐊᕋᓗᐊᕐᒪᖔᑦ ᐊᐱᖅᑯᑕᐅᖃᑦᑕᖅᖢᓂ. ᓱᓕ, ᐱᔪᒪᓂᖅ ᐊᒃᓱᕈᖃᑦᑕᕐᓂᓗ ᑲᑎᒪᔨᐅᓚᐅᖅᑐᓄᑦ ᓇᓗᓇᐃᖅᓯᓚᐅᕐᒪᑕ ᕿᑭᖅᑕᓃᒃᑯᑦ ᑎᒥᐅᖏᓐᓇᕐᓂᐊᖅᖢᑎᒃ, ᑕᒪᓐᓇᓗ ᐋᖅᑭᒃᓱᐃᔾᔪᑎᒋᔭᐅᓚᐅᖅᑐᖅ ᓴᙱᓂᖅᓴᒥᒃ, ᓇᖕᒥᓂᖅᓱᖅᑐᒥᒃ ᑎᒥᐅᓕᖅᑐᒧᑦ ᐅᓪᓗᒥ.
ᑭᖑᒻᒧᑦ ᑕᑯᓪᓗᓂ, ᒪᓕᑦᑐ ᐅᐱᒍᓱᒃᑐᖅ ᑲᑎᒪᔨᐅᒋᐊᕐᖓᖅᑐᑦ ᐊᒃᓱᕈᖃᑦᑕᓚᐅᕐᓂᖏᓐᓂ ᑕᐃᒪᐃᒻᒪᑦ ᐅᓪᓗᒥ ᓴᖅᑭᑎᑦᑎᓯᒪᓕᖅᑐᑦ ᐊᔾᔨᒌᙱᑦᑐᓂᒃ. “ᐱᓕᕆᐊᒃᓴᐅᓚᐅᖅᑐᑦ ᐱᓕᕆᐊᖑᓚᐅᖅᓯᒪᔪᑦ ᐅᓪᓗᒥ ᑕᑯᒃᓴᐅᓕᖅᑐᓂᒃ,” ᐅᖃᖅᑐᖅ, ᕿᑭᖅᑕᓃᒃᑯᑦ ᐱᕈᖅᐸᓪᓕᐊᓂᕆᔭᖓᓂᑦ ᐊᒻᒪᓗ ᐊᔾᔨᒌᙱᑦᑐᓂᒃ ᐃᑲᔫᑎᒃᓴᖃᓕᖅᖢᑎᒃ ᐃᓄᖕᓄᑦ ᐱᔭᐅᔪᓐᓇᖅᑐᓂᒃ ᕿᑭᖅᑖᓗᖕᒥ.
ᐃᓱᒪᒋᓪᓗᒋᑦ ᑲᑎᒪᔨᐅᓚᐅᖅᓯᒪᔪᑦ ᑐᖁᖓᓕᖅᑐᑦ, ᐅᖃᖅᑐᖅ ᐊᒃᓱᕈᖃᑦᑕᓚᐅᕐᓂᖏᓐᓂᒃ ᑐᓂᓯᖃᑦᑕᖅᓯᒪᓪᓗᑎᓪᓗ, ᑐᙵᕕᓕᐅᖅᓯᒪᖕᒪᑕ ᑮᓇᐅᔭᖃᑦᑎᐊᕋᑎᒃ. ᓯᕗᓂᒃᓴᒥ, ᓂᕆᐅᒋᔭᖃᖅᑐᖅ ᐃᓄᐃᑦ ᒪᒃᑯᒃᑐᖏᑦ ᐃᓚᒋᔭᐅᔪᓐᓇᖅᓯᓂᖏᓐᓂᒃ ᐸᕐᓇᐃᖃᑕᐅᓗᑎᒃ ᐊᒻᒪᓗ ᑐᑭᑖᖅᑎᑦᑎᔨᐅᖃᑕᐅᓗᑎᒃ: “ᒪᒃᑯᒃᑐᑦ ᐃᓚᐅᒋᐊᖃᖅᑐᖅ ᐸᕐᓇᖃᑕᐅᓗᑎᒃ ᐊᒻᒪᓗ ᐃᓄᖕᓂᒃ ᐱᔾᔪᑎᒋᓗᒋᑦ ᐃᑲᖅᓇᐃᔭᕐᓗᑎᒃ ᓯᕗᓂᒃᓴᒥ.”
ᒪᓕᒃᑑᑉ ᐅᖃᐅᓯᕆᔭᖏᑦ ᓱᓕᔪᑦ—ᕿᑭᖅᑕᓃᒃᑯᑦ ᓯᕗᒧᐊᖏᓐᓇᕆᐊᖃᖅᑐᑦ, ᐃᓄᖕᓂᒃ ᐃᑲᔪᕐᓗᑎᒃ ᓇᐅᒃᑯᑐᐃᓐᓇᖅ, ᑕᐃᒫᑐᑦ ᑎᒥᙳᖅᑎᑦᑎᖅᑳᓚᐅᖅᑐᑦ ᐅᖃᐅᓯᕆᓚᐅᖅᑕᖏᓐᓂᑦ ᐃᓄᖕᓂᒃ ᐃᑲᔪᖅᑐᐃᓗᑎᒃ.
